ཉེ་ལམ་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཕེ་ཌར་པཱ་ཝལ་ལགས་ནས་ལ་དྭགས་སུ་༸གོང་ས་མཆོག་ལ་མཇལ་བཅར་ཞུས་པ་དང་འབྲེལ། རྒྱ་ནག་གཞུང་གིས་སྲིད་འཛིན་ཕེ་ཌར་པཱ་ཝལ་ལགས་དང་ལྷན་དུ་འབྲེལ་ལམ་ཡོངས་མཚམས་འཇོག་བྱས་པའི་གསལ་བསྒྲགས་སྤེལ་འདུག
ཁ་སང་རྒྱ་ནག་གཞུང་གིས་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཕེ་ཌར་པཱ་ཝལ་ལགས་དང་ལྷན་དུ་ཡོད་པའི་ཕྱོགས་གཉིས་བར་གྱི་འབྲེལ་ལམ་ཡོངས་རྫོགས་མཚམས་འཇོག་བྱས་པའི་གསལ་བསྒྲགས་སྤེལ་འདུག་ཅིང་། དེ་ནི་ཉེ་ལམ་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཕེ་ཌར་པཱ་ཝལ་ལགས་ནས་ལ་དྭགས་སུ་༧གོང་ས་རྒྱལ་བ་རིན་པོ་ཆེ་མཆོག་ལ་ཆེད་དུ་མཇལ་བཅར་ཞུས་པར་རྒོལ་ལན་བསློགས་པ་ཡིན་ཚུལ་གྱི་རྒྱུ་མཚན་བགྲངས་འདུག
དེ་འབྲེལ་ཅེཀ་སྤྱི་མཐུན་རྒྱལ་ཁབ་དུ་ཡོད་པའི་རྒྱ་ནག་གཞུང་ཚབ་ཁང་གིས། ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཕེ་ཌར་པཱ་ཝལ་ལགས་ནས་ལ་དྭགས་སུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་པ་དེས་རྒྱ་ནག་གི་མངའ་ཁོངས་བདག་དབང་དང་བརྟན་བརླིང་ལ་གནོད་སྐྱོན་བཏང་ཡོད། རྒྱ་ནག་གིས་སྲིད་འཛིན་ཕེ་ཌར་པཱ་ཝལ་ལགས་སུ་༸གོང་ས་མཆོག་ལ་མཇལ་བཅར་ཞུ་བར་དགག་བྱ་བཏོན་ཡོད་པ་མ་ཟད། ཅེཀ་སྤྱི་མཐུན་གཞུང་ལ་རྣམ་པ་ཤུགས་ཆེན་པོའི་ཐོག་ནས་ངོ་རྒོལ་བྱས་ཡོད། ཕེ་ཌར་པཱ་ཝལ་ལགས་ཀྱི་འཁྲུག་རྐྱེན་སློང་བའི་བྱ་སྤྱོད་ཀྱི་ཉེན་ཚབས་ལ་བརྟེན་ནས། རྒྱ་ནག་གིས་ཁོང་དང་ལྷན་དུ་འབྲེལ་ལམ་ཡོངས་མཚམས་གཅོད་པའི་ཐག་བཅད་བླངས་ཡོད། ཅེས་བརྗོད་འདུག་ལ། ད་ལྟའི་ཆར་ཅེཀ་སྤྱི་མཐུན་རྒྱལ་ཁབ་ཀྱི་ཕྱོགས་ནས་གནད་དོན་དེའི་ཐད་བརྡ་ལན་གང་ཡང་བརྒྱབ་མི་འདུག
ཡང་ཕྱི་ཟླ་ ༧ ཚེས་ ༢༨ ཉིན་ཅེཀ་སྤྱི་མཐུན་རྒྱལ་ཁབ་དུ་ཡོད་པའི་རྒྱ་ནག་གཞུང་ཚབ་ཁང་གིས་ངོ་རྒོལ་བསྒྲགས་གཏམ་ཞིག་སྤེལ་བའི་ནང་། སྲིད་འཛིན་ཕེ་ཌར་པཱ་ཝལ་ལགས་ཀྱིས་༸གོང་ས་རྒྱལ་བ་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་ཚེ་རིང་ལགས་སུ་ཐུག་འཕྲད་ཞུས་པར་མཐའ་ཅིག་ཏུ་ངོ་རྒོལ་ཡོད། ཅེས་དང་། ཅེཀ་སྤྱི་མཐུན་རྒྱལ་ཁབ་ཀྱིས་རྒྱ་ནག་གཅིག་གི་སྲིད་བྱུས་ལ་བརྩི་སྲུང་བྱས་ཏེ། རྒྱལ་ཁབ་གཉིས་ཀྱི་འབྲེལ་ལམ་གོང་འཕེལ་གཏོང་དགོས་པ་ལས། བོད་རང་བཙན་གྱི་ཁ་བྲལ་ཕྱོགས་ཁག་ལ་རྒྱབ་སྐྱོར་བྱ་རྒྱུ་མཚམས་འཇོག་དགོས་ཞེས་བརྗོད་ཡོད།
