རྒྱ་ནག་གིས་བོད་ནང་གི་དཔལ་འབྱོར་དང་རིག་གཞུང་། སྤྱི་ཚོགས་འཛུགས་སྐྲུན་བཅས་ཡར་རྒྱས་བཏང་པའི་གྲུབ་འབྲས་ལ་དབྱིན་ཇིའི་གྲོས་ཚོགས་འཐུས་མི་ཚོས་བསྟོད་བསྔགས་བྱས་འདུག
བོད་ས་གནས་སྲིད་གཞུང་གི་མགྲོན་འབོད་ལྟར་དབྱིན་ཇིའི་གྲོས་ཚོགས་འཐུས་མི་སྐོར་ཞིག་གིས་ཕྱི་ཚེས་ ༨ ཉིན་ནས་བོད་ནང་ལྟ་སྐོར་བྱས་ཡོད་འདུག
ཁོང་ཚོས་བོད་རང་སྐྱོང་ལྗོངས་ཀྱི་ལས་བྱེད་དང་བོད་རིག་པ་བ་རྣམས་དང་མཉམ་དུ་བོད་ནང་གི་ད་ལྟའི་གནས་སྟངས་སྤྱི་དང་། འགྲོ་བ་མིའི་ཐོབ་ཐང་། ཆོས་ལུགས་དད་མོས་བཅས་ཀྱི་ཐད་བགྲོ་གླེང་ཚོགས་འདུ་ཞིག་ཀྱང་བསྐོངས་འདུག
ཕྱི་ཚེས་ ༡༢ ཉིན་ཁོང་ཚོ་ཕྱིར་དབྱིན་ཡུལ་ལ་འབྱོར་རྗེས་ཁོང་ཚོས་ཐེངས་འདིའི་འགྲུལ་སྐྱོད་ཀྱི་སྐོར་ལ་སྙན་ཐོ་ཞིག་བསྒྲགས་ཡོད་ཅིང་། དེའི་ནང་དུ་བཀོད་དོན། རྒྱ་ནག་དབུས་སྲིད་གཞུང་གི་རོགས་སྐྱོར་འོག་བོད་ནང་གི་དཔལ་འབྱོར་དང་སྤྱི་ཚོགས་བཟོ་ལས་ལ་ཧ་ལས་པའི་ཡར་རྒྱས་ཕྱིན་འདུག་ལ། བོད་མི་རིགས་ཀྱི་འཚོ་བའི་གནས་སྟངས་ཀྱང་ཞེ་དྲག་གིས་ཡར་རྒྱས་འགྲོ་གིན་འདུག་ཅེས་དང་།
རྒྱ་ནག་གཞུང་གིས་བོད་ས་ཁུལ་གྱི་ཤེས་ཡོན་སློབ་གསོའི་ཐོག་ལའང་མ་དངུལ་ཕོན་ཆེན་པོ་གཏོང་གི་འདུག དེ་རིང་བར་དུ་བོད་ས་ཁུལ་དུ་གཞི་རིམ་སློབ་གྲྭ་ ༨༨༤ དང་དམའ་འབྲིང་སློབ་གྲྭ་ ༡༡༧། མཐོ་འབྲིང་སློབ་གྲྭ་ ༡༠། མཐོ་རིམ་སློབ་གྲྭ་ ༦ ཡོད་པར་བཤད།
ཡང་ཁོ་ཚོས་བཤད་དོན། བོད་ས་ཁུལ་དུ་ཆོས་ལུགས་ཀྱི་བསྟི་གནས་ ༡༧༠༠ འདུག་ལ། འདི་ལ་བལྟས་ན་བོད་མི་རིགས་ཀྱིས་ཆོས་ལུགས་དད་མོས་ཀྱི་རང་དབང་ལ་ལོངས་སུ་སྤྱོད་བཞིན་པ་མཐོང་ཐུབ་གིན་འདུག་ཟེར།
ཁོང་ཚོས་སྙན་ཐོ་དེའི་ནང་དུ། རྒྱ་ནག་གཞུང་གིས་བོད་མི་རིགས་ཀྱི་འགྲོ་བ་མིའི་ཐོབ་ཐང་ལ་སྲུང་སྐྱོབ་དང་ཡར་རྒྱས་གཏོང་བའི་འབད་བརྩོན་དེར་རྗེས་སུ་ཡི་རང་བྱེད་ཀྱིན་ཡོད་ཟེར།
