བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༤༤༨ སྟེང་གི་རྩོམ་སྒྲིག་པའི་གཏམ།
གལ་སྲིད་དེ་རིང་བོད་རྒྱ་གཉིས་ཀྱིས་རྒྱལ་སྤྱིའི་སྟེང་དུ་དྲིལ་བསྒྲགས་ཀྱི་དམག་འཁྲུག་ཅིག་རྒྱག་གི་ཡོད་ཚེ། རྒྱ་ནག་གིས་ད་སྐབས་གསུམ་གཉིས་ས་ཡི་ཁྱོན་འདི་དྲིལ་བསྒྲགས་ཀྱིས་དབང་དུ་བསྒྱུར་ནས་ང་ཚོ་སའི་གོ་ལའི་མཐའ་སྣེ་ཆུང་ཆུང་ཞིག་ལ་འདེད་ཀྱིན་ཡོད།
ལོ་འདིའི་ཕྱི་ཟླ་ ༤ པའི་ཚེས་ ༩ ཉིན་རྒྱ་ནག་གིས་ང་ཚོའི་གནས་ཚང་རྒྱལ་ཁབ་ནང་གི་ཧིན་རྡུའི་དུས་བབ་གསར་ཤོག་སྟེ། The Hindustan Times ཞེས་པའི་སྟེང་། ཀྲུང་གོའི་བོད་ཀྱི་འདས་པ་དང་ད་ལྟ་བ། ཞེས་ཁ་བྱང་དུ་བཀོད་དེ་ཤོག་ངོས་བརྒྱད་ཀྱི་གསལ་བསྒྲགས་ཤིག་ཉོས་ཡོད། དེ་བཞིན་དུ། ཟླ་དེའི་ཚེས་ ༦ ཉིན་ཨབ་རི་ཁའི་རྒྱལ་ཁབ་ Malawi ཡི་ཉིན་རེའི་གསར་ཤོག་ Daily Times of Malawi ཞེས་པའི་སྟེང་དུ། བོད་ལ་དམངས་གཙོའི་བཅོས་བསྒྱུར་བྱས་ནས་མི་ལོ་ ༥༠ འཁོར་ཞེས་ཁ་བྱང་དུ་བཀོད་དེ། གསར་ཤོག་དེའི་ཤོག་ངོས་ ༡༨ ཉོས་ཡོད། འདི་ལྟར་གླིང་ཕྲན་དང་མངའ་ཁུལ་འདི་དག་ནང་བོད་དོན་དྲིལ་བསྒྲགས་ཀྱི་འགད་རྫས་ཆེན་པོ་རེ་འཕངས་ཏེ། དམག་འཁྲུག་འདི་གཟབ་ནན་གྱིས་རྒྱག་གིན་ཡོད།
རྒྱ་ནག་གི་དམག་འཁྲུག་ནི་འདི་ཙམ་ག་ལ་ཡིན། ཁོང་ཚོས་ནུབ་ཕྱོགས་སྟོབས་ཆེན་རྒྱལ་ཁབ་ཁག་གི་གསར་འགོད་བརྒྱུད་ལམ་ནི་འདི་ལྟར་ཉོ་ཐུབ་མེད་ནའང་། ཁོང་ཚོས་རང་ཉིད་ཀྱི་བརྒྱུད་ལམ་གསར་གཏོད་བྱས་ཤིང་། ཕྱི་ཟླ་ ༤ པའི་ཚེས་ ༢༠ ཉིན་གུང་ཁྲན་ཏང་གི་མགྲིན་པ་ལྟ་བུའུ་མི་དམངས་ཉིན་རེའི་ཚགས་པར་གྱི་དབྱིན་ཡིག་དཔར་མ་འགྲེམས་མགོ་བརྩམས་ཤིང་། ད་ཆར་གསར་ཤོག་དེར་དྲ་ཐོག་ཏུ་སྐད་ཡིག་ཆེན་པོ་ ༦ ཡོད། འདི་དག་གི་ཀློག་མཁན་ནི་ཨ་རི་དང་ཡུ་རོབ། ར་ཤི་ཡ། ཨ་རབ། ཉི་ཧོང་བཅས་ཡིན། རྒྱ་ནག་གིས་བརྒྱུད་ལམ་རྒྱ་བསྐྱེད་ཀྱི་ཕྱོགས་ལ་རྒྱ་སྒོར་ཐེར་འབུམ་ ༤༥ གཏོང་གི་ཡོད་ལ། ཁོང་ཚོས་ཀྲུང་དབྱང་བརྙན་འཕྲིན་ཁང་གི་རྒྱལ་སྤྱིའི་སྡེ་ཚན་ཞེས་པའི་ལེ་ཚན་དུ་དབྱིན་སྐད་ཐོག་དུས་ཚོད་ཉེར་བཞི་དང་། གཟའ་རེའི་ཉིན་བདུན་ལ་ཆད་མེད་དུ་གནས་ཚུལ་གཏོང་གི་ཡོད། ཞིན་ཧྭ་གསར་འགྱུར་དེ་སྐད་ཡིག་ཆེན་པོ་ ༦ དྲུག་གི་ནང་ཡོད་པའི་ཁྲོད་དབྱིན་ཡིག་དང་ཧྥུ་རན་ཆི། སི་པཱ་ནེ་ཤི ཨ་རབ་སྐད་བཅས་ཚུད་ཡོད། ལོ་སྔོན་མ་ནས་ཞིན་ཧྭ་དྲ་རྒྱ་ལ་བོད་ཡིག་གི་དྲ་ཤོག་ཅིག་ཀྱང་ཡོད། འདི་ལྟར་རྒྱ་ནག་གིས་དྲིལ་བསྒྲགས་ཀྱི་དམག་འཁྲུག་འདིའི་ལམ་ནས་ཁྱོད་ཤི་ང་གསོན་གྱི་དམག་འཁྲུག་ཅིག་རྒྱག་གི་ཡོད།
གསར་འགྱུར་བརྒྱུད་ལམ་གྱི་ཕན་ནས་མཁས་པའི་གཏམ་བཤད་དང་རིག་གཞུང་ཟློས་གར་སོགས་ཀྱི་ཆ་ནས་ཀྱང་ཤུགས་ཆེ་རུ་བཏང་སྟེ། ནུབ་ཕྱོགས་ཀྱི་སློབ་གླིང་ཁག་ཏུ་ཀྲུང་གོའི་བོད་ཀྱི་གནས་སྟངས་དང་ལོ་རྒྱུས་ཀྱི་གནས་བབ། རིག་གཞུང་གི་འབྲེལ་བ་བཅས་དྲིལ་བསྒྲགས་བྱེད་ཀྱིན་ཡོད། ཉེ་ལམ་ཡུ་རོབ་ཀྱི་གྲོགས་པོ་ཞིག་གིས་ང་ལ་བཤད་དོན། རྒྱ་ནག་གི་གཞུང་ཚབ་ཁག་གི་ནང་དུ་རིག་གཞུང་གི་སྡེ་ཚན་རེ་བཙུགས་འདུག་ལ། དེ་དག་གིས་ནུབ་ཕྱོགས་ཀྱི་སློབ་གླིང་སོགས་སུ་རྒྱ་ནག་ངོ་སྤྲོད་དང་བོད་དོན་དྲིལ་བསྒྲགས་ཀྱི་ལས་ཀ་བྱེད་ཀྱིན་འདུག བཙན་བྱོལ་བོད་གཞུང་གིས་ཀྱང་གཞུང་ཚབ་ཁག་ཏུ་བོད་ཀྱི་རིག་གཞུང་གི་སྡེ་ཚན་རེ་འཛུགས་རྒྱུ་ནི་ཁ་ཚ་དགོས་གཏུགས་རེད་ཟེར།
བོད་མི་ཚོ་དྲིལ་བསྒྲགས་ཀྱི་ནུས་པར་ཡིད་ཆེས་བརྟན་པོ་ཡོད་ལ། འདས་པའི་ལོ་ ༥༠ རིང་གི་གྲུབ་འབྲས་ཆེ་ཤོས་ཤིག་ཀྱང་བོད་དོན་དྲིལ་བསྒྲགས་ཡིན། བོད་མི་ཚོའི་བསམ་བློའི་རྨང་རྡོ་ནི་བདེན་པ་ནི་སྔ་ཕྱི་ཙམ་མ་གཏོགས་བདེན་ཐོག་ལ་འཁྱོལ་ཐུབ་པ་དང་། འདི་ལས་ལྡོག་ན་ཕམ་པར་འགྱུར་ངེས་པ་དེ་ཡིན། རྒྱ་ནག་ཀྱང་དྲིལ་བསྒྲགས་ཀྱི་ནུས་པར་ཡིད་ཆེས་ཡོད། ཁོང་ཚོར་འཆར་གཞི་དང་གདེང་ཚོད་ཀྱང་ཡོད། རྒྱ་ནག་གིས་རྫུན་མ་གཅིག་ཐེངས་བརྒྱར་བཤད་ན་བདེན་པར་འགྱུར་བའི་རྩ་དོན་འདི་འཁྱེར་ཡོད།
