རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་རྒྱ་ནག་གཞུང་འཛམ་གླིང་གི་གསར་འགོད་པ་བཙོན་འཇུག་བྱེད་མཁན་སྡུག་ཤོས་དང་གསར་འགོད་རང་དབང་གི་གནས་བབ་ཞན་ཤོས་ཨང་གསུམ་པ་དེ་ཡིན་པ་ཐེར་འདོན་བྱས་འདུག
རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ཕྱི་ལོ་ ༢༠༢༦ ལོའི་གསར་འགོད་རང་དབང་སྙན་ཐོ་བཏོན་པར་གཞིགས་ན། རྒྱ་ནག་ནི་འཛམ་གླིང་ནང་གསར་འགོད་པ་བཙོན་འཇུག་བྱེད་མཁན་སྡུག་ཤོས་ཀྱི་རྒྱལ་ཁབ་དེ་ཡིན་པ་དང་། ཨེར་ཊི་རེ་ཡ་ (Eritrea) དང་བྱང་ཀོ་རི་ཡ་གཉིས་ཀྱི་རྗེས་ནས་རྒྱ་ནག་སླར་ཡང་འཛམ་གླིང་གི་གསར་འགོད་རང་དབང་སྐྱོ་ཤོས་ཀྱི་རྒྱལ་ཁབ་ཡིན་འདུག
རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས། འཛམ་གླིང་རྒྱལ་ཁབ་ ༡༨༠ ནང་གི་གསར་འགོད་རང་དབང་གི་གནས་བབ་སྐོར་ལ་ཞིབ་འཇུག་བྱས་ཡོད་ཅིང་། འཛམ་གླིང་རྒྱལ་ཁབ་ ༡༨༠ ལས་རྒྱལ་ཁབ་ ༡༠༠ ཡི་གསར་འགོད་རང་དབང་གི་གནས་བབ་ཇེ་ཞན་དུ་ཕྱིན་སྟབས། ཕྱི་ལོ་ ༢༠༢༦ ལོ་ནི་འདས་པའི་ལོ་ངོ་ ༢༥ རིང་གི་གསར་འགོད་རང་དབང་སྐྱོ་ཤོས་ཀྱི་ལོ་ཞིག་ཆགས་ཡོད་འདུག་ལ། ད་ལྟའི་ཆར་འཛམ་གླིང་ཡུལ་གྲུ་གང་སར་གསར་འགོད་པའི་རང་དབང་ལ་རྡོག་རྫིས་གཏོང་བའི་གནས་བབ་ཚབས་ཇེ་ཆེར་འགྲོ་བཞིན་པ་ནི། གཙོ་བོ་དམག་འཁྲུག་དང་སྲིད་དབང་སྒེར་གཅོད་པའི་དབང་ཤུགས་རྒྱ་སྐྱེད། དེ་བཞིན་དམངས་གཙོའི་སྲིད་འགྱུར་གྱི་ཁྲོད་དུ་གཡོན་ཕྱོགས་རང་ལུགས་ཀྱི་དབང་ཤུགས་སྐྱེད་མུས་ཡིན་པའི་རྒྱུ་རྐྱེན་སོགས་ལས་གསར་འགོད་རང་དབང་ལ་དྲག་གནོན་ཇེ་ཆེར་ཕྱིན་ཡོད་ཅིང་། ལྷག་པར་དུ་གསར་འགོད་པའི་རང་དབང་སྲུང་སྐྱོབ་བྱེད་པའི་ཁྲིམས་སྒྲིག་དང་བདེ་འཇགས། ཆབ་སྲིད་ཀྱི་འགན་དབང་། སྤྱི་ཚོགས་དང་དཔལ་འབྱོར་སོགས་ཀྱི་གནས་བབ་ཞན་པོར་གྱུར་ཡོད་འདུག