ཁོང་ཚོས་བོད་ལྗོངས་སློབ་གྲྭ་ཆེན་མོར་གཟིགས་སྐོར་བྱས་རྗེས་རྒྱ་ནག་གིས་བོད་ནང་གི་རིག་གཞུང་སྲུང་སྐྱོབ་ཀྱི་ཐད་ངོས་འཛིན་ཚད་མཐོན་པོ་གནང་གི་ཡོད་པ་ཤེས་སོང་ལ། དེ་བཞིན་བོད་ནང་གི་དགོན་པ་དང་ཁ་ཆེའི་ལྷ་ཁང་སོགས་ལ་གཟིགས་སྐོར་བྱས་རྗེས་རྒྱ་ནག་ནང་གི་ཆོས་ལུགས་ཀྱི་རྣམ་པ་མི་འདྲ་བ་དག་ལ་ཉམས་མྱོང་ཐོབ་ཅེས་དང་།
གཟིགས་སྐོར་འདི་བརྒྱུད་དེ། ཁོང་ཚོས་བོད་ནང་ལ་གཏིང་ཟབ་མོར་ལྟ་རྒྱུ་བྱུང་ལ། རྒྱ་རིགས་དང་བོད་རིགས་ཚང་མས་ཞི་བདེའི་བོད་འཛུགས་སྐྲུན་བྱ་རྒྱུར་རེ་སྨོན་བྱེད་ཀྱིན་འདུག་ཅེས་སོགས་བརྗོད་ཡོད་པ་རེད།
དབྱིན་ཇིའི་གྲོས་ཚོགས་འཐུས་མི་འདི་དག་ནི། Lord David Steele ཞུ་བ་དང་། Lord Alton དེ་བཞིན་ James Gray MP དང་ Derek Wyatt MP བཅས་རེད། ཁོང་ཚོ་བཞི་བོ་ནི་དབྱིན་ཇིའི་གྲོས་ཚོགས་ཀྱི་རྒྱ་ནག་རྒྱབ་སྐྱོར་ཚོགས་པའི་འཐུས་མི་ཡིན་འདུག
རྒྱ་ཟས་ལེའུ་བཅོ་བརྒྱད་ཟ་རྒྱུར་དགའ་བའི་དབྱིན་ཇིའི་འཐུས་མི་བཞི་པོའི་བརྗོད་དོན་ལ་བོད་ནང་རང་དབང་དང་། ཡར་རྒྱས། བདེ་སྐྱིད་བཅས་ཚད་མཐོ་པོར་སླེབས་པ་ངོས་འཛིན་བྱེད་ཀྱིནཡོད་པ་འདྲ།
དེ་འདྲ་ཡིན་ཚེ་མདོ་དབུས་ཁམས་གསུམ་ནས་རང་གི་གཅེས་པའི་ཚེ་སྲོག་ལའང་མ་འཛེམས་པར་ཐ་གཅིག་ཏུ་རྒྱ་ནག་དམར་པོའི་སྲིད་གཞུང་ལ་བོད་མི་ཚོས་ཞི་རྒོལ་བྱེད་དོན་གྱི་གནད་དོན་དེ་གང་ལ་ཐུག་ཡོད་ཅེས་ང་ཚོས་ཁོང་ཚོར་ངེས་པར་དུ་དྲི་བ་འདོན་ཆོག
རྒྱ་ནག་གཞུང་གིས་ཀྱང་གནད་དོན་དེར་དྲག་པོའི་དཔུང་གིས་མི་སྤྱོད་ལས་འདས་པའི་བརྡུང་འདེགས་ཚ་མནན་དང་། དྲི་གཅོད་ནན་མོ། བཙོན་བཅུག སྲོག་འཁྲིམས་གཅོད་པ་སོགས་རྒྱུ་མཚན་གང་ལ་བརྟེན་ནས་བྱེད་དམ།
