བོད་མིའི་སྤྱི་ཚོགས་ལ་གཟེངས་རྟགས།

༧གོང་ས་མཆོག་གི་པགས་རིགས་རྒྱན་སྤྲོས་གཟབ་མཆོར་ཐད་ཀྱི་བཀའ་སློབ་ཐེངས་གཅིག་གིས་གཞིས་སྡོད་བོད་མི་ཡོངས་ལ་གཡོ་སྐྱོམ་ཞིག་བཏང་ཡོད་ལ། ད་ལྟ་བོད་མི་རྣམས་རྔོན་པ་ནས་རི་སྐྱེས་སྲོག་ཆགས་སྲུང་སྐྱོབ་ཀྱི་རླབས་ཆེན་གྲུབ་འབྲས་སོན་མཁན་གྱི་དཔེ་བཟང་ཅན་དུ་གྱུར་ཡོད། རྒྱ་གར་རི་སྐྱེས་སྲོག་ཆགས་ཀྱི་ཐེབས་རྩ་ཚོགས་པ་དང་ཝེ་ནུའི་མེས་ནོན་ཐེབས་རྩ་གཉིས་ཀྱི་གོ་སྒྲིག་འོག་ཟླ་གཉིས་པའི་ཚེས་ ༡༩ ཉིན་རྒྱལ་ས་ལྡི་ལིར་རི་སྐྱེས་སྲོག་ཆགས་སྲུང་སྐྱོབ་ཀྱི་རྒྱལ་ཡོངས་གཟེངས་རྟགས་ཐེངས་བཅུ་པ་དེ་བོད་མིའི་སྤྱི་ཚོགས་ལ་ཕུལ་ཡོད་ལ། བོད་གཞུང་ཕྱི་དྲིལ་བཀའ་བློན་བསྟན་པ་ཚེ་རིང་མཆོག་ནས་བོད་མིའི་སྐུ་ཚབ་གནང་སྟེ་གཟེངས་རྟགས་དེ་བཞེས་ཡོད། རྒྱལ་ཡོངས་གཟེངས་རྟགས་དེ་ནི་ཚེ་གང་གྲུབ་འབྲས་གཟེངས་ཐོན་གྱི་ཚོགས་སྡེ་དང་མི་སྒེར་སོགས་ལ་གནང་བཞིན་ཡོད་ལ། ཐེངས་འདིར་བོད་མིའི་སྤྱི་ཚོགས་ལ་གཟེངས་རྟགས་ཕུལ་བ་དེས། བོད་མིའི་སྤྱི་ཚོགས་ཀྱིས་རང་ཉིད་ཀྱི་ཡུལ་སྲོལ་གོམས་གཤིས་སུ་ཡོད་པའི་རི་སྐྱེས་སྲོག་ཆགས་སྲུང་སྐྱོབ་ཆེད་རླབས་ཆེན་གྱི་གྲུབ་འབྲས་ཤིག་ཐོན་ཐུབ་ཡོད་པའི་ངོས་འཛིན་གནང་ཡོད་པ་རེད།