རང་བཙན། བོད་མིའི་རྨི་ལམ། ༼༢༽

ཚོ་ཁྲང་ཆེན་གྱིས་བརྩམས། དོན་གོས་སྒྱུར།

ཅ༽རང་བཙན་དང་རང་ཐག་རང་གཅོད་ནི་འཛམ་གླིང་གི་འཕེལ་ཕྱོགས་ཤིག་རེད།
ལྗེའུ་མི་རིགས་ཀྱི་རྒྱལ་ཁབ་སླར་གསོ་བྱུང་བའི་བྱ་བཞག་དེ་དམིགས་བསལ་གྱི་དཔེ་མཚོན་ཅིག་རེད་ལ། ཁོང་ཚོ་ད་ལྟའི་བོད་མི་རིགས་ལྟར་རང་ཁྱིམ་ཡོད་པ་དེ་འདྲ་ཞིག་མིན་པར། ཁོང་ཚོ་འཛམ་གླིང་ཡུལ་གྲུ་གང་སར་འཁྱམས་ཤིང་གནས་དགོས་བྱུང་ཡོད་པ་རེད། ཡིན་ནའང་།  ཁོང་ཚོས་མི་ལོ་དུ་མའི་རིང་དུ་དུས་ནམ་ཡང་རང་ཉིད་ཀྱི་རྨི་ལམ་མངོན་འགྱུར་བྱ་ཆེད་འབད་བརྩོན་ལྷོད་མེད་བྱས་ཤིང། ལོ་ངོ་དུ་མའི་རིང་གི་དཀའ་སྤྱད་འབད་བརྩོན་དང་ཟུངས་ཁྲག་དང་འདྲེས་པའི་བློས་གཏོང་གི་འཐབ་རྩོད་ལས་མཐའ་མར་རྒྱལ་ཁབ་སླར་གསོ་བྱུང་བ་མ་ཟད། ཨི་སི་རིལ་རང་བཙན་གྱི་རྒྱལ་ཁབ་དེ་ཉིད་གསར་འཛུགས་བྱ་ཐུབ་ཡོད་པ་རེད། དེ་ལྟ་ནའང་། རྒྱལ་ཁབ་གསར་འཛུགས་ཀྱི་ཉིན་མོ་དེར་མཐའ་མཚམས་ཀྱི་ལེ་བྷེ་ཡ་རྒྱལ་ཁབ་ལྔའི་མཉམ་འབྲེལ་གྱིས་བཙན་འཛུལ་བྱས་ཏེ་ཁོང་ཚོའི་འཚོ་གནས་ལ་བར་ཆད་གང་མང་བཟོས་ཡོད་ལ།  སྐབས་དེའི་བཙན་འཛུལ་བྱེད་མཁན་གྱི་རྒྱལ་ཁབ་ལྔ་ལ་མི་གྲངས་ཁྲི་ ༤༠༠༠ ཡོད་པ་དང་ཨི་སི་རིལ་རྒྱལ་ཁབ་ལ་མི་གྲངས་ཁྲི་ ༦༠ ལས་མེད། སྐབས་དེར་ཁོང་ཚོའི་རྒྱལ་ཁབ་སླར་གསོ་ཁྱབ་བསྒྲགས་ཀྱི་ཉིན་མོ་ཡིན་པ་དང་ཚད་ལྡན་གྱི་དམག་མིའི་གྲ་སྒྲིག་ཅི་ཡང་མེད་པའི་དུས་སྐབས་དེར་ཉེན་ཁ་མིག་རྩར་སླེབས་པ་རེད།  འོན་ཀྱང། སྐབས་དེ་དུས་ཀྱང་ཨི་སི་རིལ་གྱི་མིས་རྒྱལ་ཁབ་གསར་འཛུགས་ཏེ་སྲིད་མི་སྲིད་པ་ཞིག་ཡིན་པའི་བསམ་བློ་འཁོར་མེད་པར། ཁོང་ཚོས་རྒྱལ་ཁབ་གསར་འཛུགས་ཏེ་བྱེད་འོས་དང་མི་འོས་ཀྱི་བསམ་བློ་བཏང་ཡོད་པ་དང་། མཇུག་མཐར་རང་ཉིད་ཀྱི་ཁྱིམ་གཞི་བརྟན་སྲུང་བྱ་རྒྱུའི་ལམ་ཁ་གདམ་གསེས་བྱས་ནས་འབངས་མི་ཡོངས་ཀྱི་དཀའ་བ་རྒྱབ་ཏུ་བསྐྱུར་ཏེ་བཙན་འཛུལ་རྒྱལ་ཁབ་དེ་དག་ལ་འཐབ་རྩོད་བྱས་མཐར་རང་ཉིད་ཀྱི་རྒྱལ་ཁབ་གསར་འཛུགས་བྱ་ཐུབ་ཡོད་པ་རེད།
