བོད་ཀྱི་
ལོ་མཇུག་གི་ཚོགས་ཆེན་འདིའི་སྟེང་བཙན་བྱོལ་བོད་མིའི་སྤྱི་ཚོགས་ཀྱི་གྲུབ་ཆ་འདྲ་མིན་ནས་ཡོང་བའི་བོད་མི་ ༥༠༠ ཙམ་བཞུགས་སྒར་ངྷ་སར་འཛོམས་ཏེ་བོད་ཀྱི་རྩ་དོན་ཐོག་གོ་བསྡུར་བགྲོ་གླེང་བྱེད་རྒྱུ་ཡིན་ལ། འདི་ནི་བོད་མི་རྣམས་རི་ཡུལ་གཉིས་སུ་གྱེས་ཏེ་མི་ལོ་ ༥༠ འགོར་བའི་ཁ་མཚམས་དེར་འཁེལ་ཡོད་སྟབས། ཛ་དྲག་གི་ལས་དོན་ཞིག་ཅི་ནས་ཀྱང་ཡིན།
ཚོགས་འདུ་འདིའི་རྒྱབ་ལྗོངས་ནི་ཇི་ལྟར་༧གོང་ས་མཆོག་གིས་ཕྱག་འཕྲིན་ནང་བཀོད་པ་ལྟར། ད་ལོའི་བོད་ནང་གི་ཛ་དྲག་གི་བྱུང་རྐྱེན་དང་། རྒྱལ་སྤྱིའི་གནས་བབ་བཅས་ཀྱི་འོག་ནས་བོད་ཀྱི་རྩ་དོན་ལ་གོ་བསྡུར་བྱེད་རྒྱུ་དེ་ཡིན་སྟབས། ཚོགས་ཞུགས་པ་རྣམས་གྲོས་ལ་མ་ཞུགས་པའི་སྔོན་དུ་ཚོགས་ཆེན་འདིའི་ཐོག་འཁྱེར་ཡོང་རྒྱུའི་ནང་ལས་ལྟ་བུ་དང་ངེས་པར་དུ་ཞིབ་འཇུག་བྱེད་དགོས་སའང་གནད་དོན་འདི་གཉིས་ཡིན།
ཉིན་འདི་དག་གི་རིང་བཙན་བྱོལ་བོད་མིའི་སྤྱི་ཚོགས་ཁྲོད་ཐེངས་འདིའི་ཚོགས་ཆེན་སྐོར་ལ་ཚོད་དཔག་སྣ་ཚོགས་བྱེད་ཀྱིན་ཡོད། ཁག་ཅིག་གིས་ད་ནི་རང་བཙན་གྱི་ལམ་དུ་འགྲོ་གི་རེད་ཟེར་ལ། འགའ་རེས་འདི་ནི་དབུ་མའི་ལམ་གྱི་འབབ་སྟེགས་སྐྲུན་ས་རེད་ཟེར། རེ་ཟུང་གིས་འདི་ནི་རྒྱ་ནག་ལ་གནོན་ཤུགས་སྤྲོད་ཐབས་ཙམ་རེད་ཟེར། འོན་ཀྱང་ཚང་མས་ཁ་ཡོངས་གྲགས་ཀྱིས་རྒྱབ་རྩར་འཚོལ་བཞིན་པ་ནི་གཞིས་ལུས་མི་དམངས་རེད། ཚོགས་ཆེན་གྱི་རྣམ་པ་དང་ངོ་བོའི་ཐད་མི་རྣམས་ཀྱི་གོ་བ་ནི་ཚིག་དོན་གྱི་གོ་བའི་ཕ་རོལ་ཏུ་བརྒལ་ཡོད་ལ། ད་ལྟའི་གླེང་ཕྱོགས་ལ་བལྟས་ན། ༧གོང་ས་མཆོག་གིས་ཐུགས་རེ་གནང་བ་བཞིན། ༼གོ་བསྡུར་བགྲོ་གླེང་ཞིབ་ལྷོད་༽ཅེས་པ་དེ་ཡོང་རྒྱུ་མིན་པར། རང་རང་གི་ནམ་རྒྱུན་གྱི་ལྟ་བ་དང་ལངས་ཕྱོགས་ཀྱི་ཕྱོགས་སུ་བརྟན་པོར་ལྷུང་ཞིང་། དུས་ངེས་མེད་དུ་འདི་ལྟར་ཕན་ཚུན་གྱི་ཁ་གཏད་དུ་འབུད་ངེས་པར་འདུག