སྙན་ཐོའི་ནང་། རྒྱ་ནག་གཞུང་གིས་གསར་འགོད་ལས་རིགས་ལ་བཀག་སྡོམ་དང་འཛམ་གླིང་ཁྱོན་ཡོངས་སུ་གནས་ཚུལ་ཤེས་རྟོགས་ཐུབ་པའི་ཐོབ་ཐང་ལ་དྲག་གནོན་བྱེད་བཞིན་ཡོད་པ་མ་ཟད། རྒྱ་ནག་གཞུང་འབྲེལ་གྱི་གསར་ཁང་ཞི་ཧྭ་དང་མི་དམངས་ཉིན་རེ་ཚགས་པར། གོ་ལའི་དུས་བབ་སོགས་ཀྱིས་རྒྱ་ནག་ནང་ཙམ་དུ་མ་ཟད། འཛམ་གླིང་ཁྱོན་ཡོངས་སུ་རྒྱ་ནག་གི་དྲིལ་བསྒྲགས་ཁྱབ་སྤེལ་གཏོང་གི་ཡོད་ཅིང་། རྒྱ་ནག་གི་གསར་ཁང་དག་ནི་དམར་ཤོག་ཚོགས་པའི་མགྲིན་ཚབ་ལྟ་བུ་ཡིན་པ་དང་ལྷག་པར་དུ་གསར་འགོད་པ་ཚོས་ཞི་ཅིན་ཕིན་གྱི་ལྟ་གྲུབ་ཟེར་བར་དུས་ནས་དུས་སུ་སློབ་སྦྱོང་དང་དམར་ཤོག་དགོས་དོན་ཁོ་ནར་འབད་འབུང་བྱེད་དགོས་པ་ལས། རྒྱ་ནག་གཞུང་གི་ལངས་ཕྱོགས་ཀྱི་ཁ་གཏད་དུ་གྱུར་བའི་གནས་ཚུལ་འགོད་མཁན་གྱི་གསར་ཁང་དང་གསར་འགོད་པ། མི་སྒེར་དང་རྩོམ་པ་པོ་སོགས་ཀྱིས་རང་དབང་གི་གནས་ཚུལ་སྤེལ་བར་དམ་དྲག་ཤུགས་ཆེན་བྱེད་ཀྱི་ཡོད་པ་རེད་ལ། འདས་ལོ་གཅིག་རིང་རྒྱ་ནག་གཞུང་གིས་གསར་འགོད་པ་ཁྱོན་ ༡༡༣ འཛིན་བཟུང་གིས་བཙོན་འཇུག་བྱས་ཡོད་འདུག
ཕྱི་ལོ་ ༢༠༢༦ ལོའི་གསར་འགོད་རང་དབང་ཡག་ཤོས་ཀྱི་རྒྱལ་ཁབ་ལྔ་ནི་ནོ་ཝེ་དང་དེ་ནས་ནེ་ཐི་ལན་ཌི། ཨེ་སི་ཊོ་ནེ་ཡ་དང་ཌན་མག སི་ཝེ་ཌན་བཅས་ཡིན་ཞིང་། སྡུག་ཤོས་ལྔ་ནི་ཨེར་ཊི་རེ་ཡ་ (Eritrea) དང་བྱང་ཀོ་རི་ཡ། རྒྱ་ནག ཨི་རན་དང་སོ་ཌི་ཨ་རིབ་བྷི་ཡ་བཅས་ཆགས་ཀྱི་འདུག རྒྱ་ནག་གཞུང་འདས་པའི་ལོ་ངོ་བཞི་བསྟུད་མར་རྒྱ་ནག་པ་བཙོན་འཇུག་བྱེད་མཁན་སྡུག་ཤོས་དེ་ཡིན་པ་རེད། ཕྱི་ལོ་ ༢༠༢༥ ནས་ ༢༠༢༦ བར་འཛམ་གླིང་ཡོངས་སུ་གསར་འགོད་པ་ཁྱོན་ ༣༣༠ བཙོན་འཇུག་བྱས་ཡོད་འདུག