ང་ཚོའི་འཐབ་རྩོད་འདི་གོ་མཚོན་གྱི་ཁ་ནས་རྒྱལ་མི་ཐུབ་པ་ནི་ང་ཚོས་ལོ་ ༥༠ གོང་ནས་ཤེས་ཡོད། ད་ནི་བརྡ་འཕྲིན་གྱི་ལམ་ནས་ཀྱང་རྒྱལ་ཐུབ་མིན་གྱི་ཐེ་ཚོམ་སྐྱེས་མགོ་ཚུགས། དེའི་ཁར་ང་ཚོས་ད་བར་དུ་བོད་པ་རང་གི་གཞུང་སྒེར་གྱི་གསར་འགོད་བརྒྱུད་ལམ་ཁག་ལ་བསྐྱར་ཞིབ་དང་། ལམ་སྟོན། དཔུང་ཁག་ཧྲག་སྒྲིག་བྱེད་ཐུབ་མེད་པ་ནི་སྐྱོ་གར་གཞན་ཞིག་ཡིན།
གཞུང་གི་མ་འཐུས་ས་དང་མ་འགྲིག་ས་རྐྱང་བཤད་ནས་བསྡད་པ་ལས་དེ་སེལ་བའི་ཐབས་ལམ་འདྲ་བཙལ་རོགས། དེ་དག་བསྒྲུབ་ཐུབ་པའི་བཀའ་ཁྲི་ཞིག་འཚོལ་རན་པའི་དུས་ལ་བབ་མི་འདུག་གམ།
བོད་དོན་དྲིལ་བསྒྲགས་ཆེན་པོ་ཞིག་བྱུང་ཡོད་པ་མ་རེད། ལྷག་པར་དུ་བོད་པ་ཚོ་ངོ་ཤེས་མཁན་དང་ཤེས་འདོད་མཁན་ཇེ་ཉུང་རེད། ད་བར་དུ་ཤེས་པ་དེ་ཏཱ་ལའི་བླ་མའི་གཟི་བྱིན་རེད། ནང་ཆོས་ཀྱི་བྱམས་སྙིང་རྗེ་རེད། དེའི་རྗེས་ནས་བསམ་བློ་འདི་འཛིན་མཁན་གྱི་མི་རིགས་རེད་སྙམ་པའི་མཐོ་སྒང་གི་བོད་པ་(འབྲོག་པ་དང་ཞིང་པ་)དྲང་པོ་དྲང་རྐྱང་ཚོ་རེད། པར་རེ་བླངས་ཏེ་སྒྲུང་རེ་བཟོས་ཏེ་ནུབ་ཕྱོགས་ཀྱི་གསར་འགོད་པ་རེ་ཟུང་གིས་སྙན་གྲགས་དང་ཁ་རྒྱབ་བཅས་ཕྱོགས་ཐམས་ཆད་ཁེབས་པར་བྱེད་ཀྱི་ཡོད་པ་རེད།འོན་ཀྱང་། ཁོང་ཚོའི་མིག་ལམ་ནས་བོད་པ་ཚོར་དེ་འདྲའི་གཟི་ཤུགས་ཞིག་ཡོད་དམ། བོད་དོན་འདིར་དེ་འདྲའི་བྲོ་བ་ཞིག་འདུག་གམ། གལ་སྲིད་ཡོད་ན་ད་ལོ་དང་ན་ནིང་གཉིས་ལ་དེ་འདྲའི་ཁྱད་པར་ཞིག་ག་རེ་བྱས་ནས་ཤོར་བ་རེད།
དྲ་ཐོག་འདི་ན་ཁང་གསར་རྡོ་རྗེ་དང་ཞབས་དྲུང་ངག་དབང་རྣམ་རྒྱལ་གཉིས་ལས་སྐད་ཆ་ཞིབ་མོ་བཤད་ཤེས་མཁན་ཞིག་མེད་དོན་ཅི་རེད། ཁོང་གཉིས་མི་གསོན་པོར་ངོ་ཤེས་མཁན་འདྲ་ཡོད་དམ།
