བོད་གཞུང་གི་རྒྱབ་དཔུང་ཡོད།

བོད་ཕྱོགས་སུ་འཁོར་བའི་རྒྱ་ནག་གི་གདོང་མདོག་ཇེ་ནག་ཏུ་སོང་ཞིང༌། ཨོ་རྩེད་ཀྱིས་བསུས་པའི་པེ་ཅིན་གྱི་མཚར་མདངས་ཇེ་རྒྱས་སུ་གྱུར། བོད་གཞུང་གིས་བསྐུར་བའི་རྒྱལ་སྤྱིའི་རེ་དོགས་མག་མོག་ཏུ་འགྱུར་བཞིན་པའི་སྐབས་འདིར་བོད་གཞུང་མང་ཛ་དྲག་ལས་འགུལ་ཚོགས་ཆུང་གིས་ལས་འགུལ་སྣ་ཚོགས་ཤིག་སྤེལ་རྒྱུ་ཡིན་ཟེར།

བོད་ཀྱི་རྒྱལ་ས་ལྷ་སའི་མི་དམངས་ཀྱིས་གཞི་རྒྱ་ཆེ་བའི་གྱེན་ལངས་བྱས་ཏེ། ཟླ་ངོ་ཧྲིལ་བོ་ ༥ འཁོར་བའི་ཉིན་མོ་དང༌། རྒྱ་ནག་པེ་ཅིན་དུ་རྒྱལ་སྤྱིའི་རྩེད་འགྲན་འཚོགས་ཏེ། ཉིན་ ༦ འགྲོ་བཞིན་པའི་ཟླ་འདིའི་ཕྱི་ཚེས་ ༡༤ ཉིན་གྱི་སྔ་དྲོ་ཆུ་ཚོད་ ༡༡ ཐོག བཙན་བྱོལ་བོད་གཞུང་བཀའ་སྤྱི་གཉིས་ལས་གྲུབ་པའི་བོད་གཞུང་མང་ཛ་དྲག་ལས་འགུལ་ཚོགས་ཆུང་གིས་རྒྱ་ནག་དྲག་པོའི་དཔུང་དམག་གིས་བོད་ནང་ཚད་ལས་བརྒལ་བའི་མནར་གཅོད་མུ་མཐུད་གཏོང་བཞིན་ཡོད་པ་དང༌། ལྷག་པར་དུ་ཨོ་ལིམ་པིག་རྩེད་འགྲན་རྗེས་སུ་བོད་ནང་སྔར་ལས་ལྷག་པའི་དམ་དྲག་སྡུག་སྦྱོང་གཏོང་རྒྱུའི་ཉེན་ཁ་འདུག་སྟབས། འཛམ་གླིང་གང་སར་གནས་བའི་བོད་རིགས་ཡོངས་ཀྱིས་ས་གནས་ཛ་དྲག་ཚོགས་ཆུང་གི་འགན་འཁུར་འོག ཟས་བཅད་ངོ་རྒོལ་དང་ཞི་བའི་གོམ་བགྲོད། རྔམ་སྟོན་ཁྲོམ་སྐོར། རྐྱང་ཕྱག དགེ་འདུན་པའི་ཞི་བའི་གོམ་བགྲོད། གསར་འགོད་གསལ་བསྒྲགས། མར་མེ་ཁྲོམ་སྐོར། གཏམ་བརྗོད་འཁྲབ་སྟོན། ས་གནས་དཔོན་རིགས་ཀྱིས་བོད་དོན་སྐོར་གསུང་བཤད། བགྲོ་གླེང་དྲིལ་བསྒྲགས་སོགས་བྱས་ཏེ་རྒྱ་ནག་གི་བྱེད་སྤྱོད་དེ་རིགས་ལ་ངོ་རྒོལ་གྱི་ལས་འགུལ་ཤུགས་ཆེར་སྤེལ་དགོས་ཞེས་གསར་འགོད་གསལ་བསྒྲགས་བསྐྱངས་སོང༌།

