གད་སྙིགས་ཀྱི་དཀའ་ངལ་སེལ་ཐབས།

གད་སྙིགས་ཀྱི་འབྱུང་རྐྱེན་གཙོ་བོ་ནི་རྒྱུན་ལྡན་གྱི་འཚོ་བའི་ནང་ང་ཚོས་དངོས་རྫས་རྣམས་བེད་སྤྱོད་ཚུལ་བཞིན་མི་བྱེད་པ་དང་། གད་སྙིགས་དབྱེ་འབྱེད་མི་བྱེད་པར་ཡོད་ཚད་མཉམ་གསེས་ཀྱིས་གཡུག་པར་བརྟེན་གད་སྙིགས་ཀྱི་དཀའ་ངལ་ཉིན་རེ་བཞིན་ཇེ་མང་དུ་འགྲོ་བཞིན་ཡོད། མི་མང་བོ་ཞིག་གིས་སོ་སོའི་སྡོད་ཁང་གཙང་ཉར་ཙམ་ལས་གད་སྙིགས་རྣམས་སྣང་མེད་ཀྱིས་ཆུར་གཡུག་པ་དང་། མེར་སྲེག་པ། གང་སར་གཡུག་པ་སོགས་ཀྱི་གོམས་གཤིས་ངན་པ་ཞིག་འཇགས་ཡོད། དེས་རྐྱེན་པས་ཁོར་ཡུག་ལ་འབག་བཙོག་བཟོས་ཏེ། རང་བྱུང་ཁམས་ཀྱི་ཆ་སྙོམ་གྱི་རང་བཞིན་ལ་འགྱུར་བ་ཐེབས་བཞིན་ཡོད་པས། དང་པོར་གད་སྙིགས་མི་ཡོང་བའི་ཐབས་ཤེས་གནང་དགོས། དཔེར་ན་ཁྲོམ་ནས་སྔོ་ཚལ་དང་ཤིང་ཏོག་སོགས་ཉོ་སྐབས་ཚོང་པས་འགྱིག་རིགས་སྤྲད་ཀྱང་མི་ལེན་པར་རང་གི་ལྟོ་ཕད་དམ་སྒྱེའུ་བེད་སྤྱོད་དགོས་པ་དང་། ཡང་ཆོས་ཕྱོགས་ཀྱི་དུས་ཆེན་ཁག་དང་། མཛད་སྒོ་ཁག སྤྲོ་སྐྱིད་བྱེད་པ་དང་སྐྱེས་སྐར་གཏོང་བ། བག་སྟོན་ལྟ་བུ་སོགས་ཀྱི་སྐབས་སུ་གད་སྙིགས་ཕོན་ཆེ་འབྱུང་བའི་དངོས་རྫས་རིགས་བེད་སྤྱོད་བྱེད་མི་རུང་།
གད་སྙིགས་ལ་ཞིབ་ལྟ་བྱས་ཚེ་དེའི་ནང་གི་དངོས་རྫས་མང་བོ་ཞིག་དོན་དངོས་ཐོག་གད་སྙིགས་མིན་ཡང་རྒྱུན་དུ་གད་སྙིགས་རྣམས་དབྱེ་འབྱེད་མ་བྱས་པར་ཡོད་ཚད་མཉམ་བསྲེས་ཀྱིས་གཡུག་པར་བརྟེན་ནས་གད་སྙིགས་དེ་དག་བྱུང་གིན་ཡོད། དེས་ན། འགྱིག་རིགས་དང་། ཤོག་བུ། ལྕགས་རིགས། ཧ་ཡང་། ཤེལ་དམ་སོགས་སོ་སོར་དབྱེ་འབྱེད་བྱས་ཏེ་གད་སྙིགས་མཁོ་བསྡུ་བྱེད་མཁན་ལ་བཙོང་ན། དེས་གད་སྙིགས་ཀྱི་དཀའ་ངལ་ཉུང་དུ་གཏོང་བ་མ་ཟད། རང་བྱུང་ཐོན་ཁུངས་ཆུད་སོས་སུ་མི་འགྲོ་བའི་ཁེ་ཕན་ཡོད། ཡང་ཤིང་ཏོག་དང་ཚལ་རིགས་ཀྱི་པགས་པ། ཤིང་གི་ལོ་མ། ཟས་སྙིགས་སོགས་གད་སྙིགས་གཞན་མཉམ་དུ་མ་གཡུག་པར་ས་དོང་ཞིག་ཏུ་ལུད་སྦྱོར་བྱས་ཚེ་རང་བཞིན་གྱིས་ཞིག་རུལ་དུ་གྱུར་ཏེ། ས་བཅུད་བཟང་དུ་གཏོང་ཆེད་ཀྱི་ལུད་ཕུལ་དུ་བྱུང་བ་ཞིག་ཏུ་འགྱུར་ཐུབ་ཅིང་། དེ་ནི་རྫས་ལུད་ལྟར་མ་ཡིན་པར་རང་བྱུང་ཁམས་དང་འཕྲོད་སྦྱོར་ལྡན་པ་ཞིག་ཡིན། འོན་ཀྱང་འགྱིག་ཤོག་གཙོ་བོར་གྱུར་བའི་ཞིག་རུལ་དུ་འགྲོ་མི་ཐུབ་པའི་གད་སྙིགས་རིགས་གང་སར་གཡུག་ན་ལོ་ངོ་སྟོང་ཕྲག་ཕྱིན་ཡང་རང་འཇགས་སུ་གནས་པ་ཙམ་དུ་མ་ཟད་དེ་དག་ལས་བྱུང་བའི་དུག་རྫས་ཀྱིས་རང་བྱུང་ཁོར་ཡུག་ལ་འབག་བཙོག་བཟོས་ཏེ་དབུགས་ཐོགས་ཀུན་གྱི་འཚོ་གནས་དང་རྩི་ཤིང་རིགས་ཀྱི་སྐྱེ་འཕེལ་ལ་གནོད་སྐྱོན་བཟོ་བཞིན་ཡོད་ཅིང་། ཡང་མི་མང་བོས་གད་སྙིགས་མེར་སྲེག་བཏང་སྟེ། གད་སྙིགས་མེད་པར་བཟོ་ཐབས་བྱེད་ཀྱིན་ཡོན་ནའང་། དེ་ནི་ཕྱི་ཚུལ་དུ་གད་སྙིགས་མི་སྣང་བའི་རྣམ་པ་ཙམ་ལས་དོན་དངོས་ཐོག་མཁའ་རླུང་འབག་བཙོག་བཟོས་ཏེ་སྐྲན་ནད་ཀྱིས་གཙོས་པའི་བཅོས་ཐབས་དཀའ་བའི་ནད་རིགས་མང་བོ་འབྱུང་རྐྱེན་དུ་འགྱུར་གྱིན་ཡོད་ལ། འཛམ་གླིང་ཧྲིལ་བོར་གོ་ལའི་ཚ་དྲོད་འཕེལ་བཞིན་པ་ཡང་འབྱུང་རྐྱེན་གཙོ་བོ་དབྱེ་འབྱེད་མ་བྱས་པར་གང་སར་གཡུག་པའི་གད་སྙིགས་ལས་ཐོན་པའི་དྲོད་རླངས་དང་དེ་དག་མེར་སྲེག་བཏང་བའི་སོལ་རླུང་སོགས་ཀྱི་དུ་ངན་ལས་བྱུང་བར་ཁོར་ཡུག་ཞིབ་འཇུག་པས་འགྲེལ་བརྗེད་བྱེད་བཞིན་ཡོད། གཞན་ཡང་འགྱིག་ཤོག་དང་། ཤོག་བུ། སྨན་རྙིང་པ། བེད་སྤྱོད་ཟིན་པའི་གློག་མེ་སོགས་ཆུར་གཡུག་པས། དེ་དག་ལས་བྱུང་བའི་གནོད་ཚབས་ཅན་གྱི་རྫས་ངན་རིགས་ཆུ་ནང་དུ་བཞུར་ཏེ། རིམ་པས་རྒྱུག་ཆུ་དང་གཙང་ཆུ། མཚོ་དང་མཚེའུ། རྒྱ་མཚོ་སོགས་སུ་འདྲེས་ཏེ་ཆུར་གནས་པའི་སྲོག་ཆགས་རིགས་ཀྱི་འཚོ་སྡོད་གནས་ཡུལ་ལ་གཏོར་སྐྱོན་ཐེབས་ཏེ། སྲོག་ཆགས་དེ་རིགས་རྩ་སྟོང་དུ་འགྱུར་ཉེན་ཡོད་པ་དང་། འབག་བཙོག་ཅན་གྱི་ཆུ་རིགས་ཞིང་ཆུ་དང་། ས་འོག་གི་ཆུར་འདྲེས་ཏེ་དེ་དག་ལ་ལོངས་སུ་སྤྱོད་མཁན་གྱི་སྐྱེ་འགྲོ་དང་རྩི་ཤིང་རིགས་ལ་དུག་སྐྱོན་ཕོགས་ནས་སྔར་མེད་ཀྱི་ནད་ངན་མང་བོ་གསར་དུ་འཕེལ་ཏེ། འཆི་སྐྱོན་གྱི་ཚད་ཉིན་རེ་བཞིན་ཇེ་མང་དུ་འགྲོ་མུས་མིན།