བོང་སྟག་རི་ལུ།
ཉིན་འདི་ཚོ་ནི་ཏག་ཏག་ལྷ་སའི་ཟིང་འཁྲུག་སྟེ ༣ ༡ ༤ དང་འབྲེལ་ནས་ས་ཕྱོགས་ཀུན་དུ་ཚོགས་འདུ་ཆེ་ཆུང་མང་པོ་བསྡུ་བཞིན་ཡོད་ལ། ཆེ་ས་ནས་རྒྱལ་ཁབ་ཕྱི་ནང་དང་ཆུང་ས་ནས་སྡེ་བ་དང་ཁྱིམ་མིའི་བར་ན་གླེང་གཞི་སྣ་ཚོགས་ཤིག་བརྗོད་དང་བརྗོད་བཞིན་པའི་སྒང་རེད། ཏན་ཏན། སྐབས་འདི་ལ་ང་ཚོའི་སྡེ་བའི་ཡང་བྲེལ་མྱུར་ངང་བརྡ་ཐོ་བཏང་སྟེ་ཁྱིམ་མི་གཅིག་ཀྱང་མ་ལུས་པར་ཚོགས་འདུ་ལ་ཞུགས་དགོས་པའི་བཀའ་ཕབས་བྱུང༌།
སྤྱིར་ན། ངེད་ཚང་ནི་རྫོང་ཐོག་ཏུ་གཏན་སྡོད་བྱས་ཡོད་མོད། ཁྱིམ་ཐོ་ད་དུང་སྡེ་བའི་ནང་དུ་ཡོད་པས་ང་རང་སྡེ་མི་ཕལ་བ་ཞིག་གི་ངོས་ནས་འཚོགས་འདུ་ལ་ཞུགས་པ་ཡིན། ཚོགས་འདུ་དེའི་དགོངས་དོན་གཙོ་བོ་ནི་ལྷ་སའི་ཟིང་འཁྲུག་དང་འབྲེལ་བའི་བདེ་འཇགས་ཡོང་དགོས་པ་གཙོ་བོར་བརྗོད་ཀྱིན་ཡོད་ལ། སྡེ་བ་རིམ་པའི་འགོ་ཁྲིད་ཀྱིས་སྔ་ཕྱིར་གཏམ་བཤད་རབ་དང་རིམ་པ་སྤེལ་བྱུང༌། དེ་དག་ལས་ཆེས་འབུར་དུ་ཐོན་པ་ནི་སྔོན་ཆད་སྡེ་དཔོན་གྱི་འགན་ཁུར་མྱོང་བའི་ཧྲུའུ་ཅི་རྒན་པ་དེའི་སྐད་ཆ་རེད། ཁོས་བཤད་དོན་ང་ཚོ་ནི་གུང་ཁྲན་ཏང་གིས་བསྐྱངས་པའི་མི་ཡིན་ལ། སྔོན་ཆད་ཁ་ལ་ཟ་རྒྱུ་དང་རྒྱབ་ལ་གོན་རྒྱུ་མེད་དུས་ཀྱང་གུང་ཁྲན་ཏང་གིས་ང་ཚོ་བསྐྱངས་པ་ རེད། དེང་སང་ཕྱི་རབས་པ་ཁ་ཤས་ཀྱིས་ངོ་ལོག་གི་ཟིང་འཁྲུག་སློང་བཞིན་པ་འདི་ རང་གིས་སྐྱིད་མ་ཆིག་པ་རེད། ང་ལ་མཚོན་ན། སྔོན་ཆད་ཡང་རང་འགུལ་གྱིས་ལག་པ་ཡར་བཀྱགས་ཏེ་གུང་ཁྲན་ཏང་ནང་དུ་ཞུགས་པ་ཡིན་ལ། ཕྱིན་ཆད་ཀྱང་བློ་གཅིག་སེམས་གཅིག་གིས་གུང་ཁྲན་ཏང་གི་ཕྱོགས་ནས་ཀ་ལངས་ལངས་བྱེད་ངེས་ཡིན་ཟེར། དེ་དང་བསྟུན་ནས། ཨ་ཡེ་མགོན་མེས་ཀྱང་ད་ལྟའི་བར་རྒྱ་མི་རིགས་ཀྱིས་ང་ཚོ་ཅིག་ གཅེས་མྱོང་ང་ར། ཕྱི་རབས་པ་འདི་ཚོ་ད་མིག་ཅིག་མེད་ཀི་ཟེར། དེ་ལྟར་སྡེ་བ་རིམ་པའི་ཚོགས་འདུའི་གཏམ་བཤད་དེ་ཡང་ཐོག་མར་སྡེ་དཔོན་གྱིས་མགོ་བརྩམས་ཤིང༌། རིམ་གྱིས་མང་ཚོགས་ཀྱི་སྟེང་ལ་བབས་དུས་གཏམ་བཤད་སྤེལ་མཁན་གཅིག་ལས་གཅིག་ལྷག་ལ། སྔོན་ཆད་སྡེ་བ་རིམ་པའི་དཔྱ་ཁྲལ་རབ་དང་རིམ་པ་མང་པོ་བསྡུ་དུས་ཀྱང་ཁ་རོག་གེར་ཁྲལ་མཇལ་མཁན་གྱི་སྡེ་མི་ཁ་མི་གྲགས་པ་ཚོས་ཀྱང་ཉིན་འདིར། ཏཱ་ལའི་བླ་མ་དང་ཏཱ་ལའི་ཚོགས་ཁག་ཟེར་ནས་རྐང་བའི་ས་རྒྱག་མཁན་དང་མ་ཁ་སོ་འདེབས་མཁན་ཡང་གཅིག་ལས་གཅིག་ལྷག་པ་མ་ཟད། ངར་ཤུགས་ཆེན་པོའི་སྒོ་ནས་ཏཱ་ལའི་ཚོགས་ཁག་ལ་ངོ་རྒོལ་དྲག་པོ་གཏོང་དགོས་ཟེར། དེ་ལྟར་ང་ཚོས་གཞན་ལ་སྡིག་དམོད་རྐྱང་རྐྱང་དང་འཐབ་རྩོད་ཆུང་ཆུང་ཞིག་གི་ཁྲོད་ནས་ཚོགས་འདུ་དེ་མཇུག་སྒྲིལ་སོང་ལ། ཚོགས་འདུ་དེར་ཞུགས་རྗེས་ངས་ང་ཚོའི་སྡེ་བ་དང་ང་ཚོའི་ཕ་ཡུལ་ནི་ནམ་ཡང་རང་ཉིད་བོར་ནས་སྔོན་ཐོན་ལ་བསྙེགས་མཁན་ཞིག་དང་སྔོན་ ཐོན་གྱི་ཁྲོད་དུ་འཚང་མཁན་ཤ་སྟག་ཞིག་ཡིན་པ་རྟོགས་ལ། མི་འགྱངས་བར། ང་ཚོའི་སྡེ་བ་ལ་ཡང་བྱེ་དང་འབྲས་སོགས་ཀྱི་དགའ་རྟགས་མང་པོ་ཡོད་པ་མ་ཟད། དར་དམར་དམར་པོ་ཞིག་གི་སྟེང་དུ་སྔོན་ཐོན་སྡེ་བ་བྲིས་ཏེ་ཁོ་ཚོ་ལ་འབུལ་ཁོ་ཐག་ཡིན་ལ། ཁོ་ཚོས་ཀྱང་དར་དམར་དེ་རང་གི་སྲོག་བཞིན་བཀུར་ནས་ཡ་གིའི་ཆོས་ཁང་གི་གོང་དུ་འགེལ་བ་ང་ལ་འང་ཡིད་ཆེས་བརྟན་པོ་ཡོད་དོ།།
༢༠༠༨༣།༢༠ ཉིན། ༼བོད་འབྱོར་རྩོམ་ཡིག རྩོམ་པ་པོའི་རེ་འདོད་ལྟར་མིང་རང་འཇགས་བཞག་ཡོད།༽
རི་ལུར་གུས་བཀུར་ཡོད། ཡིན་ནའང་། ཚང་མས་ཁོང་གི་བདེ་འཇགས་ལ་དོ་ཁུར་གནང་རོགས།