རྡོར་གླིང་བོད་མིའི་རང་འཚོ་བཟོ་གྲྭ་གླེང་བ།

རྡོར་གླིང་བོད་མིའི་རང་འཚོ་བཟོ་གྲྭའི་འགན་འཛིན་རྡོ་རྗེ་ཚེ་བརྟན་ལགས་སུ་རང་འཚོ་བཟོ་གྲྭའི་སྐོར་ལ་བཅར་འདྲི་བྱས་པ།

དྲི་བ། དང་པོ་རྒན་ལགས་ཀྱིས་བཟོ་གྲྭ་འདིའི་ལོ་རྒྱུས་མདོར་བསྡུས་ཤིག་གསུང་རོགས།

དྲིས་ལན། བཟོ་གྲྭ་འདི་ ༡༩༥༩ ལོའི ༡༠ ཚེས་ ༢ ཉིན་སྐུའི་གཅེན་པོ་རྒྱལ་ལོ་དོན་འགྲུབ་མཆོག་གི་སྐུ་ཟླ་ལྷ་ལྕམ་དམ་པ་དེས་དབུ་འཛུགས་གནང་བ་རེད། ཁོང་གིས་བཟོ་གྲྭ་འདི་འཛུགས་དགོས་དོན་ནི། དེ་དུས་བོད་པ་མང་བོ་ཞིག་སྐྱབས་བཅོལ་ལ་སླེབས་ཡོད་སྟབས། མི་མང་བོ་ཞིག་འགྲོ་ས་འདུག་ས་མེད་པའི་དཀའ་ངལ་ལ་གཟིགས་ནས་བཟོ་གྲྭ་འདི་བཙུགས་འདུག དང་པོ་བཟོ་གྲྭ་འདི་འཛུགས་དུས་ས་ཆ་འདིར་ཁང་མིག་ཆུང་ཆུང་གཉིས་མ་གཏོགས་མི་འདུག ཁང་མིག་དེ་གཉིས་ཀྱང་ ༡༩༡༠ ནས་ ༡༩༡༢ བར་༧རྒྱལ་དབང་སྐུ་ཕྲེང་བཅུ་གསུམ་པ་བཞུགས་ས་དང་ཁོང་གི་ཆིབས་རྟ་འཇོག་ས་རེད་ལབ་ཀྱིན་འདུག བར་སྐབས་དེར་རྒྱ་མིས་བོད་ལ་བཙན་འཛུལ་ཞིག་བྱས་སྐབས་ཁོང་སྐྱབས་བཅོལ་ལ་ཕེབས་པ་རེད་ཟེར་གྱིན་འདུག ས་ཆ་དེ་གནད་འགག་ཅིག་ཏུ་བརྩིས་ནས་བཟོ་གྲྭ་འདིར་བརྒྱབས་འདུག དང་པོ་ལྷ་ལྕམ་ཁོང་གིས་བཟོ་གྲྭའི་འཆར་འགོད་འཐེན་དུས། བོད་ཁྱིམ་སློབ་གྲྭའི་སློབ་སྤྱི་སྐུ་ངོ་ལྷ་དབང་ལགས་དང༌། ས་གནས་འདིའི་རྒྱ་གར་གྱི་དམག་སྤྱི་ཁག་ཅིག་གི་རྒྱབ་སྐྱོར་དང་རོགས་རམ་ལ་བརྟེན་ནས་བཟོ་གྲྭ་འདི་དབུ་འཛུགས་གནང་ཐུབ་འདུག སྐབས་དེར་སྐྱབས་བཅོལ་ལ་སླེབས་བསྡད་ཡོད་མཁན་དེ་ཚོའི་ཁྲོད་གདན་དང་སྣམ་བུ་འཐག་མཁན། ཤིང་བཟོ་བྱ་མཁན་སོགས་མང་བོ་ཞིག་ཡོད་སྟབས། ཁོང་ཚོ་མཉམ་རུབ་བྱས་ནས་རང་རང་གིས་གང་ཤེས་པའི་ལག་ཤེས་དེ་དག་མི་ཉམས་རྒྱུན་འཛིན་དང༌། ཆབས་ཅིག་གནས་སྐབས་རང་ཉིད་ཀྱི་འཚོ་གནས་ཐག་གཅོད་བྱེད་ཐུབ་པའི་རང་འཚོ་བཟོ་གྲྭ་འདི་བཙུགས་འདུག

