ཐའེ་ཧྥུན་གྱི་དྲག་རླུང་གིས་མི་ ༥༠༠ ལྷག་གི་ཚེ་སྲོག་འཕྲོག་པའི་བསྔོ་སྨོན་ཆེད་དུ་༧གོང་ས་མཆོག་ཕྱི་ཚེས་ ༣༠ ཉིན་གླིང་ཕྲན་དེར་ཆིབས་བསྒྱུར་གནང་སོང་། ཡིན་ཡང་། ན་ནིང་གི་སི་ཁྲོན་ས་ཡོམ་སྐབས་སུ་མི་གྲངས་ ༦༨༠༠༠ ལྷག་རྐྱེན་ལམ་དུ་ཕྱིན་སྐབས་འདི་ལྟའི་གླེང་སློང་བྱུང་ཡང་། དོན་དམ་གྱི་སྐལ་བ་དེ་མ་བྱུང་བ་ནི་མུ་མཐུད་ནས་ཕངས་སེམས་ཀྱི་རྒྱུ་རུ་གྱུར།
འདི་དང་འདྲ་བར་ན་ནིང་བོད་མི་ཚོས་༧རྒྱལ་བ་རིན་པོ་ཆེ་ཕྱིར་བོད་དུ་ཕེབས་འཇུག་དགོས་ཞེས་མདོ་དབུས་ཁམས་གསུམ་ནས་ཞི་བའི་སྐད་འབོད་བྱས་སྐབས་རྒྱ་གཞུང་གིས་ཕལ་ཆེ་བ་བཙོན་དུ་བཅུག བརྒྱ་ཕྲག་འགའ་ནི་རེ་འབོད་འདི་ལ་བརྟེན་ནས་སྲོག་ཐོག་ཏུ་བཏང་སོང་། འདི་དག་ལ་བསམ་སྐབས་༧གོང་ས་མཆོག་ཕྱིར་བོད་དུ་ཕེབས་པ་ལ་ཆ་རྐྱེན་གཅིག་རང་འདུག་ལ། དེ་ནི་བོད་རང་བཙན་གྱི་ལྟ་བ་འདོར་བ་དང་། རང་སྐྱོང་གི་དགོས་འདུན་རྣལ་མ་ཞིག་འདོན་རྒྱུར་ཐུག་མེད་པར། རྒྱ་ནག་འདི་དམངས་གཙོ་ཚད་ལྡན་ཞིག་ལ་འགྱུར་རྒྱུ་དེ་ཁོ་ན་རེད།
པེ་ཅིན་གྱི་དཔོན་རིགས་ཚོས་རྒྱ་ནག་གཅིག་གི་རྩ་དོན་བཤད་ཀྱིན་སྲིད་འཛིན་མ་ཡུན་ཇིག་གི་ལག་མགོ་ནས་འཐེན་གིན་ཡོད་རུང་། ཐའེ་ཝན་མཚོ་འགག་ནི་དམངས་གཙོའི་སྤྱི་ཚོགས་ཤིག་ཡིན་ལ། མཐའ་མའི་ཐག་གཅོད་དེའང་མང་ཚོགས་ཀྱི་རང་ཐག་རང་གཅོད་ལྟར་འགྲོ་དགོས་པ་ལས། སྲིད་འཛིན་ཧུའུ་ཅིན་ཐའོ་ནང་བཞིན་སྲིད་འཛིན་མ་ཡུན་ཇིག་ལ་སྲིད་དབང་གཅིག་སྡུད་ལམ་ལུགས་ཀྱི་ཐག་གཅོད་བྱེད་དབང་མེད། དེ་བས་སྲིད་འཛིན་མ་ཡུན་ཇིག་གིས་ཐའེ་ཝན་མི་དམངས་ཀྱི་སྣེ་ཁྲིད་ནས་རྒྱ་ནག་གི་མི་འབོར་རྒྱ་མཚོ་ལྟ་བུའི་ནང་དུ་བསྲེས་མི་ཐུབ་པ་ནི་མངོན་སུམ་ཡིན། ཕྱོགས་གཞན་ནས་གླེང་ན། ཐའེ་ཝན་མི་དམངས་ཀྱིས་རྒྱ་ནག་དང་མཉམ་དུ་རྒྱལ་ཁབ་འདྲ་མཉམ་གྱི་ལྟ་ཚུལ་ཐོག་ནས་ཕར་ཚུར་འགྲོ་འོང་བྱེད་རེས་དང་། ཚོང་ལས་དང་རིག་གཞུང་གི་ལས་དོན་སྤེལ་རེས་བྱེད་ཀྱིན་ཡོད་ལ། ཇི་སྲིད་རྒྱ་ནག་ཐའེ་ཝན་ལྟ་བུ་ཞིག་ཏུ་མ་འགྱུར་བར་དུ། ཐའེ་ཝན་རྒྱ་ནག་ཅན་དུ་འགྱུར་འགྲོ་བའི་དོགས་པ་སུ་ལའང་མེད་ཚོད་ཡིན། མུ་མཐུད་བཤད་ན། སྲིད་འཛིན་མ་ཡུན་ཇིག་གིས་པེ་ཅིན་ལ་བཟུང་བའི་རྣམ་འགྱུར་དེ་ནི་མཚོ་འགག་གཉིས་ཀྱི་འབྲེལ་བ་རྒྱུན་ལྡན་ལ་གནས་པའི་ཆེད་ཡིན་པ་མ་གཏོགས། ཐའེ་ཝན་འདི་རྒྱ་ནག་སྐམ་ས་ཆེན་པོའི་འོག་ལ་འགྲོ་གི་ཡིན་པའི་གོ་བརྡ་ག་ལ་ཡིན། པེ་ཅིན་ནི་འདི་ལྟར་མཚོ་འགག་གི་གནད་དོན་ཐད་ལ་མགོ་འཐོམ་དུ་གྱུར་ཡོད་ཀྱང་སྲིད།
པེ་ཅིན་གྱི་དཔོན་རིགས་ཚོར་བློས་ཐུབ་ཀྱི་གྲོགས་པོ་ཞིག་དགོས་ན་དེ་ནི་༧གོང་ས་མཆོག་ཡིན། ཁོང་གིས་བོད་དང་རྒྱ་ནག ཐའེ་ཝན་བཅས་འགག་སྒོ་འདི་དག་གི་དཀའ་ངལ་གང་ཡང་སེལ་ཐུབ་ལ། ཏཱ་ལའི་བླ་མ་ཁོ་ནས་སྲིད་འཛིན་མ་ཡུན་ཇིག་ལས་ལྷག་ཅིག་ཐའེ་ཝན་མི་དམངས་ཀྱི་སེམས་ཁམས་གསོ་ཐུབ་ཀྱི་ཡོད་པ་ལྟར། ཧུའུ་ཅིན་ཐའོ་ཡིས་ཀྱང་སློབ་ཚན་འདི་དང་མཉམ་དུ་རང་གིས་བསྟེན་འོས་ཤིང་ཕྱི་ཐག་རིང་བའི་གྲོགས་པོ་ངོ་མ་དེ་སུ་ཡིན་ངོ་རྟགས་ཆོད་དགོས་པའི་དུས་ཡིན།
པེ་ཅིན་གྱིས་ཐའེ་ཝན་ནི་རྒྱ་ནག་གི་ཁ་བྲལ་ཐབས་མེད་པའི་ཞིང་ཆེན་ཞིག་ཡིན་ཟེར། དེར་བརྟེན་པེ་ཅིན་གྱི་ངོས་ནས་བཤད་ན། ༧གོང་ས་མཆོག་ཐའེ་ཝན་དུ་ཕེབས་པ་ནི་རྒྱ་ནག་གི་ཞིང་ཆེན་ཞིག་གི་ནང་དུ་ཕེབས་པའང་ཡིན་སྟབས། སྲིད་འཛིན་ཧུའུ་ཅིན་ཐའོ་ལགས། ད་ནི་སྐུ་ཉིད་ཀྱིས་ཏཱ་ལའི་བླ་མ་མཆོག་རྒྱ་ནག་གི་ཞིང་ཆེན་ཞིག་ནང་ཕེབས་པར་དགའ་བསུ་ཞུ་འོས་ལ། ཡང་ན། མ་ཡུན་ཇིག་ནང་བཞིན། ཁོང་ཕྱིར་ཕེབས་པར་དམངས་གཙོའི་ལམ་ཁ་ཡང་དག་ཅིག་ཕྱེ་འོས་པར་འདོད།།