དེ་བཞིན། ཉེ་བའི་དུས་སུ་རང་བཙན་ཐོབ་པའི་ཁྲེ་མོར་ལེའེ་སི Timor_leste རྒྱལ་ཁབ་ཀྱང་ནུབ་ཕྱོགས་ལུགས་ཀྱི་འོས་དང་མི་འོས་རྒྱུན་འཁྱོངས་བྱས་མཐར་རང་བཙན་ཐོབ་ཡོད་པ་རེད།  ཁྲེ་མོར་ལེའི་སི་རྒྱལ་ཁབ་ལ་མི་གྲངས་ཁྲི་ ༨༠ ཡོད་ལ། དེ་ཡང་ཨིན་ཌུ་་ནི་ཤེ་ཡའི་མི་གྲངས་ཀྱི་བརྒྱ་ཆའི་ ༠༌༥ མ་ཟིན་ཙམ་རེད། གལ་སྲིད། སོ་ཧཱ་ཁྲོར་དམག་དོན་སྲིད་དབང་ suhartor’s military  གི་སྒེར་གཅོད་ཀྱི་མི་ལོ་སུམ་ཅུའི་ཁྲོད་ཁོང་ཚོས་” སྲིད་དང་མི་སྲིད” ཀྱི་བསམ་བློའི་ཁ་ཕྱོགས་ལྟར་ཆས་ཡོད་ཚེ་ཁོང་ཚོར་རང་བཙན་ཐོབ་མི་སྲིད་ཀྱང་། མཐའ་མར་ཁོང་ཚོར་རང་བཙན་ཐོབ་ཡོད། དེ་ནི་ཁོང་ཚོའི་དབུ་ཁྲིད་དང་མི་མང་གིས་དུས་ནམ་ཡང་རང་ཉིད་ཀྱི་འདུ་ཤེས་དང་རྩ་དོན་རྒྱུན་འཁྱོངས་བྱས་པའི་འབྲས་བུ་ཉག་གཅིག་ལ་བརྟེན་ནས་བྱུང་བ་ལས། ཐབས་ཤེས་ཡོད་ཚད་ཐབས་དགུ་རྩལ་སྤྲུགས་དང་སྲེག་བཅད་བརྡར་གསུམ་གྱི་བཀོལ་སྤྱོད་ལས་བྱུང་བའི་འོས་དང་མི་འོས་པའི་འབྲས་བུ་ཞིག་གཏན་ནས་མ་རེད། དེ་མཚུངས་ཁོ་སོ་ཝོ་ kosovo ཡང་གཅིགས་མཚུངས་ཡིན་ལ། སའི་རྒྱ་ཁྱོན་ལ་སྤྱི་ལེ་གྲུ་བཞི་མ་ཁྲི་གཅིག་དང་།  (དེ་སྔོན་གྱི་སེ་ཝེ་ཡཱ serbia འི་མངའ་སྡེ་ཞིག) མི་འབོར་ཁྲི་ ༢༠༠ ལས་མེད་ཅིང་སེ་ཝེ་ཡའི་ལྔ་ཆའི་གཅིག་མ་ཟིན་ཙམ་གྱི་མི་གྲངས་ལས་མེད་ནའང་། ལོ་ངོ་དུ་མའི་དཀའ་སྤྱད་འབད་བརྩོན་ལ་བརྟེན་ནས་རང་བཙན་ཐོབ་ཅིང་ཁོང་ཚོའི་རྨི་ལམ་མངོན་འགྱུར་བྱུང་ཡོད་ལ། ཟླ་སྔོན་མ་ནས་བཟུང་འཛམ་གླིང་རྒྱལ་ཁབ་ ༦༢ ཡིས་ཕྱི་འབྲེལ་ལ་ངོས་ལེན་བྱས་ཡོད་པ་རེད། ཆེས་ཐོག་མའི་དུས་སྐབས་དེར་ཁོང་ཚོས་ཀྱང་དཀའ་བ་གང་མང་ཞིག་མྱངས་ཡོད་པ་དང་མི་མང་པོ་ཞིག་གིས་དེ་ཡང་”མི་སྲིད་པ” ཞིག་ཡིན་པའི་བསམ་བློ་འཁོར་ཡོད།