དྲི་བ། བཟོ་གྲྭ་འདིར་ཐོན་རྫས་རིགས་ག་ཚོད་བཟོ་བཞིན་ཡོད་པ་དང༌། ལས་རིགས་སྡེ་ཚན་རིགས་ག་ཚོད་ཡོད་དམ།
དྲིས་ལན། ལས་རིགས་སྡེ་ཚན་མང་བོ་ཡོད་པ་རེད། བལ་སྐུད་ལ་ཚོན་རྩི་གཏོང་ས་ཞིག་ཡོད་པ་རེད། དེ་བཞིན་ཚེམ་བཟོ་རྒྱག་ས། བལ་ཐུག་འཁེལ་ས། ཤིང་བཟོ་བྱེད་ས། པང་གདན་དང་གདན་འཐག་ས། དེ་མ་ཡིན་པའི་བོད་ཀྱི་ཁྱད་ཆོས་ཐོན་པའི་རི་མོ་བརྩེགས་གྲུབ་བྱེད་ས་སོགས་ཡོད་པ་རེད། བཟོ་གྲྭའི་ཡན་ལག་ཅིག་རྡོར་གླིང་ཁྲོམ་གཞུང་ན་ཡོད། དེར་སྨན་ཁང་དང་དཔར་ཁང་སོགས་ཡོད། སྨན་ཁང་དེས་སྨན་ཁང་གཞན་པ་དང་བསྡུར་ན་སྨན་རིན་གོང་ཆུང་དུ་བཏང་ནས་མི་མང་ལ་ཞབས་ཞུ་སྒྲུབ་བཞིན་ཡོད།
 
དྲི་བ། བཟོ་གྲྭ་འདིར་ལས་བྱེད་ག་ཚོད་ཡོད་དམ།
དྲིས་ལན།  དགུ་ཅུ་གོ་གྲངས་བར་དུ་མི་ལྔ་བརྒྱ་དྲུག་བརྒྱ་ལྷག་ཅིག་འདུག དེ་ནས་གཞུང་གི་ངོས་ནས་བོད་པ་མང་བོ་ཞིག་ཕྱི་རྒྱལ་ལ་གཏོང་བའི་གོ་སྐབས་བྱུང་བ་ནས་བཟུང་སྟེ། མང་བོ་ཞིག་ཆས་སོང་བ་རེད། ད་སྐབས་མི་སུམ་བརྒྱ་ལྷག་ཅིག་མ་གཏོགས་མེད། དེའི་ནང་བརྒྱ་ཆའི་དགུ་བཅུ་ལོ་དྲུག་ཅུ་ནས་བདུན་ཅུའི་བར་གྱི་རྒན་རྒོན་རེད།

