དབུས་ཕྲུག་ཚེ་རིང༌།
འདི་ནི་སྐབས་དང་དུས་ལ་བབས་ཤིང༌། ལོ་རྒྱུས་རང་བཞིན་གྱི་བོད་ཀྱི་དམིགས་བསལ་ཚོགས་ཆེན་ཞིག་ཡིན་སྟབས། བོད་མི་ཡིན་ནོ་ཅོག་གིས་ལེགས་ཉེས་ལ་མ་ལྟོས་པར་རང་འཁྲིའི་འགན་དབང་ཁུར་ཏེ་ཁ་སང་དང་དེ་རིང༌། འབྱུང་འགྱུར་གྱི་བོད་ཀྱི་རྩ་དོན་དང་འབྲེལ་བའི་ཐོག་བསམ་ཚུལ་ཐུང་ངུ་ཞིག་ལས་མེད་ཀྱང་དངོས་ཤུགས་གང་ནས་ཀྱང་བརྒྱུད་སྤྲོད་བྱེད་དགོས། ཁ་སང་དེ་རིང་གནས་ཚུལ་འདིའི་ཐོག་སོ་སོའི་ལྟ་བ་དང་མཐུན་པའི་གླེང་སློང་མང་དག་ཅིག་རྡ་སའི་གནས་ཡུལ་གང་སར་བྱེད་ཀྱིན་ཡོད། ལྷག་དོན་གཞུང་འབྲེལ་མ་ཡིན་པའི་ཚོགས་པ་ཁག་གིས་བསམ་ཚུལ་ཤུགས་ཆེར་བཏོན་དང་འདོན་བཞིན་ཡོད་པ་རྣམས་སྒྲུབ་དགོས་ངེས་ཤིག་ཡིན། གལ་ཏེ་ཚོགས་ཐོག་འདིར་མི་དམངས་རང་བཞིན་གྱི་ཚོགས་ཆུང་རྣམས་ཀྱི་བསམ་ཤོག་ནང་བརྒྱ་ཆ་དྲུག་ཅུ་བདུན་ཅུ་ལྷག་གིས་བོད་རང་བཙན་དང་རང་ཐག་རང་གཅོད་ཀྱི་བསམ་ཚུལ་སླེབས་ཡོད་ན། ད་ལྟའི་བོད་གཞུང་གི་སྲིད་བྱུས་ལངས་ཕྱོགས་ཐད་བསམ་གཞིག་མི་གནང་ཐབས་མེད་དུ་གྱུར་ཡོད། དེ་ནི་ང་ཚོའི་གཞུང་འདི་མི་དམངས་ཀྱིས་སྐྱོང་བའི་མང་གཙོའི་གཞུང་ཞིག་ཡིན་པས་རེད། དེ་མིན་ཚོགས་ཆེན་འདི་གཞུང་གི་རྩ་བའི་སྲིད་ཇུས་གཞིར་བཞག་ཐོག་བསམ་ཚུལ་བསྡུ་རྒྱུ་ཙམ་ཞིག་ཡིན་ན། ཚོགས་ཆེན་འདི་ཉིད་ཀྱི་བརྗོད་གཞིར་ཚད་བཀག་ཡོད་པར་བརྟེན་མི་དམངས་འཐུས་ཚབ་ཀྱི་ངོ་བོར་འགྱུར་དཀའ་བ་ཡིན། ཡིན་ནའང་འདི་ལྟ་བུའི་བསམ་ཚུལ་གླེང་བར་ལས་སླ་པོ་རྩ་བ་ནས་མེད། ད་ལྟ་དང་འབྱུང་འགྱུར་བོད་རྒྱ་ཆེའི་མི་མང་གི་བདེ་སྡུག་དང་འབྲེལ་བ་ཡོད་སྟབས་འགན་ལེན་བྱེད་དགོས་པ་ཡིན། དེ་བཞིན་སྤྱི་ལོ་༡༩༥༩ ནས་སྤྱི་ལོ་༡༩༧༩ བར་དང་དེ་ནས་སྤྱི་ལོ་༢༠༠༢ ནས་དེ་རིང་བར་གཞུང་གི་ལངས་ཕྱོགས་ཁག་གཉིས་པོར་འཐུས་ཚང་གཟབ་ནན་གྱིས་བལྟ་ཞིབ་དང༌། གཞུང་འབྲེལ་མ་ཡིན་པའི་ཚོགས་པ་ཁག་སོ་སོ་བྱུང་ནས་དེ་རིང་བར་གྱི་བོད་རང་བཙན་གྱི་ལས་འགུལ་ཁྲོད། ཕན་ནུས་ཇི་བྱུང༌། རྒྱལ་ཁབ་ཁག་དང་མི་དམངས་རང་བཞིན་གྱི་རྒྱབ་སྐྱོར་གྱི་ནུས་ཤུགས་སོགས་ལ་དབྱེ་ཞིབ། དེ་མིན་རྒྱལ་སྤྱི་དང་རྒྱ་ནག་སྤྱི་ཚོགས་ཀྱི་དམག་དོན་དང༌། དཔལ་འབྱོར་ཚན་རྩལ་མི་འབོར་སོགས་ཀྱི་གནས་བབ། དཔེར་ན་རྒྱ་ནག་གི་ཕྱོགས་ནས་ཐེ་ཝན་ལྟ་བུར་མཚོན་ན་དུས་རབས་ཉི་ཤུའི་ལོ་རབས་བདུན་ཅུའི་འགོར་རྒྱལ་ཚོགས་ནས་ཐེ་ཝན་གྱི་གདན་ཐོབ་ཤོར་བའི་རྗེས་ཐེ་ཝན་རང་བཙན་ལ་རྒྱབ་སྐྱོར་བྱེད་མཁན་རྒྱལ་ཁབ་མི་ཉུང་བ་ཞིག་ལྷག་ཡོད་རིགས་ལས་ད་ཆ་རྒྱ་ནག་གི་ཤུགས་རྐྱེན་འོག་ལོ་རེ་ནས་ཉུང་ངུར་འགྲོ་བ་དང༌། ཉེ་ཆར་ཇོར་ཇི་ཡའི་རྩོད་རྙོག་སྐབས་ཨ་རི་གཙོས་པའི་ཡུ་རོབ་མཐུན་ཕྱོགས་རྒྱལ་ཁབ་ཚོས་ཇོར་ཇི་ཡའི་མངའ་ཁུལ་ནས་རང་བཙན་བྱེད་མི་རང་སྐྱོང་གི་ས་ཁུལ་དེ་གཉིས་རྒྱལ་ཚོགས་ཀྱི་སྟེང་ཇོར་ཇིའི་མངའ་འོག་ཏུ་འཁོད་པའི་རྒྱུ་མཚན་དག་མིན་ཇི་ལྟར། ས་ཁུལ་དེ་གཉིས་ཇོར་ཇི་ཡ་ནས་ཁ་བྲལ་ན་མི་འགྲིགས་ཞེས་ཚོར་ཤུགས་རྣོན་པོས་དགག་རྒྱག་ཚ་ནན་བྱས་ཡོད། རྒྱབ་ལྗོངས་ནི་ཇོར་ཇི་ཡ་བྱང་ཆིངས་དམག་དོན་སྒྲིག་འཛུགས་ནང་འཛུལ་ཞུགས་བྱ་རྒྱུ་ཡིན་པ་དང་ཡོ་རོབ་རྒྱལ་ཁབ་གཞན་དུ་ཤུགས་རྐྱེན་ངན་པ་མི་འབྱུང་བའི་ཆེད་རེད། སྐབས་དེར་རྒྱ་གཞུང་གིས་མགོ་ན་ན་བསམ་གཞིག་བྱས་ཏེ་ཕྱོགས་གཉིས་ཀར་མི་གནོད་པའི་ཟློས་གར་འཁྲབ་པ་ཡིན། མདའ་གཅིག་གིས་གླ་བ་གཉིས་གསོད་པར་རྒྱུ་མཚན་མང་དག་ཡོད། དེས་ན་དེང་འཛམ་གླིང་ནང་རང་ཉིད་ལ་སྟོབས་ཤུགས་ཡོད་ན་དྲང་བདེན་ཟེར་བ་ཁ་ཙམ་ལས་ཕྱིར་མངོན་རྒྱུ་དཀའ་བས་ན། སྔ་འདང་ཕྱི་འདང་ལེགས་པོ་བརྒྱབ་ནས་བསམ་ཚུལ་གླེང་དགོས་པ་ལས་འགན་ཁུར་མི་དགོས་པའམ་ནུས་པ་མེད་བཞིན་དུ་ཡོད་མདོག་མདོག་གིས་བཤད་ན། མེ་དོང་ནང་དུ་ལྷུང་ཡོད་པའི་བོད་མི་དམངས་དང༌། རིག་གཞུང་ཁོར་ཡུག་རྣམས་མིང་གི་ལྷག་མར་འགྱུར་ངེས་རེད། ཚོགས་ཆེན་འདིར་ལྟ་གྲུབ་ཙམ་རྩོད་གླེང་བྱེད་རྒྱུ་མིན་གཤིས། སོ་སོའི་ལངས་ཕྱོགས་འདྲ་མིན་ཡོད་པ་དེ་དག་ལེགས་སྒྲུབ་ཡོང་ཆེད་ཐབས་ལམ་འདི་དང་འདི་ཡོད་ཅེས་གདེང་ཚོད་ལྡན་པའི་ངང་རྒྱུ་མཚན་ཡང་དག་འདྲེན་རྒྱུ་དགོས་པ་ཡིན། དེ་མིན་རང་བཙན་ལྟ་བུར་མཚོན་ན། བོད་རང་བཙན་རེད། བོད་དུ་རང་བཙན་ཞེས་སྐད་འབོད་བྱེད་ཀྱི་འདུག དེ་ང་ཚོའི་ཐོབ་ཐང་དང་དམིགས་ཡུལ་ཡིན་ཞེས་པས་ཅི་ཡང་ཁུངས་འཁྱོལ་ཐབས་མེད། གཙོ་དོན། རང་བཙན་འཚེ་མེད་ཞི་བས་ལེན་རྒྱུ་ཡིན་ནམ། ཞི་དྲག་གཉིས་ཐོག་ནས་རྩོད་རྒྱུ་ཡིན། བློ་གཅིག་སེམས་གཅིག་གིས་བློས་གཏོང་བྱེད་ཕོད་པའི་མི་འབོར་དང༌། དཔལ་འབྱོར། ཤེས་ཡོན་གྱི་ནུས་ཤུགས་གང་འདྲ་འདུག ཚེ་སྲོག་དེ་ཙམ་བློས་གཏོང་བྱས་པའི་འགྲུབ་འབྲས་ལ་སྔོན་དཔགས་ཇི་ཙམ་ཡོད། དེ་དག་གི་རྒྱབ་ལྗོངས་ལ་བསམ་གཞིག་ནན་མོ་བྱེད་པ། འཛམ་གླིང་ནང་འཚེ་བ་མེད་པའི་རང་བཙན་ལེན་སྟངས་ཀྱི་ལོ་རྒྱུས་ཀྱི་ཟིན་ཐོར་སྙེག་པར་ལས་སླ་པོ་ནམ་ཡང་མེད། ང་ཚོས་རྩ་དོན་རྩོད་སྟངས་བཞིན་བརྩད་དེ་ང་ཚོའི་གནས་བབ་དང་མཚུངས་པར་རང་བཙན་རེག་པའི་དཔེ་མཚོན་གྱི་རྒྱལ་ཁབ་སུ་འཇོག་རྒྱུ་ཡིན། ལྷག་དོན་ཕྱི་ལོགས་སུ་ལས་འགུལ་སྤེལ་ནས་རང་གི་རྒྱལ་ཁབ་ནང་རང་བཙན་ཐོབ་པའི་རྒྱལ་ཁབ་ཡོད་དམ་མེད། མེད་ན་ཇི་ལྟར་བྱ་རྒྱུ་ཡིན། སོགས་ཀྱི་ཐོག་བསམ་བློ་དྲུག་གསུམ་བཅོ་བརྒྱད་གཏོང་དགོས། དེ་མིན་དབུ་མའི་ལམ་གྱི་ཐོག་ད་ལྟའི་བགྲོད་ལམ་དེའམ་དེ་མིན་འཐབ་རྩོད་ཀྱི་བརྒྱུད་རིམ་ཁྲོད་ཉམས་མྱོང་ལས་བྱུང་བའམ་དེ་ལས་གཞན་རྩ་དོན་སྒྲུབ་ཕྱོགས་ཐད་བསམ་ཚུལ་ག་ཚོད་ཀྱི་མང་བ་ཡོད་ཀྱང་དེ་རྩིས་ཀྱིས་ལས་འགུལ་སྤེལ་ཕྱོགས་ཐད་གསོན་ཤུགས་རྒྱས་ངེས་ཡིན། དེ་འབྲེལ་བོད་ནང་མཉམ་འབྲེལ་ཐོག་ཤེས་ཡོན་དང་ཁོར་ཡུག་ཆེད་དཔལ་འབྱོར་གྱི་རྒྱབ་སྐྱོར་ཐུབ་ཐབས། ཕྱོགས་གཉིས་ཀའི་སྐུ་ཚབ་ཚོགས་པའི་སྤུས་ཚད་མཐོར་འདེགས་སོགས་དོན་གནད་འདི་དག་སྐོར་སྔ་རོལ་ནས་གྲ་སྒྲིག་ཚགས་ཚུད་དགོས་རྒྱུ། གཞན་དེ་ལས་མང་བ་ཞིག་བོད་རྒྱ་ཞི་མོལ་སྐུ་ཚབ་ཐེངས་བརྒྱད་པ་ཕེབས་གྲུབ་རྗེས་བསམ་ཚུལ་རྙེད་པར་ངེས། ཚོགས་མིའི་སྒྲུབ་ཆའི་སྟེང་གཞུང་དང་ཚོགས་པ་ཁག་འགའ་ཕུད་རྒྱ་བལ་འབྲུག་གསུམ་དང༌། ཕྱི་རྒྱལ་རྣམས་སུ་མི་སྣ་ལྔ་བཅུ་ལས་གདན་ཐོབ་མེད་པ་ནི་ཉུང་དྲག་པར་སེམས། གཞན་ངེས་པར་དུ་གདན་ཞུ་གནང་དགོས་པ་ཞིག་ལ་གཞུང་དང་ལངས་ཕྱོགས་མཐུན་མིན་ཇི་ལྟར་ཡང་བློ་བཟང་སེངྒེ་ལགས་དང་པདྨ་མ་འབུམ། ཚེ་རིང་ཤཀྱ་འཇམ་དབྱངས་ནོར་བུ་སོགས་ཆེད་ལས་མཁས་དབང་རྣམས་གདན་ཞུ་དང༌། ཁོང་རྣམས་ལ་ཚོགས་ཐོག་ཏུ་གཏམ་བཤད་ཀྱི་གོ་སྐབས་ངེས་པར་དུ་འབུལ་དགོས་པ་ཡིན། རྒྱལ་ཁབ་དང་མི་རིགས་གང་དུ་ཡང་ཤེས་ཡོན་ཅན་ནི་ནོར་བུ་ཡིན་པས་རེད། དོན་སྙིང༌། མགྱོགས་མྱུར་དམིགས་བསལ་ཚོགས་ཆེན་སྟེང༌། བོད། འཆི་ལ་ཉེ་བའི་ད་ལྟའི་ཛ་དྲག་གི་དུས་བབ་འདིར་རང་རེའི་རེ་སྒུག་གི་དོན་གནད་འདི་གང་མྱུར་ཐག་ཆོད་ཡོང་བའི་ཐབས་ལམ་ལེགས་པོ་ཞིག་ངེས་པར་དུ་འཚོལ་དགོས།།
