གངས་ཅན་པ་ཟེར་བའི་མིང་དེ་མ་ཤི་བར་འདུག་རྒྱུ་རེད། ས་གང་ཞིག་ནས་སྐྱེས་ཀྱང༌། སོ་སོའི་ཕུང་བོའི་གྲུབ་ཆ་དེ་བོད་གངས་ཅན་པའི་ཁུ་ཁྲག་ཡིན་སྟབས། མ་ཤི་བར་བོད་པ་ཞེས་པའི་མིང་དེ་འདོར་ཐབས་ཡོད་པ་མ་རེད། དེར་བརྟེན་བོད་པ་ཞིག་ཡིན་པ་ནས་བཟུང༌། མ་ཤི་བར་དུ་བོད་སྤྱི་བའི་འགན་དེ་འཁྲི་ཡོད། དུས་ནམ་ཡང་བོད་སྤྱི་བའི་དོན་དག་རྗེད་སྲོལ་ཡོད་པ་མ་རེད། ད་ལྟའི་བར་ཚང་མས་ཧུར་ཐག་བྱས་ཡོད་ལ། ད་དུང་ཡང་ཧུར་ཐག་བྱེད་རོགས་ཟེར་རྒྱུ་ཡིན་ཞེས་༧གོང་ས་མཆོག་གིས་གསུངས་ཡོད།
ཐེངས་འདིར་༧གོང་ས་མཆོག་ཨ་རིའི་ཁུལ་དུ་ཟླ་ཕྱེད་རིང་མཛད་འཕྲིན་བསྐྱངས་པ་དང་སྟབས་བསྟུན། ཁེ་ན་ཌ་དང་བྱང་ཨ་རིའི་ཁུལ་དུ་ཡོད་པའི་བོད་རིགས་གཅིག་ཁྲི་ཉིས་སྟོང་ ༡༢༠༠༠ ལྷག་མཉམ་རུབ་ཀྱིས་ཕྱི་ཚེས་ ༢༤ ཉིན་༧གོང་ས་མཆོག་ལ་བརྟན་བཞུགས་ཕུལ་ཡོད་པ་དང༌། བརྟན་བཞུགས་ཀྱི་རྡོ་རྗེ་སློབ་དཔོན་ལ་བཀའ་བློན་ཁྲི་བ་ཟམ་གདོང་རིན་པོ་ཆེ་མཆོག་ཆེད་དུ་གདན་འདྲེན་ཞུས་ཡོད། སྐབས་དེར་བྱང་ཨ་རིའི་ཁུལ་གྱི་བོད་རིགས་དྲུག་སྟོང་ ༦༠༠༠ ཙམ་འདུ་འཛོམ་སར་༧གོང་ས་མཆོག་གིས་བོད་ཀྱི་རིག་གཞུང་གཅེས་འཛིན་དང༌། བོད་མི་རིགས་ཀྱི་ལྟ་བ་མཁྲེགས་འཛིན། བོད་ཀྱི་བདེན་དོན་འཐབ་རྩོད་བྱེད་ཕྱོགས་བཅས་ཀྱི་ཐད། ཟབ་རྒྱས་གསུང་གི་བདུད་རྩི་བསྩལ་ཡོད། ཁོང་གིས་བོད་ཀྱི་རིག་གཞུང་གཅེས་འཛིན་ཐད་གསུང་དོན། ང་ཚོས་སེམས་ཁུར་ཆེན་པོ་བྱས་ཏེ་ད་ལྟའི་བར་བོད་ཀྱི་ཆོས་དང་རིག་གཞུང་ཞེས་བཤད་བསྡད་ཡོད། རྒྱ་གར་ལ་ཆ་བཞག་ན་ཧི་མ་ལ་ཡའི་རི་རྒྱུད། ཆོས་དང་རིག་གཞུང་ང་ཚོ་བོད་དང་གཅིག་གྱུར་ཡིན་པའི་ནུབ་ལ་དྭགས་ནས། ཤར་མོན་ཡུལ་བར་མི་སྐྱ་ཕོ་མོ་ཚོས་ནང་ཆོས་ལ་དོ་སྣང་གིས་བགྲོ་གླེང་བྱེད་ཀྱིན་ཡོད། བོད་པའི་སྤྱི་ཚོགས་ནང་དུའང་དེང་དུས་ཀྱི་སློབ་གྲྭ་ཐོན་ཡོད་པ་དང༌། གཞུང་གི་ལས་བྱེད་ཡིན་པ་མང་པོས་ནང་ཆོས་བགྲོ་གླེང་གོ་བསྡུར་བྱེད་ཀྱིན་འདུག