དྲི་བ། བཟོ་གྲྭའི་ལས་བྱེད་མང་ཤོས་རྒན་རྒོན་ཡིན་སྟབས། བཟོ་གྲྭའི་ལས་ཀ་འཐུས་ཤོར་དང་སྒྲིག་འཛུགས་ཀྱི་ཕྱོགས་ནས་དཀའ་ངལ་ཡོད་དམ།
དྲིས་ལན།  ཏག་ཏག་ང་ཚོར་དེའི་ཐད་ནས་དཀའ་ངལ་འཕྲད་ཀྱིན་ཡོད་པ་རེད། བཟོ་གྲྭ་འདིའི་ལས་ཀ་བྱ་མཁན་མང་ཤོས་རྒན་རྒོན་ཡིན་སྟབས། ལོ་གཞོན་པ་ནང་བཞིན་ལས་ཀ་བྱེད་ཐུབ་ཀྱིན་ཡོད་པ་མ་རེད། ཡིན་ནའང༌། ཁོང་ཚོར་ལས་ཀ་ཞིག་མ་སྤྲད་པ་ཡིན་ན་ཁོང་ཚོའི་ལྟོ་རྒྱབ་དེ་འགྲོ་གིན་ཡོད་པ་མ་རེད། ངས་གོང་ནས་ཞུས་པ་ནང་བཞིན། རང་འཚོ་བཟོ་གྲྭ་ཟེར་དུས་སོ་སོས་གང་ཤེས་པའི་ལག་ཤེས་དེར་བརྟེན་ནས་རང་ཉིད་ཀྱི་འཚོ་བ་བཙལ་དགོས་ཀྱིན་ཡོད་པ་རེད། དེ་མ་གཏོགས་བོད་གཞུང་ལ་སྙན་ཞུ་ཞུས་ནས་ཡོང་སྒོ་བསླང་ན་ཆོག་གི་ཡོད་པ་རེད་དེ། ག་དུས་བར་དུ་ང་ཚོས་གཞུང་ལ་བསླང་ནས་སྐྱོབ་གསོ་ཟས་ནས་འདུག་དགོས་པ་རེད། གཞུང་ལའང་དཀའ་ངལ་ཆེན་པོ་ཡོད་སྟབས། རང་ཉིད་ཀྱིས་རང་གི་འཚོ་གནས་ཐག་གཅོད་བྱེད་ཐུབ་ན་གཞུང་གི་དཀའ་ངལ་དེའང་རང་བཞིན་གྱིས་སེལ་འགྲོ་གི་རེད། ངའི་བསམ་པར། བོད་པ་མང་བོ་ཞིག་གིས་ང་ཚོ་སྐྱབས་བཅོལ་བ་ཡིན་ཟེར་ནས་སྐྱོབ་གསོ་ལ་རེ་སྒུག་དང་རེ་བ་རྒྱག་རྒྱུར་དགའ་བོ་འདུག རང་ཉིད་ཀྱིས་དཀའ་ལས་རྒྱག་གི་མི་འདུག དེ་ང་ཚོའི་ནོར་འཁྲུལ་ཞིག་རེད་བསམ་ཡོད། ཕྱི་རྒྱལ་ཚོའི་ཀླད་པའི་ནང་ཡང༌། སྐྱབས་བཅོལ་བ་ཟེར་དུས་ལས་ཀ་མི་བྱ་བར་ཟས་ནས་ཉལ་ནས་འདུག་པའི་གནས་སྟངས་ཤིག་ཤར་ཡོད་ས་རེད། ལྟ་སྐོར་བ་ཁ་ཤས་འདིར་ཡོང་ནས་ང་ཚོའི་ལས་ཀ་བྱེད་སྟངས་ལ་བལྟས་ནས་ཧང་འདྲ་བོ་སང་གི་འདུག