ང་ཚོས་ད་ནས་བཟུང་སྟེ་མཐོ་རིམ་སློབ་མ་ལས་དམའ་རིམ་སློབ་མ་གལ་ཆེན་དུ་གཟིགས་ཏེ་སློབ་སྦྱོང་སྤྲོད་རྒྱུ་ཧ་ཅང་གལ་ཆེན་པོ་རེད་ལ། རྩ་བའི་དུས་དང་གནས་སྟངས་ཀྱི་དབང་གིས་ཤེས་ཡོན་སྲིད་བྱུས་དང་འགྲོ་སྟངས་ཀྱི་ཐབས་ལམ་སོགས་ལ་བསྐྱར་ཞིབ་གནང་རྒྱུ་ཧ་ཅང་གལ་ཆེན་དུ་མཐོང་གི་འདུག་ཟེར།
དེ་རིང་ཞོགས་པའི་ཆུ་ཚོད་ ༨ ཀྱི་སྟེང་ས་རཱ་བོད་ཀྱི་མཐོ་རིམ་སློབ་གཉེར་ཁང་གིས་གོ་སྒྲིག་གནང་བའི་མི་ལོ་ལྔ་བཅུའི་དུས་དྲན་སྲུང་གཙི་དང་འབྲེལ་བའི་མཁས་པའི་བགྲོ་གླེང་ཚོགས་འདུ་དེའི་སྐུ་མགྲོན་གཙོ་བོར་བོད་གཞུང་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་མཆོག་དང་རིགས་ལམ་སློབ་གཉེར་ཁང་གི་དབུ་འཛིན་དགེ་བཤེས་སྐལ་བཟང་དགྲ་འདུལ་རྣམ་གཉིས་ཕེབས་ཡོད་ལ། དེ་བཞིན་ཝར་ཎ་མཐོ་སློབ་དང་ལྷོ་ཕྱོགས་སེ་ར་དགོན་གྱི་དགེ་བཤེས་ཁག་ཅིག བོད་ཀྱི་དཔེ་མཛོད་ཁང་དང་བོད་ཀྱི་རིགས་ལམ་སློབ་གཉེར་ཁང། ཀིརྟི་བྱེས་པ་གྲྭ་ཚང་། ས་རཱ་མཐོ་སློབ། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་། བོད་གཞུང་ཤེས་རིག་ལས་ཁུངས་བཅས་ནས་ཕེབས་པའི་མཁས་པ་ ༢༠ ལྷག་ཕེབས་འདུག་ལ། ས་རཱ་མཐོ་སློབ་ཀྱི་དགེ་སློབ་དང་གསར་འགོད་པ་འདུ་འཛོམས་དང་བཅས་མཁས་པའི་བགྲོ་གླེང་དེ་དབུ་འཛུགས་གནང་ཡོད།
བགྲོ་གླེང་དབུ་འཛུགས་ཀྱི་མཛད་རིམ་ཐོག་ས་རཱ་མཐོ་སློབ་ཀྱི་སློབ་སྤྱི་འཇམ་དཔལ་གྲགས་པ་ལགས་ཀྱིས་རིགས་ལམ་སློབ་གཉེར་ཁང་དབུ་འབྱེད་ཀྱི་བརྒྱུད་རིམ་དང་དམིགས་ཡུལ་ཐད་འགྲེལ་བརྗོད་གནང་སོང་ལ། ཁོང་གིས། ངྷ་ས་རིགས་ལམ་སློབ་གཉེར་ཁང་འདི་ཉིད་༧གོང་ས་མཆོག་གི་བཀའ་དྲིན་འོག་གཞི་རིམ་སློབ་གྲྭ་ཁག་ནས་ཐོན་པའི་སློབ་མ་ཇི་སྙེད་ཅིག་ལ་བོད་ཀྱི་ཐུན་མོང་མ་ཡིན་པའི་རིག་གནས་དང་ཡང་སྒོས་ནང་དོན་རིག་པར་འདོད་མོས་ཡོད་རིགས་ལ་དམིགས་ཏེ་ ༡༩༧༣ ལོར་གསར་འཛུགས་གནང་བ་ཡིན་ཞིང། དེ་བཞིན་ཞིང་བཤེགས་དམ་པ་རྒན་བློ་བཟང་རྒྱ་མཚོ་མཆོག་གིས་ཕུགས་རྒྱང་རིང་བོའི་བསམ་བློ་གཞིར་བཞག་སྟེང་ ༡༩༩༠ ལོ་ནས་བཟུང་རིགས་ལམ་སློབ་གཉེར་ཁང་གི་ཡན་ལག་འདིའི་ཕྱིའི་འཛུགས་སྐྲུན་གྱི་ལས་གཞི་མགོ་འཛུགས་གནང་བ་དང་། རིམ་བཞིན་བོད་ཀྱི་རིག་གནས་མི་ཉམས་རྒྱུན་འཛིན་དང་སློབ་གཉེར་ཁང་གི་སློབ་ཚན་གཏན་འབེབས། སློབ་སྟོན་པ་འཚོལ་ཞིབ། འཛིན་སྐྱོང་བྱེད་ཕྱོགས། དཔལ་འབྱོར་མཁོ་སྒྲུབ་སོགས་ལེགས་འགྲུབ་བྱུང་སྟེ། ༡༩༩༨ ལོའི་ཕྱི་ཟླ་ ༨ པའི་ཚེས་ ༡༣ ཉིན་༧གོང་ས་མཆོག་ཆེད་ཕེབས་ཀྱིས་ས་རཱ་མཐོ་སློབ་དངོས་སུ་དབུ་འབྱེད་གནང་བ་མ་ཟད། མཐོ་རིམ་རིག་གནས་རབ་འབྱམས་པའི་སློབ་ཚན་ཁག་ཀྱང་འབྲེལ་ཡོད་མི་སྣ་དང་མཁས་དབང་འདུ་འཛོམས་ཐོག་གཏན་འབེབས་གནང་མཐར། འདས་པའི་བགྲང་བྱ་བཅུ་གཅིག་རིང་མཐོ་རིམ་རིག་གནས་རབ་འབྱམས་པའི་སློབ་ཐོན་སློབ་མ་ ༡༧༩ དང་འབྲིང་རིམ་དགེ་འོས་ ༩༠། གཞི་རིམ་འོག་མའི་དགེ་འོས་ ༡༢༡། དེ་བཞིན་ཧི་མ་ལ་ཡའི་རི་རྒྱུད་ཀྱི་དགེ་འོས་ ༥༧། དམིགས་བསལ་སློབ་སྦྱོང་གནང་བཞིན་པའི་ཟུར་སློབ་གྲངས་ ༡༡༠། རྒྱ་གར་མཐོ་སློབ་དུ་ཡོད་པའི་བོད་རིགས་སློབ་མ་ ༣༣༡ བཅས་གསོ་སྐྱོང་བྱས་དང་བྱེད་བཞིན་ཡོད་ལ། ད་ལྟའི་བར་ཨེ་མོ་རེ་གཙུག་ལག་སློབ་གཉེར་ཁང་གི་སློབ་མ་ ༡༡༠ དང་མེ་ཡ་མེ་མཐོ་སློབ་ཀྱི་སློབ་མ་ ༧༣། མེ་ཤུ་ཁཱ་མཐོ་སློབ་ཀྱི་སློ་བ་མ་ ༡༧ བཅས་ལ་བོད་ཀྱི་རིག་གཞུང་སློབ་སྦྱོང་དང་རིག་གནས་བརྗེ་རེས་ཀྱི་ལས་གཞི་སྤེལ་མུས་ཡིན། ཐེངས་འདིའི་བགྲོ་གླེང་འདི་ནི་ང་ཚོ་བོད་གཞུང་དམངས་གཉིས་བཙན་བྱོལ་ཏུ་འབྱོར་ནས་མི་ལོ་ ༥༠ འཁོར་བའི་དུས་དྲན་སྲུང་གཙིའི་ཆེད་ཡིན་ལ། བགྲོ་གླེང་ཐོག་འདས་པའི་བྱུང་རབས་ལ་བལྟས་ཏེ་མ་འོངས་པའི་མི་རབས་གསར་བར་ལམ་ཡང་དག་ཅིག་དང་། ༧གོང་ས་མཆོག་དང་བོད་གཞུང་གི་དམིགས་ཡུལ་ཐོག་ཤར་བསྐྱོད་ཐུབ་པའི་ལམ་སྟོན་དང་འབོད་སྐུལ་དང་འབྲེལ་བའི་ཆེད་རྩོམ་ཁག་འགྲེམས་སྤེལ་ཞུ་རྒྱུ། རང་གི་དམིགས་ཡུལ་བཞིན་དོན་གཉེར་ལྡན་པའི་ལས་དོན་ཁག་ལ་གཞིར་བཞག་སྟེ་འདི་ག་སློབ་གཉེར་ཁང་གི་དགེ་སློབ་རྣམ་པར་བགྲོ་གླེང་བརྒྱུད་རང་གི་སློབ་ཚན་དང་འབྲེལ་བའི་ཐོག་དགོངས་ཚུལ་དང་ཐབས་ལམ། རིགས་ལམ་དང་བློ་སྐྱེད་གསར་བ་ཞིག་ཡོང་ཆེད་དམིགས་པ་ཡིན་ལ། དེ་བཞིན་ཆེས་མཐོའི་རིག་གནས་རབ་འབྱམས་པའི་སློབ་ཚན་དང་ལས་གཞི་སོགས་ཀྱི་ཐད་ལའང་བགྲོ་གླེང་དང་གོ་བསྡུར་གནང་ཆེད་ཡིན་ཅེས་གསུངས།
སྐུ་མགྲོན་གཙོ་བོ་བོད་གཞུང་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་མཆོག་གིས་གསུངས་དོན། ང་ཚོའི་མི་ལོ་ལྔ་བཅུའི་དུས་དྲན་དེ་དུས་དྲན་གྱི་ལས་རྟགས་དང་བརྗོད་ཚིག་གི་ནང་དོན་དུའང་ལོ་ལྔ་བཅུའི་གཞིས་བྱེས་བོད་མིའི་སྐྱིད་སྡུག་དྲན་གསོ་ཞེས་པའི་བརྗོད་ཚིག་དེ་འདྲ་ཞིག་བཀོད་ཡོད་ཅིང་། ཚིག་ལ་སྙན་ཆ་མེད་ཀྱང་དོན་སྙིང་བོའི་ཐོག་སེམས་ནང་ཚོར་བ་སླེབས་འོང་བའི་ཚིག་དེ་འདྲ་ཞིག་བེད་སྦྱོད་གཏོང་གིན་ཡོད་པ་རེད། ང་ཚོ་བཙན་བྱོལ་གྱི་ནང་དུ་མི་ལོ་ལྔ་བཅུ་འཁོར་བའི་དུས་དྲན་སྲུང་གཙི་བྱེད་ཀྱིན་པ་ལྟར་རྒྱ་ནག་གིས་ཀྱང་ལོ་ལྔ་བཅུ་དང་དྲུག་ཅུ་སོགས་ཀྱི་དུས་དྲན་སྲུང་གཙི་བྱེད་ཀྱིན་ཡོད་པ་རེད། ང་ཚོའི་ངོས་ནས་ཁོང་ཚོའི་བྱེད་སྟངས་དེ་དོན་དང་ལྡན་པ་ཡིན་མིན་ཞིབ་འཇུག་བྱ་དགོས་པ་ཞིག་རེད་ལ། ང་རང་ཚོའི་ངོས་ནས་དུས་དྲན་དེ་གཞན་ལ་བལྟས་ཏེ་བྱས་པ་ཙམ་མ་ཡིན་པར་དངོས་ཡོད་དང་བདེན་པའི་ཐོག་ནས་སྲུང་གཙི་བྱ་དགོས་པ་དེ་ཧ་ཅང་གལ་ཆེན་དུ་མཐོང་གིན་འདུག་ཅེས་གསུངས་བྱུང་ལ། ཡང་ཁོང་གིས། འདས་པའི་མི་ལོ་ལྔ་བཅུ་ལ་དྲན་གསོ་བྱས་དུས་ཚོར་བ་རྐྱེན་པོ་ཞིག་རེད། ང་ཚོས་ད་ལྟའི་ཆ་རྐྱེན་ལ་བལྟས་ཏེ་འདས་པའི་དུས་སྐབས་ལ་བསྡུར་བ་ཡིན་ན་བསྡུར་ཐབས་མེད་པ་ཞིག་རེད་ལ། ད་ལྟའི་གནས་སྟངས་ལ་བལྟས་ཏེ་འདས་པའི་བྱུང་རབས་བཤད་བསྡད་པ་དེ་ཡང་འཛམ་གླིང་སྤྱི་ཡོངས་སུ་དྲང་བདེན་ལ་བརྩི་གི་མེད། ཡིན་ཡང་། ༧གོང་ས་མཆོག་གིས་ནམ་རྒྱུན་དུ། ང་ཚོའི་གྲུབ་འབྲས་དང་བསྔགས་བརྗོད་གཞན་གྱིས་བརྗོད་དགོས་པ་དང་ལས་དོན་གང་ཡིན་ཡང་རེ་བ་བཟང་ས་དང་གྲ་སྒྲིག་སྡུག་ས་ནས་བྱེད་དགོས་པའི་བཀའ་སློབ་ནན་པོ་གནང་ཡོད་པ་ལྟར་ད་ལྟའི་བར་ང་ཚོ་ཡར་རྒྱས་གང་འཚམ་ཕྱིན་ཡོད་ཀྱང་། ང་ཚོའི་ཐུགས་བློར་མ་ཆུད་པ་དང་ཡར་རྒྱས་གཏོང་དགོས་ཀྱང་དཀའ་ངལ་གྱི་རང་བཞིན་དུ་གནས་ཡོད་པའི་རིགས་མང་པོ་ལྷག་ཡོད་པ་མ་ཟད། ཤེས་ཡོན་སྲིད་བྱུས་དང་འབྲེལ་བའི་སློབ་གྲྭ་ཁག་གི་དཀའ་ངལ་ཁག་གསུམ་ང་ཚོས་ངེས་པར་དུ་བསྒྱུར་བཅོས་གཏོང་དགོས་ཀྱིན་འདུག