དེ་ཚོར་གྲུབ་འབྲས་གང་འཚམ་ཐོན་ཡོད་པ་རེད། འདས་པའི་ལོ་གཅིག་གཉིས་ནང་སློབ་གྲྭ་ནང་གི་བྱིས་པ་དང༌། མཐོ་སློབ་ཀྱི་སློབ་མ་ཚོས་དུས་ནས་དུས་སུ་ནང་ཆོས་ལ་སློབ་གཉེར་བྱེད་ཀྱིན་ཡོད། ཁྱེད་ཚོས་འདི་ནས་ནང་ཆོས་སློབ་པར་བླ་མ་དགེ་རྒན་ཆེད་དུ་གདན་འདྲན་ཞུ་དགོས་པ་དེ་འདྲ་མ་རེད། རང་ཐག་རང་གཅོད་ཀྱིས་བགྲོ་གླེང་སྦྱང་བཤད་བྱས་ཏེ། ཤེས་ཡོན་དང་ཤེས་བྱ ཞིག་ལ་གཞི་བཞག་སྟེ། སློབ་སྦྱོང་བྱ་རྒྱུ་གལ་ཆེ། ཆོས་ལ་དད་པ་བྱེད་དང་མི་བྱེད་སོ་སོའི་འདོད་པ་རེད། ཕྱི་རྒྱལ་ཁག་ཏུ་དགོན་པ་དང་བོད་པའི་ཆོས་ཚོགས་མང་པོ་ཡོད། དེ་དག་གི་ངོས་ནས་ཀྱང་ཕན་ཚུན་མཉམ་རུབ་བྱས་ཏེ། ནང་ཆོས་བགྲོ་གླེང་སོགས་ཀྱི་མཐུན་རྐྱེན་སྦྱོར་ཐུབ་ན་ཡག་པོ་འདུག བླ་མ་སློབ་མའི་འདུ་ཤེས་དང་ཆོས་ཞུ་བའི་རྣམ་པ་མིན་པར་ནང་ཆོས་བགྲོ་གླེང་བྱ་ཐུབ་ན་ཡག་པོ་རེད་ཅེས་གསུངས་ཡོད།
སྤྱིར་སུ་ལའང་མི་རིགས་ཀྱི་ལྟ་བ་མཁྲེགས་འཛིན་ཞེས་ན། དེ་ཙམ་སྙན་པོ་མེད་ཀྱང་། ཐེངས་འདིར་༧གོང་ས་མཆོག་གིས་བོད་ཀྱི་རིག་གཞུང་གི་རིན་ཐང་དེ་བོད་མི་རིགས་ཀྱི་ངོ་བོར་སྦྱར་དེ། བོད་མི་རིགས་ཀྱི་ལྟ་བ་དང་གདེང་སྤོབས་ཀྱི་གལ་ཆེའི་རང་བཞིན་གསུངས་དོན། མི་རིགས་ཀྱི་ལྟ་བ་དེ་གལ་ཆེན་པོ་རེད། ང་ཚོར་ཅི་ཙམ་གྱིས་རིག་གཞུང་རྩ་ཆེན་པོ་དང་གཏིང་ཟབ་པོ་ཞིག་ཡོད་པ། དེ་ཙམ་གྱིས་སོ་སོའི་མི་རིགས་ཀྱི་ལྟ་བ་དང༌། མི་རིགས་ཀྱི་སྤོབས་པ་དགོས། དཔེར་ན། རྒྱ་མིའི་གྲོགས་པོ་ཚོར་མཚོན་ན་སོ་སོར་སྤོབས་པ་འདུག