བདེ་སྲུང་བོད་གནས་ཉམས་ཞིབ་ཁང་ངམ་བོད་གཞུང་ཕྱི་དྲིལ་ལས་ཁུངས་ལ་གསར་ཤོག་འདི་གཉིས་ཀའི་ངོ་བཤུས་རེ་རག་ཡོད་མེད་འདྲི་རོགས། རག་མེད་ན་རག་ཐབས་བྱོས། དེ་ནས་ནང་དོན་ལ་ཞིབ་འཇུག་གནང་རོགས། རྒྱ་ནག་གི་གླ་ཡོད་གསལ་བསྒྲགས་དེའི་ཐབས་དང་རྩལ་ལ་རྒྱུས་ལོན་གསལ་བོ་ཞིག་བྱས་ནས་ཕྱི་ལ་བསྒྲག་རོགས།
ཤེལ་དཀར་གྱིས་གསུངས་པ་བདེན་པར་འདོད། ཡིན་ཡང་། བཤད་ཚད་ལག་ལེན་དུ་འདེབས་ཐུབ་རྒྱུ་དཀའ་ལ། དུས་ཐུང་ནང་ལག་ལེན་ལ་འཁེལ་རྒྱུ་དེ་བས་ཀྱང་ཁག་གི་རེད། དེ་བས་ང་ཚོས་ཕྱོགས་ཡོངས་ཀྱི་ལམ་ཁ་རེ་འཚོལ་དགོས་པ་རེད། ང་ལྟ་བུ་ཡིན་ན་ད་ལྟ་དང་ལྷག་པར་དུ་མ་འོངས་པར་ང་ཚོ་རང་ཉིད་ལ་དབང་བའི་བརྒྱུད་ལམ་དྲང་པོ་དང་ཧུར་པོ་རེ་དགོས་རྒྱུ་ནི་ཧ་ཅང་གལ་ཆེ་བར་འདོད། དམངས་གཙོ་ལ་ཡིད་ཆེས་ཡོད་པ་ཙམ་མིན་པར་ལག་ལེན་ནས་དམངས་གཙོ་ཆགས་དགོས་ཀྱི་འདུག འབྱུང་འགྱུར་གྱི་བཀའ་ཁྲི་ཡང་ལྟ་གྲུབ་ཀྱི་རྒྱ་འདི་ལས་མི་བརྒལ་བ་ཞིག་ཡོད་ན་ཅི་མ་རུང་སྙམ་གྱིན་ཡོད།
མི་རབ་གོང་མར་སྐྱོན་བརྗོད་འདི་དང་འདི་ཞེས་ཟེར་ཟློས་བྱེད་ཀྱང་། ད་དུང་ང་ཚོ་རྨོངས་གཉིད་ལས་སད་ཐུབ་མི་འདུག་སྙམ།།
རྒྱ་ནག་གིས་བོད་དུ་བཙན་འཛུལ་བྱེད་ལུགས་འདི་ནི་དུས་རྟག་དུ་གོ་རིམ་ལྡན་པ་ཞིག་དང་འཆར་གཞི་ཡོད་པའི་སྒོ་ནས་སྤེལ་བཞིན་ཡོད་པ་རེད། འོན་ཀྱང་། ཡིད་སྐྱོ་བ་ཞིག་ལ་ངེད་ཅག་བཙན་བྱོལ་གཞུང་གིས་ཁོང་ཚོས་ལག་ལེན་བསྟར་རྗེས་གཞི་ནས་གཉིད་ལས་སད་པ་ལྟར་འཆར་གཞི་རེ་འཚོལ་བཞིན་ཡོད་པ་ལས། ཁོང་ཚོ་ཇི་བཞིན་འདིས་རྗེས་སུ་འདི་བྱེད་དགོས་ཀྱི་རེད་ཟེར་ནས་འཆར་གཞི་གང་ཡང་མེད་པར་བཤད་མི་ཐུབ་ཀྱང་། ཕལ་ཆེར། དེ་འདྲ་མེད་པའི་སྐྱོན་ཞིག་ཏན་ཏན་ཡོང་གི་འདུག དེའི་སྟབས་ཀྱིས་བོད་པ་ཚང་གི་ལས་དོན་གང་ཞིག་མཇུག་ཡོད་པ་ཞིག་ཡོང་ཐུབ་ཀྱི་མེད་པ་དེ་རེད།