གང་ཡིན་ཟེར་ན། ཁོང་ཚོའི་ཀླད་པའི་ནང་གི་སྐྱབས་བཅོལ་བ་དེས་མི་གཞན་གྱིས་དཀའ་ལས་བརྒྱབས་པ་ཟས་ནས་ཉལ་ནས་བསྡད་ཡོད་སྟབས། འདིར་ཡོང་ནས་ང་ཚོའི་བཅའ་སྟངས་ལས་སྟངས་མཐོང་དུས། ལྷག་དོན་དུ་རྒན་རྒོན་ཚོས་ལས་ཀ་བྱེད་བཞིན་པ་མཐོང་ཚེ། ཁོང་ཚོ་ཡང་དགའ་སྣང་ཟེར་ན་མི་འདུག བསམ་བློ་གཉིས་པ་ཞིག་གཏོང་དགོས་ཀྱིན་འདུག་ཅེས་ལབ་མཁན་ཡང་འདུག ཡིན་ནའང༌། རྒན་རྒོན་ཚོ་འདི་ལྟར་རྫོགས་འགྲོ་གི་ཡོད་སྟབས། གཞོན་སྐྱེས་ཚོས་འདི་རྒྱུན་འཛིན་མ་བྱས་ན། ཆེ་ས་ནས་བོད་པའི་རིག་གཞུང་ཞིག་གི་འཐུས་ཤོར་དང༌། ཆུང་ས་ནས་བཟོ་གྲྭ་ཁོ་རང་ཉམས་རྒུད་དུ་འགྲོ་བའི་དཀའ་ངལ་མང་བོ་ཞིག་ཀྱང་འཕྲད་ཡོང་གིན་འདུག གཞོན་སྐྱེས་ཚོས་འདིར་ལས་ཀ་བྱེད་ཀྱིན་མི་འདུག གང་ཡིན་ཟེར་ན། གཞོན་སྐྱེས་དེ་ཚོའི་བསམ་བློའི་ནང་ལ་ཕོག་མང་བོ་ལེན་ས་ཡོད་པ་ཞིག་དང༌། ལས་ཀ་ལས་སླ་བོ་བྱེད་ས་ཡོད་པ་ཞིག་དྲན་བསྡད་ཡོད་སྟབས། ལག་ཤེས་ཞེས་པ་དེར་དཀའ་ངལ་དང་སྡུག་རུས་ཚང་མ་རྒྱག་དགོས་ཀྱིན་ཡོད་པ་རེད། བཟོ་གྲྭ་འདིའི་ལས་བྱེད་ཚང་མ་ཁྱིམ་ཚང་གཅིག་གི་མི་ནང་བཞིན་ཡོད་དུས། ལས་བྱེད་ཚང་མའི་ལས་ཤག་དང་ལྟོ་རྒྱབ། མཐའ་ན་སྨན་བཅོས་དང་བུ་ཕྲུག་གི་སློབ་ཡོན་སོགས་ཀྱང་བཟོ་གྲྭ་རང་ངོས་ནས་འབུལ་གྱིན་ཡོད་པ་རེད། དེར་བརྟེན། ཟླ་ཕོག་གི་ཕྱོགས་ནས་ཉུང་ངུ་རེ་མ་གཏོགས་ཡོད་པ་མ་རེད། ཟླ་བ་གཅིག་ལ་ཕོག་མཐོ་ཤོས་ཧིན་སྒོར་ཆིག་སྟོང་ལྔ་བརྒྱ་དང༌། དམའ་ཤོས་ཧིན་སྒོར་ལྔ་བརྒྱའི་བར་དེ་འདྲ་རྐྱང་རྐྱང་རེད།