དང་པོ། ཤེས་ཡོན་ཚོགས་ཆེན་སྐབས་གཉིས་པ་ནས་བཟུང་དེང་རབས་ཀྱི་ཤེས་ཡོན་སྤྱིའི་གནས་ཚད་དེ་སློབ་གྲྭ་ཁག་གི་ནང་འདོད་པ་ཁེངས་ཀྱིན་མེད་པ་དང་། གཉིས་པ། བོད་དང་ཐུན་མོང་མ་ཡིན་པའི་འབྲེལ་བ་ཡོད་རིགས་ཀྱི་སློབ་གྲྭ་ཁག་ཏུ་བོད་སྐད་དང་བོད་ཡིག་གི་གནས་ཚད་དེ་དུས་ཚོད་རིམ་བྱུང་གིས་ཉམས་ཆག་འགྲོ་གིན་ཡོད་པ། གསུམ་པ། ང་ཚོ་མི་རིགས་རང་ལ་ཡོད་པའི་གཉོམ་ཆུང་དང་ཚུལ་མཐུན། དྲང་པོ་ཡིན་པའི་ཡ་རབས་ཀྱི་ཀུན་སྤྱོད་ཉམས་ཆག་འགྲོ་བཞིན་ཡོད་པའི་སྐོར་སོགས་མང་པོ་བྱུང་བ་རེད། དེ་གསུམ་དེ་གང་འདྲ་བྱས་ནས་ཆགས་མིན་ང་ཚོད་ཞིབ་འཇུག་བྱས་པར། ང་ཚོས་སློབ་ཚན་གོ་སྒྲིག་བྱེད་སྟངས་མ་ཤེས་པ་དང་། རྒྱལ་ཁབ་གཞན་གྱི་ལུགས་སྲོལ་ལ་འཛུལ་ཏེ་གཞན་དབང་སྟབས་བསྟུན་བྱས་པ་སོགས་རྒྱུ་རྐྱེན་གཙོ་བོ་རེད། མདོར་བསྡུས་ན་ང་ཚོའི་དཀའ་ངལ་རིགས་གཅིག་གཞི་རྩའི་དཀའ་ངལ་ཡིན་པ་དང་ཕུགས་རྒྱང་རིང་པོའི་དཀའ་ངལ་ཡིན་པ་གང་ཞིག་ངོ་འཕྲོད་མ་འཕྲོད་ཀྱིས་འཕྲད་སེལ་གྱི་བྱེད་ཐབས་བྱེད་པའི་དབང་གིས་འཐུས་ཤོར་དུ་ཕྱིན་པ་རེད། དེ་བཞིན། ཤེས་ཡོན་དེ་རིག་པའི་སྡེ་ཚན་གཞན་དང་མི་མཐུན་པའི་གཞུང་ལུགས་ཤིག་ཡིན་སྟབས། ཁོ་རང་གི་རིག་པའི་གཞུང་ལུགས་དང་སྟབས་བསྟུན་བྱ་དགོས་པ་རེད། ང་ཚོས་ཤེས་ཡོན་ཡོད་མེད་ལ་མ་ལྟོས་པར་ཤེས་ཡོན་གྱི་གནད་དོན་གལ་ཆེན་པོ་ཞིག་ལ་སྤྱི་ཚོགས་ཀྱི་བདེ་དོན་ཞིག་གི་ཆེད་འཚང་ཁ་བརྒྱབས་པ་ཡིན་ན་ཤེས་ཡོན་འཐུས་ཤོར་ལ་འགྲོ་བའི་གནས་སྟངས་ཆགས་འོང་གིན་འདུག་ལ། དེ་ལྟ་བུའི་གནས་སྟངས་ནི་ད་ལྟའི་ཆར་ཡང་སློབ་གྲྭ་ཁག་ཏུ་མང་པོ་མཐོང་རྒྱུ་ཡོད་པ་རེད། དེ་བས་ང་ཚོས་ད་ནས་བཟུང་སྟེ་མཐོ་རིམ་སློབ་མ་ལས་དམའ་རིམ་སློབ་མ་གལ་ཆེན་དུ་གཟིགས་ཏེ་སློབ་སྦྱོང་སྤྲོད་རྒྱུ་ཧ་ཅང་གལ་ཆེན་པོ་རེད་ལ། རྩ་བའི་དུས་དང་གནས་སྟངས་ཀྱི་དབང་གིས་ཤེས་ཡོན་སྲིད་བྱུས་དང་འགྲོ་སྟངས་ཀྱི་ཐབས་ལམ་སོགས་ལ་བསྐྱར་ཞིབ་གནང་རྒྱུ་ཧ་ཅང་གལ་ཆེན་དུ་མཐོང་གི་འདུག་ཅེས་གསུངས་སོང།
