བོད་རང་སྐྱོང་ལྗོངས་མི་དམངས་འཐུས་ཚོགས་ཀྱི་ཚོགས་གཞོན་ཝང་ཅུན་ལ་ལྐོག་ཟ་རུལ་སུངས་ཀྱི་གནད་དོན་ཡོད་པར་བརྟེན་ཁྲིམས་ལྟར་ཉེས་ཆད་གཅོད་རྒྱུ་ཡིན་འདུག
དེ་འབྲེལ་རྒྱ་ནག་གཞུང་འབྲེལ་གྱིས་གནས་ཚུལ་སྤེལ་བ་ལྟར་ན། བོད་རང་སྐྱོང་ལྗོངས་མི་དམངས་འཐུས་ཚོགས་ཀྱི་ཚོགས་གཞོན་ཟུར་བ་ཝང་ཅུན་གྱིས། དེ་སྔ་བོད་རང་སྐྱོང་ལྗོངས་མངའ་རིས་ས་ཁུལ་གྱི་མགོ་ཁྲིད་གཞོན་པ་དང་། བོད་རང་སྐྱོང་ལྗོངས་ཀྱི་ས་ཁམས་ཐོན་ཁུངས་ལས་ཁུངས་ཀྱི་འགན་འཛིན་གཞོན་པ། བོད་རང་སྐྱོང་ལྗོངས་མི་དམངས་འཐུས་ཚོགས་ཀྱི་ཚོགས་གཞོན་སོགས་ཀྱི་གོ་གནས་ཐོག་གི་སྟབས་བདེའི་ཆ་རྐྱེན་སྤྱད་དེ་གཞན་ལ་ཁེ་ཕན་དོན་གཉེར་བྱེད་རོགས་བྱས་པ་དང་། ཁྲིམས་འགལ་ཐོག་གཞན་གྱི་རྒྱུ་དངོས་བླངས་པའི་གྲངས་འབོར་ཧ་ཅང་ཆེ་བས། ཁྲིམས་ལྟར་ལྐོག་རྔན་བླངས་པའི་བྱས་ཉེས་ལྟར་ཁྲིམས་ཐག་གཅད་རྒྱུ་ཡིན་འདུག
གནས་ཚུལ་ལྟར་ན། ཝང་ཅུན་ལ་རྒྱ་ནག་དབུས་སྒྲིག་ཁྲིམས་ཞིབ་བཤེར་ལས་ཁུངས་ཀྱིས་བརྟག་དཔྱད་བྱས་ཏེ། ཆེས་མཐོའི་མི་དམངས་ཞིབ་དཔྱོད་ཁང་ལ་རྩིས་སྤྲོད་བྱས་ཡོད་ཅིང་། མི་དམངས་ཞིབ་དཔྱོད་ཁང་གིས་ཝང་ཅུན་ཁྲིམས་ལྟར་འཛིན་རྒྱུའི་ཐག་བཅད་ཟིན་འདུག་ནའང་། ད་ལྟའི་ཆར་མོར་ལོ་ག་ཚོད་ཅིག་གི་ཁྲིམས་ཐག་གཅོད་མིན་ཡོངས་བསྒྲགས་བྱས་མི་འདུག
དེ་བཞིན། ལི་ཐང་རྫོང་རོང་པ་ཤང་གི་དེ་སྔའི་མགོ་ཁྲིད་ཨ་བཀྲར་སྒྲིག་འགལ་ཁྲིམས་འགལ་ཚབས་ཆེན་གྱི་དོགས་གཞི་ཡོད་པས། ད་ལྟ་ལི་ཐང་རྫོང་སྒྲིག་ཁྲིམས་ཞིབ་བཤེར་ལས་ཁུངས་ཀྱིས་ཨ་བཀྲར་ཞིབ་བཤེར་བྱེད་བཞིན་ཡོད། ལྷ་ས་གྲོང་ཁྱེར་ཆུ་ཤུར་རྫོང་ཞིང་ལས་གྲོང་གསེབ་ལས་དོན་གྱི་འགན་འཛིན་གཞོན་པ་ཁྲེན་ཞའོ་ལིན་ལ་སྒྲིག་འགལ་ཁྲིམས་འགལ་ཚབས་ཆེན་བྱས་པའི་དོགས་གཞིའི་འོག ད་ལྟ་ལྷ་ས་གྲོང་ཁྱེར་ཆུ་ཤུར་རྫོང་སྒྲིག་ཁྲིམས་ཞིབ་བཤེར་ཁང་གིས་ཞིབ་བཤེར་བྱེད་བཞིན་ཡོད་པ་རེད།
ད་ལྟ་ཝང་ཅུན་ནི་རང་ལོ་ ༦༢ ཡིན་ཞིང་ཕྱི་ལོ་ ༡༩༨༢ ལོར་བོད་རང་སྐྱོང་ལྗོངས་ཟེར་བའི་མངའ་རིས་ས་ཁུལ་ནས་མགོ་བཙུགས་ཏེ་བོད་རང་སྐྱོང་ལྗོངས་ནང་ལོ་ངོ་བཞི་བཅུ་ལྷག་རིང་ལས་ཀ་བྱས་མྱོང་འདུག འདས་ལོར་ཝང་ཅུན་ལ་ལྐོག་རུལ་སུངས་ཀྱི་དོགས་གཞིའི་འོག་ནས་ཞིབ་བཤེར་བྱེད་མགོ་བཙུགས། འདི་ལོའི་ཕྱི་ཟླ་ ༧ པར་རྒྱ་ནག་དམར་ཤོག་ཚོགས་ཁོངས་དང་གཞུང་གི་གོ་གནས་ནས་ཕྱིར་ཕུད་འདུག
གསར་འགོད་པ། སྐལ་བཟང་སྦྱིན་པ།