མཉམ་འབྲེལ་རྒྱལ་ཚོགས་ཐོག་མའི་གསར་འཛུགས་ཀྱི་དུས་སྐབས་སུ། འཛམ་གླིང་གི་རྒྱལ་ཁབ་ ༥༠ ལས་མེད་ཀྱང་ད་ལྟ་རྒྱལ་ཁབ་ ༢༠༠ ཡོད་པ་དང་།  སྔོན་མ་ལས་ལྡབ་བཞིའི་འཕར་སྣོན་བྱུང་ཡོད་པ་རེད།   འདི་ལས་རང་བཙན་དང་ཁ་བྲལ། མི་རིགས་རང་ཐག་རང་གཅོད་ནི་འཛམ་གླིང་གི་འཕེལ་ཕྱོགས་ཤིག་ཡིན་པ་གསལ་བཤད་བྱས་ཡོད་ལ།  གཙོ་ཆེ་བ་ནི། མི་རིགས་དེ་དག་གི་འགྱུར་མེད་ཀྱི་བརྩོན་སེམས་དང་ཆོད་སེམས་ལ་རག་ལས་ཡོད་པ་མ་ཟད། དབུ་ཁྲིད་དེ་དག་རང་གི་རྒྱལ་ཁབ་ཀྱི་མདུན་ལམ་ལ་ངེས་ཤེས་གསལ་མིན་དང་ཆོད་སེམས་བརྟན་མིན་ལ་རག་ལས་ཡོད་པ་རེད།
ཆ༽བཙན་བྱོལ་པས་དེ་ནི་སྐྱེས་བུ་དམ་པའི་ནོར་འཁྲུལ་རེད་ཟེར།
ད་ལྟའི་དུས་འདིར་རྒྱ་གཞུང་ལ་དམངས་གཙོདང་མིང་དོན་མཚུངས་བའི་རང་སྐྱོང་གང་རུང་གི་དགོས་འདུན་འདོན་བཞིན་པ་དེ་དག་གི་རེ་འདོད་འགྲུབ་རྒྱུ་དེ་གཏན་ནས་མི་སྲིད་པ་ཞིག་རེད་ལ། རྒྱ་ནག་གི་ཁྲིམས་ལུགས་ཀྱི་ཐད་ལ་རེ་འདོད་དང་ཐབས་ཇུས་གང་ཡོད་བཏོན་ཡང་དེ་ལ་མཇུག་འབྲས་ཤིག་ཡོད་མི་སྲིད། རྒྱུ་མཚན་ནི། གུང་ཁྲན་ཏང་གིས་ད་ལྟའི་བར་རང་ཉིད་ཀྱི་རྩ་ཁྲིམས་གཞིར་བཞག་ཐོག་བྱ་བ་ལག་བསྟར་བྱས་མེད། རྩ་ཁྲིམས་ནི་མེ་ཏོག་གི་རྫ་བུམ་ལྟ་བུ་ཞིག་ཡིན་ནའང་། ཁྱེད་ཀྱིས་དེ་ལས་མེ་ཏོག་སྐྱེས་བའི་རེ་བ་བྱེད་བཞིན་པ་ནི་ཁྱེད་ཀྱི་་ནོར་འཁྲུལ་ཞིག་རེད།
ད་ལྟའི་དུས་འདིར་བཙན་བྱོལ་བོད་གཞུང་གིས་ངེས་པར་དུ་སྒྲུབ་དགོས་པ་ནི། དངོས་ཡོད་གསལ་རྟོགས་དང་བདེན་པར་བརྩི་བཀུར་བྱ་རྒྱུ་དེ་རེད། འདིའི་དངོས་ཡོད་ཅེས་པ་ནི། རྒྱ་ནག་གཞུང་གིས་གང་འདྲ་བྱས་ཀྱང་བོད་མི་མང་ལ་ཆེས་མཐོའི་རང་སྲིད་རང་སྐྱོང་སྤྲོད་མི་སྲིད་པ་དེ་རེད། དེ་ནི་སྒེར་གཅོད་པས་རང་གཤིས་ཐོག་ཐག་གཅོད་བྱས་ཟིན་སྟབས།  བོད་མི་མང་གིས་ཇི་ལྟར་བཟོད་སྒོམ་དང་མཐུན་ཐབས། མགོ་སྒུར་བ་དང་རེ་སྐུལ་ཞུས་པ་སོགས་ཅི་འདྲ་བྱས་ཀྱང་ཕན་འབྲས་ཅི་ཡང་མེད། དམིགས་བསལ་མ་ཡིན་པའི་དཔེ་མཚོན་ཞིག་ནི། ཏཱ་ལའི་བླ་མས་ལྷག་བསམ་རྣམ་དག་གིས་བོད་རང་བཙན་དོར་ཞིང་། ཁོང་རང་གིས་ཐེངས་བརྒྱ་ཕྲག་མང་པོར་ནུབ་ཕྱོགས་ནས་ཁོང་གི་དགོངས་ཚུལ་གསལ་བོར་འགྲེལ་བརྗོད་གནང་ཡོད་པ་མ་ཟད། ཁོང་གི་སྐུ་ཚབ་བརྒྱུད་ཐེངས་མང་པོར་ཐད་ཀར་པེ་ཅིན་གཞུང་ལ་འགྲེལ་བཤད་གསལ་བོར་གནང་ཡོད།  ཡིན་ནའང། རྒྱ་ནག་གཞུང་གིས། དུས་ནམ་ཡང་བོད་རང་བཙན་གྱི་ཞྭ་མོ་ཏཱ་ལའི་བླ་མའི་མགོར་གཡོགས་ཀྱིན་པ་མ་ཟད། བརྒྱུད་ལམ་ལ་སྟངས་འཛིན་བྱས་ཏེ་ཆེད་དུ་འདིའི་སྐོར་དྲིལ་བསྒྲགས་བྱས་ཤིང་། མི་གྲངས་དུང་ཕྱུར་བཅུ་གསུམ་ཡོད་པའི་རྒྱ་ནག་མི་མང་གི་སེམས་ངོར་ཏཱ་ལའི་བླ་མ་ནི་རྒྱལ་ཁབ་ཁ་བྲལ་གྱི་གཏེ་བོ་ཞིག་གི་སྣང་བརྙན་བསྐྲུན་ཏེ་ཁོང་ལ་ཁོང་ཁྲོ་དང་ན་ཟུག་བཟོ་བཞིན་ཡོད་པ་རེད། ཀྲུང་གུང་ལ་ཁ་གཏད་པའི་ཡུལ་གྱར་སྲིད་གཞུང་ལ་མཚོན་ན། ཁྱེད་ཀྱིས་ཁོང་ཚོ་སྐྱེས་བུ་དམ་པ་ཞིག་གི་ཚུལ་དུ་བཟུང་སྟེ་གནས་ལུགས་བརྗོད་པ་དེ་ཀྲུང་གོའི་ནོར་འཁྲུལ་མ་ཡིན་པར། ཁྱེད་རང་གི་ནོར་འཁྲུལ་རེད། ཁོང་ཚོས་གསལ་རྟོགས་ཡོད་པའི་སྒོ་ནས་སྒེར་གཅོད་པའི་རྩ་དོན་དང་གཞུང་ལུགས་ཐོག་ལག་ལེན་བྱེད་ཀྱིན་ཡོད་པ་རེད། ཡིན་ནའང་། ཁྱེད་ལ་རྩ་དོན་མེད་ཅིང་འདུ་ཤེས་ཀྱང་མི་གསལ་སྟབས། གཞན་དང་འཐབ་རྩོད་ལས་རྒྱལ་བ་ནི་མི་སྲིད་པ་ཞིག་རེད།
ཇ༽ བོད་ཀྱི་”དངོས་ཡོད་གནས་ཚུལ་གཉིས་” བརྒྱུད་སྒྲོག
ལོ་འདིར་ཏཱ་ལའི་བླ་མ་དགུང་ལོ་ ༧༤ ཡིན།  ཁོང་ཉིད་ཏཱ་ལའི་བླ་མའི་ལོ་རྒྱུས་ཐོག་སྐུ་ཚེ་ཆེས་རིང་ཞིང་།  (ཏཱ་ལའི་བླ་མའི་སྐུ་ཕྲེང་གཞན་མང་ཆེ་བ་དགུང་ལོ་ ༥༠ མ་སོན་པར་མྱ་ངན་ལས་འདས) མཛད་འཕྲིན་འཛམ་གླིང་ལ་རྒྱས་ཤིང་འཛམ་གླིང་མི་མང་གིས་ཆེས་དགའ་མོས་བྱེད་སའི་དབུ་ཁྲིད་ཅིག་ཏུ་གྱུར་ཡོད།  ཁོང་གིས་འདས་པའི་མི་ལོ་ ༢༠ རིང་ཀྲུང་གོའི་སྲིད་གཞུང་དང་འབྲེལ་མོལ་བྱས་པའི་”དབུ་མའི་ལམ་”ལ་གྲུབ་འབྲས་བྱུང་མེད་སྟབས། (མ་འོངས་པར་འབྱུང་མི་སྲིད་པ་ལྡོག་མེད་ཀྱི་ཆོས་ཉིད་ཅིག་རེད།) ངེས་པར་དུ་ཐབས་ཇུས་ལ་འགྱུར་བ་གཏོང་བའི་བྱ་བཞག་གཙོ་བོར་བཟུང་སྟེ། འཛམ་གླིང་མི་མང་ལ་བོད་འདི་ལོ་རྒྱུས་ཐོག་རང་བཙན་གཙང་མའི་རྒྱལ་ཁབ་ཅིག་ཡིན་པའི་དངོས་ཡོད་དང་། བོད་མི་མང་གི་མངོན་འདོད་རང་བཙན་ཡིན་པའི་དངོས་ཡོད་གཉིས་བརྒྱུད་སྒྲོག་བྱ་དགོས། དེ་ལྟ་བྱ་ཐུབ་ཚེ་འཛམ་གླིང་སྟེང་བོད་མི་མང་གི་དངོས་ཡོད་ལ་ལ་རྒྱབ་སྐྱོར་བྱ་མཁན་རིགས་ཀྱི་སྟོབས་ཤུགས་གསོག་འཇོག་བྱེད་ཐུབ་པ་མ་ཟད། བོད་ནང་ཁུལ་གྱི་བོད་མི་མང་པོ་ཞིག་ལ་སྐུལ་སློང་དང་རྟོགས་སད་འབྱུང་ཐུབ་རྒྱུ་རེད། རེ་བ་རྟོགས་སད་བྱུང་བའི་རང་གི་མི་རིགས་ཀྱི་སྟེང་ལ་བཅོལ་བ་ལས། རྒྱ་གཞུང་གི་སྲིད་དབང་སྒེར་གཅོད་དང་སྐྱབས་འོག་ཏུ་འཇུག་པའི་ཐད་ལ་རེ་བ་བཅོལ་མི་རུང། དེ་བཞིན། སྒེར་གཅོད་པའི་སྲིད་དབང་གི་འགྱུར་བ་ལ་རེ་བ་མི་བཅོལ་བར་མི་མང་གི་དངོས་ཡོད་རྟོགས་རྗེས་ཀྱི་སྟོབས་ཤུགས་ལ་ཡོད་ཚད་བཅོལ་དགོས།
ད་ལྟའི་དབུ་མའི་ལམ་གྱི་ལམ་ཁ་འདི་ལྟ་བུ་ལ་འགྲོ་ལམ་མེད་པ་གསལ་བོར་རྟོགས་འོང་གི་འདུག་ལ།  ངེས་པར་དུ་འཛམ་གླིང་མི་མང་ལ་བོད་ཀྱི་དངོས་ཡོད་ཀྱི་གནས་ཚུལ་བརྒྱུད་སྒྲོག་བྱས་ཏེ་ཕན་ནུས་ཐོན་པ་ཞིག་བཟོ་དགོས། དེ་ལྟར་བྱས་ཀྱང་མངོན་གསལ་གྱི་འབྲས་བུ་ཞིག་མ་བྱུང་བ་ཡིན་ན་དངོས་ཡོད་ཀྱི་ལམ་ཁ་ཞིག་ལ་བརྒྱུད་དགོས་པ་མ་ཡིན་ནམ། དངོས་ཡོད་ཀྱི་ལམ་ལ་ཞུགས་པ་ཡིན་ན་མངོན་གསལ་གྱི་གྲུབ་འབྲས་ཤིག་འབྱུང་གི་རེད། དེ་ལྟར་མིན་པར། རྒྱ་ནག་གི་འོས་མེད་འགྲིག་ཐབས་ཀྱི་སྲིད་བྱུས་འོག་རང་ཉིད་ལྷོད་གཡེང་དང་འཐབ་རྩོད་རྒྱ་ཡན། རྒྱ་ནག་སྒེར་གཅོད་པའི་ཁྲིམས་མཐུན་ཡིན་པའི་བློར་འཛིན་སྐྱོར་སྦྱོང་གི་སྣང་ཚུལ་ལ་བལྟས་ཏེ་བསྡད་པ་ཡིན་ན། བོད་ནང་ཁུལ་གྱི་བོད་མི་ཚོ་ཡང་གོ་ལོག་ཐེབས་སྲིད་ཀྱི་རེད་ལ། མ་འོངས་པའི་དུས་ཤིག་ལ་ཁོང་ཚོས་རང་གི་རྒྱལ་ཁབ་ཀྱི་ལོ་རྒྱུས་ཤེས་རྟོགས་དཀའ་བའི་གནས་སུ་གྱར་ཏེ། རང་བཙན་ལ་རེ་བ་མེད་པར་འཁོར་རྒྱུགས་ཀྱི་བསམ་ཡན་ཁྲོད་གནས་སྲིད་པ་དང་། ཁོང་ཚོའི་སེམས་སུ་བོད་ཕྱི་ནང་གཉིས་ཀྱི་བོད་མི་སུ་ཡིན་ཡང་མང་ཆེ་བས་རང་བཙན་རྩོད་ཀྱི་མིན་པར། རང་ཉིད་གཅིག་པུའི་བསམ་འདུན་བཞིན་ཡོད་ཚད་ལ་མགོ་འདོགས་དང་གཡུགས་སྲིད་པ་ཞིག་རེད།
ཉ༽ ཆེས་གལ་ཆེ་བ་ནི་བོད་མི་མང་”རྟོགས་སད་” བྱ་རྒྱུ་དེ་རེད།
ད་ལྟའི་བར་བོད་འདི་རྒྱ་ནག་གི་ཁོང་གཏོགས་ཤིག་ཡིན་ཅེས་བཤད་པ་ཡིན་ན། རྒྱ་རིགས་ཤེས་ལྡན་པའི་རྒྱབ་སྐྱོར་ཐོབ་སྲིད་ཞེས་པའི་གཏམ་དེ་དངོས་ཡོད་དང་གཏན་ནས་མི་མཐུན་པའི་བཤད་སྟངས་ཤིག་རེད། བོད་ཀྱི་གནད་དོན་ཐག་གཅོད་ཀྱི་གནད་འགག་གཙོ་བོ་ནི། བོད་མི་ས་ཡ་དྲུག་གི་རྟོགས་སད་ཀྱི་ཚད་གཞི་དང་འཐབ་རྩོད་ཀྱི་ནུས་སྟོབས་ལ་རག་ལས་ཡོད། ཨི་སི་རལ་གྱི་རྒྱལ་ཁབ་སླར་གསོ་དང་ཁྲེ་མོར་ལེའེ་སི Timor_leste རྒྱལ་ཁབ་ཀྱི་རང་བཙན། ཁོ་སོ་ཝོ་ཡི་རྒྱལ་ཁབ་གསར་འཛུགས། དེ་བཞིན་ཨ་རི་བ་དབྱིན་ཇིའི་མངའ་ཁོངས་ནས་རང་བཙན་ཐོབ་པའི་དཔེ་མཚོན་ཡོད་ཚད་ཀྱང་མི་རིགས་རང་ཉིད་ཀྱི་དཀའ་སྤྱད་སྡུག་རུས་ལ་བརྟེན་ནས་བྱུང་བ་ལས། མི་སེར་སྤེལ་ཡུལ་ནང་ཁུལ་གྱི་ཤེས་ལྡན་པའི་རྟོགས་སེལ་ལས་བྱུང་བ་ཞིག་གཏན་ནས་མིན། རང་ཉིད་དང་ཁ་གཏད་ཀྱི་མི་རིགས་དེའི་ཤེས་ལྡན་པ་དག་གི་སྙིང་རྗེ་དང་བསམ་ཤེས་ཀྱི་སྐད་སྒྲ་དེ་རྩ་ཆེན་ཡིན་ནའང་། དེ་ནི་གཙོ་བོ་ཞིག་ཏུ་འཛིན་མི་རུང་ལ་སྔོན་འགྲོའི་ཆ་རྐྱེན་ཞིག་ཏུ་དེ་བས་ཀྱང་འཛིན་མི་རུང།