མཐའ་མར་ས་རཱ་མཐོ་སློབ་ཀྱི་བོད་དགེ་བསོད་ནམས་རྒྱ་མཚོ་ལགས་ཀྱིས་ཐེངས་འདིའི་བགྲོ་གླེང་སྟེང་ཕེབས་པའི་སྐུ་མགྲོན་གཙོ་བོ་གཙོས་བགྲོ་གླེང་མཉམ་ཞུགས་པ་རྣམས་ལ་བཀའ་དྲིན་ཞུ་བ་དང་འབྲེལ་མཛད་སྒོའི་རིམ་པ་མཇུག་བསྡུས་ཤིང་། གསོལ་ཇ་བར་གསེང་གི་རྗེས་སུ་དགེ་བཤེས་བློ་བཟང་སྙན་གྲགས་ལགས་ཀྱིས་གཙོ་སྐྱོང་གནང་འོག་སྔ་དྲོ་མཁན་པོ་འཇུ་བསྟན་སྐྱོང་ལགས་ཀྱིས་ཁྲི་སྲོང་སྐབས་སུ་ནང་ཆོས་དར་ཚུལ་དང་། དགེ་བཤེས་དཀོན་མཆོག་རྒྱ་མཚོ་མཆོག་གིས་ཚད་མ་རིག་པའི་བྱུང་རིམ་དང་དེའི་དགེ་མཚན་སྐོར་ལ་བགྲོ་གླེང་གནང་ཡོད། ཕྱི་དྲོ་བོད་ཀྱི་དཔེ་མཛོད་ཁང་གི་ལས་བྱེད་འགུ་ལོག་དམ་ཆོས་དཔལ་བཟང་ལགས་ཀྱིས་བཀའ་བསྟན་བོད་དུ་ཕབ་བསྒྱུར་བྱེད་སྟངས་དང་དགེ་བཤེས་དཀོན་མཆོག་དབང་འདུས་ལགས་ཀྱིས་བོད་བརྒྱུད་ནང་བསྟན་དང་མི་རབས་གསར་བའི་འཛིན་སྐྱོང་བྱེད་ཕྱོགས་དང། རབ་འབྱམས་པ་བློ་བཟང་བསོད་ནམས་ལགས་ཀྱིས་གྲུབ་མཐའི་རྣམ་བཞག་དང་དེའི་གལ་གནད་སོགས་ཀྱི་ཐད་བགྲོ་གླེང་གནང་བ་མ་ཟད་དྲི་བ་དྲིས་ལན་ཡང་གནང་ཡོད།
མཁྱེན་སོང་ངམ་ཤ་ཀླན??????????????????????
ང་ཅོ་རིས་ཤ་ཀླན་འཇམ་དབྱངས་གྲགས་པ་མཆོག་ལ་རེ་བ་ཞུ་རྒྱུ།
ང་རང་ཚོ་སྟོབས་ཆེན་རྒྱལ་ཁབ་ཡིན་པ་མ་ཟད་རྒྱལ་ཁབ་༣༨་ནང་དུ་གནས་ཡོད་པའི་མི་རིགས་ཞིག་རེད་ལ་རྒྱ་ནག་སྟོབས་ཤུགས་ཅི་ཙམ་ཆེ་ཡང་བོད་མི་གཅིག་མ་ལུས་པ་བསད་ཐུབ་པས་ནུས་པ་མེད་པ་མཐོང་དུས་ངས་ང་རང་ཚོ་སྟོབས་ཆེན་རྒྱལ་ཁབ་ཞིག་ལ་ངོས་འཛིན་ཞུ་བཞིན་ཡོད།
ང་རང་ཚོ་རྒྱལ་ཁབ་༣༨་ནང་དུ་ཡོད་པའི་མི་དང་མཐུན་པའི་སྐད་ཞིག་དང། ལུས་དང་མཐུན་པའི་གོས་ཞིག་ཡོད་ན་གོས་གྱོན་པའི་མི་དེ་བྲོ་བདེ་ལ་གཏམ་བཤད་པའི་མི་དེ་ཁ་བདེ།
ཞེས་རེ་འབོད་མི་བྱེད་ཀ་མེད་རེད།
ང་ཚོའི་བོད་ཕྲུག་སྤྱི་ཡོངས་ཀྱིས་དགའ་མོས་དང་སྤྲོ་སྣང་གིས་འབད་པ་དང་སྦྱང་པ་བྱ་སའི་རིག་ཚན་ནང་སྲོལ་རྒྱུན་འདི་མི་འདུག སྲོལ་རྒྱུན་གྱི་ཟ་མ་ཟ་འདོད་མེད་པའི་མི་ལ་སྲོལ་རྒྱུན་གྱི་ཟ་མ་ཨུ་ཚུགས་ཀྱིས་སྟེར་བ་འདིས་སྲོལ་རྒྱུན་གྱི་ཟ་མ་ཁམ་གཙང་ཞིག་མི་ཟ་བའི་ཐོག་དེང་རབས་ཀྱི་ཟ་མ་ཟ་བའི་དུས་ཚོད་དང་ཟ་འདོད་གཉིས་ཆར་ལ་འགལ་རྐྱེན་བྱེད་ཀྱིན་ཡོད་པ་རེད། མཐའ་མཇུག་གི་གནས་སྟངས་ནི་སྲོལ་རྒྱུན་དང་དེང་རབས་ཀྱི་ཟ་མ་གཉིས་ཆར་མི་རེག་པར་གྲོད་སྟོང་རྐྱལ་སྟོང་དུ་ལུས་པའི་སློབ་ཕྲུག་གང་མང་ཞིག་བོད་ཁྱིམ་དང་ཤེས་རིག་ཁྱབ་ཁོངས་ཀྱི་སློབ་གྲྭ་ཁག་གི་རྒྱལ་སྒོ་ནས་མངོན་ཡོང་གིན་ཡོད་པ་རེདཞེས་
ལྷོ་ཕྲུག་མཆོག་གིས་འདི་འདྲ་གསུངས་པ་དེ་ནི་དངོས་ཡོད་སྟངས་ཞིག་དང་བགྲོ་གླེང་བྱེད་དགོས་པའི་གཞི་རྩ་ཞིག་རེད་བསམ་གྱི་འདུག
ཡིན་ཡང་ཤ་ཀླན་འཇམ་དབྱངས་གྲགས་པ་ལ་དགེ་མཚན་ཞིག་ཡོད་པ་ནི་དུས་རབས་གསར་པའི་རིག་གནས་བོད་ཡིག་ནང་དུ་བསྒྱུར་ཐུབ་དགོས་པའི་བསམ་ཚུལ་དེ་རེད།
དེ་ལ་ང་ཅོ་རི་ངོས་ནས་རྗེས་སུ་ཡིད་རང་ཞུ་རྒྱུ་ཡིན
ཨེ་སྣ་བོ་ཆེན་དེ་མ་རེད་པས
བགྲོ་གླེང་དབུ་འཛུགས་ཀྱི་མཛད་རིམ་ཐོག་ས་རཱ་མཐོ་སློབ་ཀྱི་སློབ་སྤྱི་འཇམ་དཔལ་གྲགས་པ་ལགས་ཀྱིས་རིགས་ལམ་སློབ་གཉེར་ཁང་དབུ་འབྱེད་ཀྱི་བརྒྱུད་རིམ་དང་དམིགས་ཡུལ་ཐད་འགྲེལ་བརྗོད་གནང་སོང་ལ་ཞེས་པ་འཇམ་དབྱངས་གྲགས་པ་དེ་ཤ་ཀླན་འཇམ་དབྱངས་གྲགས་པ་ཡིན་ནམ།
ཡིན་ན་ཧ་ཧ་ཧ་ཧ་མ་འོང་བོད་ཀྱི་རིགས་གཅིག་རྐང་འཛིན་དང་བོད་རྒྱལ་ཁབ་ཀྱི་བདག་པོ་ངོ་མ་ཤེས་པ་སྤྱི་ཚོགས་ཀྱིས་ཁ་ཕྱོགས་ལ་ལྟ་མི་ཤེས་པ་ཞིག་གིས་ཚོགས་འདུས་དབུ་འཛུགས་གནང་ན་འབྲས་བུ་ཇི་འདྲ་ཡོང་རྒྱུ་ཡིན་མིན་མཁྱེན་གསལ་རེད་ལྭོ་དྲ་གྲོགས་ཚོ།
གང་དུ་ཡིན་ཡང་བཙན་བྱོལ་བོད་ཀྱི་ཚོགས་འདུ་དང་བགྲོ་གླེང་། ཟབ་སྦྱོང་བཅས་ཕལ་ཆེ་བའི་གྲལ་མགོ་ནས་གཏམ་བཤད་སྤེལ་མཁན་ནི་སེར་མོ་བའི་རིགས་རེད། སྔོན་བྱོན་བོད་ཀྱི་མཁས་གྲུབ་ཚོའི་གསུང་སྒྲོས་ཁག་ན། བོད་ཀྱི་ཆོས་དང་རིག་གཞུང་གཉིས་རིགས་སོ་སོར་དགར་སྲོལ་འདུག་པས། དམའ་རིམ་སློབ་སྦྱོང་གི་སྐབས་སུ་ཡང་བོད་བརྒྱུད་ནང་བསྟན་ལས་འཕྲོས་ཏེ་ཚད་མ་རིག་པའི་བྱུང་རིམ་དང་། གྲུབ་མཐའི་རྣམ་བཞག བཀའ་བསྟན་བོད་དུ་ཕབ་བསྒྱུར་བྱེད་སྟངས་ལ་སོགས་པ་ནི་དམའ་རིམ་སློབ་སྦྱོང་གཙིགས་འཛིན་བྱེད་པའི་གཞི་རྟེན་དུ་མ་མཐོང་ལ། དེ་གཙིགས་འཛིན་བྱེད་པའི་སྐབས་དོན་དང་ཡང་འབྲེལ་བ་ཆེར་མ་མཐོང་། ངའི་རྨོངས་འཆར་ལྟར་ན། དམའ་རིམ་སློབ་སྦྱོང་གི་སྐབས་སུ་གཙིགས་ཆེར་འཛིན་དགོས་པ་ནི་སློབ་མ་ཚོར་སུམ་རྟགས་དག་གསུམ་དང་། སྙན་གཞུང་གི་སྤྱི་དོན། བོད་ཀྱི་ལོ་རྒྱུས་ཀྱི་སྤྱི་ཁོག སྤྱི་ཚོགས་དང་འབྲེལ་བའི་སློབ་གསོའི་རིག་པ། འཛམ་གླིང་ཤེས་བྱ་སོགས་ཀྱི་རྨང་གཞི་བརྟན་པོ་ཞིག་འཇོག་གལ་ཆེ་བར་མཐོང་།
