དམངས་གཙོའི་སྤྱི་ཚོགས།

དམངས་གཙོ་ནི་སྲིད་གཞུང་ཞིག་ཇི་ལྟར་འཁོར་སྐྱོད་བྱེད་ཆེད་དུ་གཏན་འབེབས་བྱས་པའི་རྩ་ཁྲིམས་ཀྱི་དོན་ཚན་ཁག་དང་བརྒྱུད་རིམ་ཙམ་ཞིག་མིན། དམངས་གཙོའི་སྤྱི་ཚོགས་ནང་དུ། སྲིད་གཞུང་ནི་སྤྱི་ཚོགས་ཤིག་གི་རྩིགས་གྱང་མི་འདྲ་བ་མང་པོ་སྟེ། སྒྲིག་འཛུགས་ཁག སྲིད་དོན་ཚོགས་པ། མཉམ་འབྲེལ། མཐུན་ཚོགས། སྐྱིད་སྡུག་བཅས་དང་མཉམ་དུ་གནས་པའི་གྲུབ་ཆ་གཅིག་ཡིན། སྣ་འདུས་རང་བཞིན་འདི་ལ་དབང་ཆ་མཉམ་བགོ་རིང་ལུགས་ཟེར་ལ། འདིས་དམངས་གཙོའི་སྤྱི་ཚོགས་ནང་གི་རྩ་འཛུགས་རང་བཞིན་གྱི་ཚོགས་པ་ཁག་དང་སྒྲིག་འཛུགས་ཁག་གིས་རང་རང་གི་འཚོ་གནས་དང་། སྒྲིག་ཁྲིམས། དབང་ཆ་བཅས་སྲིད་གཞུང་ལ་བརྟེན་མི་དགོས་པར་བྱས་ཡོད།

དམངས་གཙོའི་སྤྱི་ཚོགས་ནང་དུ་སྒེར་གྱི་ཚོགས་པ་སྟོང་ཕྲག་འགའ་རེ་ཡོད་ལ། དེ་དག་གི་སྐོར་ཞིག་ནི་ས་གནས་རིམ་པ་དང་ཁག་ཅིག་ནི་རྒྱལ་ཡོངས་རིམ་པར་ཡོད། འདི་དག་གི་མང་པོ་ཞིག་གིས་མེ་སྒེར་དང་རྙོག་འཛིང་གི་སྤྱི་ཚོགས། དེ་བཞིན་གཞུང་གི་སྒྲིག་འཛུགས་ཁག་གི་བར་དུ་འདུམ་འགྲིག་པ་ལྟ་བུའི་ཞབས་འདེགས་ཞུ་གིན་ཡོད་ལ། ཁོང་ཚོས་མི་སྒེར་དག་ལ་དམངས་གཙོའི་སྤྱི་ཚོགས་ཤིག་གི་མི་སེར་གྱི་ཐོབ་ཐང་ལ་ལོངས་སྤྱོད་དང་ལས་འགན་སྒྲུབ་པར་སྦྱོང་བརྡར་གྱི་གོ་སྐབས་འབུལ་གྱི་ཡོད།

ཚོགས་སྡེ་འདི་དག་གིས་གཞུང་གི་ལས་བྱེད་འོས་འདེམ་དང་། གནད་དོན་ལ་བགྲོ་གླེང་། སྲིད་བྱུས་འགྱུར་བ་གཏོང་ཕྱོགས་ལ་ཤུགས་རྐྱེན་སྤྲོད་ཐབས་བྱེད་པ་སོགས་ལམ་ཁ་སྣ་མང་ནས་རང་རང་གི་ཚོགས་མི་དག་གི་མངོན་འདོད་མཚོན་པར་བྱེད་ཀྱི་ཡོད། འདི་ལྟའི་ཚོགས་པ་ཁག་བརྒྱུད་ཚེ། མི་སྒེར་བ་དག་གིས་སྲིད་གཞུང་དང་སོ་སོའི་སྤྱི་ཚོགས་ནང་དོན་སྙིང་ལྡན་པའི་མཉམ་ཞུགས་བྱེད་པར་ལམ་ཁ་རྒྱ་ཆེན་པོ་རྙེད་ཐུབ། འདི་དག་གི་དཔེ་མཚོན་ནི་འདྲ་མིན་སྣ་ཚོགས་ཡིན་ཏེ། ཐེབས་རྩ་ཚོགས་པ་དང་། ཆོས་ཚོགས། ཁོར་ཡུག་ཚོགས་པ། ཚོང་ལས་ཚོགས་པ་དང་ངལ་རྩོལ་ཚོགས་པ་བཅས་ཡིན།

