༧གོང་ས་རྒྱལ་བ་རིན་པོ་ཆེ་མཆོག་བོད་ལ་ཕེབས་རྒྱུའི་ཐུགས་རེ་ཡོད། 

སྲིད་སྐྱོང་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་བོད་ལ་ཕེབས་རྒྱུའི་ཐུགས་རེ་ཡོད་ཀྱང་ཕྱོགས་ཡོངས་ཀྱི་གནས་བབ་མང་དག་ཅིག་ལ་བསྟུན་དགོས་སྐོར་སོགས་གསུངས་སོང་། 

དེ་རིང་ཞོགས་པར་བཞུགས་སྒར་༧རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ནས་སྐབས་བཅུ་བདུན་པའི་བཀའ་ཤག་ལྷན་རྒྱས་དང་། བོད་མི་མང་སྐབས་བཅོ་བརྒྱད་པའི་སྤྱི་འཐུས་ཚོགས་གཙོ་སྦྲེལ་པོར་མཇལ་ཁ་བསྩལ་ཡོད་ཅིང་། མཇལ་ཁའི་སྐབས་༧གོང་ས་རྒྱལ་བ་རིན་པོ་ཆེ་མཆོག་ནས་སྐབས་བཅུ་བདུན་པའི་འཛིན་སྐྱོང་བཀའ་ཤག་གི་སྲིད་སྐྱོང་དང་བཀའ་བློན་རྣམས་ལ། ད་ང་ཚོའི་མི་རབས་གསར་པ་རྣམས་བསླེབས་པ་རེད། ད་ལྟ་བོད་ཀྱི་གནས་ཚུལ་དེ་འཛམ་བུ་གླིང་གི་སྒང་ལ་གསལ་དུ་གསལ་དུ་ཕྱིན་པའི་ཟོལ་ཞིག་དང་། མང་པོ་ཞིག་གིས་ང་ཚོའི་བཙན་བྱོལ་སྒྲིག་འཛུགས་དེ་དངོས་གནས་ཆ་འཇོག་འཕེལ་བ་ཞིག་ཏུ་རྩིས་ནས་ཚང་མས་དགའ་པོ་བྱེད་ཀྱི་འདུག་གཱ ང་མདོ་སྨད་སྐུ་འབུམ་ནས་སྐྱེས་པའི་མི་འདིས་བོད་བསྟན་སྲིད་ཀྱི་དོན་དུ་འགན་ཞིག་ཁུར་ནས་བྱས་རྗེས་དང་ཕན་ཐོགས་ཞེ་དྲགས་ཡག་པོ་བྱུང་སོང་། ད་དུང་ཡང་ངོས་རང་གི་སྙིང་སྟོབས་ཞུམ་པ་མེད། དངོས་གནས་དྲང་གནས་བོད་བསྟན་སྲིད་ཀྱི་བདེ་དོན་མཐར་ཐུག་བར་དུ་ངོས་རང་གིས་བསྒྲུབ་བསམ་བསྡད་ཡོད། ཐུགས་རྗེ་ཆེ། ཞེས་གསུངས་འདུག

མཇལ་ཁ་གྲུབ་མཚམས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་གཙོ་བོ་གཞིར་བཞག་ནས། བཅའ་ཁྲིམས་དང་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་སྲིད་ཇུས།  ལྷག་པར་བོད་ནང་ལ་ཡོད་པའི་བོད་མི་རྣམས་ཀྱིས་དཀའ་ངལ་མང་པོ་ཞིག་མྱོང་གིན་ཡོད་པ་རྣམས་ལ་དཀའ་སེལ་གྱི་ཐབས་ལམ་ག་རེ་བསྟན་དགོས་རུང་། ང་ཚོས་རང་ནུས་གང་ལྕོགས་ཀྱི་ནུས་པ་གདོན་རྒྱུའི་དམ་བཅའ་བརྟན་པོ་ཡོད། དེ་བཞིན་དེ་རིང་ཞོགས་པར་དབྱར་གསོལ་ཞེས་ལོ་ལྟར་གཞུང་འབྲེལ་གྱིས་གནས་ཆུང་སྤྱན་འདྲེན་ཞུ་ཡི་ཡོད་པ་དེའང་། དེ་རིང་ཞོགས་པའི་ཆུ་ཚོད་བདུན་པར་སྤྱན་འདྲེན་ཞུས་ནས། འདས་པའི་ཉིན་ཤས་རིང་ལ་མ་འོངས་པར་ཁ་ཕྱོགས་བཟང་ཕྱོགས་སུ་འགྲོ་ཐུབ་རྒྱུར་རྟགས་དང་རྟེན་འབྲེལ། བླ་མའི་ཐུགས་རྗེ་བྱིན་རླབས། ལྷ་ཆོས་སྐྱོང་སྲུང་མ་རྣམས་ཀྱི་གྲོགས་དང་འཕྲིན་ལས་ཡོང་རྒྱུར་རྟེན་འབྲེལ་བཟང་པོ་ཞིག་འདུག ཅེས་གསུངས་སོང་། 