ཏཱ་ལའི་བླ་མའི་མཚན་སྙན་འཛམ་གླིང་ཁྱོན་དུ་རྒྱས་པར་བོད་མི་རིགས་ཀྱི་”དངོས་ཡོད་ཀྱི་གནད་དོན་གཉིས”བརྒྱུད་སྒྲོག་བྱ་རྒྱུ་ནི་མེད་དུ་མི་རུང་བའི་གོ་སྐབས་ཤིག་ཏུ་གྱུར་ཡོད། ནམ་ཞིག་ཏཱ་ལའི་བླ་མ་སྐུ་ཕྲེང་བཅུ་བཞི་བ་ཆེན་མོ་འདི་ཉིད་དགོངས་པ་གཞན་དོན་དུ་གཤེགས་པ་དང་། ཁོང་གི་ཡང་སྤྲུལ་བཙལ་ཡང་ཉུང་མཐར་མི་ལོ་ ༢༠ རྗེས་སུ་སྐུ་ན་གཞོན་པའི་ཏཱ་ལའི་བླ་མ་ཞིག་སླེབས་སྲིད་ཀྱི་རེད། གལ་སྲིད་སླེབས་པ་ཡིན་ཡང་ཁོང་ཉིད་བཞིན་འཛམ་གླིང་ནང་སྙན་གྲགས་ཤིག་ཡོང་ཁག་པོ་ཆགས་ཀྱི་རེད་ལ། ཡོང་མི་སྲིད་པ་ཞིག་རེད་ཅེས་བཤད་ཀྱང་ཆོག དེ་བས་ཏཱ་ལའི་བླ་མ་འདི་ཉིད་ཀྱི་ཁྱད་དུ་འཕགས་པའི་མཁྱེན་ཡངས་དང་རྣམ་དཔྱོད།  གཤིས་རྒྱུད། སྤྱོད་ཚུལ། མིའི་རྩིས་ཐང་། ཀུན་ཁྱབ་སེམས་ཁུར་སོགས་ནི་གཞན་མེད་ཀྱི་ཁྱད་ཆོས་ཤིག་ཡིན་ལ། སུ་ཞིག་གིས་ཀྱང་ལད་ཟློས་བྱ་མི་ཐུབ་པ་ཞིག་ཡིན། འདི་ལྟ་བུའི་འཛམ་གླིང་རང་བཞིན་གྱི་བརྩི་མཐོང་དང་སྙན་གྲགས་ཤིག་མ་འོངས་”ཏཱ་ལའི་བླ་མ” ཅེས་པའི་མཚན་སྙན་ཐོགས་མཁན་ཞིག་ཡོད་མི་སྲིད། འདི་ལྟ་བུའི་རིན་བྲལ་གྱི་རང་གི་ནུས་པ་”དབུ་མའི་ལམ” གྱི་སྟེང་དུ་བཀོལ་བ་ནི་ཧ་ཅང་བློ་ཕམ་གྱི་གནས་ཤིག་རེད།
ཏ༽ བོད་མིའི་སེམས་ཁོང་གི་འབོད་སྒྲ་”རང་བཙན”རེད།
ངས་དོགས་སློང་ཅི་ཡང་མེད་པའི་སྒོ་ནས་བོད་མི་མང་ཆེ་བའི་སེམས་ཁོང་གི་རྨི་ལམ་ངོ་མ་རང་བཙན་རེད་ཅེས་བཤད་ཕོད། ཁོང་ཚོས་རྒྱ་ནག་གཞུང་གི་བཙན་གནོན་དང་ཆོས་ཕྱོགས་ཀྱི་དབུ་ཁྲིད་ཅིག་ཡིན་པའི་ཏཱ་ལའི་བླ་མར་གོང་བཀུར་དང་ཁོང་གི་སྲིད་བྱུས་ལ་བརྩི་བཀུར་བྱེད་ཀྱིན་ཡོད་པ་ལས། དོན་ངོ་མར་བོད་མི་རེ་རེའི་སེམས་ཁོངས་སུ་རྒྱ་གཞུང་གི་དྲག་གནོན་ལ་རྒོལ་ལན་བཏང་སྟེ། རང་ཉིད་ཀྱི་ཁྱིམ་གཞི་སླར་གསོ་བྱ་རྒྱུ་སེམས་སུ་བཅངས་ཡོད། འདས་པའི་ལོ་རྒྱུས་ཀྱི་ཆུ་རྒྱུན་རིང་མོ་ནས་ད་ལྟའི་བར་འཛམ་གླིང་སྟེང་གི་མི་རིགས་གང་འདྲ་ཞིག་ཡིན་ཡང་རང་ཉིད་ཀྱི་ཟུངས་ཁྲག་གི་འཐབ་རྩོད་ལ་བརྟེན་ནས་རྒྱལ་ཁབ་སླར་གསོ་བྱས་པ་ལྟར། བོད་མི་རིགས་ཀྱང་དེ་ལས་འདའ་ཐབས་མེད་པ་ཞིག་རེད།