![Wang made a research tour in Tibet from July 19 to 22. [Xinhua/Liu Bin]](https://tibettimes.net/wp-content/uploads/2026/07/1784796471071092378-360x180.jpg)
དྲ་གྲོགས་ཚོར་ཐེངས་འདིར་༧གོང་ས་མཆོག་ཐའེ་ཝན་ལ་ཆིབས་སྒྱུར་མ་བསྐྱང་གོང་དུ། གོ་མིན་ཏང་སྲིད་གཞུང་གིས་བདུན་ཕྲག་སྔོན་མའི་ནང་སྐུ་ཚབ་མི་སྣ་ཞིག་པེ་ཅིན་དུ་བཏང་སྟེ། ༧གོང་ས་མཆོག་ཐའེ་ཝན་ལ་ཕེབས་རྒྱུའི་སྐོར་ལ་གྲོས་མོལ་བྱས་འདུག དེའང་ཁ་ཇེ་གསལ་ལ་བཏང་ན་གོ་མིན་ཏང་གིས་ཏཱ་ལའི་བླ་མ་ཐའེ་ཝན་ལ་ཕེབས་རྒྱུའི་ཐད་གུང་ཁྲན་ཏང་ལ་ཆོག་མཆན་ཞུས་པར་ངོས་འཛིན་བྱེད་ཀྱིན་འདུག འདི་ལྟར་ན་ཐའེ་ཝན་ལ་ནང་སྲིད་ཅེས་པ་ཞིག་ཡོད་པ་རེད་དམ། ཡང་ན། འདི་རྒྱ་ནག་གི་ནང་སྲིད་རེད།
ཡིན་པར་ཆ་བཞག་ཀྱང་། དེ་ཚོས་འདིའི་རིགས་ཏེ་བཤད་དགོས་པ་དེ་དག་བཤད་ཀིན་ཡོད་ན་ནི་དགའ་འོས་པ་ཞིག་རེད་མོད། དེ་ཚོས་དགའ་ནི་ཞིག་བྱེད་ཀྱི་མ་རེད།
ཁོ་ཚོར་དགོས་པའང་དེ་ཡིན་གྱི་མ་རེད་འདོད།
ངས་གོ་བ་ལྟར་ན། རྒྱ་ནག་གི་བོད་དོན་ཉམས་ཞིབ་པ་དང་། གསང་བའི་ལས་ཁུངས་སོགས་ཀྱིས་བོད་ཀྱི་དུས་བབ་སོགས་ཕྱི་ཕྱོགས་ཀྱི་དྲ་རྒྱ་དག་སྔོག་གིན་འདུག་ཟེར། འདི་བདེན་པ་ཡིན་ཚེ་གོང་གི་རྩོམ་སྒྲིག་པའི་གཏམ་འདི་ཡང་རྒྱ་ནག་གི་གསང་བའི་ཡིག་ཆའི་ནང་དུ་ཕྱིན་ཚར་ཡོད་ཀྱི་རེད།
འདི་སུ་ཞིག་ལ་བཤད་ཀྱིན་ཡོད་མེད་མ་ཤེས།
འདི་ལྟ་བུ་རྒྱ་ཡིག་འབྲི་ཐུབ་ན་ཕན་ཐོགས་སྲིད་སྙམ་པ་ཞིག་འདུག
ང་ཚོར་ད་བཤད་མ་བཤད་ཡོད་ནི་མ་རེད།
བཀླགས་ཟིན།བསམ་གཞིགས་བསྐྱར་མ་ཞིག་བྱེད་ཀྱིན་ཡོད།