དྲི་བ། གོ་ཐོས་ལ་བཟོ་གྲྭ་འདི་སྔོན་མ་ལས་ད་ལྟ་ཉམས་རྒུད་དུ་སོང་ཡོད་པའི་སྐད་ཆ་ཞིག་གོ་རྒྱུ་འདུག སྐུ་ཉིད་ཀྱི་དགོངས་ཚུལ་ལ། ཉམས་རྒུད་དེའི་རྐྱེན་གཙོ་བོ་གང་ཡིན་ནམ།

དྲིས་ལན། ཉམས་རྒུད་གཙོ་བོ་དེ་ལས་ཀ་བྱེད་མཁན་ཉུང་དུ་སོང་བ་དང༌། ལྷག་པར་དུ་རྒན་རྒོན་ཚོའི་ལག་ཤེས་དེ་རྒྱུན་འཛིན་བྱེད་མཁན་མེད་པར་སོང་བའི་རྐྱེན་གྱིས་ཉམས་རྒུད་དེ་རང་བཞིན་གྱིས་སླེབས་ཡོང་བ་རེད། གལ་སྲིད་གཞོན་སྐྱེས་མང་བོ་ཞིག་འདིར་འཛུལ་ཞུགས་བྱས་ནས་ལས་ཀ་རྒྱུན་འཛིན་བྱེད་པ་ཡིན་ན། ཉམས་རྒུད་དེ་སེལ་འགྲོ་གི་རེད། རྡོར་གླིང་འདི་ཡུལ་སྐོར་སྤྲོ་འཆམ་པ་མང་བོ་ཡོང་ས་ཞིག་རེད། ཁོང་ཚོ་འདིར་ཡོང་ནས་བལ་གདན་དང་སྣུམ་ཚོན་རི་མོ། དེ་བཞིན་བོད་ཀྱི་ཁྱད་ཆོས་ཐོན་པའི་ཐོན་རྫས་འདྲ་མིན་མང་བོ་མངགས་ཀྱིན་ཡོད་པ་རེད། ཡིན་ནའང༌། འདིར་ལས་ཀ་བྱེད་མཁན་ཉུང་བ་དང༌། ལྷག་པར་དུ་རྒན་རྒོན་ཚོས་ལས་ཀ་ལས་ཏེ། མངགས་ཉོ་བྱས་པའི་རྗེས་མ་ཆོད་པར་བརྟེན། དཀའ་ངལ་ཆེན་པོ་ཞིག་འཕྲད་ཀྱིན་འདུག ངའི་བསམ་པར། ལོ་དྲུག་གི་རྗེས་ནས་འདི་ལས་ཀྱང་དཀའ་ངལ་ཆེན་པོ་འཕྲད་ཀྱི་རེད་བསམ་གི། རྗེས་ཕྱོགས་གཞོན་སྐྱེས་ཚོས་བོད་པའི་རིག་གཞུང་ཞིག་ཉམས་རྒུད་དུ་འགྲོ་བཞིན་འདུག་བསམ་པའི་བསམ་བློ་ཞིག་ཁྱེར་ནས་འདིར་ལས་ཀ་བྱེད་དུ་ཡོང་ན་ཉམས་རྒུད་དེ་སེལ་ཐུབ་ཀྱི་རེད་བསམ་གི། མ་གཞི་ང་ཚོའི་མི་རིགས་འདིར་མི་འབོར་གྱི་ཆ་ནས་དཀའ་ངལ་འཕྲད་ཀྱིན་ཡོད་སྟབས་འདི་ལྟ་བུའི་འཐུས་ཤོར་མང་བོ་ལྷག་པ་རེད།