ཏཱ་ལའི་བླ་མ་དང་བཙན་བྱོལ་བོད་མི་ཚོས་བོད་མི་མང་ཆེ་བའི་འདོད་བློ་ལ་མཐོང་ཆེན་བྱས་ཏེ། བོད་མི་མང་ཆེ་བའི་ནང་སེམས་ཀྱི་རེ་འདོད་ “བོད་རང་བཙན” གྱི་བདེན་པ་དང་དངོས་ཡོད་འཛམ་གླིང་ལ་བརྒྱུད་སྒྲོག་དང་གསལ་སྟོན་བྱ་རྒྱུ་གལ་ཆེན་དུ་མཐོང་གི་འདུག་ལ། དེ་ལས་ཀྱང་གལ་ཆེ་བ་ནི་བོད་མི་རེ་རེར་ཁེར་རྐྱང་གི་ཚོར་སྣང་མི་སྤྲོད་པར་ཁོང་ཚོས་སེམས་ཁོང་གི་རྨི་ལམ་མུ་མཐུད་མེ་ཕུང་བཞིན་སྤར་བ་ཡིན་ན། མེ་ཕུང་འདིས་ད་གཟོད་བོད་རང་བཙན་སླར་གསོ་ལ་དྲོད་ཁོལ་ལམ་ལམ་ཁ་ཞིག་སླར་གསོ་ཐུབ་ཀྱི་རེད།  ལམ་ཁ་འདིར་དཀའ་ཁག་ཇི་འདྲ་ཞིག་ཆེ་བ་དང་མི་རབས་ཇི་འདྲའི་མང་པོ་ཞིག་གི་རྒྱུན་མཐུད་བྱ་དགོས་རུང། ལམ་ཁ་འདི་ནི་སྔ་གཞུག་གང་ཡིན་ཡང་བརྒྱུད་དགོས་པ་ཞིག་ཆགས་ཡོད། དེ་ལྟ་ནའང་། བརྒྱུད་དགོས་པ་ཞིག་ཡིན་པ་ཤེས་བཞིན་དུ། ཅིའི་ཕྱིར་མགོ་མི་རྩོམ་པ་ཡིན་ནམ། མགོ་རྩོམ་པའི་དུས་སྐབས་དེར་ཧ་ཅང་མཉེན་པོ་ཞིག་དང་། དུས་ཡུན་རིང་མོའི་སླར་གསོའི་གོ་རིམ་ཁྲོད་བཤད་རིན་མེད་པའི་སྣང་ཚུལ་འབྱུང་སྲིད་ཀྱང་། མི་མང་པོའི་སེམས་ཁོང་གི་འབོད་སྒྲ་དང་རྨིི་ལམ་ལ་འབྲེལ་བའི་ལམ་བུ་ཞིག་དང་ཡང་དག་གི་ལམ་ཁ་ཞིག་ཡིན་ཕྱིན། ལམ་ནོར་བའི་ལམ་ཁ་རུ་རྨིས་ཁྲི་གཅིག་ལ་རྒྱུགས་པ་ལས་རྨི་ལམ་དང་ཡང་དག་ལ་འབྲེལ་བའི་ལམ་ཁ་དེར་ཁྲི་གང་རྒྱུགས་པ་བཟང་གི་རེད། མི་སུ་འདྲ་ཞིག་ཡིན་ཡང་རང་ཉིད་ཀྱི་རྨི་ལམ་མངོན་འགྱུར་བྱ་ཆེད་དཀའ་སྤྱད་དང་འབད་བརྩོན་བྱས་པ་ཡིན་ན། ནུས་པ་དང་སྟོབས་ཤུགས་ཤིག་ཡོང་གི་རེད་ལ། དེ་ནི་བདེན་པ་ཡིན་པའི་རྐྱེན་གྱིས་རེད། མིའི་རིགས་ཀྱི་ལོ་རྒྱུས་ཁྲོད་གནའ་ནས་ད་བར་དུ་ཡོད་ཚད་ཀྱི་ལེགས་འགྲུབ་དང་རྒྱལ་ཁ་སོགས་ཡོད་ཚད་ཀྱི་ཡོད་ཚད་རང་ཉིད་ཀྱི་རྨི་ལམ་མངོོན་འགྱུར་གྱི་འབྲས་བུ་ཁོ་ན་ཡིན་སྟབས། བོད་མི་རིགས་ཀྱི་རྨི་ལམ་ཡང་མིའི་རིགས་ཀྱི་རྨི་ལམ་མངོན་གྱི་གྲུབ་ཆ་ཞིག་ཏུ་གྱུར་ཡོད།