བོད་རིག་པའི་མཁས་པ་དང་མཚོ་སྔོན་མི་རིགས་སློབ་ཆེན་གྱི་དགེ་རྒན་ཆེན་མོ་ཟུར་བ་རྒན་བདེ་མཆོག་ལགས་དགུང་ལོ་ ༨༦ སྟེང་སྐུ་གྲོངས་ཡོད་འདུག
དེ་རིང་ཕྱི་ཟླ་ ༧ ཚེས་ ༡༧ ཉིན་བོད་རིག་པའི་ཆེད་མཁས་པ་དང་། མཚོ་སྔོན་མི་རིགས་སློབ་ཆེན་གྱི་དགེ་རྒན་ཆེན་མོ་ཟུར་བ་བདེ་མཆོག་ལགས་དགུང་ལོ་ ༨༦ སྟེང་སྐུ་གྲོངས་པའི་གནས་ཚུལ་ཐོན་ཡོད་ཅིང་། བོད་ནང་གི་མཁས་པ་དང་། ཤེས་ཡོན་ཅན། འདས་པོ་གང་གི་སློབ་མ། དེ་བཞིན་བོད་ཀྱི་རིག་གནས་ལ་དོ་སྣང་ཡོད་མཁན་མང་དག་ཅིག་གིས་མྱ་ངན་དང་རྗེས་དྲན་ཞུ་མུས་ཡིན་པ་མ་ཟད། བོད་ནང་གི་དྲ་ལམ་ཕལ་མོ་ཆེར་ཁོང་ལ་རྗེས་དྲན་ཞུ་བའི་མཆོད་མེ་དང་ཁོང་གི་སྐུ་པར་གྱིས་ཁེངས་འདུག
ཁོང་ཉིད་འདས་གྲོངས་སུ་གྱུར་བའི་གནས་ཚུལ་ཐོན་རྗེས་བོད་ནང་གི་བོད་མི་ཞིག་གིས་སྐྱོ་གདུང་དང་བཅས། རྒན་ལགས་གཤེགས་པར་ཤིན་ཏུ་ཡིད་སྐྱོ་ཞིང་སེམས་རབ་ཏུ་འཁྲུགས་མོད། སྐུ་ཚེ་མཐར་ཕྱིན་པ་དང་རིགས་ཀྱི་མགོ་འདྲེན་དུ་ཡང་ཡང་བཞུགས་པའི་སྐུ་དྲིན་སོགས་བསམ་ཚེ། ད་ནི་ལོས་ཡིན། ཚེ་མཐའ་ཡས་པའི་ངོ་བོར་བརྟན་སོང་བ་རེད། མཛད་པའི་ཞབས་རྗེས་རབ་ཏུ་དཀར་སོང་བ་རེད། ཨ་ཁུ་བདེ་མཆོག་གི་སྐུ་ཕུང་རེ་ཞིག་བསྡུས་ན་ཡང་ང་ཚོའི་དྲན་འཛིན་གྱི་མེ་ལོང་ངོས་ན། ནམ་ཡང་ཨ་ཁུ་ཁོང་གི་མཛད་རྗེས་ཀྱི་རི་མོ་མ་ཡལ་བར་ཡོད། ཨ་ཁུ་ཁོང་གི་ལྷག་བསམ་ཡང་མ་རྙིང་བར་ཡོད། མདོར་ན། ཁོང་ནི་དུས་གསུམ་ཀུན་ཏུ་གངས་རིའི་ལུང་བ་ན་ཞལ་འཛུམ་གྱི་ལེར་བཞུགས་ཡོད། ཐུགས་སྤྲོ་སང་ངེར་བཞུགས་ཡོད། ཅེས་བརྗོད་འདུག
