ཏཱ་ཅིའི་ཡོན་ཚགས་པར།
རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་དྲུང་ཆེ་རོ་བྷོར་ཊི་མེས་ནར་ཊི་ལགས་སུ་བཅར་འདྲི།
༢༠༠༡ ལོར་ཧཕ་རན་སིའི་རྒྱལ་ས་ཕེ་རེ་སི་ནང་རྟེན་གཞི་བྱས་ཡོད་པའི་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་བཞིན་པ་དེ་ནི་ཨོ་ལིམ་པིག་གི་རྩ་དོན་དང་འགལ་ཡོད་པས། ༢༠༠༨ ལོའི་ཨོ་ལིམ་པྀག་རྩེད་འགྲན་བདག་དབང་རྒྱ་ནག་གཞུང་ལ་སྤྲད་པར་ངོ་རྒོལ་བྱེད་ཀྱི་ཡོད་པ་དང༌། གཞུང་འབྲེལ་མ་ཡིན་པའི་རྒྱལ་སྤྱིའི་ཚོགས་སྡེ་ཁྲོད་རྒྱལ་མཚམས་མེད་པའི་གསར་འགོད་མཐུན་ཚོགས་ནི་པེ་ཅིང་དུ་ཨོ་ལིམ་པིག་རྩེད་འགྲན་འཚོགས་པར་ངོ་རྒོལ་བྱེད་མཁན་གྱི་ཚོགས་པ་ཐོག་མའི་གྲས་ཀྱང་ཡིན་པ་རེད། ༢༠༠༧ ལོའི་ཕྱི་ཟླ་༡ ནང་རྒྱ་ནག་གཞུང་གིས་གདན་འདྲེན་ལྟར་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་དྲུང་ཆེ་རོ་བྷོར་ཊི་མེས་ནར་ཊི་དང་ཨེ་ཤ་ཡའི་སྡེ་ཚན་འགན་འཛིན་བེན་སན་ཊི་བྷོར་སིལ་གཉིས་རྒྱ་ནག་ནང་གཟིགས་བསྐོར་དུ་བསྐྱོད་པ་དང༌། སྐབས་དེར་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལེགས་བཅོས་གནང་རྒྱུའི་ཁས་ལེན་གནང་སྟེ་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་པེ་ཅིང་ཨོ་ལིམ་པིག་རྩེད་འགྲན་ལ་ངོ་རྒོལ་བྱེད་བཞིན་པ་མཚམས་འཇོག་ཆེད་མགོ་བསྐོར་བསླུ་བྲིད་བཏང་བ་རེད། ད་ལྟ་ཁས་ལེན་བྱས་པའི་དུས་ལས་ཡོལ་ཡོད་ན་ཡང་རྒྱ་ནག་གཞུང་གིས་ལག་བསྟར་བྱ་དགོས་བའྀི་ལས་དོན་གཅིག་ཀྱང་མངོན་དུ་གྱུར་མེད་པར་བརྟེན། རྒྱལ་མཚམས་མེད་པའི་གསར་འགོད་མཐུན་ཚོགས་ངོས་ནས་པེ་ཅིང་ཨོ་ལིམ་པིག་རྩེད་འགྲན་ལ་གཞི་རྒྱ་ཆེ་བའི་ངོ་རྒོལ་གྱི་ལས་འགུལ་བསྐྱར་ཏུ་སྤེལ་མགོ་བཙུགས་པ་དང༌། ཏཱ་ཅིན་ཡོན་ཚགས་པར་གྱི་གསར་འགོད་པའི་མཐུན་ཚོགས་ཀྱི་དྲུང་ཆེ་སྐུ་ཞབས་རོ་བྷོར་ཊི་མེས་ནར་ཊི་ལགས་སུ་ལས་འགུལ་སྐོར་བཅར་འདྲི་བྱས་པ་གཤམ་གསལ།