རྒྱ་མི་རིགས་ལ་གོང་ས་མཆོག་གི་དགོངས་གཞི་ངོ་མ་དེ་ཤེས་སུ་འཇུག་རྒྱུ་དེ་ཡིན་ངེས་སོ།
རྩོམ་སྒྲིག་པའི་དམིགས་ཚད་མཐོན་པོ་རེད། ཡིན་ནའི། ཁ་སང་དེ་རིང་ཐའེ་ཝན་དུ་ངོ་རྒོལ་ཆུང་ཚེགས་བྱུང་བཞིན་པར་ལྟ་སྐབས། གལ་སྲིད་ཏཱ་ལའི་བླ་མ་རྒྱ་ནག་ཏུ་ཕེབས་ཐུབ་ནའང་དེ་ལས་ཀྱང་ངོ་རྒོལ་མང་བོ་བྱུང་སྲིད་པ་གསལ་བོ་རེད། དེ་བས། འདིའི་ཐད་ལྷན་རྒྱས་ཐབས་ལམ་ག་རེ་ཡོད་དམ།
རེད་རེད། སྐུ་ཞབས་ལུང་རིགས་ལགས། ཚགས་པར་རྩོམ་སྒྲིག་པའི་གཏམ་ཟེར་བ་དེ་མི་མང་པོ་ཞིག་གིས་གསར་ཁང་དེའི་ཁ་ཕྱོགས་ལ་ངོས་འཛིན་པ་དང་། ཡང་མང་པོ་ཞིག་གིས་རྩོམ་སྒྲིག་པའི་གཏམ་ནི་གསར་ཁང་དེའི་རྩོམ་སྒྲིག་པར་ཡིག་རྩལ་བཏང་པའི་རྒྱུག་འབྲས་ལྟ་བུར་ངོས་འཛིན་གྱིན་ཡོད་པས་ལས་སླ་བོ་ཞིག་གཏན་ནས་མིན། དུས་བབ་རྩོམ་སྒྲིག་པའི་གཏམ་ལ་མཚོན་ན་ཁྱེད་རང་དང་དུས་བབ་གསར་ཤོག་གི་ལྕི་ཡང་འདེགས་བྱེད་ཀྱི་རྒྱ་མ་ལྟ་བུར་གྱུར་འདུག
ད་དུང་མུ་མཐུད་ནས་རྣམ་རིག་ལྕགས་སྐུད་ལྟར་མ་བསྒྲིམ་ཚེ་མ་འོངས་ཛ་དྲག་གི་དུས་རབས་ནང་དུ་ཁྱེད་ཀྱིས་ཉིན་རེར་དོམ་ནག་བཅུ་དང་དམར་འཛིང་བྱེད་དགོས་པའི་དུས་ཤིག་འཆར་སྲིད་པ་ཡིན།
ང་ལ་མཚོན་ན། རྩོམ་སྒྲིག་པའི་གཏམ་ཞིག་འབྲི་བ་ནི། རི་མགོ་ནས་དོམ་ནག་སྨྱོན་པ་ཞིག་ལ་འཛིང་བ་དང་འདྲ་བོ་རེད། ཐེངས་གཅིག་རེར་ཕར་རྫོག་ཐུབ་པའི་སྐབས་ཡོད་སྲིད་རུང་། སྐབས་མང་ཆེ་བར་དོམ་ནག་དེས་ཁྱོད་རང་ཉིད་ཟ་གི་རེད།
ངས་ད་བར་དུ་རྩོམ་སྒྲིག་པའི་གཏམ་འབྲི་དུས་ཀྱི་སྣང་ཚུལ་ནི་འདི་འདྲ་ཞིག་རེད། དེར་བརྟེན། ཉིན་བཅུ་རེའི་ནང་དུ་ངས་དོམ་ནག་རེར་འཛིང་དུས་ཕལ་ཆེ་བར་དོམ་ནག་དེས་ང་ཟ་གིན་ཡོད་ལ། ངས་ཉིན་བཅུ་རེའི་ནང་དུ་སྐྱེ་བ་རེ་རེ་བླངས་ཏེ། སླར་ཡང་དོམ་ནག་རེར་འཛིང་གི་ཡོད།
