ཨ་རིས་རྒྱ་རིགས་སློབ་མ་རྣམས་ཀྱི་ཐོངས་མཆན་ཕྱིར་བསྡུ་བྱ་རྒྱུ་ཡིན་འདུག

ཨ་རིས་རྒྱ་ནག་གཞུང་དང་འབྲེལ་བ་ཡོད་པའི་རྒྱ་རིགས་སློབ་མ་གཙོས་རྒྱ་ནག་གི་སློབ་མ་རྣམས་ཀྱི་ཐོངས་མཆན་ཕྱིར་བསྡུ་དང་འབྱུང་འགྱུར་ཨ་རིར་སློབ་སྦྱོང་དུ་ཡོང་མཁན་རྣམས་ལ་ཞིབ་བཤེར་ནན་མོ་བྱ་རྒྱུ་ཡིན་འདུག

U.S. Secretary of State Marco Rubio testifies at a House Foreign Affairs Committee hearing on U.S. President Donald Trump’s State Department budget request for the Department of State, on Capitol Hill in Washington, D.C., U.S., May 21, 2025. REUTERS/Elizabeth Frantz/File Photo Purchase licensing Right

ཁ་སང་ཕྱི་ཚེས་ ༢༨ ཉིན་སྲིད་འཛིན་ཊོམ་ཕུ་མཆོག་གིས་སྣེ་འཁྲིད་པའི་ཨ་རིའི་སྲིད་གཞུང་གིས། ཨ་རིར་ཡོང་མཁན་གྱི་རྒྱ་རིགས་སློབ་མ་དང་ལྷག་པར་རྒྱ་ནག་དམར་ཤོག་ཚོགས་པར་འབྲེལ་བ་ཡོད་པའི་སློབ་མ་རྣམས་ཀྱི་ཐོངས་མཆན་ཕྱིར་བསྡུ་བྱ་རྒྱུ་ཡིན་པའི་གསལ་བསྒྲགས་ཤིག་བྱས་ཏེ། ཨ་རིར་གནས་སྤོར་བྱེད་མུས་ཡིན་པའི་རྒྱ་རིགས་ཀྱི་གྲངས་འབོར་ལ་ཚོད་འཛིན་བྱེད་ཐབས་བྱེད་ཀྱི་ཡོད་པ་རེད།

གནད་དོན་དེའི་ཐད་ཨ་རིའི་ཕྱི་སྲིད་བློན་ཆེན་མཱར་ཁོ་རོ་བྷའོ་(Marco Rubio) མཆོག་གིས་བསྒྲགས་གཏམ་ཞིག་སྤེལ་བའི་ཁྲོད། ཨ་རིའི་རྒྱལ་སྲིད་ལས་ཁུངས་ཀྱིས་ནང་སྲིད་བདེ་འཇགས་ལྷན་ཁང་དང་ལྷན་ལས་དོན་གཉེར་ནས། རྒྱ་རིགས་སློབ་མ་རྣམས་ཀྱི་ཐོངས་མཆན་དག་ཚད་མཐོའི་ཐོག་ནས་ཕྱིར་བསྡུ་བྱ་རྒྱུ་ཡིན། ཨ་རིའི་གཞུང་གིས་ཁྲིམས་འགལ་གནས་སྡོད་བྱེད་མཁན་ཕྱིར་འབུད་དང་སློབ་མའི་ཐོངས་མཆན་མེད་པ་བཟོ་རྒྱུ་ཚད་མཐོའི་ལས་དོན་གཉེར་རྒྱུ་ཡིན། ཞེས་དང་། རྒྱལ་སྲིད་ལས་ཁུངས་ཀྱིས་འབྱུང་འགྱུར་རྒྱ་ནག་དང་ཧོང་ཀོང་ནས་ཐོངས་མཆན་ཞུ་མཁན་རྣམས་ལ་ཚད་མཐོའི་ཞིབ་བཤེར་བྱ་རྒྱུ་ཡིན་འདུག་ཀྱང་། ད་ལྟ་རྒྱ་ནག་གཞུང་གིས་གནད་དོན་དེའི་ཐད་ཡ་ལན་གང་ཡང་བྱས་མེད་པ་རེད།