དྲི་བ། རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ཅིའི་ཕྱིར་དུས་སྐབས་འདི་ལ་པེ་ཅིང་དུ་ཨོ་ལིམ་པིག་རྩེད་འགྲན་འཚོགས་པར་བཀག་འགོག་བྱེད་ཀྱི་ཡོད་དམ།
ལན། དེ་ནི་པེ་ཅིང་དུ་ཨོ་ལིམ་པིག་རྩེད་འགྲན་འཚོགས་པར་ལོ་གཅིག་ལས་མེད་པ་དང༌། ང་ཚོས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་ཕྱོགས་བསྡོམས་ཤིག་བརྒྱབ་པ་ཡིན། ཕྱི་ལོ་༢༠༠༡ ཟླ་༧ པའི་ནང་མོ་སི་ཁོ་རུ་པེ་ཅིང་ལ་ཨོ་ལིམ་པིག་རྩེད་འགྲན་འཚོགས་པའི་བདག་དབང་ཐོབ་པ་དང༌། སྐབས་དེར་རྒྱལ་མཚམས་མེད་པའི་གསར་འགོད་མཐུན་ཚོགས་ངོས་ནས་ངོ་རྒོལ་བྱས་པ་ཚང་མའི་དྲན་པ་རེད། ང་ཚོས་བསམ་པར་དེང་གི་རྒྱ་ནག་ནང་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་བཞིན་པ་དེ་ཨོ་ལིམ་པིག་གི་རྩ་དོན་དང་མི་མཐུན་པ་རེད། དེར་བརྟེན་ང་ཚོས་ངོ་རྒོལ་བྱེད་ཀྱི་ཡོད་ལ། ང་ཚོས་ཨོ་ལིམ་པིག་ལག་བསྟར་ལས་ཁུངས་ལ་ང་ཚོའི་རྣམ་འགྱུར་གསལ་བོ་བསྟན་ཡོད། སྐབས་དེར་ཨོ་ལིམ་པིག་ཚོགས་པ་དང་རྒྱ་ནག་སྲིད་གཞུང་གིས་ང་ཚོ་ལ་ཁྱེད་ཚོས་སེམས་ཁུར་བྱེད་མི་དགོས། ཁྱེད་ཚོས་ལྟོས་བསྡད་དང་ཨོ་ལིམ་པིག་རྩེད་འགྲན་ཚུགས་རྗེས་འགྲོ་བ་མིའི་ཐོབ་ཐང་ཡར་རྒྱས་གཏོང་རྒྱུ་དང༌། ཁྱེད་ཚོས་སྒུག་བསྡད་དང་ཡོད་ཚད་འགྱུར་བ་ཐེབས་རྒྱུ་ཡིན་པ་རེད་བཅས་བརྗོད་པ་རེད། ད་ལྟ་ལོ་ངོ་དྲུག་ཕྱིན་སོང་བས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ཅི་འདྲ་ཡིན་ནམ། ཁོ་ཚོས་བརྗོད་པ་བཞིན་གཏན་ནས་མིན་པར་འགྲོ་བ་མིའི་ཐོབ་ཐང་ལ་ཡར་རྒྱས་ཅི་ཡང་ཕྱིན་མེད་པ་རེད། དེར་བརྟེན་ང་ཚོས་དེ་རིང་གཞི་ནས་རྒྱལ་སྤྱིའི་ཨོ་ལིམ་པིག་གི་ཚོགས་གཙོ་ལོ་གྷེ་ལ་ཡི་གེ་བྲིེས་སྟེ་སྔོན་མ་པེ་ཅིང་གིས་ཁས་ལེན་བྱས་པ་གཅིག་ཀྱང་ལག་བསྟར་གནང་མེད་པས་ད་ལྟ་ཁྱེད་ཀྱིས་ཁོ་ཚོས་ཁས་ལེན་བྱས་པ་ལག་བསྟར་གནང་དུ་འཇུག་དགོས་བའི་དུས་ལ་བབས་ཡོད་པ་རེད་ཅེས་