གླུ་བ་མའེ་ཁལ་རྗེག་སོན་སྐུ་གྲོངས་བ།

དེ་རིང་དུས་རབས་ཉི་ཤུ་བའི་ནང་གི་ཨ་རི་དང་འཛམ་གླིང་གི་གླུ་བ་གྲགས་ཅན་མའེ་ཁལ་རྗེག་སོན་Michael Jaksaon སྐུ་གཤེགས་པ་དང་། ཁོང་གིས་ཡིད་དབང་འཕྲོག་པའི་གླུ་གཞས་མང་པོ་ཞིག་བཏང་སྟེ་མི་སེམས་སྨྱོ་བར་བྱས་ཡོད་ལ། ལུས་ཀྱི་པགས་པ་བརྗེ་བོ་བརྒྱབས་ནས་རང་གི་མི་རིགས་ཀྱི་སེམས་ཁམས་ལ་རྨ་ཁ་ཡང་བཟོས་ཡོད་རབས་བཤད། གང་ལྟར་འདི་ལོར་ལོ་ན་ ༥༠ སོན་པའི་གཞས་པ་གྲགས་ཅན་ཁོང་ལ་སྙིང་གི་ནད་ཚ་ཞིག་གི་རྐྱེན་བྱས་ཏེ་ཨ་རིའི་ཁ་ལེ་ཧྥོ་ནེ་ཡ་མངའ་སྡེའི་སྨན་ཁང་ཞིག་ནས་འཇིག་རྟེན་ཕྱི་མའི་མགྲོན་པོར་ཆས་སོང་། མའེ་ཁལ་གྱི་གཞས་སྣ་འཁྲབ་ལེན་གྱི་སྙན་གྲགས་དང་མཉམ་དུ་བྱིས་པའི་སྐོར་དང་འབྲེལ་བའི་རྙོག་དྲ་ཡང་ལུང་པ་གང་གིས་ཁོང་གི་ཚེ་མཇུག་གི་འཚོ་བ་དེ་དེ་འདྲའི་བདེ་སྐྱིད་ལྡན་པ་ཡོང་དུ་བཅུག་མེད།

མའེ་ཁལ་གྱིས་འབྱུང་འགྱུར་སྤྱི་ཟླ་ ༧ ཚེས་ ༡༣ ཉིན་དབྱིན་ཡུལ་གྱི་རྒྱལ་ས་ལོན་ཊིན་ནས་གླུ་གཞིས་འཁྲབ་སྟོན་བྱ་རྒྱུའི་གྲ་སྒྲིག་ཡོད་པ་དང་། གནས་ཚུལ་དེ་ད་ལོའི་སྤྱི་ཟླ་ ༣ པར་འཛམ་གླིང་ལ་གསལ་བསྒྲགས་བྱས་ཏེ་སྐར་མ་ཁ་ཤས་ལས་མ་འགོར་བར་གཟིགས་མོ་བའི་འཛིན་བྱང་ཡོངས་རྫོགས་བཙོང་ཚར་ཡོད་འདུག མའེ་ཁལ་རྗེག་སོན་ལ་འཛམ་གླིང་གླུ་བ་སྐད་གྲགས་ཅན་གྱི་མཚན་སྙན་ཐོབ་རྗེས་རྒྱལ་ཁབ་ཁག་གི་གྲོང་ཁྱེར་ཆེན་པོ་ ༥༨ ནང་དུ། གླུ་གཞིས་འཁྲབ་སྟོན་གྲགས་ཆེན་ཐེངས་ ༨༢ ཙམ་བྱས་ཡོད་པ་དང་། སྤྱི་ལོ་ ༡༩༩༦ ལོ་ནས་བཟུང་མའེ་ཁལ་རྗེག་སོན་སྒེར་གྱི་ཆེད་འཛུགས་གླུ་གཞིས་འཁྲབ་སྟོན་མཚམས་འཇོག་བྱས་ཡོད་འདུག

མ་ཧེ་ཁལ་ཁོང་ད་ལྟ་ལོ་ན་ ༥༠ ཡིན་ཞིང་། སྤྱི་ལོ་ཁོང་གིས་ ༡༩༩༤ ལོར་འཛམ་གླིང་གི་གླུ་བ་གྲགས་ཆེན་རྒན་རབས་པ་ཨེལ་ཝེ་སི་ཕིར་ཟི་ལཱེ་ Elvispresley ལགས་ཀྱི་བུ་མོ་ལེ་སར་མེ་རེ་ Lisamarie དང་མཉམ་དུ་གཉེན་སྒྲིག་བྱས་ཏེ་བྱིས་པ་གཅིག་སྐྱེས་རྗེས་ ༡༩༩༦ ལོར་ཁོང་གཉིས་ཁ་ཁ་ཆགས་འདུག འོན་ཀྱང་། ལོ་དེར་བསྐྱར་དུ་ཌེ་བྷེ་བྷེས་རོའོ་ Debbie Rowe  ཞེས་བའི་བུད་མེད་ཅིག་དང་ལྷན་དུ་གཉེན་སྒྲིག་བྱས་ཏེ་བྱིས་པ་གཉིས་སྐྱེས་ཡོད་ཀྱང་། ༡༩༩༩ ལོར་ཁོང་གཉིས་ཀྱང་བཟའ་ཐོར་བྱུང་འདུག

ཁ་སང་ཉིན་གུང་ཨ་རིའི་ཆུ་ཚོད་ ༢ དང་སྐར་མ་ ༢༦ སྟེང་འཛམ་གླིང་གི་གླུ་བ་གྲགས་ཆེན་མའེ་ཁལ་རྗེག་སོན་ཁོང་སྐུ་གཤེགས་མ་ཐག གསར་འགོད་པའི་ཁོང་གི་སྐྱེས་དམན་དང་པོ་ལེ་སར་མེ་རེ་ Lisamarie ལགས་སུ་བཅར་འདྲི་ཞུས་སྐབས། ཁོ་མོས། ངས་གཏམ་ངན་འདི་གོ་མ་ཐག་ང་རང་ཧང་སང་སྟེ། ད་ལྟ་སེམས་ལ་ཅི་ཡང་དྲན་གྱིན་མི་འདུག སེམས་པ་ཡོངས་ལྷུང་ལྷུང་བར་གྱུར་ཏེ་མགོ་བོ་ནག་འཐོམ་མེར་འདུག མའེ་ཁལ་དང་ངེད་གཉིས་བཟའ་ཚང་ཐོར་ཀྱང་། ལོ་བཅུ་གཅིག་ལ་སོན་མ་ཐག་པའི་ངེད་གཉིས་ཀྱི་བྱིས་པ་འདི་དུས་ནམ་ཡང་མའེ་ཁལ་གྱི་ནང་མི་རེད། སྐུ་གཤེགས་དམ་པ་མའེ་ཁལ་དུས་ནམ་ཡང་བྱིས་པ་ཆུང་ཆུང་འདིའི་ཕ་ལགས་རེད། ངས་མའེ་ཁལ་དྲན་གྱིན་འདུག ངས་སྐབས་དེའི་ངེད་གཉིས་ཀྱི་འཚོ་བ་དྲན་གྱིན་འདུག ཅེས་བརྗོད་འདུག