ཁོང་ཚོ་མི་འབོར་ཆེན་པོ་ཡིན་ཞེས་བཤད་ཀྱིན་འདུག་ལ། གཙོ་ཆེ་ཤོས་རྒྱ་ནག་གི་རིག་གཞུང་ལོ་ལྔ་སྟོང་གི་ཡིན་ཞེས་སྤོབས་པ་བྱེད་ཀྱིན་འདུག ང་ཚོ་བོད་པར་མཚོན་ནའང་སོ་སོའི་རིག་གཞུང་ཕྱུག་པོ་དང༌། ཁ་ཡོད་ལག་ཡོད་དུས་རབས་དང་མཐུན་ཞིང༌། འཛམ་གླིང་ལ་ཕན་ཐོགས་པ་ཞིག་ཡིན་སྟབས་སྤོབས་པ་སྐྱེ་ཆོག དེ་བཞིན་སོ་སོའི་སྐད་ཡིག་ལ་ཆ་བཞག་ན། བོད་པའི་སྐད་ཡིག་ཡར་རྒྱས་འགྲོ་ས་མ་རག་པའི་ཚན་རིག་སོགས་སུ་བོད་སྐད་ཀྱིས་མི་འདང་ས་ཡོད་པ་ལས། བོད་སྐད་ཡར་རྒྱས་འགྲོ་ས་བྱུང་པའི་བོད་སྐད་ཡར་རྒྱས་གཏོང་སའི་གཞི་དེ་ལོ་སྟོང་ཕྲག་རིང་གི་ནང་ཆོས་ཀྱི་ལྟ་གྲུབ་དེ་ཆགས་ཡོད་སྟབས། འཛམ་གླིང་འདིར་སངས་རྒྱས་ཆོས་ཀྱི་དགོངས་པ་ཡོངས་རྫོགས་ལེན་པར་བོད་སྐད་དང་བོད་ཡིག་ལས་ལྷག་པ་ཞིག་ཡོད་པ་མ་རེད། རྒྱ་ཡིག་དང་བོད་ཡིག་བསྡུར་ན། བོད་ཡིག་གཏིང་ཟབ་པ་ཆགས་ཡོད། རྒྱ་ནག་གི་རིག་གཞུང་དེ་ཚོ་ཁོན་ཙིའི་ལྟ་གྲུབ་དང་འབྲེལ་ཡོད། དེ་ཚོ་སྤྱིར་བཏང་གི་འགྲོ་སྟངས་རེད། སྟོང་ཉིད་དང་རྟེན་འབྱུང་ཟེར་བ་ལྟ་བུའི་རྒྱ་ཆེན་པོ་ཡོད་པ་མ་རེད། དེར་བརྟེན་ང་བོད་པ་ཡིན་བསམ་དུས་སྤོབས་པ་སྐྱེ་པ་ཞིག་དང༌། གདེང་ཚོད་སླེབས་པ་ཞིག་དགོས་པ་རེད། ང་ཚོ་ལུང་པ་དང་བྲལ་ནས་སྐྱབས་མེད་མགོན་མེད། ང་ཚོར་གང་ཡང་མེད་བསམ་པའི་ཨ་ཆད་ཨུ་ཐུག་ནས་མི་སྡོད་པར། ང་ཚོ་འཛམ་གླིང་འདིའི་སྟེང་ན་ལོ་རྒྱུས་རིང་པོ་ཡོད་པ་ཞིག རིག་གཞུང་ཕྱུག་པོ་ཡོད་པ་ཞིག ནང་པའི་བསྟན་པ་ཡོངས་འཛིན་སྐྱོང་སྤེལ་གསུམ་བྱེད་མཁན་ཞིག་ཡིན་བསམ་པའི་སྤོབས་པ་དགོས། བོད་ནང་གི་རྒྱ་ཆེའི་མི་དམངས་ལ་དཀའ་ངལ་དེ་ཙམ་ཡོད་ཀྱང༌། སེམས་ནང་གི་སྤོབས་པ་ཞེ་དྲག་ཡག་པོ་འདུག