ཨོ་ཨོ་ངས་ཞུ་ཡ་ཞིག་ལ་དག་ཡིག་གསར་བསྒྲུག་ཡང་མཉམ་དུ་བཞག་ཡོད
མི་སྣ་ལགས་དུས་ཚོད་ཡོད་ན་ཕེབས་དང་ངེད་གཉིས་ཀྱིས་ཁ་བརྡ་རེ་བྱེད་ན་སྐྱིད།
གོང་གི་མཁས་དབང་མཐུན་ཚོགས་ནང་དུ་བུད་མེད་མཐོང་རྒྱུ་མེད་པའི་རྒྱུ་མཚན་ནི། ་མཁས་དབང་ཚོས་དམ་པའི་ལྷ་ཆོས་ཀྱི་ཕྱོགས་ནས་བགྲོ་གླེང་གནང་བ་མ་གཏོགས་འཇིག་རྟེན་ཕ་ཆོས་ཕྱོགས་ལ་བགྲོ་གླེང་མེད་པའི་རྒྱུ་མཚན་གྱིས་རེད།
མ་བོད་ཁ་བ་ཅན་གྱི་བུད་མེད་རྣམས་ནི་འཛམ་གླིང་འདིའི་སྟེང་གི་གཙང་ཤོས་དང་སྤྱོད་པ་བཟང་ཤོས་ཡིན་པ་མ་ཟད་བོད་ཁ་བ་ཅན་གྱི་འཇིག་རྟེན་འཁོར་བའི་རྣམ་བཞག་བརྒྱ་ཆ་༦༥་ལག་ལན་ཐུབ་བའི་ཁྱད་ཆོས་ལྡན་པའི་མཛེས་མ་རྣམས་ལ་ང་གྲྭ་ལོག་ཞིག་བཀའ་དྲིན་ཆེ་ཞུ་རྒྱུ་ཡིན།
ཧེ་ཧེ་རེད་རེད་བུད་མེད་ཅིག་ཀྱང་མཐོང་རྒྱུ་མི་འདུག་ཞེས་ང་གྲྭ་ལོག་ཞིག་བཤད་ན་བླ་རྒན་མཁས་པ་དེ་ཚོས་ཇི་གསུངས་ཡོང་ངམ།
གོང་གི་ཤེས་ལྡན་མི་སྣ་འདི་དག་གི་གྲས་ན་བུད་མེད་ཅིག་ཀྱང་མཐོང་རྒྱུ་མེད་པ་འདི་ཁྱད་མཚར།
བདེ་མོ་བདེ་རྐྱང་ཡིན། ཨ་རོགས་ཅོ་རི་ཁྱེད་བདེ་མོ་ཨེ་ཡིན། དེ་རིང་ཡང་ང་གཉིས་རྩོད་པ་ཞིག་བརྩད་ན་མ་རེད་པས།
ཨེ་མི་སྣ་བཀྲ་ཤིས་བདེ་ལེགས་
བདེ་པོ་ཡིན་ནམ།
ས་རྭ་མཐོ་སློབ་ནས་ཐོན་པའི་ཥྭསྟྲི་ཞིག་ས་གནས་སིད་སི་ལ་མི་ཚེ་སྐྱེལ་སྐབས་ཐ་ལི་བཀྲུ་ནས་དཔལ་འབྱོར་སྒྲུབ་དགོས་དུས་མཐོ་སློབ་ལ་ཡང་སིད་སི་སྒོར་མོ་༣༥༠༠་ཟླ་རེ་གླ་ཕོག་ཐོབ་ཐུབ་པའི་དུས་རབས་གསར་པའི་རིག་གནས་སློབ་ཁྲིད་མེད་པ་འདྲ།
ཟམ་གདོང་བླ་མའི་མཇུག་ནས་གནས་ལུགས་དང་ལྗིད་ཁོག་ཡོད་པའི་སྐད་ཆ་ཤོད་མཁན་ཞིག་ལ་ཀརྨ་དགེ་ལེགས་ཁོང་ཡིན། གནའ་དེང་གི་ཤེས་ཡོན་གཉིས་ཆར་ལ་རྒྱུས་མངའ་དང་མཁྱེན་རྒྱ་ཟབ་པའི་སྲི་ཞུ་བ་རྒན་གྲས་ཁྱེད་རང་སྐབས་རྗེས་མའི་ཤེས་རིག་བཀའ་བློན་དུ་ངེས་པར་ཕེབས་ཐུབ་པའི་སྨོན་ལམ་འདེབས་བཞིན་ཡོད།
ལྷག་བསམ་རྣམ་དག་དང་ཁ་ཞེ་ངོ་ལྐོག་མེད་པར་གཞུང་ལ་ཞབས་ཞུ་ཞུས་ན་གནས་དབེན་པ་དང་རི་ཁྲོད་འགྲིམས་མི་དགོས་ཤིང་ལྷ་ཆོས་སྐྱོང་སྲུང་མར་ཡང་ཕར་འཕྲིན་ལས་བཅོལ་དུ་འགྲོ་མི་དགོས་པར་ཚུར་གྲོགས་དང་རམ་འདེགས་གནང་བར་ཕེབས་ཡོང་།
འདི་ཀརྨ་དགེ་ལེགས་ལགས་ཀྱིས་གསུངས་མྱོང་བའི་བཀའ་མོལ་ཞིག་ཡིན་ཅིང་ངའི་སེམས་པའི་གཏིང་རིམ་ཞིག་ན་རྕ་བ་བརྟན་པོ་ཚུགས་ནས་གནས་འདུག
གོང་དུ་ངོས་འཛིན་གནང་བའི་དཀའ་ངལ་གསུམ་ལས་གསུམ་པ་དེ་གཉིས་པའི་ཁོང་གཏོགས་ཤིག་ལས་ལོགས་སུ་གྲངས་འདྲེན་དགོས་པའི་འབྲེལ་མེད་ཡན་གར་བ་ཞིག་མིན། དཀའ་ངལ་དང་པོ་དང་གཉིས་པ་གཉིས་མདོར་བསྡུས་ནས་བཤད་ན་དེང་རབས་དང་སྲོལ་རྒྱུན་གྱི་ཤེས་ཡོན་གཉིས་ཀ་འདོད་བློ་ཁེངས་པ་ཞིག་ཡོང་གི་མི་འདུག་ཟེར་བ་དེ་རེད།
༸གོང་ས་མཆོག་གིས་ཤེས་ཡོན་ཉམས་ཆགས་ཐད་ཀྱི་བཀའ་སློབ་དེ་གནང་བ་ནས་བཟུང་ཤེས་ཡོན་ཉམས་ཆགས་ཀྱི་རྒྱུ་རྐྱེན་འཚོལ་བ་ཞེས་པའི་སྐད་ཆ་འདི་དང་རིགས་གཅིག་རྐང་འཛིན་ཟེར་བའི་ཐ་སྙད་འདི་ཚོ་ཁ་འཕྲེད་ལ་ཐོགས་ཚད་ཀྱིས་འཆད་རྒྱུ་ཞིག་དང་ལག་སྨྱུ་གུ་བཟུང་ཚད་ཀྱིས་འབྲི་རྒྱུའི་བརྡ་ཚིག་ཅིག་ཏུ་གྱུར་པ་རེད། མང་མང་གིས་ཤེས་ཡོན་ཉམས་ཆགས་ཀྱི་རྒྱུ་རྐྱེན་ཇི་ཡིན་གནད་ལ་འཁེལ་མིན་ལ་མི་ལྟོས་པར་གང་ས་གང་དུ་ཤོད་པའི་གོ་སྐབས་བྱུང་བ་རེད། ངས་ཀྱང་འདིར་གཅིག་འཆད།
ང་ཚོའི་བོད་ཕྲུག་སྤྱི་ཡོངས་ཀྱིས་དགའ་མོས་དང་སྤྲོ་སྣང་གིས་འབད་པ་དང་སྦྱང་པ་བྱ་སའི་རིག་ཚན་ནང་སྲོལ་རྒྱུན་འདི་མི་འདུག སྲོལ་རྒྱུན་གྱི་ཟ་མ་ཟ་འདོད་མེད་པའི་མི་ལ་སྲོལ་རྒྱུན་གྱི་ཟ་མ་ཨུ་ཚུགས་ཀྱིས་སྟེར་བ་འདིས་སྲོལ་རྒྱུན་གྱི་ཟ་མ་ཁམ་གཙང་ཞིག་མི་ཟ་བའི་ཐོག་དེང་རབས་ཀྱི་ཟ་མ་ཟ་བའི་དུས་ཚོད་དང་ཟ་འདོད་གཉིས་ཆར་ལ་འགལ་རྐྱེན་བྱེད་ཀྱིན་ཡོད་པ་རེད། མཐའ་མཇུག་གི་གནས་སྟངས་ནི་སྲོལ་རྒྱུན་དང་དེང་རབས་ཀྱི་ཟ་མ་གཉིས་ཆར་མི་རེག་པར་གྲོད་སྟོང་རྐྱལ་སྟོང་དུ་ལུས་པའི་སློབ་ཕྲུག་གང་མང་ཞིག་བོད་ཁྱིམ་དང་ཤེས་རིག་ཁྱབ་ཁོངས་ཀྱི་སློབ་གྲྭ་ཁག་གི་རྒྱལ་སྒོ་ནས་མངོན་ཡོང་གིན་ཡོད་པ་རེད།
བཀྲ་ཤིས་བདེ་ལེགས་ཞུ།