མི་རྣམས་ཀྱི་བཤད་ཚུལ་ལྟར་ན། འདིའི་སྔོན་གྱི་རྩོམ་སྒྲིག་པའི་གཏམ་ནི་དོམ་ནག་དེས་ང་ལ་སྙོབ་ཐེངས་གཅིག་གིས་ཧམ་བཟའ་བྱས་ཐེངས་དེ་རེད་ཟེར། ད་ཐེངས་ཀྱང་དོམ་ནག་འདི་དང་ངེད་གཉིས་རི་མགོ་ན་འཛིང་བཞིན་པའི་སྒང་ཡིན།
གུས་པར་འོས་པའི་སྐུ་ཞབས་ལུང་རིགས་ལགས། བཀའ་དྲིན་ཆེ།
གཡུ་དྲུག་དཀར་ལགས། སྐབས་དེར་༧གོང་ས་མཆོག་སི་ཁྲོན་ས་ཡོམ་འོག་རྐྱེན་འདས་སུ་གྱུར་བ་དང་ཤུལ་ལུས་རྣམས་ཀྱི་ཆེད་དུ་བསྔོ་སྨོན་ཆེད་ཕེབས་དགོས་པ་རེད་ཟེར་མཁན་ནི། བོད་དོན་རྒྱབ་སྐྱོར་བ་སོགས་ཕྱི་ཕྱོགས་ཀྱི་མི་རྣམས་རེད། གླེང་སློང་ཤུགས་ཆེན་པོ་བྱུང་ཡོད་པ་མ་རེད།
༧གོང་ས་མཆོག་ནི་བོད་རྒྱ་མི་རིགས་གཉིས་ཀྱི་དཀའ་གནད་སེལ་བའི་ལྡེ་མིག་ཡིན་པ་ནི་བཤད་མ་དགོས་པར་འུ་ཅག་གིས་ཤེས་ཀྱང་། རྒྱ་ནག་སྲིད་གཞུང་གིས་དཔོན་ངན་དེ་དག་གིས་ཤེས་རྒྱུ་དང་དང་ལེན་བྱེད་རྒྱུ་ཁག་པོ་རེད་ལ། ལྷག་པར་དུ་ཐེ་བན་མི་མང་གིས་ཁོང་ཚོ་ནི་རྒྱ་ནག་གི་ཆ་ཤས་ཞིང་ཆེན་ཞིག་ཡིན་པར་ཁས་ལེན་བྱེད་མི་སྲིད་པ་རེད། དེ་ལྟར་བྱས་ཉིན་ནས་༧གོང་ས་མཆོག་རྒྱའི་ཞིང་ཆེན་ཞིག་གི་གདན་འདྲེན་བྱེད་དགོས་བྱུང་ན་གོང་རིམ་གྱི་ཆོག་མཆན་མ་ཐོབ་པར་ཡོང་ཐུབ་མེད་པ་སྐུ་ཉིད་ཀྱིས་ཀྱང་མཁྱེན་གསལ་རེད་ལགས།
སྐུ་ཞབས་རྩོམ་སྒྲིག་པ་ལགས། {ན་ནིང་གི་སི་ཁྲོན་ས་ཡོམ་སྐབས་སུ་མི་གྲངས་ ༦༨༠༠༠ ལྷག་རྐྱེན་ལམ་དུ་ཕྱིན་སྐབས་འདི་ལྟའི་གླེང་སློང་བྱུང་ཡང་}། ཞེས་པ་འདི་རྒྱ་རིགས་ཁྲོད་སྐབས་དེ་དུས་བྱུང་བ་ཞིག་ཡིན་ནམ།
གལ་སྲིད་སྐུ་ཉིད་ལ་འདིའི་སྐོར་གྱི་ཁུངས་ལྡན་གནས་ཚུལ་འདྲ་ཡོད་ཚེ་མཛད་བྲེལ་ལ་མ་ལྟོས་བར་མང་ཙམ་གསུང་རོགས།