རྒྱ་ནག་གི་དུས་དྲན་ཐེངས་ ༦༠ པ།

འཆར་ཟླའི་ཚེས་ ༡ ཉིན་རྒྱ་ནག་དམར་ཤོག་ཚོགས་པས་སྲིད་དབང་བཟུང་ཏེ་ལོ་ངོ་ ༦༠ འཁོར་བའི་དུས་དྲན་སྲུང་གཙི་བྱ་རྒྱུ་ཡིན་པ་དང། ད་སྐབས་ཉེ་འཁོར་གྱི་ས་གནས་མཐའ་དག་ལ་དམ་དྲག་དང་ཞིབ་གཤེར་བྱེད་མུས་ཡིན་པ་རེད།

འཆར་ཟླའི་ཚེས་ ༡ ཉིན་པེ་ཅིང་དུ་རྒྱ་ནག་དམར་ཤོག་ཚོགས་པས་ད་བར་སྲིད་དབང་བཟུང་ནས་ལོ་ངོ་ ༦༠ འཁོར་བའི་དུས་དྲན་སྲུང་གཙི་བྱ་རྒྱུ་ཡིན་ཞིང། དེའི་རིང་གཞུང་ཕྱོགས་ནས་ཐབས་ཤེས་ཡོད་རྒུ་བཏོན་ཏེ། ཕྱི་ནང་གི་འགལ་རྐྱེན་མཐའ་དག་སྔོན་འགོག་བྱ་ཐབས་སུ་ཉེན་རྟོག་པ་དང། དང་བླངས་སྐོར་སྲུང་བ་ས་ཡ་ ༡ ལྷག་ཉེ་འཁོར་གྱི་ས་ཁུལ་ཁག་ཏུ་འགྲེམ་འཇོག་བྱེད་ཀྱིན་འདུག།

སྤྱིར་རྒྱ་ནག་ནི་འཛམ་གླིང་སྟོབས་འབྱོར་ཆེ་ཤོས་ཀྱི་རྒྱལ་ཁབ་གསུམ་པ་དེ་ཡིན་ཞིང་།  མགོ་ཁྲིད་ཚོས་དོན་དངོས་ཐོག ཉིན་དེ་དག་ལ་ཕྱི་ནང་གི་སྡིགས་ར་ཡོང་རྒྱུར་ཞེད་སྣང་བྱེད་ཀྱི་ཡོད་ལ། འདས་ལོའི་བོད་ནང་གི་དོན་རྐྱེན་དང། ཉེ་དུས་ཞིན་ཅང་གི་གྱེན་ལངས་གཉིས་པོ་དེས་མཚོན་ཏེ། ཁོང་ཚོའི་རྒྱལ་ཁབ་ཀྱི་བདེ་འཇགས་ལ་ཉེན་ཚབས་ཆེན་པོ་ཡོད་ཚུལ་འགྲེལ་བརྗོད་བྱེད་ཀྱིན་ཡོད་པ་རེད།

རེས་གཟའ་ཕུར་བུའི་ཉིན་ཤིན་ཧྭ་གསར་ཁང་ནས་གནས་ཚུལ་སྤེལ་བ་ལྟར་ན། ཉེ་ཆར་གནམ་བདེ་སྒ་མོ་ཆེའི་ཉེ་འཁོར་དུ་མི་ཞིག་གིས་མཚོན་ཆ་བེད་སྤྱད་ཀྱིས་ཡུལ་མི་གཉིས་དམར་གསོད་དང། གཞན་མང་པོ་ཞིག་ལ་རྨས་སྐྱོན་བཏང་སྟེ། ཉེན་རྟོག་པས་འཇུ་བཟུང་བྱས་ཡོད་ཚུལ་དང།  གཞན་ཡང་ད་སྐབས་དང་བླངས་སྐོར་སྲུང་བ་ས་ཡ་གཅིག་ཙམ་ཡོད་པའི་ནང་། མང་པོ་ཞིག་ནི་རྒས་ཡོལ་ཞུས་ཟིན་པའི་སྐོར་སྲུང་བ་ཤ་སྟག་དང།  ཁོང་ཚོས་རྒྱལ་ཁབ་ཀྱི་བདེ་འཇགས་དོན་དུ། གྲོང་ཁྱེར་གྱི་སྲང་ལམ་ཁག་ཏུ་མཉམ་རུབ་དང་ཆེད་བསྐྱོད་བྱས་ཏེ། ཡུལ་གྱི་བདེ་འཇགས་མཐར་འཁྱོལ་ཡོང་བར་འབད་བརྩོན་བྱེད་ཀྱིན་ཡོད་ཚུལ་བཤད་ཀྱི་ཡོད་པ་རེད།

འཁྱོལ་དཀའ་བའི་ཉིན་མོ་དེ་དག་གི་ནང་དུ་ཁོང་ཚོས་མཐའ་མཚམས་ཁག་ནས་སོ་སྨན་དང། འདག་རྫས་སོགས་རློན་གཤེར་དང་ཕྱེ་མའི་རིགས་བསྐུར་གཏོང་བྱ་རྒྱུས་མཚོན་པའི། ཡུལ་སྐོར་བ་སྒེར་པ་དག་དང་གནམ་གྲུ་འཕུར་སྐྱོད། ཕུག་རོན་གཅེས་སྤྲོས་པས་ཕུག་རོན་མཐའ་དག་རླུང་བསིལ་ནང་དུ་འཇོག་པ་མ་གཏོགས། གང་བྱུང་ཕྱིར་གཏོང་མི་ཆོག་པའི་དམ་དྲག་བྱེད་བཞིན་པ་རེད།

ཉིན་དེ་རིང་དུ། གནམ་བདེ་སྒོ་མོ་ཆེའི་ཉེ་ཁུལ་དུ་དམག་མི་ཕོན་ཆེན་ཞིག་རུ་སྒྲིག་གཤར་བའི་སྐབས། ཁོང་ཚོས་ཉེ་འགྲམ་གྱི་ཁང་བ་ཡོད་དོ་ཅོག་གི་ཁང་བདག་ལ། ནང་གི་སྒེའུ་ཁུང་ཕྱེ་བ་དང། ཁང་ཐོག་ཏུ་འགྲོ་བ་སོགས་བྱེད་མི་ཆོག་པ་མ་ཟད། རང་ཁྱིམ་དུ་ཉེ་དུ་དང་མགྲོན་པོ་མགྲོན་འབོད་བྱེད་མི་ཆོག་ལ། ཉེ་འཁྲིས་ཀྱི་མགྲོན་ཁང་མཐའ་དག་གི་སྦྱིན་བདག་ཚོར་ཡང་ཁང་གླ་གཏོང་མི་ཆོག་པའི་བཙན་བཀའ་གཏོང་བཞིན་ཡོད་པ་རེད།

དེ་བཞིན་ཕྱི་རྒྱལ་ཡུལ་སྐོར་བ་ཚོར་ཡང་ཕྱི་རོལ་དུ་གང་ཉུང་བསྐྱོད་དགོས་པ་དང། གལ་སྲིད་འགྲོ་དགོས་བྱུང་ཚེ་ངེས་པར་ལག་འཁྱེར་མཉམ་བསྣམས་དགོས་པའི་རེ་སྐུལ་གྱི་སྦྱར་ཡིག་ཀྱང་ཕྱོགས་གང་སར་སྦྱར་ཏེ་དམ་དྲག་བྱེད་ཀྱིན་ཡོད་པ་རེད།