ཁོང་གིས། ང་ཚོ་མི་རྣམས་འཆུག་ནས་ཕན་ཚུན་འཁོན་འཛིན་དང་བསམ་བློ་གུ་དོག་པོ་བཏང་ནས་བསྡད་པ་ཡིན་ན། ང་ཚོར་མུ་མཐུད་དུ་དཀའ་ངལ་འཕྲད་ཀྱི་རེད། དེ་ལས་བསམ་བློ་རྒྱ་ཆེ་ཙམ་ཐོངས། བོད་སྤྱི་པའི་རྩ་དོན་ལ་བསམ་བློ་བཏང་ནས་བོད་རིགས་ཡོད་དོ་ཅོག་མཉམ་གཅིག་ཏུ་སྤུངས་ཐུབ་པ་ཡིན་ན། ང་ཚོས་ལས་ཀ་གང་བྱས་པ་ཡིན་ན། སྐད་ཆ་ག་རེ་བཤད་པ་ཡིན་ན། དེ་ཁ་གཏད་ལ་ཕན་གྱི་འདུག་གམ། སོ་སོ་ལ་ཕན་མིན་བསམ་བློ་གཏང་དགོས་རྒྱུ་དེ་ཧ་ཅང་གལ་ཆེན་པོ་རེད་ལ། དེ་འདྲ་ཞིག་ཡོང་བ་ཡིན་ན། ༧གོང་ས་རྒྱལ་བ་རིན་པོ་ཆེ་མཆོག་ནང་བཞིན་གྱི་དབུ་འཁྲིད་ཅིག་བྱུང་བ་དང་། དབུ་འཁྲིད་དེ་འདྲ་ཞིག་གི་འོག་ནས། འཐབ་རྩོད་དང་སྒྲིག་འཛུགས་ཀྱི་འགྲོ་སྟངས་སོགས་ཚང་མ་ཚད་ལྡན་ཞིག་བཟོས་གནང་ཡོད་པས། ང་ཚོ་སྐལ་བ་བཟང་པོ་ཞེ་དྲགས་རེད། ཅེས་གསུངས་སོང་། 