བརྗོད་ཡོད། ང་ཚོས་གསལ་བཤད་བྱེད་འདོད་པ་ནི་ང་ཚོས་ལུས་རྩལ་འགྲན་ཚོགས་ལ་ངོ་རྒོལ་བྱེད་ཀྱི་མེད་ལ། ང་ཚོ་ཡང་ལུས་རྩལ་ལ་དགའ་མོས་ཡོད། ཨོ་ལིམ་པིཀ་རྩེད་འགྲན་ལ་དགའ་མོས་ཡོད། ང་ཚོས་རེ་བ་ཡང་ཨོ་ལིམ་པིག་དེ་དུས་སྟོན་ཆེན་པོ་ཞིག་ཏུ་གྱུར་རྒྱུ་དེ་ཡིན། ང་ཚོས་ཨོ་ལིམ་པིག་རྩེད་འགྲན་བེད་སྤྱོད་གཏོང་གི་མེད་པར་རྒྱ་ནག་གཞུང་གིས་ཨོ་ལིམ་པིག་གི་སྙིང་སྟོབས་དང་རྩ་དོན་ལ་རྒྱབ་འགལ་གྱིས་ལུས་རྩལ་པ་ཚོ་གཏའ་མར་ཉར་གྱི་ཡོད་པ་རེད།
ཚང་མའི་ཤེས་གསལ་ལྟར་ལུས་རྩལ་འགྲན་བསྡུར་བ་མང་པོ་ཞིག་ཨོ་ལིམ་པིག་རྩེད་འགྲན་ལ་ཞུགས་རྒྱུ་ཡིན་པ་དང༌། ཁོ་ཚོས་རང་དབང་གི་རིན་ཐང་འདུ་ཤེས་ལ་ཤིན་ཏུ་བརྩི་མཐོང་གནང་གི་ཡོད་པ་རེད། རྒྱ་ནག་ནང་ཆབ་སྲིད་བཙོན་པ་མང་པོ་ཞིག་བཀག་ཉར་བྱས་ཡོད་པས། ཁོ་ཚོ་འཛམ་གླིང་གི་བཙོན་ཁང་ཆེ་ཤོས་འགྲམ་ནས་རྒྱུགས་མཆོང་གནང་གི་ཡིན་ནམ། ཨོ་ལིམ་པྀག་གི་རྩ་དོན་ལ་བརྩི་བཀུར་མི་བྱེད་པའི་རྒྱ་ནག་སྲིད་གཞུང་གིས་ཨོ་ལིམ་པིག་བཀག་ཉར་བྱེད་བཞིན་ཡོད་པ་རེད། དེ་ལ་ང་ཚོས་ཇི་ལྟར་བྱེད་དགོས་སམ། ང་ཚོས་ནུས་ཤུགས་ཡོད་ཚད་བཏོན་ནས་མི་དམངས་དང་ལུས་རྩལ་འགྲན་བསྡུར་བ། སྲིད་གཞུང་ཁག་ལ་སོ་སོའི་ལས་འགན་ཅི་ཞིག་ཡིན་པ་གསལ་འདེབས་བྱེད་དགོས་བ་རེད།
ད་ལྟ་ང་ཚོས་རྒྱ་ནག་སྲིད་གཞུང་ལ་རེ་འདུན་འདོན་དགོས་བའི་དུས་ལ་བབས་ཡོད། རྒྱ་ནག་ནང་རང་དབང་གི་ངལ་རྩོལ་ཚོགས་པ་ལ་བརྩི་བཀུར་མེད་པ་དང༌། དམར་ཤོག་ཚོགས་པ་ལས་གཞན་སྲིད་དོན་ཚོགས་པ་མེད་ལ། ཆོས་ལུགས་རང་དབང་དང་གསར་འགོད་རང་དབང་མེད་པ་རེད། བཙོན་པར་མནར་གཅོད་གཏོང་བ་ནི་བཙོན་ཁང་མང་པོའི་ནང་ཡོངས་ཁྱབ་ཡིན་པ་དང༌། མི་མང་པོའི་མདུན་ནས་སྲོག་ཁྲིམས་ལག་བསྟར་བྱེད་བཞིན་ཡོད་པའི་འགྲོ་བ་མིའི་ཐོབ་ཐང་ཆེས་སྡུག་པའི་རྒྱལ་ཁབ་ཅིག་རེད། དེར་བརྟེན་དེ་རིང་རྒྱལ་སྤྱི་ཨོ་ལིམ་པིག་ཚོགས་པ་ནས་ངེས་བར་ཏུ་ཁ་ཕྱིར་འཁོར་ཏེ་པེ་ཅིང་ལ་ང་ཚོའི་ཁྱེད་ཚོས་ཁས་ལེན་བྱས་པའི་འགྲོ་བ་མིའི་ཐོབ་ཐང་གི་གནས་སྟངས་ལེགས་བཅོས་གཏོང་བར་རེ་བ་བྱེད་ཀྱི་ཡོད་ཅེས་བརྗོད་དགོས་བ་རེད།