ཡང་བོད་ནང་གི་བོད་མི་ཞིག་གིས། མར་ཁུའི་རྒྱ་མཚོ་ཡོངས་སུ་འཁྱིལ་བའི་དབུས།། ཕུན་ཚོགས་འོད་སྟོང་འབར་བའི་སྒྲོན་མེ་ཡིས།། མུན་པའི་སྐལ་བ་མ་ལུས་གསལ་བྱས་ནས།། འགྲོ་ཀུན་སངས་རྒྱས་མྱུར་དུ་མཐོང་བར་སྨོན།། ཞེས་སྨོན་ལམ་བཏབ་ཡོད་ཅིང་། ཡང་བོད་མི་གཞན་ཞིག་གིས། དགེན་ཁོང་སྐུ་གཤེགས་པར་གདུང་སེམས་དྲག་པོས་མྱ་ངན་དང་གུས་འདུད་ཞུ། ཁོང་ནི“འཁྲུངས་པ་རླབས་ཆེན་“དང“གཤེགས་པ་གཟི་བརྗིད“ཡིན་པས་ང་ཚོས་ནམ་ཡང་ཁོང་གི་ལྷག་བསམ་དང་སྐུ་དྲིན་ནི་བརྗེད་མི་རུང་། བྱང་ཆུབ་སེམས་དཔའ་རྣམས་ཀྱི་ནི།། འགྲོ་དོན་ཐུགས་ལ་དགོངས་གྲུབ་ཤོག། མགོན་པོ་ཡིས་ནི་གང་དགོངས་པ།། སེམས་ཅན་རྣམས་པ་དེ་འབྱོར་ཤོག། ཅེས་སོགས་བརྗོད་འདུག
དགེ་རྒན་ཆེན་མོ་དང་བོད་རིག་པའི་མཁས་པ་བདེ་མཆོག་ལགས་ནི། ཕྱི་ལོ་ ༡༩༤༡ ལོར་བོད་མདོ་སྨད་བིས་མདོར་འཁྲུངས། དགུང་ལོ་གསུམ་ནས་བཟུང་བིས་མདོ་དགོན་ཆེན་དུ་ཞུགས། དགུང་ལོ་བཅུའི་སྟེང་དགོན་པའི་ཚོགས་ལ་དངོས་སུ་ཞུགས་ཏེ། དགུང་ལོ་བཅོ་བརྒྱད་བར་དུ་དགེ་བའི་བཤེས་གཉེན་ལྷ་སྡེ་བརྩོན་འགྲུས་ནོར་བུ་ཚང་དང་། ཤུགས་ཚང་ཨ་ཁུ་ཐུབ་བསྟན་དོན་གྲུབ་སོགས་ལ་བསྟེན་ཏེ། དགོན་པའི་ཞལ་འདོན་དང་། བསྡུས་གྲྭ། དབུ་མེད་ཀྱི་བྲིས་རྒྱུན་སོགས་ལེགས་པར་སྦྱངས། ཕྱི་ལོ་ ༡༩༥༨ ལོ་སྟེ་དགུང་ལོ་བཅོ་བརྒྱད་སྟེང་། མཚོ་སྔོན་ཞིང་ཆེན་དགེ་ཐོན་སློབ་གྲྭར་ཕེབས་ནས་སློབ་གཉེར་གནང་། ཕྱི་ལོ་ ༡༩༦༡ ལོར་མཚོ་ལྷོ་ཁུལ་དགེ་ཐོན་སློབ་གྲྭར་ཕེབས་ཏེ། སློབ་གྲྭའི་དགེ་རྒན་སངས་གོ་ཚང་དང་བན་གོ དབང་འབུམ་རྒྱལ། ལྷ་མོ་ཚེ་བརྟན་སོགས་ཀྱི་མདུན་ནས་རིག་གནས་དང་ཆབ་སྲིད་སོགས་སྦྱངས་ཏེ། ཕྱི་ལོ་ ༡༩༦༥ ལོར་སྲིད་གཞུང་གི་བཀོད་སྒྲིག་ལྟར་མཚོ་ལྷོ་ཁུལ་ཞིན་ཧེ་རྫོང་གི་དཔལ་ཁ་སོགས་སུ་དགེ་རྒན་གྱི་དངོས་སྦྱོང་ལོ་གཅིག་རིང་གནང་།