འཛམ་གླིང་རྒྱལ་སྤྱིའི་འཁྲོད་དུ་རང་དབང་ཅན་གྱི་གསར་འགོད་པ་ཚར་དམ་དྲག་དང་། རྒྱལ་སྤྱིའི་སྤྱི་ཚོགས་འཁྲོད་དུའང་རྒྱལ་ནང་གི་གནས་ཚུལ་དེ་དག་སྦས་གསང་བྱེད་དགོས་དོན་གང་ཡིན་ནམ།
ང་ཚོས་གོང་གི་དབྱིན་ཇིའི་འཐུས་མིའི་བཞི་པོ་དེར་ཐ་གཅིག་ཏུ་ཁོང་ཚོའི་བཤད་ཚུལ་དེ་དྲང་བདེན་མ་ཡིན་པར་འཁྱོགས་བཤད་བྱེད་ཀྱིན་ཡོད་པར་ངོ་རྒོལ་བྱེད་དགོས།
མི་དེ་དག་གི་རིགས་ལ་དངོས་ནས་བདེན་པ་ཁུངས་ཐུབ་བྱེད་དུ་འཇུག་དགོས་ཀྱི་ཡོད་པ་རེད། ཁ་སྐྱག་ལངས་དུ་སོང་ནས། བཤད་དགོས་མ་དགོས་ཚང་མར་རྒྱའི་སྲིད་གཞུང་གིས་ཡིག་ཆ་ལྟར་ཁས་ལེན་བྱས་པ་ཡིན་ན། བོད་འདི་རྒྱ་ཁུངས་སུ་ཁོང་ཚོས་ཆབ་བསྒྲགས་བྱས་ཀྱང་འགྲིག་གི་ཡོད་པ་རེད། འབྲི་དགོས་སའི་བོད་མི་མང་ལ་མི་འདྲི་བར། འདྲི་མི་དགོས་པར་དཔོན་རིགས་ངན་པ་དེ་དག་གི་ལྐོག་ཇུས་ངན་པ་དེ་དག་གི་ཡིག་ཆར་བལྟས་དེ་འཛམ་གླིང་ལ་མགོ་བསྐོར་གཏོང་མཁན་འདི་དག་ལ་དངོས་ནས་ཚ་འདེད་གཏོང་རྒྱུ་དེ་ནི་བོད་ཕྱི་ན་ཡོད་པའི་རང་དབང་སྒེར་ཚོགས་དང་གཞུང་འབྲེལ་ཚོགས་པའི་གསར་འགོད་པ་སུས་ཡིན་ཡང་འགན་དུ་བཞེས་རན་ཡིན། དེ་མིན་གཉེན་ཁ་ཆེ་རུ་འགྲོ་ངེས།
བོད་ཀྱི་གནས་སྟངས་ངོ་མ་ཤེས་ན། ཕྱི་རྒྱལ་བ་ཕར་བཞག་བོད་པ་ཡིན་ཀྱང་ཡར་རྒྱས་ཀྱི་རྣམ་པ་མཐོང་གི་རེད།
ཁོ་ཚོས་གང་བཤད་པ་དེའི་ཐད་རང་དབང་ལུང་པའི་གསར་འགོད་པ་ཚོས་དོན་དངོས་གང་ཡིན་དང་། གནས་སྟངས་ཕྱི་གསལ་ནང་གསལ་ཡོང་བའི་བཅར་འདྲི་ཚ་ནན་བྱས་ཏེ་བཙན་བྱོལ་བོད་མི་ལས་སླ་བོའི་མཐོང་ཆུང་དང་སྣང་མེད་བྱེད་མི་ཐུབ་པའི་ཚོར་སྣང་ངེས་པར་སྤྲད་དགོས། ལུང་རིགས་སོགས་ལ་འགན་ཆེན་པོ་ཡོད།
ཡང་ངས་ཡིག་ནོར་མཐོང་བྱུང་།
ཚོགས་འདུ་ཞིག་ཀྱང་བསྐངས་འདུག ཚོགས་འདུ་ཞིག་བསྐོངས་འདུག
འབད་རྩོན། འབད་བརྩོན།