བོད་གཞུང་དམངས་ཀྱིས་༧གོང་ས་མཆོག་ལ་བརྟན་བཞུཊ།

ལྔ་བཅུའི་དུས་དྲན་མཛད་སྒོའི་དབུ་འཛུགས་དང་བསྟུན་ཏེ་བོད་གཞུང་དམངས་ལྷ་མི་ཡོངས་ཀྱིས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུས་ཡོད་ལ། ༧གོང་ས་མཆོག་གིས་ཀྱང་ཐུགས་ཧ་ཅང་རྒྱས་པའི་ངང་ནས། ཁྱེད་ཅག་གིས་བློ་བདེ་བོ་བྱོས། ངས་ད་དུང་ཕན་པ་རིང་བོ་གཏོང་གིན་ཡོད། ཅེས་ཞལ་བཞེས་གནང་ཡོད་པ་རེད།

བོད་མིའི་ཞི་བའི་གྱེན་ལངས་དང་གཞུང་དམངས་བཙན་དུ་འབྱོར་ནས་ལོ་ངོ་ཧྲིལ་བོ་ ༥༠ འཁོར་བའི་དུས་དྲན་མཛད་སྒོ་མགོ་འཛུགས་དང་མཇུག་སྡོམ་གཉིས་ལ་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཐུགས་གཏན་འཁེལ་ཡོད་པ་ལྟར། དེ་རིང་ཞོགས་པ་ཆུ་ཚོད་ ༨ སྟེང༌། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་ཏུ་བོད་གཞུང་དམངས་ལྷ་མི་ཡོངས་ཀྱིས་བོད་མིའི་ཆོས་སྲིད་གཉིས་ཀྱི་དབུ་ཁྲིད། རྒྱལ་དབང་སྐུ་ཕྲེང་བཅུ་བཞི་བ་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་བསྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་གི་སྐུའི་གསང་བ་གསུམ་ལ་ཚུལ་བསྟན་བར་ཆད་ཀྱི་རིགས་ཞར་ཡང་མི་བཞེས་པར་སྐུ་ཁམས་རྡོ་རྗེ་ཆོས་ཀྱི་ངོ་བོར་བརྟན་ཅིང༌། ཐུགས་ཀྱི་བཞེད་དགོས་མཐའ་དག་དགག་མེད་ལྷུན་འགྲུབ་ཡོང་ཆེད་བརྟན་བཞུགས་རྒྱས་པ་ཞིག་བསྟར་འབུལ་ཞུས་ཡོད།

སྐབས་དེར་༧གོང་ས་མཆོག་གིས་མི་དམངས་ལ་བཀའ་སློབ་བསྩལ་དོན། དེ་རིང་བརྟན་བཞུགས་ཐོག་ཕེབས་པ་ཚོ་དང༌། འདི་བརྒྱུད་ནས་འཛམ་གླིང་གང་སར་གནས་པའི་གངས་ཅན་པ། ལྷག་པར་ཏུ་བོད་གངས་ཅན་ལྗོངས་སུ་སྡུག་བསྔལ་དང་དངངས་སྐྲག་ངང་སྡོད་མཁན་ཚོ་དང༌། སྡུག་སྦྱོང་མནར་གཅོད་འོག་འདས་གྲོངས་སུ་ཕྱིན་པ་དེ་དག་གི་སེམས་ཀྱི་རེ་བ་སོགས་ནུས་པ་གཅིག་ཏུ་སྒྲིལ་ཏེ་བརྟན་བཞུགས་གནང་བ་རེད། དེར་ངོས་ནས་ཐུགས་རྗེ་ཆེ་ཟེར་རྒྱུ་ཡིན། དེ་བཞིན་འཛམ་གླིང་འདིའི་སྒང་གི་དྲང་བདེན་ལ་དགའ་བ་དང་ལྷག་བསམ། གཞན་ཕན་གྱི་བསམ་པ་ཅན་ང་རང་གི་ངོ་ཤེས་པ་ཕལ་ཆེར་མང་པོ་ཞིག་གིས་འདུན་པ་གཏོང་གིན་ཡོད་པ་རེད་བསམ་ཡོད། དེ་བཞིན་དུ་རྒྱ་ཡུལ་གྱི་ཆོས་གྲོགས་ཕོ་མོ་ཚོའི་ནང་ནས་ཀྱང༌། ང་རང་ལ་དངོས་སུ་ཐུག་མཁན་མང་པོ་ཞིག་ཡོང་གིན་འདུག་ལ། ལན་བཏང་ཡོང་མཁན་ཡང་མང་པོ་ཞིག་འདུག

ཚང་མའི་འདུན་པ་དང་དད་པ། དམ་ཚིག་བསྲེས་ལྷད་མེད་པ་བྱས་ཏེ། འདུན་པ་གཅིག་ཏུ་སྒྲིལ་ནས་དེ་རིང་འདིར་སྨོན་ལམ་རྒྱག་གིན་ཡོད་སྟབས། ལུས་པོ་དངོས་སུ་མེད་ནའང་བསམ་པ་དེའི་ཐོག་ལ་བཏང་བསྡད་ཡོད་པ་ཚང་མ་ལ་ཐུགས་རྗེ་ཆེ་ཟེར་རྒྱུ་ཡིན།

དེ་རིང་འདིར་བོད་ལྗོངས་ལྷ་མི་སྤྱིའི་བརྟན་བཞུགས་གནང་བ་རེད། ས་སྐྱ་བདག་ཁྲི་རིན་པོ་ཆེ་དབུ་བཞུགས་གནང་བའི་ཐོག ཐུགས་སྨོན་བདེན་ཚིག་གནང་གིན་ཡོད་པ་རེད། ནམ་རྒྱུན་ནས་ང་རང་གིས་འདུན་པ་རིང་པོ་གཏོང་གིན་ཡོད། ལྷག་པར་ཏུ་སེར་སྐྱ་ལྷ་མི་ཚང་མས་འདུན་པ་གཅིག་སྒྲིལ་ཐོག་ནས་ནུས་པ་འདོན་གྱིན་ཡོད་ལ། ལྷག་པར་དུ་ཛ་དྲག་གི་ཁ་ཐུག་ལ་དད་པ་དང་འདུན་པ། ལྷག་བསམ། དམ་ཚིག་སོགས་གཅིག་ཏུ་སྒྲིལ་ནས་ཡོང་གི་ཡོད་སྟབས། ང་རང་གི་ངོས་ནས་ཀྱང༌། དེ་བཞིན་བྱས་ཏེ་ལྷག་བསམ་བསྐྱེད་དེ་ཕན་པ་རིང་པོ་ད་དུང་ཡིན་ནའང་སེམས་ཤུགས་བསྐྱེད་དེ་སྨོན་ལམ་རྒྱག་གི་ཡིན། ཁྱེད་རང་ཚང་མ་ཐུགས་བདེ་བོས་ངང་བཞུགས་རོགས་གནོངས། ཐུགས་རྗེ་ཆེ། ཅེས་བཀའ་བསྩལ་སོང༌།