ཕྱི་ལོ་ ༡༩༦༦ ལོར་མཚོ་སྔོན་མི་རིགས་སློབ་འབྲིང་སྟེ་དེང་གི་མཚོ་སྔོན་མི་རིགས་སློབ་ཆེན་གྱི་གྲ་སྒྲིག་སློབ་གྲྭ་རུ་ཕེབས་ནས་དགེ་རྒན་གྱི་ཕྱག་ལས་གནང་མགོ་ཚུགས། ཕྱི་ལོ་ ༡༩༦༩ ལོ་ནས་མཚོ་སྔོན་མི་རིགས་སློབ་ཆེན་དུ་དགེ་རྒན་ཆེན་མོ་གནང་། ཕྱི་ལོ་ ༡༩༧༤ ནས་ཕྱི་ལོ་ ༢༠༠༤ བར་ལོ་ངོ་སུམ་ཅུ་ལྷག་གི་རིང་ལ། སློབ་གྲྭ་དེའི་གྲངས་ཉུང་མི་རིགས་སྐད་ཡིག་སྡེ་ཁག་ནས་དགེ་རྒན་ཆེན་མོ་གནང་། ཕྱི་ལོ་ ༡༩༩༤ ལོ་ནས་བཟུང་རབ་འབྱམས་པའི་ཞིབ་འཇུག་སློབ་མའི་དགེ་རྒན་གྱི་འགན་བཞེས། ཁོང་གི་སློབ་ཁྲིད་གཙོ་བོ་ནི་བོད་ཀྱི་བརྡ་སྤྲོད་རིག་པ་དང་། བོད་བརྒྱུད་ནང་བསྟན་གྱི་བྱུང་འཕེལ་ལོ་རྒྱུས་སོགས་ཡིན། ཁོང་གིས་སྔ་རྗེས་སུ་མཚོ་སྔོན་བརྙན་འཕྲིན་ཁང་དང་། བོད་ཁུལ་གྱི་སློབ་གྲྭ་ཆུང་འབྲིང་མང་པོར་ཕེབས་ནས་སུམ་རྟགས་ཀྱི་ཁྲིད་རྒྱུན་སྤེལ་ཞིང་འཆད་ཁྲིད་གནང་མྱོང་ཡོད་ལ། ཕྱི་ལོ་ ༢༠༡༦ ལོར་བརྡ་སྤྲོད་རིག་པའི་སློབ་ཁྲིད་དངོས་སུ་འོད་སྡེར་ལ་བཀོད་ནས་འགྲེམས་སྤེལ་བྱས། ཕྱི་ལོ་ ༢༠༠༤ ལོར་དངོས་སུ་ལས་འཁྱུར་ངལ་གསོ་གནང་ནའང་། ད་ལྟའི་བར་དུ་མཚོ་ལྷོ་དང་མགོ་ལོག རྔ་བ་སོགས་བོད་རིགས་ས་ཁུལ་གྱི་སློབ་གྲྭ་ཆུང་འབྲིང་མང་པོར་ཕེབས་ནས་སུམ་རྟགས་གཉིས་གཙོ་བྱས་པའི་བོད་ཀྱི་རིག་གནས་སྣ་མང་ཐོག་སློབ་ཁྲིད་གནང་། ཁོང་ནི་བོད་ཀྱི་སྲོལ་རྒྱུན་རིག་གནས་ལ་མཁས་ཤིང་། སློབ་མ་སྐྱོང་བའི་ཐབས་ལ་མཁས་པའི་དགེ་བའི་བཤེས་གཉེན་ཆེན་པོ་ཞིག་ཡིན་པར་མ་ཟད། དེང་རབས་ཀྱི་སྤྱི་ཚོགས་བསླབ་བྱ་དང་། བསམ་བློ་ཀུན་སྤྱོད་བཟང་པོ་གོང་དུ་སྤེལ་མཁན་གྱི་དགེ་རྒན་ཕུལ་བྱུང་ཞིག་ཏུའང་ངོས་འཛིན་གནང་གི་ཡོད།
གསར་འགོད་པ། དཔལ་ལྡན།