༡ བཀའ་ཁྲིས་དབུ་མའི་ལམ་གྱི་རྩ་འཛིན་གྲོས་ཆོད་ནུས་མེད་དུ་གྱུར་ཚུལ་དང་མི་རིགས་ས་གནས་རང་སྐྱོང་ལག་ལེན་དུ་འཁེལ་ཐུབ་པའི་གདེངས་ཚོད་བཤད་ཐུབ་ཀྱི་ཡོད་དམ།
དོན་དག་ཁ་ཤས་འདུག
༡ བཀའ་ཁྲིས་དབུ་མའི་ལམ་གྱི་རྩ་འཛིན་གྲོས་ཆོད་ནུས་མེད་དུ་གྱུར་ཚུལ་དང་མི་རིགས་ས་གནས་རང་སྐྱོང་ལག་ལེན་དུ་འཁེལ་ཐུབ་པའི་གདེངས་ཚོད་བཤད་ཐུབ་ཀྱི་ཡོད་དམ།
༢ ཏཱ་ལའི་བླ་མས་དབུ་མའི་ལམ་གྱི་མཐའ་ཐུག་གི་ཐག་གཅོད་མི་མང་ལ་ཡོད་ཅེས་པ་ནི་༼རང་ཐག་རང་གཅོད་༽ཆགས་ཀྱི་ཡོད་དམ། རང་ཐག་རང་གཅོད་ལ་དགེ་མཚན་གསུམ་ཡོད།
༼༡༽པེ་ཅིང་གིས་རང་ཐག་རང་གཅོད་ངོས་ལེན་ཡོད་པའི་རྒྱལ་སྤྱིའི་ཡིག་ཆ་གཉིས་མིང་རྟགས་བཀོད་ཡོད་པས། འདི་བོད་མིས་ཁྲིམས་ལུགས་ཀྱི་རྒྱབ་བརྟེན་དུ་བཟུང་ཆོག་པར་མ་ཟད། པེ་ཅིང་གིས་ཀྱང་དེར་ཞཱ་མོ་གང་བྱུང་འདི་བྱུང་དུ་གཡོགས་ཐུབ་ཀྱི་མེད།
༼༢༽ པེ་ཅིང་གིས་རང་ཐག་རང་གཅོད་ངོས་ལེན་ཡོད་པའི་རྒྱལ་སྤྱིའི་ཡིག་ཆ་གཉིས་མིང་རྟགས་བཀོད་ཡོད་པའི་ཆ་ནས་རྒྱལ་སྤྱིའི་སྤྱི་ཚོགས་ལ་པེ་ཅིང་གིས་ཁྲིམས་སྲོལ་དེ་རིགས་ལག་ལེན་དོན་འཁྱོལ་ཡོང་བར་བསྐུལ་འདེད་བྱེད་པའི་འོས་འགན་ཡོད་ལ། ཁ་གཡར་སའང་གཙོ་བོ་ཞིག་ཆགས་ཡོད།
༼༣༽ ལམ་ཁ་འདི་གདམ་པ་ཡིན་ན། ད་ལྟའི་བོད་མིས་མ་འོངས་པའི་མི་རབས་ཀྱི་ལམ་ཁ་འགག་ཏུ་བཅུག་མེད། དེ་ལས་ལྡོག་ན། མ་འོངས་མི་རབས་ལ་ནུས་པ་ཡོད་ཀྱང་གཞི་འཛིན་ས་འཆོལ་ཟིན་པའི་དཀའ་ངལ་ཡོང་གི་ཡོད།
༣ སྐུ་ཚབ་ཚོགས་པ་ཤར་རྒྱག་ཏུ་ཐའི་ཝན་ནང་བཞིན་༼སྐམ་ས་ཚོགས་པ༽ལྟ་བུའི་ངོ་བོར་བསྒྱུར་རན་ནམ།
ད་ཤོད་ཡཱ་སྨྱུག་འཛིན་པ་ཚོ། པཱ་ལེ་བ་ལ་གནང་དོགས་མེད།