རྒྱ་རིགས་སློབ་མ་ནི་ཨ་རིར་སློབ་སྦྱོང་བྱེད་མཁན་གྱི་སློབ་མའི་གྲངས་འབོར་མང་ཤོས་གཉིས་པར་གྱུར་ཡོད་ཅིང་། ཕྱི་ལོ་ ༢༠༢༣ ནས ༢༠༢༤ བར་གྱི་སློབ་དུས་གཅིག་པུའི་ནང་རྒྱ་རིགས་སློབ་མ་གྲངས་ ༢༧༠༠༠༠ ལྷག་འདུག་པས། དེས་ཨ་རིའི་ཕྱི་རྒྱལ་སློབ་མའི་གྲངས་འབོར་གྱི་བརྒྱ་ཆའི་བཞི་ཆ་གཅིག་ཟིན་ཡོད་པ་རེད། གནད་དོན་དབྱེ་ཞིབ་པ་མང་དག་ཅིག་གིས། ཨ་རིས་རྒྱ་རིགས་སློབ་མ་མང་དག་གི་ཐོངས་མཆན་ཕྱིར་བསྡུ་དང་ཞིབ་བཤེར་ནན་མོ་བྱེད་མུས་ཡིན་པ་དེས། ཨ་རིའི་སློབ་ཆེན་ཁག་གིས་རྒྱ་ནག་དང་འབྲེལ་ལམ་གཅད་དགོས་པའི་བརྡ་ལན་ཞིག་ཡིན་པའི་ཚོད་དཔག་བྱེད་ཀྱིན་འདུག་ལ། ཉེ་ལམ་ཊོམ་ཕུ་སྲིད་གཞུང་གིས་རྒྱ་ནག་དང་འཇིགས་སྐུལ་རིང་ལུགས་པ་སོགས་དང་འབྲེལ་འདྲིས་ཡོད་པའི་སློབ་མ་བསྡུ་ལེན་བྱེད་ཀྱིན་ཡོད་ལུགས་ཤད་ནས། ཧཱ་ཝར་ཌི་གཙུག་ལག་སློབ་གཉེར་ཁང་གིས་རྒྱལ་སྤྱིའི་སློབ་མ་གསར་བསྡུའི་ལས་དོན་རྣམས་བཀག་སྡོམ་བྱས་ཡོད།

དེ་བཞིན་དེ་རིང་བྷི་བྷི་སི་གསར་ཁང་གི་གནས་ཚུལ་ལྟར་ན། ཁ་སང་ཕྱི་ཚེས་ ༢༨ ཉི་ཨ་རིའི་ཊོམ་ཕུ་སྲིད་གཞུང་གིས་རྒྱལ་སྤྱིའི་ཨ་རིའི་དོན་གཅོད་ལས་ཁུངས་ཁག་ལ། རྒྱལ་ཁབ་སོ་སོའི་ཨ་རིར་སློབ་སྦྱོང་ཆེད་སྐྱོད་མཁན་རྣམས་ཀྱི་བཅར་འདྲི་དང་དུས་བཅད་སོགས་རེ་ཞིག་ཕྱིར་འགྱངས་དགོས་པའི་ཡོངས་ཁྱབ་བཀོད་ཁྱབ་ཅིག་སྤེལ་ཡོད་ཅིང་། སྤྱིར་ལོ་ལྟར་ཨ་རིར་འཛམ་གླིང་ས་ཕྱོགས་གང་སར་ནས་སློབ་མ་བསྡུ་ཡི་ཡོད་པ་དང་། དེས་ཨ་རིའི་དཔལ་འབྱོར་གནས་བབ་ཐད་ལའང་ནུས་པ་མི་དམན་པ་ཞིག་འཐོན་མུས་ཡིན། རྒྱལ་སྤྱིའི་ཤེས་ཡོན་སློབ་སྟོན་ལྷན་ཚོགས་(NAFSA) ལྟར་ན། ཕྱི་ལོ་ ༢༠༢༣ དང་ ༢༠༢༤ ཡི་སློབ་དུས་གཅིག་པུའི་ནང་རྒྱལ་སྤྱིའི་སློབ་མ་ས་ཡ་གཅིག་ལྷག་གིས་སློབ་ཡོན་སོགས་ཨ་སྒོར་ཐེར་འབུམ་ ༤༤ སྤྲད་ཡོད་ཅིང་། སློབ་མ་གྲངས་ ༣༧༨༠༠༠ ལྷག་གིས་ཞོར་ལས་གཉེར་ནས་སྤྱི་ཚོགས་ཞབས་ཞུ་བསྒྲུབས་ཡོད་སྐོར་སོགས་གསལ་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།