སྐབས་དེར་བོད་མི་མང་སྤྱི་འཐུས་ཚོགས་གཙོ་དང་གཞུང་མང་ཛ་དྲག་ཚོགས་ཆུང་གི་ཚོགས་གཙོ་གཅིག་ལྕོགས་ཀརྨ་ཆོས་འཕེལ་ལགས་ཀྱིས་གསུངས་དོན། བོད་ནང་གི་ད་ལྟའི་དཀའ་ངལ་མ་སེལ་བར་དུ་ང་ཚོ་བྱེས་འབྱོར་རྣམས་ནས་ལས་འགུལ་མུ་མཐུད་སྤེལ་རྒྱུ། ང་ཚོའི་ཁུར་དུ་འཁྲི་བའི་ལས་འགན་ཡིན་སྟབས། འཚེ་མེད་ཞི་བ་དང༌། གནས་ཡུལ་རྒྱལ་ཁབ་ཀྱི་ཁྲིམས་དང་མ་འགལ་བའི་ཐོག ནུས་ལྡན་གྱི་ལས་འགུལ་སྣ་ཚོགས་སྤེལ་དགོས། ལྷག་པར་དུ་ཨ་རི་དང་སུད་སི་གཙོས་ནུབ་ཕྱོགས་རྒྱལ་ཁབ་ཀྱི་བོད་དོན་རྒྱབ་སྐྱོར་ཚོགས་པ་ཁག་དང་མཉམ་འབྲེལ་ཐོག་ལས་འགུལ་གཞི་རྒྱ་ཆེན་པོ་སྤེལ་དགོས། ཡུན་རིང་ལ་ལས་འགུལ་སྤེལ་དགོས་སྟབས། མི་རེ་ཟུང་ལ་བསུན་གཙེར་ཡོང་ངེས་མོད། གཞིས་ལུས་རྒྱ་ཆེ་མི་མང་གིས་ཤི་རྒྱུ་དང༌། བཙོན་འཇུག རྡུང་རྡེག་ཕོགས་རྒྱུ་ཤེས་བཞིན་རྒྱལ་ཁབ་དང་མི་རིགས་ཀྱི་ཆེད། རང་ཉིད་བློས་གཏོང་གིས་ཞི་བའི་ངོ་རྒོལ་བྱེད་ཀྱིན་པ་སྙིང་ལ་བཅིངས་ཏེ། ཁོང་རྣམ་པར་གདུང་སེམས་མཉམ་སྐྱེད་ཀྱིས་རྒྱབ་དཔུང་དུ། རང་དབང་ལུང་པར་ཡོད་པའི་བོད་རིགས་སྤུན་ཟླ་རྣམས་ཀྱིས་རང་དོན་རང་གཅེས་ཀྱིས་ཞི་བའི་ངོ་རྒོལ་བར་མ་ཆད་པར་སྤེལ་དགོས་ཞེས་གསུངས་སོང༌།

གཞན། ཕྱི་ཟླ་ ༨ ཚེས་ ༣༠ རེས་གཟའ་སྤེན་པའི་ཉིན་གྱི་སྔ་དྲོ་ཆུ་ཚོད་ ༧ པ་ནས་ཕྱི་དྲོ་ཆུ་ཚོད་ ༧ བར། ཆུ་ཚོད་ ༡༢ རིང་བོད་རིགས་དང་བོད་དོན་རྒྱབ་སྐྱོར་བ་རྣམས། འཛམ་གླིང་ཁྱོན་ཡོངས་ཀྱི་ཞི་བདེ་ལ་དགའ་བའི་མི་དམངས་ཡོངས་ཀྱིས། ༧སྤྱི་ནོར་གོང་ས་མཆོག་གི་སྐུ་ཚེ་བརྟན་ཞིང་མཛད་འཕྲིན་རྒྱས་པ་དང༌། ད་ལོ་བོད་ནང་བསྟན་སྲིད་མི་རིགས་ཀྱི་དོན་དུ་ལུས་སྲོག་དོར་བའི་འདས་པོ་རྣམས། ད་ལྟ་རྒྱ་དམག་གི་དྲག་གནོན་འོག་མནར་གཅོད་མྱོང་བཞིན་པ། དེ་བཞིན་འཛམ་གླིང་ཡོངས་འཚེ་མེད་ཞི་བདེར་སྐྱོད་ཆེད། ཟས་བཅད་སྨྱུང་གནས་སྲུང་དགོས་པ་དང༌། དེ་དང་མཉམ་དུ་ཆོས་རྒྱུད་ཆེན་པོ་བཞི་དང་གཡུང་དྲུང་བོན་དང་བཅས་བའི་གདན་ས་ཁག་དང༌། བཙུན་དགོན་སོགས་ཆོས་སྡེ་སོ་སོའི་ཐུན་མོང་མ་ཡིན་པའི་གལ་ཆེའི་སྒྲུབ་མཆོད་དང་ཆོ་ག་གང་ཡིན་ཉམས་བཞེས་ཐོག ༧རྒྱལ་བའི་གསོལ་འདེབས་ཞབས་བརྟན་དང་གུ་རུའི་ཐུགས་དམ་གནད་སྐུལ། གསོལ་འདེབས་བདེན་པའི་རྔ་སྒྲ། བདེན་ཚིག་སྨོན་ལམ། སྒྲོལ་མ། མ་ནི་ཡིག་དྲུག་གང་མང་ཐོག་ལྷ་མོ་དང༌། གནས་ཆུང་འཕྲིན་སྐུལ་བཅས་ཀྱི་གསོལ་འདེབས་སྨོན་ལམ་གནང་དགོས། དེ་ཡང་གདན་ས་དང་བཙུན་དགོན་རྣམས་ནས་སོ་སོའི་ཚོགས་ཆེན་དང༌། གྲྭ་ཚང་གི་འདུ་ཁང་ནང་དུ་འཚོགས་དགོས་བ་དང༌། སློབ་གྲྭ་ཁག་གི་སློབ་ཕྲུག་དགེ་ལས་ཡོངས་ཚོགས་ཁང་ནང་འཚོགས་དགོས། བོད་མིའི་སྡོད་སྒར་ཁག་སྤྱི་ཁང་དུ་འཛོམས་དགོས་ཤིང༌། བོད་མི་ཁ་ཐོར་མཉམ་འཛོམ་བྱ་ཡུལ་མེད་རིགས་རྣམས་གང་ཐུབ་ཀྱིས་སོ་སོའི་ཁྱིམ་མཚེས་གཡས་གཡོན་མཉམ་རུབ་ཀྱིས་འཚོགས་དགོས་ཞེས་གསལ་བསྒྲགས་བསྐྱངས་སོང༌།