ཨོ་ལིམ་པིག་ཚོགས་པ་དང་རྒྱལ་ཁབ་སོ་སོའི་སྲིད་གཞུང་གིས་དེ་ལྟར་སྒྲུབ་པའི་ནུས་བ་ཡོད་པ་རེད། ཡིན་ན་ཡང་ཁོ་ཚོས་རྒྱུ་རྐྱེན་གཞན་ལ་བརྟེན་ནས་དེ་ལྟར་སྒྲུབ་འདོད་ཀྱི་མེད་པ་ངས་ཤེས་ཀྱི་ཡོད། ཁོ་ཚོས་དེ་ལྟར་སྒྲུབ་འདོད་མེད་པའི་རྒྱུ་རྐྱེན་ནི་ཁོ་ཚོས་རང་ཉིད་ཀྱི་ཚོང་ཟོག་རྒྱ་ནག་ལ་བཙོང་འདོད་ཆེད་ཡིན་པ་དང༌། ཚང་མས་རྒྱ་ནག་སྲིད་གཞུང་དང་ལྷན་དུ་ཚོང་རྒྱག་འདོད་ཡོད་པ་རེད།
ཡིན་ན་ཡང་འདིར་འགལ་བ་ཞིག་ཡོད་པ་ནི་ཨོ་ལིམ་པིག་གི་རྩ་དོན་ནང་མིའི་རང་དབང་དང་ཆེ་མཐོང་བརྗོད་ཀྱི་ཡོད་པ་རེད། དེ་ན་རྒྱ་ནག་གི་མིའི་རང་དབང་དང་ཆེ་མཐོང་གང་དུ་ཡོད་དམ། རྒྱ་ནག་ནང་མཐོང་མི་ཐུབ་པ་རེད།
དྲི་བ། ཁྱེད་ཀྱིས་ལྟོས་ན་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་དང་ཨོ་ལིམ་པིག་གི་རྩ་དོན་གཉིས་མི་འཚམས་པ་ཡིན་ནམ།
ལན། མི་འཚམས་པ་རེད། ༡༩༨༠ ལོར་རྒྱལ་ཁབ་དྲུག་ཅུ་ལྷག་གིས་ར་ཤི་ཡའི་རྒྱལ་ས་མོ་སུ་ཁོ་རུ་ཨོ་ལིམ་པིག་རྩེད་འགྲན་འཚོགས་པར་བཀག་འགོག་བྱས་པ་དང༌། དེ་ནི་མོ་སུ་ཁོ་རུ་འགྲོ་བ་མིའི་ཐོབ་ཐང་མེད་པ་དང༌། ར་ཤི་ཡའི་ཨབ་གྷན་ནི་སི་ཐན་ལ་བཙན་འཛུལ་བྱས་མ་ཐག་ཡིན་པ་རེད། དེ་ན་དེ་རིང་གི་རྒྱ་ནག་གིས་༡༩༨༠ ལོའི་ར་ཤི་ཡ་ལས་འགྲོ་བ་མིའི་ཐོབ་ཐང་ལ་བརྩི་བཀུར་བྱེད་ཀྱི་ཡོད་དམ། རྦད་དེ་མེད་པ་རེད། དེ་རིང་གི་རྒྱ་ནག་གིས་སྔོན་མའི་ར་ཤི་ཡ་ལས་འགྲོ་བ་མིའི་ཐོབ་ཐང་ལ་བརྩི་བཀུར་བྱེད་ཀྱི་མེད་པ་རེད། ཅིའི་ཕྱིར་༡༩༨༠ ལོ་མོ་སུ་ཁོ་རུ་ཨོ་ལིམ་ཕིག་རྩེད་འགྲན་འཚོགས་པར་བཀག་འགོག་བྱེད་མཁན་གྱི་རྒྱལ་ཁབ་དེ་ཚོས་དེ་རིང་རྒྱ་ནག་ལ་བཟུང་བའི་རྣམ་འགྱུར་མི་གཅིག་པ་ཡིན་ནམ། དེས་རྒྱུ་མཚན་ཤིན་ཏུ་སླ་སྟེ་ཁོ་ཚོས་རྒྱ་ནག་དང་ལྷན་ཚོང་འབྲེལ་བྱེད་འདོད་ཡོད་པ་རེད། སྔོན་མ་ར་ཤི་ཡ་དང་ཚོང་འབྲེལ་བྱེད་མཁན་མེད་པ་རེད། ཁ་ཤས་ཀྱིས་དེང་སྐབས་ཨོ་ལིམ་པིག་རྩེད་འགྲན་བཀག་འགོག་བྱེད་མཁན་མེད་པ་རེད་བསམ་གྱི་ཡོད་མོད་ང་ཚོས་པེ་ཅིང་ལ་ཨོ་ལིམ་ཕིག་རྩེད་འགྲན་གྱི་བདག་དབང་མ་ཐོབ་སྔོན་ནས་བཀག་འགོག་བྱེད་ཀྱི་ཡོད། ཡིན་ན་ཡང་ངེས་བར་ཏུ་གནོན་ཤུགས་ངེས་ཅན་དང་ཁ་གསལ་བོ། ཡོངས་ཁྱབ་ཀྱིས་རྒྱ་ནག་སྲིད་གཞུང་ལ་ཨོ་ལིམ་ཕིག་གི་རྩ་དོན་དང་རྒྱ་ནག་གི་འགྲོ་བ་མིའི་ཐོབ་ཐང་མི་འཚམས་པ་རེད་ཅེས་བརྗོད་དགོས་བ་རེད།
དྲི་བ། ད་ལོའི་ཕྱི་ཟླ་དང་པོའི་ནང་ཁྱཻད་རང་རྒྱ་ནག་ལ་བསྐྱོད་རྗེས་རྒྱ་ནག་གཞུང་ལ་གསར་འགོད་རང་དབང་ལེགས་བཅོས་གཏོང་དགོས་བའི་དགོས་འདུན་དོན་ཚན་བཅུ་བཏོན་ཡོད་པ་རེད། ཁྱེད་ཀྱི་བལྟས་ན་ལེགས་བཅོས་ག་རེ་གནང་ཡོད་དམ།
ལན། ལེགས་བཅོས་ཅི་ཡང་བཏང་མི་འདུག ལོ་མགོར་རྒྱ་ནག་གཞུང་གིས་གདན་འདྲེན་ལྟར་རྒྱ་ནག་ཏུ་བསྐྱོད་པའི་སྐབས་ཁོ་ཚོས་ཁོ་ཚོ་ནི་མི་ཨུ་ཚུགས་ཅན་ཞིག་མིན་པར་མི་སུ་ཡིན་རུང་བགྲོ་གླེང་བྱེད་ཆོག་ཅེས་བརྗོད་པ་རེད། དེ་ན་ཤིན་ཏུ་བཟང་ང་ཚོས་ཀྱང་ཨོ་ལིམ་པིག་རྩེད་འགྲན་དེ་དུས་སྟོན་ཆེན་པོ་ཞིག་ཏུ་གྱུར་བའི་རེ་བ་བྱེད་ཀྱི་ཡོད། ཁྱེད་ཚོས་རེ་བར་ང་ཚོས་ཨོ་ལིམ་པིག་རྩེད་འགྲན་ལ་བཀག་འགོག་གི་ལས་འགུལ་མི་སྤེལ་རྒྱུ་དེ་རེད། ང་ཚོས་ལམ་སེང་མཚམས་འཇོག་ཆོག འོན་ཀྱང་ང་ཚོའི་རེ་འདུན་ནི་ཁྱེད་ཚོས་ཆ་རྐྱེན་ཁ་ཤས་ཤིག་ཁས་ལེན་དགོས་བ་དེ་ཡིན། ང་ཚོས་ཁོང་ཚོ་ལ་ཕྱོགས་གཉིས་མོས་མཐུན་ཡོང་བའི་ཆ་རྐྱེན་ཁག་ཅིག་བཏོན་ཟིན་པ་ཡིན་ལ། དེའི་ནང་དགོས་འདུན་གཙོ་བོ་ཞིག་ནི་བཀག་ཉར་བྱས་པའི་གསར་འགོད་པ་དང་དྲ་རྒྱའི་སྟེང་ལྟ་སྤྱོད་མི་མཐུན་པའི་མི་སྣ་ཁག་ཅིག་གློད་འགྲོལ་གཏོང་དགོས་བ་དེ་ཡིན། དྲ་རྒྱའི་ལྟ་སྤྱོད་མི་མཐུན་པའི་མི་སྣ་དང་གསར་འགོད་པ། སྨྲ་བརྗོད་རང་དབང་སྲུང་སྐྱོབ་མཁན་བཅས་བསྡོམས་པའི་མི་སྣ་བརྒྱ་ཙམ་ཡོད་པ་རེད། ང་ཚོས་ཁོང་ཚོ་ལ་མིང་ཐོ་ཞིག་སྤྲད་ཡོད་ལ་དེའི་ནང་གཟུགས་པོའི་གནས་སྟངས་ཤིན་ཏུ་སྐྱོ་བ་དང༌། ལོ་ན་མཐོ་བ། བཙོན་ཁང་ནང་སྡོད་ཡུན་ཤིན་ཏུ་རིང་བ་སོགས་ཡོད། ཁོང་ཚོས་སྐྱོན་མེད་ཅེས་བརྗོད་པ་དང༌། ང་ཚོས་གྲོས་མོལ་བྱས་ཏེ་ཟླ་ཚེས་ནམ་ཞིག་ལ་མི་སུ་ཞིག་གློག་འགྲོལ་གཏོང་དགོས་བ་དང༌། དུས་ནམ་ཞིག་ལ་བཙོན་པ་སུ་ཞིག་ལ་ལྟ་རུ་འགྲོ་ཆོག་པ། དྲ་རྒྱ་གང་ཞིག་བཀག་སྡོམ་ལས་གྲོལ་དགོས་བ་སོགས་བརྗོད་ཡོད།
ཡིན་ན་ཡང་ཁོ་ཚོས་ཁས་ལེན་བྱས་པ་གཅིག་ཀྱང་ལག་བསྟར་བྱེད་མེད་པརེད། ཁོ་ཚོས་ང་ཚོའི་ཆ་རྐྱེན་འདོད་བློ་ཁེངས་བ་བྱུང་ཚེ་ང་ཚོས་ཨོ་ལིམ་ཕྀག་རྩེད་འགྲན་བཀག་འགོག་བྱེད་བཞིན་པའི་ལས་འགུལ་མཚམས་འཇོག་བྱེད་ཆོག་ཅེས་བརྗོད་ཡོད་ལ། ང་ཚོས་མཐའ་མའི་དུས་ཚོད་ཀྱང་གཏན་འཁེལ་བྱས་ཡོད། ཡིན་ན་ཡང་ཁོ་ཚོས་ཅི་ཡང་སྒྲུབ་མེད་པ་རེད།
ང་ཚོས་རང་ཉིད་ཀྱི་ཁས་ལེན་བརྩི་སྲུང་བྱས་ཡོད་ན་ཡང་ཁོ་ཚོས་རང་ཉིད་ཀྱི་ཁས་ལེན་ལ་རྒྱབ་འགལ་བྱས་པ་རེད། ཁོ་ཚོས་གནད་དོན་དེའི་ཐད་ནས་ང་ཚོ་ལ་ངོ་ཚ་བཟོ་འདོད་ཡོད་པ་རེད། ངོ་ཚ་དགོས་བ་དེ་ང་ཚོ་མ་རེད། ཁོ་ཚོས་ང་ཚོ་ལ་མགོ་བསྐོར་བཏང་བ་རེད། ད་ལྟ་ང་ཚོས་དོན་དག་འདི་ཡོངས་ཁྱབ་གསལ་བསྒྲགས་བྱས་ཏེ་ཨོ་ལིམ་ཕྀག་རྩེད་འགྲན་བཀག་འགོག་གི་ལས་འགུལ་བསྐྱར་དུ་སྤེལ་བཞིན་པ་རེད།
དྲི་བ། ཁྱེད་ཚོས་ལས་འགུལ་ཁྲོད་ལག་ལྕགས་ལྔ་ཡིས་ཐེངས་འདིས་ཨོ་ལིམ་པིག་གི་མཚོན་རྟགས་བྱེད་བཞིན་པས་རྒྱུ་མཚན་ཅི་ཡིན་ནམ།
ལན། ལག་ལྕགས་ལྔ་ནི་རང་དབང་མེད་པའི་མཚོན་རྟགས་ཡིན་ལ། དེ་ནི་མཐུན་སྒྲེིལ་མེད་པ་དང༌། འཆམ་མཐུན་མེད་པ། ཕན་ཚུན་བརྩི་བཀུར་མེད་པ། མི་གཞན་ལ་བརྩི་མཐོང་དང་བཟོད་སྒོམ་མི་བྱེད་པ། དེའི་བཙོན་ཁང་དང༌། མནར་གཅོད། སྲོག་ཁྲིམས་ལག་བསྟར་བྱེད་པ། རང་དབང་བརླག་པ། མི་སྒེར་གྱི་དབང་ཤུགས་ཀྱིས་ཡོད་ཚད་དབང་བསྒྱུར་བྱེད་བཞིན་པ་བཅས་མཚོན།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།