དེ་རིང་ཕྱི་ལོ་ ༢༠༢༦ ཟླ་ ༢ ཚེས་ ༨ ཉིན་ནི་༸སྐུའི་གཅེན་པོ་རྒྱལ་ལོ་དོན་གྲུབ་མཆོག་དགོངས་པ་རྫོགས་ཏེ་ལོ་ངོ་གཅིག་འཁོར་གྱི་ཡོད་པ་དང་བསྟུན། འཛམ་གླིང་ཡུལ་གྲུ་གང་སར་དམ་པ་ཁོང་ལ་རྣམ་པ་འདྲ་མིན་གྱི་ཐོག་ནས་རྗེས་དྲན་ཞུ་བཞིན་འདུག
དེ་རིང་སྔ་དྲོ་རྒྱ་གར་ལྷོ་ཕྱོགས་ཀྱི་དཔལ་ལྡན་འབྲས་སྤུངས་སྒོ་མང་གྲྭ་ཚང་གི་ཆོས་རྭའི་ནང་དུ་༸གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག་འབྲས་སྤུངས་གྲྭ་ཚང་གི་བླ་སྤྲུལ་མཁན་པོ་རྣམས་ཀྱིས་དབུས་པའི་སྐྱབས་གནས་དགེ་འདུན་གྱི་སྡེ་དང་མོན་གྷོ་འདོད་རྒུ་གླིང་གཞིས་ཆགས་ཀྱི་མི་མང་བཅས་འཛོམས་པའི་ཐོག་མཆོད་འབུལ་སྨོན་འཚོགས་ཡོད་པ་རེད།
དེ་རིང་སྔ་དྲོར་བོད་མིའི་སྒྲིག་འཛུགས་ཀྱི་ལས་བྱེད་གསོལ་ཚིགས་ཁང་གི་ཡང་སྟེང་ཚོགས་ཁང་དུ་༸སྐུའི་གཅེན་པོ་རྒྱལ་ལོ་དོན་གྲུབ་མཆོག་རྗེས་དྲན་གྱི་དཔེ་དེབ་གསར་པ་སྒང་པ་བོད་ཀྱི་རྒྱལ་གཅེས་དཔའ་བོ་ཆེན་པོ་ལྷ་སྲས་རྒྱལ་ལོ་དོན་གྲུབ་ཅེས་པ་དབུ་འབྱེད་དང་ཉིན་རྒྱབ་ཏུ་མཁས་པའི་བགྲོ་གླེང་གི་མཛད་རིམ་བཅས་འཚོགས་སོང་། མཛད་སྒོའི་སྟེང་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་ཚོགས་གཞོན་སྒྲོལ་མ་ཚེ་རིང་མཆོག བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག དགའ་ལྡན་ཕོ་བྲང་གི་སྐུ་ཚབ་སྤྱི་ཟུར་དགེ་བཤེས་རོང་བོ་བློ་བཟང་སྙན་གྲགས་མཆོག་བཅས་ཕེབས་ཏེ། བཀའ་ཟུར་རྒྱལ་ལོ་དོན་གྲུབ་མཆོག་གི་མཛད་རྗེས་དང་འབྲེལ་བའི་གསུང་བཤད་གནང་སོང་བ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཀྱང་བརྙན་ལམ་བརྒྱུད་རྗེས་དྲན་མཛད་སྒོ་དེར་གསུང་འཕྲིན་ཞིག་ཀྱང་གནང་འདུག་ལ། གཞན་ཡང་མཛད་སྒོར་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཉིས་དང་བོད་མིའི་སྒྲིག་འཛུགས་ཀྱི་དྲུང་ཆེ་ཁག་ཅིག དེ་བཞིན་བཞུགས་སྒར་གཡས་གཡོན་གྱི་སྐྱབས་གནས་དགེ་འདུན་གྱི་སྡེ་དང་ཉམས་ཞིབ་པ་དང་རྩོམ་པ་པོ། མི་མང་བཅས་འཛོམས་འདུག
དེ་རིང་བཞུགས་སྒར་དུ་རྟེན་གཞི་བྱས་པའི་དབུས་གཙང་ཆོལ་ཁ་དང་མདོ་སྟོད་ཆོལ་ཁ། མདོ་སྨད་ཆོལ་ཁ། བོད་ཀྱི་བུད་མེད་ལྷན་ཚོགས་སོགས་གཞུང་འབྲེལ་མིན་པའི་ཚོགས་པ་བཞིའི་གོ་སྒྲིག་འོག ཐེག་ཆེན་ཆོས་གླིང་གཙུག་ལག་ཁང་དུ་༸སྐུའི་གཅེན་པོ་རྒྱལ་ལོ་དོན་གྲུབ་མཆོག་གི་དགོངས་རྫོགས་ལོ་མཆོད་མཆོད་འབུལ་སྨོན་ལམ་འཚོགས་སོང་།
ཟླ་འདིའི་ཕྱི་ཚེས་ ༧ ནས་ཉིན་གསུམ་རིང་འབྲས་སྤུངས་སྒོ་མང་གྲྭ་ཚང་གི་འདུ་ཁང་འོག་ཏུ་དམ་པ་ཁོང་ལ་རྗེས་དྲན་སླད་༸གོང་ས་མཆོག་གི་མཛད་པ་བརྗོད་པའི་སྐུ་པར་འགྲེམས་སྟོན་ཞིག་གནང་མུས་ཡིན་པ་རེད་ལ། ༸སྐུའི་གཅེན་པོ་རྒྱལ་ལོ་དོན་གྲུབ་མཆོག་རྗེས་དྲན་གྱི་མཛད་རིམ་དེ་དག་འབྲས་སྤུངས་སྒོ་མང་གྲྭ་ཚང་དང་བཞུགས་སྒར་གོ་སྒྲིག་ཚོགས་ཆུང་། བོད་ཀྱི་སྒྲ་བསྒྱུར་ཉམས་ཞིབ་ཁང་བཅས་ཟུང་འབྲེལ་གྱིས་གཉེར་བཞིན་པ་ཞིག་ཡིན་འདུག གཞན་ཡང་། ཨ་རི་དང་ཡུ་རོབ་སོགས་སུའང་བོད་མི་མང་པོས་དམ་པ་ཁོང་ལ་རྗེས་དྲན་གྱི་མཆོད་འབུལ་སྨོན་ལམ་སོགས་འཚོགས་མུས་ཡིན་འདུག
གསར་འགོད་པ། སྐལ་བཟང་སྦྱིན་པ།