ཕྱི་ཟླ་ ༧ ཚེས་ ༢༧ ཉིན་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཕེ་ཌར་པཱ་ཝལ་ལགས་ལ་དྭགས་སུ་ཆེད་དུ་༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་བར་ཕེབས་འབྱོར་བྱུང་ཞིང་། སྐབས་དེར་ལ་དྭགས་གླེའི་གནམ་ཐང་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བཀའ་བློན་རྣམ་པས་ཕེབས་བསུའི་སྣེ་ལེན་ཞུས་ཡོད། སྲིད་འཛིན་ཕེ་ཌར་པཱ་ཝལ་ལགས་དབུས་པའི་ཅེཀ་སྐུ་ཚབ་ཚོགས་ཆུང་གིས་ཁྲིག་སེ་དགོན་པར་གནས་མཇལ་གྲུབ་རྗེས་༧གོང་ས་རྒྱལ་བ་རིན་པོ་མཆོག་ལ་མཇལ་བཅར་ཞུས་ཡོད་པ་དང་། སྐབས་དེར་སྲིད་འཛིན་པཱ་ཝལ་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ཅིཀ་སྤྱི་མཐུན་རྒྱལ་ཁབ་ནང་ཐེངས་ ༡༡ ཞབས་ཀྱིས་བཅགས་ཡོད་ལ། ང་ལ་མཚོན་ན། ཁོང་ད་རེས་ལན་གཅིག་མཇལ་རྒྱུ་བྱུང་བ་དེ་ཧ་ཅང་གིས་དགའ་ཚོར་དང་གཟི་བརྗིད་ལྡན་པ་ཞིག་ཡིན། ༧གོང་ས་རྒྱལ་བ་རིན་པོ་ཆེ་མཆོག་ནས་བོད་རང་བཙན་དགོས་ཚུལ་གསུངས་ཀྱི་མེད། ༧མགོན་པོ་གང་ཉིད་ནས་གཉིས་ཕན་དབུ་མའི་ལམ་གྱི་ཐོག་ནས་བོད་རྒྱའི་དཀའ་རྙོག་སེལ་བའི་དགོངས་གཞི་གཙོ་བོ་དང། ཆོས་དད་རང་དབང་། སྨྲ་བརྗོད་རང་དབང་། བོད་མི་རྣམས་ལ་སྐད་ཡིག་བཀོལ་སྤྱོད་སོགས་ཀྱི་རང་དབང་དགོས་ཀྱི་ཡོད་པར་རྒྱབ་སྐྱོར་བྱེད་ཀྱི་ཡོད་ཅེས་གསུངས་འདུག
དེའི་རྗེས་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་མཆོག་གིས་ལ་དྭགས་སུ་བོད་མི་རྣམས་ལ་གསུང་བཤད་གནང་སྐབས། ང་ཚོ་ནི་ཡུ་རོབ་རྒྱལ་ཁབ་ཀྱི་སྙིང་དབུས་སུ་ཡོད་པའི་ཅེཀ་སྤྱི་མཐུན་རྒྱལ་ཁབ་ནས་ཡོང་བ་ཡིན། ང་ཚོའི་རྒྱལ་ཁབ་ཀྱི་རིག་གཞུང་དང་ལོ་རྒྱུས། དེ་བཞིན་ད་ལྟའི་གནས་སྟངས་སོགས་གང་ཅིའི་ཐད་ནས་མི་འདྲ་རུང་། ཚང་མ་འགྲོ་བ་མི་ཞིག་ཡིན་པའི་ཆ་ནས་མི་ཚེ་དོན་སྙིང་ལྡན་པ་ཞིག་དང་། ང་ཚོའི་བྱིས་པ་ཚོར་མ་འོངས་པ་བཟང་པོ་ཞིག་ཡོང་ཐབས་བྱེད་པའི་དམིགས་ཡུལ་གཅིག་མཚུངས་ཡིན། ང་ཚོས་ད་རེས་བོད་དོན་རྒྱབ་སྐྱོར་མཚོན་ཆེད་༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་པ་ཡིན། ཁྱེད་ཀྱི་སྐད་ཡིག་དང་ཆོས་ལུགས། རིག་གཞུང་སྲུང་སྐྱོབ་བྱ་རྒྱུ་དེ་ནི་ཁྱེད་ཚོའི་གཞི་རྩའི་ཐོབ་ཐང་ཡིན། ཞེས་དང་། ཁོང་གིས་བོད་མི་རྣམས་ཕྱིར་རང་ཡུལ་དུ་ལོག་ཐུབ་པའི་རེ་བ་ཡོད་སྐོར་བཅས་གསུངས་འདུག
གསར་འགོད་པ། སྐལ་བཟང་སྦྱིན་པ།
![Because of high altitudes in the Himalayas, difficult terrain and often poor weather, the Kailash Manasarovar pilgrimage if one of the most challenging in the world [File: Purnima Shrestha/Reuters]](https://tibettimes.net/wp-content/uploads/2026/05/Screen-Shot-2026-05-14-at-5.25.22-PM-360x180.png)