ངས་རྒྱ་མི་ཚོར་འདི་ལྟར་བཤད་ཀྱིན་ཡོད། རྒྱ་ནག་གཞུང་གིས་དགོངས་པ་ཡག་པོ་བཞེས་ཚད་རེད། ད་ལྟའི་གངས་ལྗོངས་ཀྱི་གནས་ཚུལ་དེ་གློ་བུར་དུ་བྱུང་བ་ཞིག་མ་རེད། ལྔ་བཅུ་ང་གྲངས་ནས་དཀའ་ངལ་མང་པོ་འཕྲད་མཁན་དེ་ཚོའི་མི་རབས་རྫོགས་འགྲོ་བཞིན་ཡོད་ཀྱང༌། ཕ་མའི་སྐབས་ལ་དཀའ་ངལ་ཕྲད་པ་དེ་བུ་ཕྲུག་ཚོའི་སེམས་ནང་ལ་གནས་ཡོད། བུ་ཕྲུག་ཚོ་ཕ་མ་ཆགས་ཏེ། བུ་ཕྲུག་གི་བུ་ཕྲུག་སོགས་བརྒྱུད་ཡོང་དུས་སེམས་ནང་གི་དཀའ་ངལ་དེ་ལུས་ཡོད་སྟབས། དུས་ད་ལྟའི་བར་བོད་ནང་ལ་དུས་ནས་དུས་སུ་རྐྱེན་དང་འཕྲད་ན་གནས་ཚུལ་ཡོང་གིན་འདུག ཕྱིས་སུ་དེ་འདྲ་མ་ཡོང་བའི་ཆེད་དུ་རྩ་དོན་གྱི་ཐོག་ལ་དགོངས་པ་བཞེས་དགོས་པ་རེད། དྲག་གནོན་བྱེད་པས་ཕན་གི་མ་རེད་ཅེས་བཤད་པ་ཡིན། བོད་རྒྱ་ཆེའི་མི་དམངས་ཚོར་དཀའ་ངལ་ཞེ་དྲག་ཡོད། ཡིན་ནའང༌། ང་ཚོ་གངས་ཅན་པ་ཡིན་བསམ་པའི་ལྟ་བ་དང༌། ང་ཚོ་གངས་ཅན་པ་ཡིན་བསམ་པའི་རིགས་ཞེན་དེ མཁྲེགས་པོ་འདུག གཞན་གྱི་བཙན་དབང་འོག་བསྡད་ཡོད་པ། སྲོག་ལ་ཉེན་ཁ་ཡོད་པ་དེ་ཚོར་དེ་འདྲའི་གདང་སྤོབས་ཤིག་ཡོད་ན། རང་དབང་ལུང་པར་ཡོད་པ་ཚོ་གཞིས་ལུས་རྒྱ་ཆེ་མི་དམངས་ཀྱི་རེ་བ་བཅོལ་ས་དང༌། མིག་འབུར་གཏོད་ས་ཡིན་བསམ་པའི་ཐོག་ནས། སེམས་ཤུགས་བསྐྱེད་དེ་ཧུར་ཐག་བྱེད་དགོས་ཞེས་བཀའ་གནང་ཡོད།
ཡང་ཁོང་གིས་བོད་དོན་བདེན་པའི་འཐབ་རྩོད་དེ་འཚེ་མེད་ཞི་བའི་ལམ་ལ་བརྟེན་དགོས་ཚུལ་གསུངས་དོན། ང་ཚོའི་འཐབ་རྩོད་དེ་བདེན་དོན་ཆེད་རེད། བདེན་པ་ཡོད་པའི་རྐྱེན་གྱིས་འཚེ་བ་མེད་པའི་ལམ་ལ་འགྲོ་བར་ང་ཚོར་སྤོབས་པ་ཡོད་ལ། འཚེ་བ་མེད་པའི་ལམ་ལ་བརྟེན་ནས་བདེན་དོན་ཐག་གཅོད་བྱ་རྒྱུ་དམིགས་ཡུལ་དང་མཐུན་པ་རེད། དུས་རབས་ཉི་ཤུ་བ་མི་གསོད་ཁྲག་སྦྱོར་གྱི་དུས་རབས་ཤིག་ཆགས་ཡོད་སྟབས། དུས་རབས་ཉེར་གཅིག་པ་མི་གསོད་ཁྲག་སྦྱོར་མེད་པའི་དུས་རབས་ཤིག་བཟོ་དགོས། དེ་སེམས་ལ་འཁྱེར་ཡོད་ལ། རེ་བ་བརྒྱབས་ཡོད། སོ་སོས་འབད་བརྩོན་ཡང་བྱེད་ཀྱིན་ཡོད། དེར་བརྟེན་ང་ཚོས་བདེན་དོན་འཐབ་རྩོད་དེ་མཐའ་གཅིག་ཏུ་འཚེ་བ་མེད་པའི་ལམ་ལ་བརྟེན་རྒྱུ་གལ་ཆེ། དབུ་མའི་ལམ་ཟེར་བ་དེ་གཉིས་ཕན་ཞིག་ལ་བསམ་བློ་གཏོང་གིན་ཡོད། ཕུགས་རྒྱང་རིང་པོ་ཞིག་ལ་བསམ་བློ་གཏོང་གིན་ཡོད། ཅེས་དང༌། ང་ཚོས་རྒྱ་རིགས་མི་དམངས་ནང་ལ་འབྲེལ་བ་བྱ་རྒྱུ་དེ་ཞེ་དྲག་གལ་ཆེན་རེད། བར་སྐབས་ཤིག་ནས་ངས་འདི་ལྟར་འབོད་སྐུལ་བྱེད་ཀྱིན་ཡོད། རྒྱ་རིགས་དང་བོད་རིགས་གཉིས་ཀ་ཡོད་ས་ཞིག་ལ། རྒྱ་བོད་མཛའ་མཐུན་ཚོགས་པ་འཛུགས་དགོས་ཀྱིན་འདུག་ཅེས་འབོད་སྐུལ་བྱས་ཡོད། ང་ཚོ་བདེན་པའི་བདག་པོ་ཡིན་དུས། ང་ཚོས་རྒྱབ་ལྗོངས་མང་པོ་བཙལ་དགོས་དོན་མེད། ང་ཚོས་རྒྱ་མི་རིགས་ནང་ལོག་ལ་སྐད་ཆ་བཤད་སྐབས་སྤོབས་པ་ཡོད། ང་ཚོས་རྒྱ་མི་རིགས་ལ་འཁོན་འཛིན་བྱེད་ཀྱིན་མེད། གཉིས་ཕན་གྱི་ལམ་དུ་འགྲོ་བཞིན་ཡོད། རང་རྒྱལ་གཞན་ཕམ་ཟེར་གྱིན་མེད། རྒྱ་མི་འགའ་རེ་རྒྱ་ནག་གཞུང་གི་ཧམ་བཤད་ལ་མགོ་འཁོར་ཏེ། སྔོན་མ་ང་ཨ་རིར་ཡོང་སྐབས། ངོ་རྒོལ་བྱེད་མཁན་ཡོང་གིན་འདུག། དེ་བཞིན་འཇར་མན་ནས་བྱུང་འདུག དབྱིན་ཡུལ་ནས་ཀྱང་བྱུང་སོང༌། ད་རེབ་ཨ་རིར་ཡོང་དུས་ཁུ་སིམ་པོ་འདུག དོལ་རྒྱལ་ཚོགས་པ་དེ་ཚོས་རེ་ཟུང་ཡོང་གིན་འདུག་མ་གཏོགས། རྒྱ་མི་ངོ་རྒོལ་བྱེད་མཁན་དེ་འདྲ་མི་འདུག ད་ལྟ་ཁོང་ཚོས་བདེན་པའི་གནས་ཚུལ་ཏོག་ཙམ་ཧ་གོ་གིན་ཡོད་པ་འདྲ༌། ང་ཚོས་རྒྱ་མི་རིགས་ལ་ངོ་རྒོལ་བྱེད་ཀྱིན་མེད། ང་ཚོ་རྒྱ་མི་རིགས་དང་མཉམ་དུ་འདུག་གི་མིན་རང་བཙན་དགོས་ཟེར་གྱིན་མེད་པ་གསར་གྱུར་བརྒྱུད་ལམ་ཁག་ནས་ཁོང་ཚོས་ཤེས་ཡོད། རྒྱ་བོད་མཛའ་མཐུན་ཚོགས་པ་བཙུགས་ཏེ། བོད་པ་ཚོ་འཛོམ་སར་རྒྱ་མི་ཚོ་སྐད་བཏང༌། རྒྱ་མིའི་དུས་ཆེན་ཁག་ལ་བོད་པ་ཚོ་ཕར་སོང༌། དེ་ལྟར་གྲོགས་པོ་བཟོས་ཏེ་ང་ཚོའི་བདེན་པའི་གནས་ཚུལ་བཤད་ན། ཏན་ཏན་རེ་བ་ཆེན་པོ་ཡོད། ད་ང་ཚོས་རྒྱ་མི་རིགས་ལ་རེ་བ་རྒྱག་རྒྱུ་གལ་ཆེན་པོ་རེད། རྒྱ་ནག་དཔོན་རིགས་དེ་ཚོ་གུ་དོག་པོས་དོགས་པ་རྣམ་རྟོག་གིས་ཕོངས་འདུག འོན་ཀྱང་ཡིད་ཐང་ཆད་མི་རུང༌། རྒྱ་མི་རིགས་དང་མཉམ་དུ་མུ་མཐུད་ནས་འབྲེལ་བ་བྱ་རྒྱུ་གལ་ཆེན་པོ་རེད། གངས་ཅན་པ་ཟེར་བའི་མིང་དེ་མ་ཤི་བར་འདུག་རྒྱུ་རེད། གང་ཞིག་ནས་སྐྱེས་ཀྱང༌། སོ་སོའི་ཕུང་བོའི་གྲུབ་ཆ་དེ་བོད་གངས་ཅན་པའི་ཁུ་ཁྲག་ཡིན་སྟབས། མ་ཤི་བར་བོད་པ་ཞེས་པའི་མིང་དེ་འཁྲུ་རྒྱུ་ཡོད་པ་མ་རེད། དེར་བརྟེན་བོད་པ་ཞིག་ཡིན་པ་ནས་མ་ཤི་བར་དུ་བོད་སྤྱི་བའི་འགན་དེ་འཁྲི་ཡོད། དུས་ནམ་ཡང་བོད་སྤྱི་བའི་དོན་དག་བརྗེད་ཐབས་ཡོད་པ་མ་རེད། ད་ལྟའི་བར་ཚང་མས་ཧུར་ཐག་བྱས་ཡོད་པ་རེད་ལ། ད་དུང་ཡང་ཧུར་ཐག་བྱེད་རོགས་ཟེར་རྒྱུ་ཡིན། ཞེས་གསུངས་ཡོད་པ་རེད།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
༆ ལྷན་རྒྱས་ཚོས་བཀའ་མོལ་ཤིན་ཏུ་སྙན་བོ་གསུངས་འདུག། འོན་ཀྱང་དངོས་ཡོད་ཀྱི་དོ་བདག་སོ་སོའི་སྟངས་འཛིན་འོག་ད་བར་ཁ་ཡོད་ལག་ཡོད་ཀྱི་བོད་ཀྱི་བསྟན་སྲིད་ལ་དམན་པའི་མཛད་རྗེས་ཅན་ཡོད་འགྲོ། །
སྐལ་བཟང་བཤད་
སྟངས་ཤིག་ལ་མི་དགའ། དེ་ནི་ང་ཚོའི་ཆེ་གེ་མོ་ཚོས་བོད་དོན་བཤད་སྐབས་ནང་ཆོས་གཙོ་འདོན་བྱེད་པ་ལས་མི་རགས་རང་ཉིད་ཀྱི་རྒྱལ་རབས་དང་ལོ་རྒྱུས། རྩོམ་རིག སོགས་ལ་དོ་སྣང་བྱེད་དགོས་ཞེས་བཀའ་གསུང་གནང་བ་ཤིན་ཏུ་ཉུང་། གཅིག་བྱས་ན་ལྷན་རྒྱས་ཕྱོགས་འདིར་རྒྱུས་མྱོང་མེད་པས་ཡིན་ཡང་སྲིད། ངས་བལྟས་ན། རང་མ་རིགས་ཀྱི་ལོ་རྒྱུས་ཀྱི་བླ་སྲོག་ཡལ་སོང་བའི་མི་ཞིག་དང་རང་མི་རིགས་ཀྱི་རྩོམ་རིག་གི་བླ་སྲོག་ཉམ་སོང་བའི་མི་ཞིག་གིས་ཡག་ཤོས་ཡིན་ན་མི་རིགས་འདིའི་བདེ་སྡུག་མ་བཤད་ན་ཡག་པོ་འདུག ཡིན་ཡང་། ནང་ཆོས་རྐྱང་བ་བཤད་བས་འཛམ་གླིང་འདི་ནང་པ་ཞེ་གཅིག་བཟོ་གིན་ཡིན་ཟེར་ན་གནས་ཚུལ་ཐ་དད་རེད། དེ་ང་ལ་འབྲེལ་བ་ཅི་གང་མེད།
རེ་བ་གཞན་ལ་རྒྱག་པ་ནི་སེར་མོ་བའི་གོམས་སྲོལ་ཞིག་རེད། ཡིན་ནའང་། རང་མགོ་ཨེ་ཐོན་ལྟ་རྒྱུ་ནི་སྐྱ་པོ་ཚོའི་ན་ཟུག་ཡིན། དེ་ཕྱིར་སུ་ཞིག་གིས་རེ་བ་རྒྱ་ལ་བཅོལ་དགོས་ཟེར་ང་དེར་དགག་པ་མཐའ་གཅིག་ཏུ་རྒྱག་གི་ཡིན།
བགྲོ་གླེང་ཚ་བོ་འདུག དགའ་བོ་བྱུང་། བོད་དོན་སེལ་ཕྱོགས་ཐད་ནས་ང་ཚོས་བརྒྱ་ཆ་ཇི་ལྟར་བཀར་ཀྱང་རུང་། དེ་ནི་རང་ཉིད་ཀྱི་སེམས་ཚོར་ཙམ་ལས་ད་ཡོད་ཀྱི་རྒྱལ་སྤྱིའི་ཁྲིམས་སྲོལ་དང་སྒོ་བསྟུན་བྱས་ནས་བཤད་པ་ཞིག་མ་རེད། དེང་སྐབས་རྒྱལ་སྤྱིའི་ཀྲིམས་སྲོལ་སྤྱི་དང་བྱེ་བྲག་མི་རིགས་རང་ཐག་རང་གཅོད་བྱེད་ཕྱོགས་སྐོར་ལ་གཏན་འབེབས་བྱས་པའི་སྲོལ་ཡིག་གསལ་བོ་བཏོན་ཡོད་ལ། དྲ་གྲོགས་ཚོས་གོང་གསལ་གྱི་གནད་དོན་འདི་དག་ལ་དོ་སྣང་བྱེད་ཞོར་ངེས་པར་དུ་རྒྱལ་སྤྱི་རང་བཞིན་གྱི་ཁྲིམས་སྲོལ་ཁག་ལ་ཟུར་ལྟ་བྱེད་རྒྱུ་མ་བརྗེད་རོགས།
རྒྱ་མི་རིགས་ཀྱིས་ངོ་མས་རྒྱབ་སྐྱོར་ཞིག་བྱེད་ཚེ་བརྒྱ་ཆའི་གྲངས་ཀ་དེ་ཡར་སྤར་ཆོག་མོད། ང་ལ་ཐེ་ཚོམ་ཡོད། བོད་ཀྱི་དཀའ་ངལ་རྒྱ་མིས་སེལ་རྒྱུའི་རྨི་ལམ་འདི་ངས་མཚམས་འཇོག་བྱས་ཡོད། ངས་བལྟས་ན་བོད་ཟ་འདོད་ཀྱི་ཧམ་པ་ནི་གུང་ཁྲན་ཏང་གཅིག་པོར་ཡོད་པ་མ་རེད། རྒྱ་མི་རིགས་ལ་ཧམ་པ་འདི་ཡོད་གི་རེད། ཡིན་ནའང་སྐུ་ཉིད་ནས་བསམ་ཚུལ་བཏོན་པ་དེར་ཐུགས་རྗེ་ཆེ།