གནས་ལུགས་ལ་ཅུང་ཙམ་ཐག་ཉེ་རུ་བཏང་ནས་བཤད་ན། མི་སུ་ལའང་ནམ་རྒྱུན་སྲིད་དོན་གྱི་ལྟ་བ་འཛིན་ཕྱོགས་ལ་ཁྱད་པར་ཡོད་སྲིད་ཀྱང་། བོད་ནང་གི་ཛ་དྲག་གྱི་བྱུང་རྐྱེན་དང་རྒྱལ་སྤྱིའི་གནས་བབ་ལྟ་བུ་ནི་མི་སྒེར་གྱི་ལྟ་བའི་འོག་ནས་ལྟ་རྒྱུ་ཞིག་མིན་པར། རྒྱུ་རྐྱེན་དང་གནས་སྟངས་ལ་བརྩད་ཞིབ་བྱས་པ་བརྒྱུད་དངོས་ཡོད་ཀྱི་གནས་ཚུལ་ཞིག་རྗེན་པར་མཐོང་དགོས་པའི་གྲས་ཡིན་སྟབས་ལྟ་བའི་ཁྱད་པར་མེད་པའི་གྲས་ཡིན། གནས་ཚུལ་འདི་དག་མཐོང་བའི་ཐོག་ད་གཟོད་གང་དགའ་ཅི་དྲག་གི་གྲོས་ལ་ཞུགས་རྒྱུ་ནི་ཐེངས་འདིའི་ཚོགས་ཆེན་གྱི་ལྗིད་ཤུགས་ཆེ་ཤོས་དེ་ཡིན།
མི་མང་པོ་ཞིག་གི་སེམས་ཁུར་ནི་སླར་ཡང་གཞིས་ལུས་མི་དམངས་ཀྱིས་འདིའི་ཐད་མཉམ་ཞུགས་དང་བསམ་ཚུལ་འདོན་ཐུབ་ཀྱི་མེད་པ་དེ་ཡིན། གལ་སྲིད་ཚོགས་ཆེན་གྱི་ནང་ལས་དང་པོ་སྟེ། བོད་ནང་གི་ཛ་དྲག་གི་བྱུང་རྐྱེན་ངོ་མ་དེ་བརྙེད་ཅིང་དེ་ལ་དཔག་པའི་གྲོས་ལ་ཞུགས་ཐུབ་ཚེ་གཞིས་ལུས་མི་དམངས་ཀྱི་མངོན་འདོད་ཀྱང་རང་བཞིན་གྱིས་ཚོགས་ཆེན་འདིའི་ཐོག་སླེབ་ཐུབ་པ་ལྟ་བུ་ཞིག་ཆགས་ཡོད་པར་འདོད། དེ་བས་ཚོགས་ཆེན་འདི་ལ་དོན་སྙིང་ཆེན་པོ་ཞིག་འབྱུང་ཐུབ་མིན་ནི་གོང་གི་ཚོགས་ཆེན་གྱི་ནང་ལས་གཉིས་དེ་གསལ་བོ་ཞིག་ངོ་འཕྲོད་མིན་ལ་ཧ་ཅང་རག་ལས་ཡོད་པར་འདོད་དོ།།
དེ་རིང་ང་ལ་གྲོགས་པོ་ཞིག་གིས་གནས་ཚུལ་འདི་འདྲ་ཞིག་བསྐུར་ནས་སླེབ་སོང༌། གལ་ཆེའི་གསར་འགོད་གསལ་བསྒྲགས། ད་ལོ་ཕྱི་ཟླ་༡༡ པའི་ཚེས་༡༧ ནས་༢༢ བར་བོད་མིའི་ཆོས་སྲིད་གཉིས་ཀྱི་དབུ་ཁྲིད་ྋགོང་ས་ྋསྐྱབས་མགོན་ཆེན་པོ་མཆོག་གི་བཀའ་དགོངས་བཞིན་སྤྱི་འཐུས་གྲོས་ཚོགས་ཀྱིས་གྲོས་ཆོད་བཞག་པ་གཞིར་བཟུང་བཞུགས་སྒར་རྡ་སར་དམིགས་བསལ་ཚོགས་འདུ་ཆེན་པོ་ཞིག་འཚོགས་རྒྱུ་ཡིན་པ་དགོངས་མངའ་ལྟར། འདི་ནི་རང་རེ་བོད་ཀྱི་ལོ་རྒྱུས་འཕོ་འགྱུར་གྱི་ཁྲོད་དུ་བྱུང་བའི་ཆབ་སྲིད་ཀྱི་དུས་ཚོད་ཛ་དྲག་ཅིག་གི་འོག་བསྐོང་ཚོགས་བྱས་པར་སོང་གལ་ཆེའི་དོན་སྙིང་ལྡན་པའི་ཚོགས་འདུ་ཞིག་ཡོང་ཆེད། ང་ཚོ་གཞིས་བྱེས་བོད་མིའི་ཆོས་དང༌། རིག་གཞུང༌། དཔལ་འབྱོར། ཆབ་སྲིད། ཤེས་ཡོན་སོགས་ཀྱི་ཐད་དོན་དངོས་སུ་གནས་སྟངས་གང་འདྲ་ཞིག་ཏུ་སླེབས་ཡོད་པ་ངོས་ཟིན་ཐོག ཚོགས་ཆེན་དེར་བོད་ཀྱི་ཛ་དྲག་གི་དཀའ་ངལ་སེལ་ཐབས་སུ་ལག་ལེན་ལ་འཁེལ་ཐུབ་པ་ཞིག་ཚང་མིའི་འགན་ཁུར་ཡོད་པའི་ཐོག་ནས་བསམ་ཚུལ་འདོན་སྤེལ་བྱེད་དགོས་པ་ཧ་ཅང་གལ་ཆེན་དུ་མཐོང་བ་མ་ཟད། ང་ཚོའི་བསམ་པར་བཙན་བྱོལ་བོད་གཞུང་གིས་དབུ་ཁྲིད་འོག་འདི་ལོའི་ཟས་བཅད་སྨྱུང་གནས་ལ་གཞིས་ལུས་བོད་མི་མི་ཉུང་བ་མཉམ་གཞུགས་བྱས་པ་ལྟ་བུའི་མཚོན་གཞིས་བྱེས་བོད་མི་ཡོངས་སུ་རྫོགས་པ་མཉམ་འབྲེལ་གྱི་ལམ་ནས་བོད་དོན་ལས་འགུལ་ཕྱི་གསལ་ནང་གསལ་དང༌། རྡོག་རྩ་གཅིག་སྒྲིལ་གྱིས་མདུན་བསྐྱོད་བྱ་རྒྱུ་དང༌། དེ་འདྲའི་ལས་འགུལ་དེ་བཞིན་བབ་བརླིང་བརྟན་གསུམ་གྱི་སྒོ་ནས་གཞིས་བྱེས་གཉིས་སུ་རྒྱུན་མཐུད་སྤེལ་དགོས་པར་མཐོང༌། དེ་བཞིན་ཚང་མས་ནུས་ཤུགས་འདོན་སྟངས་ཐད་བསམ་ཚུལ་སྤེལ་རྒྱུའི་མཚོན་འགན་ལེན་གནང་རྒྱུ་གལ་ཆེན་དུ་མཐོང༌། དབུས་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་རྒྱུན་ལས་ཁང་ནས།
ཕྱི་ལོ་༢༠༠༨ ཟླ་༠༩ ཚེས་༢༣ ལ། ངོ་མ་ང་ཚོར་ཚོར་བ་ཕུག་བསམ། དམིགས་ཡུལ་དང་ལང་ཕྱོགས་ཞིག་ཡོད་དགོས་པ་དང༌། དེ་བཞིན་གྱི་གྲ་སྒྲིག་ཞིག་མེད་ན་དཀའ་ངལ་རེད་པ། ཚོགས་ཆེན་དེ་ག་འདྲ་ཞིག་ཆགས་མིན་ལ་སུ་གཅིག་ལ་གདེངས་ཚོད་མི་འདུག་ཨ།