ཡང་སྲིད་སྐྱོང་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་བོད་ལ་ཕེབས་རྒྱུའི་ཐུགས་རེ་ཡོད་པ་ནི་དངོས་ཡོད་ཀྱི་གནས་སྟངས་རེད་ལ། ལོ་མང་པོའི་སྡོན་ནས་གསལ་པོ་རེད་དེ་གནས་སྟངས་མང་པོ་ཞིག་ལ་རག་ལས་ཀྱི་ཡོད་རེད། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རེ་ཡོད་པ་དེ་མངོན་གསལ་གནང་གི་ཡོད་རེད་ལ། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་ག་རེ་གནང་གི་ཡོད་ནའང་། དེ་དག་ཚང་མ་ལྷག་བསམ་རྣམ་དག་གི་ཐོག་ནས་བཀའ་གནང་གི་ཡོད་པ་ལས། དེའི་རྒྱབ་ལྗོངས་ལ་སྲིད་ཇུས་དང་ཆབ་སྲིད་གང་ཡང་ཡོད་མ་རེད་དེ། རྒྱ་ནག་གཞུང་གིས་ད་བར་༧གོང་ས་རྒྱལ་བ་རིན་པོ་ཆེ་མཆོག་བོད་ལ་ཆིབས་བསྒྱུར་གནང་བ་ཡིན་ན། བོད་ནང་ལ་གཏན་འཇགས་བཞུགས་དགོས་ལུགས་ལབ་ཀྱི་ཡོད་རེད། ལོ་མང་སྔོན་ནས་༧གོང་ས་རྒྱལ་བ་རིན་པོ་ཆེ་མཆོག་ནས། ངོས་རང་བོད་ལ་འགྲོ་རྒྱུའི་གོ་སྐབས་བྱུང་ན། ངོས་རང་བོད་ལ་འགྲོ་ཡི་ཡིན། འོན་ཀྱང་། ངོས་རང་བོད་ལ་བསྡད་ཐུབ་ཀྱི་མ་རེད། ངོས་རང་ཤི་བ་ཡིན་ནའང་། རྒྱ་གར་གྱི་གྲོགས་པོ་ཚོ་དང་མཉམ་དུ་བསྡད་ནས་ཤི་རྒྱུའི་འདོད་པ་ཡོད། ཅེས་བཀའ་གནང་བ་བཞིན། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་དང་ད་ལྟའང་སྐུ་གཟུགས་ཀྱི་གནས་བབ་ཀྱི་ཐོག་ནས་བོད་ལ་ཆིབས་བསྒྱུར་གནང་ཐུབ་རྒྱུ་ཡོད་པ་དང་། རྒྱ་ནག་གཞུང་གིས་ཀྱང་༧གོང་ས་རྒྱལ་བ་རིན་པོ་ཆེ་མཆོག་བོད་ལ་གནས་གཟིགས་དང་ཆིབས་བསྒྱུར་གནང་ཐུབ་པའི་རེ་བ་ཡོད་ན། ང་ཚོས་འབད་བརྩོན་བྱ་ཆོག་གི་རེད་དེ། ད་ལྟ་རྒྱ་ནག་གཞུང་གི་མཁྲེགས་བཟུང་དང་། རྒྱ་ནག་གི་ཆ་རྐྱེན་ནང་༧གོང་ས་རྒྱལ་བ་རིན་པོ་ཆེ་མཆོག་བོད་ལ་བཞུགས་དགོས་ཟེར་ན་ཡོང་ཐབས་མེད་པ་རེད། དེ་འདྲ་སོང་ཙང་དེ་ནི་གནས་སྟངས་མང་པོ་ཞིག་ལ་བལྟས་ནས་རེད་མ་གཏོགས། དེང་སང་སྤྱི་ཚོགས་ནང་༧གོང་ས་རྒྱལ་བ་རིན་པོ་ཆེ་མཆོག་བོད་ལ་གདན་འདྲེན་ཞུ་ཐུབ་མ་སོང་ཟེར་བ་དང་། བོད་རྒྱའི་འབྲེལ་མོལ་མགོ་བཙུགས་མ་སོང་ཟེར་ནའང་། གནས་སྟངས་མང་པོ་ཞིག་ང་ཚོའི་ལག་ཏུ་ཡོད་ན་ང་ཚོས་བྱ་རྒྱུ་རེད། ད་བར་མི་ལོ་དྲུག་ཅུ་རེ་དྲུག་དེ་འདྲ་བྱས་ནས་ལྷག་པ་རེད་མ་གཏོགས། ང་ཚོས་འཛམ་བུ་གླིང་གི་གནས་སྟངས་ཞིབ་འཇུག་དང་འཛམ་གླིང་གི་འགྱུར་འགྲོས་དང་བོད་ཀྱི་གནས་སྟངས། རྒྱ་ནག་གི་གནས་སྟངས་དང་། བོད་ནང་གི་གནས་སྟངས་སོགས་ལ་བལྟས་ནས་གོམ་པ་བརྒྱག་དགོས་རེད། ཅེས་གསུངས་སོང་། 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།