སྐུ་ཞབས་ཀརྨ་དོན་གྲུབ་ལགས་ཀྱི་དབྱེ་སྟངས་འདི་ཧ་ཅང་ཡག་པོ་འདུག འདི་བསམ་བློ་གཏོང་ཕྱོགས་ཡན་གར་བ་ཞིག་ཏུ་མཐོང་། ཡིན་ནའི། བཙན་བྱོལ་བོད་མི་དང་རྒྱ་མིའི་བརྒྱ་ཆར་བརྗེ་བོ་རྒྱག་འོས་པར་སྙམ། ༡ བོད་དོན་སེལ་དགོས་ན། རྒྱ་མི་རིགས་ཀྱི་རྒྱབ་བསྐྱོར་དང་ཁ་འབྲལ་ཐུབ་མེད། ༢ ད་ལོ་བོད་པའི་གྱེན་ལངས་ལ་རྒྱ་མིས་ངོ་རྒོལ་གཞིར་བྱས་འཛམ་གླིང་ལ་བསྐྱེད་པའི་དངངས་འཚབ་ཀྱིས་དོན་དག་འདི་ངོ་འཕྲོད་ཐུབ་ཀྱི་ཡོད།
རྒྱ་རིགས་མི་དམངས་ལ་རེ་བ་རྒྱག་པ་ནི་ང་ཚོའི་རེ་བ་མཐའ་དག་གི་ནང་ནས་བརྒྱ་ཆ་ ༡༠ ལྟ་བུ་ཞིག་ཡིན་པར་འདོད། དེའི་ཕན་གྱི་བརྒྱ་ཆ་ ༥ ནི་རྒྱ་ནག་གཞུང་ལ་བཅོལ་དགོས་པ་རེད། བརྒྱ་ཆ་ ༥ ནི་མཉམ་འབྲེལ་རྒྱལ་ཚོགས་དང་ནུབ་ཕྱོགས་རྒྱལ་ཁབ་ཁག་ལ་བཅོལ་དགོས་པ་རེད། བརྒྱ་ཆ་ ༥ ནི་ཧི་མ་ལ་ཡའི་རི་རྒྱུད་ལ་བཅོལ་དགོས་པ་རེད། བརྒྱ་ཆ་ ༥ ནི་རང་བྱུང་གི་འགྱུར་ལྡོག་དང་རང་བཞིན་གྱི་བྱུང་བ་ལ་བཅོལ་དགོས་པ་རེད། རང་བཞིན་གྱི་བྱུང་བ་ནི་གོ་ལ་གཅིག་གྱུར་ལྟ་བུ་འགྲོ་བ་མིའི་སྤྱི་ཚོགས་ཁྲོད་མི་མངོན་པར་ཡོང་བཞིན་པའི་ནུས་ཤུགས་འདིའི་རིགས་ཡིན། ང་ཚོའི་ཁ་རྒྱབ་གཉིས་ཀར་འགྱུར་བ་སྣ་ཚོགས་ཤིག་ཡོང་གི་འདུག་པ་ལྟ་བུ་རེད། བརྒྱ་ཆ་ ༡༠ ནི་རྒྱལ་སྤྱི་རིམ་པའི་ཚོགས་པ་དང་སྒྲིག་འཛུགས་ཁག་ལ་བཅོལ་དགོས།༼མཉམ་འབྲེལ་རྒྱལ་ཚོགས་འདིའི་ནང་ཚུད་མི་དགོས།༽ བརྒྱ་ཆ་ ༦༠ ནི་བོད་མི་རང་ལ་ཐུག་འདུག འདིའང་བགོས་ན་བརྒྱ་ཆ་ ༣༥ གཞིས་ལུས་མི་དམངས་དང་བརྒྱ་ཆ་ ༢༥ བཙན་བྱོལ་བོད་མི་ཚོར་བཅོལ་དགོས། འདི་ལྟར་རེ་བ་བརྒྱ་ཆའི་བརྒྱ་ཐམ་པ་ངོས་ཟིན་པར་བྱས་ཏེ་སོ་སོར་ཁུར་དུ་བབ་པའི་ལས་ལ་འཇུག་པར་རིགས་སོ།
ཐུགས་རྗེ་ཆེ་ཧ་ཅང་ཡག་པོ་འདུག