སྲིད་དབང་སྒེར་འཛིན་རིང་ལུགས་ཀྱི་སྤྱི་ཚོགས་ནང་དུ། དོན་དངོས་ཐོག་འདི་ལྟའི་ཚོགས་པ་མཐའ་དག་སྟངས་འཛིན་དང་། འགོག་སྡོམ། ལྟ་རྟོག་ནན་མོ་སོགས་བྱེད་ལ། དེ་མིན་ན་ལམ་ཁ་གཞན་ནས་གཞུང་ལ་འགན་ལེན་བྱེད་དགོས་ཀྱི་ཡོད། དམངས་གཙོའི་སྤྱི་ཚོགས་ནང་དུ་སྲིད་གཞུང་གི་དབང་ཚད་ནི་ཁྲིམས་ཀྱི་འོག་ཡོད་ལ། གསལ་བོར་འགྲེལ་ཞིང་གཟབ་ནན་གྱིས་ཚོད་འཛིན་བྱས་ཡོད། དེར་བརྟེན། སྒེར་གྱི་ཚོགས་པ་ཁག་ནི་གཞུང་གི་སྟངས་འཛིན་ལས་རང་དབང་ཐོབ་ཡོད། སྲིད་དབང་སྒེར་འཛིན་གྱི་སྤྱི་ཚོགས་དང་མི་འདྲ་བར། ཁོང་ཚོས་གཞུང་ལ་ངོ་རྒོལ་བྱས་ཏེ་གཞུང་གིས་ལས་ཀ་གནང་ཕྱོགས་ཐད་ནས་ཁོང་ཚོར་འགན་ལེན་བྱེད་དགོས་པར་བརྗོད་ཀྱི་ཡོད། དེ་བཞིན་དུ་སྒྱུ་རྩལ་དང་། ཆོས་ལུགས་དད་མོས། ཤེས་ཡོན་ཉམས་ཞིབ་སོགས་རིགས་སྒོ་མང་པ་ཞིག་གིས་གཞུང་དང་མཉམ་དུ་འབྲེལ་མཐུད་མེད་པར་བྱེད་པའམ། འབྲེལ་གཏུགས་ཏོག་ཙམ་རེ་མ་གཏོགས་མེད་ཀྱང་ཆོག

དམངས་གཙོའི་སྤྱི་ཚོགས་འདིའི་བྲེལ་འཚུབ་དང་སྒེར་བདག་རང་བཞིན་གྱི་ཁྱབ་ཁོངས་འདིའི་ནང་དུ། མི་སེར་རྣམས་ཀྱིས་སྲིད་གཞུང་གི་ལག་པ་ལྗིད་མོའི་གནོན་ཤུགས་དེ་འཁུར་མི་དགོས་པར་རང་དབང་དང་རང་སྐྱོང་གི་འོས་འགན་ལ་འཚོལ་སྙེག་བྱེད་ཆོག

དམངས་གཙོའི་ཀ་ཆེན་དག

྾ མི་དམངས་ཀྱི་བདག་དབང་།
྾ གཞུང་ནི་མི་སེར་གྱི་མངོན་འདོད་གཞི་ལ་བཞད་ནས་འཛུགས་རྒྱུ།
྾ མང་སྣའི་དབང་སྒྱུར།
྾ ཉུང་སྣའི་ཐོབ་ཐང་།
྾ འགྲོ་བ་མིའི་གཞི་རྩའི་ཐོབ་ཐང་ལ་ཁག་འཁུར།
྾ རང་དབང་དང་ལུགས་མཐུན་གྱི་འོས་བསྡུ།
྾ ཁྲིམས་མདུན་ནས་འདྲ་མཉམ།
྾ ཁྲིམས་ལུགས་ཀྱི་བརྒྱུད་རིམ་འཐུས་ཚང་།
྾ སྲིད་གཞུང་ལ་རྩ་ཁྲིམས་ཀྱིས་ཚོད་འཛིན།
྾ སྤྱི་ཚོགས་དང་དཔལ་འབྱོར། ཆབ་སྲིད་བཅས་ཀྱི་དབང་ཆ་མཉམ་བགོ། བཅས་ཡིན།

རང་དབང་ཚེ་རིང་།