ལས་འགན་འདི་དམིཌ་བསལ་ཞིག་རེད།

ཉེ་ལམ་བོད་གཞུང་བདེ་སྲུང་ལས་ཁུངས་ཀྱི་དྲུང་ཆེ་འཇམ་དཔལ་ཆོས་བཟང་ལགས་གཞུང་ཞབས་འདེམས་བསྐོ་ཁང་ལྷན་ཁང་དང་འོས་བསྡུ་ལྷན་ཁང་གཉིས་ཀྱི་འགན་འཛིན་གཅིག་ལྕོགས་ཏུ་བསྐོས་ཡོད་པ་དང་། ཁ་སང་གཟའ་ཟླ་བ་ནས་བཟུང་འོས་བསྡུ་ལྷན་ཁང་ནས་ཕྱག་ལས་དངོས་སུ་མགོ་བརྩམས་ཡོད་འདུག

འདི་ག་གསར་ཁང་གིས་ཁོང་གི་ལས་འགན་གསར་བའི་སྐོར་ལ་སྐད་ཆ་དྲིས་པར་ཁོང་གིས་གསུངས་དོན། ང་རང་འདིར་ཡོང་ནས་ཉི་མ་གཅིག་མ་གཏོགས་སོང་ཡོད་པ་མ་རེད། ཁ་སང་དེ་རིང་རྩིས་སྤྲོད་རྩིས་ལེན་བྱེད་བཞིན་པའི་སྒང་ཡིན། ད་དུང་ལས་ཀ་དངོས་གཞིའི་ཐོག་ལ་གོམ་པ་རྒྱབ་ཡོད་པ་མ་རེད། དེ་འདྲ་སོང་ཙང་། རྗེས་ཕྱོགས་ལས་ཀ་ག་འདྲ་བྱེད་དགོས་ཀྱིན་འདུག་དེ་བོད་གཞུང་གི་སྒྲིག་ཁྲིམས་ལྟར་ལས་དགོས་པ་རེད་མ་གཏོགས། ངས་ལས་འཆར་གསར་བ་ཞིག་བཀོད་ནས་འདི་བྱེད་ཀྱི་ཡིན། ད་ལྟའི་གཞུང་ཞབས་འདེམས་བསྐོ་ལྷན་ཁང་གི་ལས་སྟངས་འདི་འགྲིག་གི་མི་འདུག་ཅེས་ནས་བསྒྱུར་བཅོས་བཏང་ཆོག་གི་མ་རེད། སྔོན་མ་ ༡༩༨༣ རྗེས་ནས་ལོ་གསུམ་ལ་ལས་དོན་འདིའི་སྐོར་ལ་ལས་ཀ་བྱས་མྱོང་ཡོད། སྐབས་དེར་གཞུང་ཞབས་འདེམས་བསྐོ་ལྷན་ཁང་ལབ་གི་མ་རེད། ལས་བྱེད་བདག་གཉེར་ཁང་ལབ་གི་རེད། སྐབས་དེ་དུས་ཀྱི་ལས་ཀ་བྱས་སྟངས་དང་བསྡུར་ན་ད་ལྟ་འགྱུར་བ་ཞེད་པོ་འགྲོ་ཡོད་པ་རེད། ཡིན་ནའང་། རྩ་བའི་གཞི་རྩ་གཅིག་པ་ཡིན་སྟབས། ལས་ཀ་བྱེད་སྟངས་ཀྱི་ཐད་ནས་ཏོག་ཙམ་ཧ་གོ་གི་ཡོད་པ་རེད། ཅེས་དང་། བརྒྱད་ཅུ་གྱ་གྲངས་སྐབས་ཀྱི་ལས་བྱེད་བདག་གཉེར་ཁང་དང་ད་ལྟའི་གཞུང་ཞབས་འདེམས་བསྐོ་ལྷན་ཁང་གཉིས་ལ་ཁྱད་པར་ག་རེ་ཡོད་མེད་སྐོར་དྲིས་པར་ཁོང་གིས་གསུངས་དོན། སྐབས་དེ་དུས་ལས་བྱེད་བདག་གཉེར་ཁང་གི་ལས་ཀ་དེ་རང་དབང་ཟེར་ན་མི་འདུག  ད་ལྟ་ནང་བཞིན་ལས་ཀ་ག་རེ་བྱེད་དགོས་ཀྱང་ལས་བྱེད་བདག་གཉེར་ཁང་རང་ངོས་ནས་ཐག་བཅད་ན་འགྲིག་གི་ཡོད་པ་རེད། ད་ལྟ་ནང་བཞིན་སྤྱི་འཐུས་ལྷན་ཁང་དང་ཁོང་ཚོར་ཞུ་དགོས་ཀྱིན་ཡོད་པ་མ་རེད། ཁ་སང་དེ་རིང་ནང་བཞིན་མཐོ་སློབ་ཐོན་པ་མང་བོ་ཡང་ཡོད་པ་མ་རེད། ད་ལྟ་དེ་འདྲ་མ་རེད། གཅིག་ནས་བོད་གཞུང་གི་བཅའ་ཁྲིམས་ཡོད་པ་རེད། གཉིས་ནས་གཞུང་ཞབས་འདེམས་བསྐོ་ལྷན་ཁང་རང་གི་སྒྲིག་གཞི་ཡོད་པ་རེད། སྒྲིག་གཞི་ལྟར་འགྲོ་རྒྱུ་མ་གཏོགས་ངས་བསྒྱུར་བཅོས་འདི་འདྲ་གཏོང་གི་ཡིན་ལབ་ན་འགྲིག་གི་ཡོད་པ་མ་རེད་ཟེར།

དེ་བཞིན་ཁོང་གིས། ད་སྐབས་ང་རང་ལས་ཁུངས་གཉིས་ཀའི་འགན་འཛིན་གཅིག་ལྕོགས་སུ་བསྐོས་ཡོད་པ་རེད། སྤྱིར་བཏང་འགན་གཅིག་ལྕོགས་ཡིན་ཡང་། ལས་ཁུངས་གཉིས་ཀ་ཁ་ཁ་རེད། ལས་ཀ་བྱེད་སྟངས་ཀྱི་ངོ་བོ་ཡང་ལོག་ཀ་རེད། དེ་འདྲ་ཡིན་པར་བརྟེན། ལས་ཀ་གཞན་པ་ལས་དམིགས་བསལ་འདྲ་བོ་ཞིག་རེད་ཟེར།