དྲི་བ།  མི་རིགས་དང་རྒྱལ་ཁབ་གང་ཞིག་ཡིན་ཡང༌། མི་རིགས་དེའི་རིག་གནས་ཀྱི་ཁྱད་ཆོས་ཐོན་པའི་ཐོན་རྫས་འདྲ་མིན་བཟོ་བསྐྲུན་བྱ་རྒྱུ་གལ་ཆེན་ཡིན་པར་བརྟེན། རྗེས་ཕྱོགས་དེའི་སྐོར་ནས་ལས་འཆར་འདྲ་ཡོད་དམ།
དྲིས་ལན།  ལས་འཆར་ཟེར་ན་འདྲ། བསམ་འཆར་ཟེར་ན་འདྲ། སློབ་གྲྭ་མཐར་འཁྱོལ་མེད་པའི་རིགས་དང༌། སྤྱི་ཚོགས་སྟེང་གི་ལས་མེད་རིགས་འདིར་ཡོང་ནས་རང་རང་ལག་ཤེས་གང་ལ་དགའ་བོ་ཡོད་ན་དེ་སྦྱང་གི་བཅུག་སྟེ། རྗེས་ཕྱོགས་ཁོང་ལྷ་བྲིས་མཁས་པ་རེད། ཁོང་སྣམ་བུ་འཐག་པར་མཁས་པ་རེད་ཟེར་བའི་ཆེད་ལས་མཁས་པ་རེ་ཨེ་ཡོང་གི་རེ་བ་ཆེན་པོ་ཡོད། ཁ་སང་དེ་རིང་འདིར་ཡོད་བཞིན་པའི་ལག་ཤེས་པ་ཁ་ཤས་དངོས་གནས་ལག་རྩལ་མཁས་པ་ཡོད་པ་རེད། ཁོང་ཚོའི་ལག་ཤེས་དེ་ཚོ་མེད་པ་ཆགས་ན་ཧང་སང་བའི་བློ་ཕམ་པོ་རེད། གཞོན་སྐྱེས་མང་ཤོས་ཤིག་གིས་ལས་ཀར་དཀའ་ལས་དེ་འདྲ་རྒྱག་གི་མི་འདུག དངུལ་གཅིག་པོ་རེག་ན་འགྲིག་ཡོད་པའི་སྲོལ་འདྲ་བོ་ཞིག ང་ཚོ་དེས་འགྲིག་གི་ཡོད་པ་མ་རེད། བོད་ཟེར་བ་དེ་དགོས་ཀྱི་ཡོད་ན། བོད་པའི་རིག་གཞུང་དེ་དགོས་ཀྱིན་ཡོད་པ་རེད། རིག་གཞུང་དེ་གཙོ་བོ་ཤ་ཞེན་གྱིས་བདག་གཉེར་བྱ་དགོས་ཀྱིན་ཡོད་པ་རེད་བསམ་གི། འདི་ངའི་རྒྱལ་ཁབ་ཡིན། ང་མི་རིགས་འདིའི་ཡིན། ངའི་རིག་གཞུང་འདི་ཡིན་བསམ་པའི་ཤ་ཞེན་དེ་ཡོད་ན་རིག་གཞུང་དེ་གཅེས་འཛིན་བྱ་ཐུབ་རྒྱུ་རེད་བསམ་ཡོད།

དྲི་བ།  གལ་སྲིད་བཟོ་གྲྭ་འདིའི་ནང་འཛུལ་ཞུགས་བྱ་འདོད་ཡོད་ན། ཆ་རྐྱེན་གང་གང་དགོས་གི་རེད་དམ།

དྲིས་ལན།  ཆ་རྐྱེན་ལ། ལས་ཀ་འདི་བཟོ་གྲྭ་ཞིག་གི་ལས་ཀ་ཡིན་པའི་ཆ་ནས། གཟུགས་པོ་ཐང་ཐང་དང༌། བོད་པ་སྐྱབས་བཅོལ་བ་ཡིན་པའི་ལག་འཁྱེར་ཡོད་ན་འགྲིག་གི་ཡོད་པ་རེད། རང་ཉིད་ཀྱིས་ལག་ཤེས་གང་ཡང་མ་ཤེས་ཀྱང་འདིར་སླེབས་ནས་སྦྱང་ན་འགྲིག་གི་ཡོད་པ་རེད། གལ་སྲིད་བཟོ་གྲྭ་འདིར་འཛུལ་ཞུགས་བྱ་འདོད་ཡོད་མཁན་རྣམས་འདིར་ཕེབས་པར་དགའ་བསུ་དང༌། འབྲེལ་བ་གནང་ཆོག་ཆོག་ཡིན་ཅེས་ཞུ་འདོད་བྱུང་། ང་ཚོའི་ཁ་བྱང་ནི་གཤམ་གསལ་ལྟར་ཡིན། (འབྲེལ་བ་གནང་སའི་གློག་འཕྲིན་ཁ་བྱང་། thondup@cal.vsnl.net.in)
 
བཅར་འདྲི་བྱེད་མཁན། འབྲོག་རུ་ཆོས་གྲགས།