ཕྱི་ཟླ་བཅུ་གཅིག་པའི་ནང་འདིར་ཉམས་མྱོང་གཞན་ཞིག་ཚོར་བྱུང་། ནམ་ཟླ་ཇེ་འཁྱགས་ལ་ཕྱིན་པ་དང་བསྟུན། བོད་ཕྱི་ནང་གཉིས་ཀར་བོད་མི་ཚོ་དལ་ཅག་གེར་འདུག བརྩིགས་ངོས་ཀྱི་སྦྱར་ཡིག་དང་སྲང་ལམ་གྱི་སྐད་འབོད། ཞི་བའི་གོམ་བགྲོད་སོགས་ཀྱང་གོ་རྒྱུ་མི་འདུག ཡིན་ཡང་། རྒྱལ་སྤྱི་རིམ་པ་ནས་བསམ་ན་བོད་དོན་འདི་སྔར་ལོའི་ཕྱི་ཟླ་ ༡༡ པའི་ནང་ལས་ཀྱང་གྲགས་སྐད་ཆེ་ཙམ་འདུག
ཐེངས་འདིར་བོད་དོན་འདི་གྲགས་སྐད་ཆེ་དོན་ནི་རྒྱ་དཀར་ནག་གཉིས་དང་། ཨ་རི་དང་རྒྱ་ནག་གཉིས་བཅས་ཀྱི་འབྲེལ་བའི་གླེང་སློང་ལས་བྱུང་། ཐོག་མ་དེར་རྒྱ་དཀར་ནག་གཉིས་ཀྱི་ས་མཚམས་རྩོད་རྙོག་ལས་འཕྲོས་ཏེ་༧གོང་ས་མཆོག་མོན་རྟ་དབང་ཡུལ་དུ་ཕེབས་ཆོག་མིན་སྐོར་བརྩད་པ་རེད། འདི་ནི་ཕྱི་ཚུལ་ནས་བལྟས་ན་ས་མཚམས་རྩོད་པ་ལྟར་སྣང་ཡང་། དོན་དམ་གྱིས་བོད་དོན་ཐོག་བཟུང་བའི་ལངས་ཕྱོགས་ཤིག་ཀྱང་མངོན་ཡོད། མཐར་ཕྱོགས་གཉིས་ཀྱིས་༧གོང་ས་མཆོག་ལ་འཛིན་པའི་ལངས་ཕྱོགས་ཇེ་གསལ་དང་ཇེ་མཁྲེགས་སུ་བཏང་ཞིང་། ༧གོང་ས་མཆོག་དངོས་སུ་མོན་རྟ་དབང་ཡུལ་དུ་ཆིབས་བསྒྱུར་བསྐྱངས། རྒྱལ་སྤྱིའི་གསར་འགོད་བརྒྱུད་ལམ་པ་ ༡༥༠ ལྷག་ཀྱང་མོན་རྟ་དབང་ཡུལ་དུ་ཕེབས་ཏེ་༧གོང་ས་མཆོག་གི་མཛད་འཕྲིན་དང་མཉམ་དུ་རྒྱ་དཀར་ནག་གཉིས་ཀྱི་ཡུལ་བབ་སྲིད་བྱུས་ལས་འཕྲོས་པའི་དཔྱད་གཏམ་མང་པོ་བརྒྱུད་ལམ་གང་སར་སྤེལ་ཡོད།
གཉིས་པ་དེ་ཨ་རིའི་སྲིད་འཛིན་ཨོ་བྷ་མ་པེ་ཅིན་དུ་ཕེབས་དུས་ཀྱི་བོད་དོན་སྐོར་ནས་རེད། སྲིད་འཛིན་ཨོ་བྷ་མའི་མཛད་འཕྲིན་ལོགས་ཀ་ཡིན་ཡང་། སྐབས་འདིར་གསར་འགོད་བརྒྱུད་ལམ་དག་གི་གླེང་གཞི་གཙོ་བོ་ནི་བོད་དོན་དང་རྒྱ་ནག་གི་འགྲོ་བ་མིའི་ཐོབ་ཐང་བཅས་ཀྱི་སྐོར་རེད། ༼ཐེངས་འདིར་ཨོ་བྷ་མས་ཞིན་ཅང་གི་སྐོར་ཚིག་ཟུར་ཙམ་དུ་ཡང་མ་གླེང་བ་དེར་ཡིད་སྐྱོ་སྐྱོ་འདྲ་བྱུང་། ཕལ་ཆེར་ཨོ་ས་མ་བྷིན་ལ་ཌིན་གྱི་འབྲེལ་བའི་དབང་གིས་ཡིན་ཀྱང་སྲིད།༽ གང་ལྟར་སྲིད་འཛིན་ཨོ་བྷ་མས་རྒྱ་གར་གྱི་ལུགས་ལྟར། བོད་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཤིག་ཡིན་པར་ངོས་འཛིན་བྱེད་ཀྱིན་ཡོད་ཅེས་རྒྱ་གར་གྱི་སྲིད་བློན་ཟུར་པ་ཝ་རྗི་བྷ་ཡེ་མཆོག་གི་ཚིག་འབྲུ་ཇི་བཞིན་དུ་དྲངས་ནས་བསྒྲགས་གཏམ་སྤེལ། ཡིན་ཡང་། ཁོང་གིས་༧གོང་ས་མཆོག་དང་བཙན་བྱོལ་བོད་གཞུང་གི་ཐུགས་རེ་ལྟར། མི་དམངས་ཚོགས་ཁང་ཆེན་མོའི་ནང་དུ་སྲིད་འཛིན་ཧུའུ་ཅིན་ཐའོ་ལ་༧གོང་ས་མཆོག་གི་སྐུ་ཚབ་ཚོའི་མཉམ་དུ་འབྲེལ་མོལ་མྱུར་ཏུ་བསྐྱར་གསོ་བྱ་དགོས་པའི་འབོད་སྐུལ་ཞུས་སོང་། ད་ལྟའི་ཆར་ང་ཚོའི་ངོས་ནས་འདི་ལས་ལྷག་པའི་རེ་བ་ཞིག་བརྒྱབས་ཀྱང་རེ་སྟོང་ཙམ་ཡིན་པའི་ངེས་པ་བརྙེད་སོང་བ་ལྟར་བོད་མི་ཚོའི་ངོས་ནས་ཐེངས་འདིར་དེ་ཙམ་གྱི་དོ་སྣང་སྤྲོད་ཐུབ་མེད་པ་ལྟར་སྣང་།
གང་ལྟར་བོད་དོན་འདི་ད་སྐབས་འཛམ་གླིང་གི་སྟོབས་ཤུགས་ཆེན་པོ་འདི་གསུམ་གྱི་བར་དུ་ཡོད་ལ། རྒྱལ་ཁབ་འདི་གསུམ་གྱི་བར་འབྲེལ་བའི་གླེང་སློང་ཇེ་ཆེར་འགྲོ་བཞིན་པའི་སྐབས་སུ། བོད་མི་རྣམས་ཀྱིས་ཀྱང་སྔར་ལས་དོ་སྣང་དང་རྣམ་རིག་སྒྲིམ་སྟེ་ཁོང་ཚོ་དང་བོད་དོན་གྱི་འབྲེལ་བ་འདི་མི་བརླག་པ་ཞིག་བཟོ་རྒྱུ་ནི་གལ་ཆེ་བར་འདོད་ལ། འདིའི་ཐད་གཞུང་དམངས་གཉིས་ཀར་འཐབ་བྱུས་གསལ་བོ་ཞིག་ཡོད་ན་ལེགས་པར་འདོད་དོ།།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
སྲིད་འཛིན་ཨོ་བྷ་མ་ལྟར། རྒྱ་གར་གྱི་སྲིད་བློན་ཟུར་པ་ཝཱཇ་པ་ཡཱི་མཆོག་གིས་ཀྱང་བོད་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཡིན་པར་ངོས་འཛིན་བྱས་ཚུལ་གོང་དུ་གསུངས་འདུག་ཀྱང༌། ཝཱཇ་པ་ཡཱི་མཆོག་གི་”བོད་རང་ས྄ྐྱོངས་ལ྄ྗོངས་ར྄ྒྱ་ནག་མི་དམངས་ས྄ྤྱི་མཐུན་ར྄ྒྱལ་ཁབ་”ཀྱི་ཆ་ཤས་ཡིན་པར་ངོས་འཛིན་ཙམ་ལས་བྱས་མེད། ཆབ་སྲིད་པ་དང་མཚན་ཉིད་པའི་ས྄ྐད་ཆ་ལ་ཟིན་མཚམས་ཡོད་པས། འདི་རིགས་ལ་དོ་ས྄ྣང་གནང་གལ།
བོད་མིས་བོད་དོན་བྱེད་རྒྱུ་དེ་ནི། གོང་ནས་བཀའ་སློབ་གནང་མཁན་རེ་ཡིས་བཀའ་སློབ་གནང་། འོག་ནས་འབུངས་མི་དག་གིས་བཀའ་སློབ་དེ་ཚོ་ཉན་རྗེས་ཁུ་སིམ་མེར་འགྲོ་རྒྱུ་དེ་མིན་པ་མི་མང་བོ་ཞིག་གི་ཤེས་ཀྱི་ཡོད་ཀྱང་། ད་ལྟའི་བར་དུ་ང་རང་ལྟ་བུ་དག་གི་ཁ་འགུལ་ནས་འདུག་པ་ལས་ལག་ལེན་དངོས་ལ་རང་ཉིད་ཀྱིས་དབུ་ཁྲིད་དེ་འགྲོ་མཁན་ནི་དཀོན་པོ་ཡིན་པས། བོད་དོན་ནི་རྒྱལ་སྤྱིའི་རྩེད་འགྲན་སྟེང་གི་སྤོ་ལོ་ལྟ་བུ་ཞིག་ཆགས་ཡོད་པ་རེད། སྤོ་ལོ་འཕེན་མཁན་སུ་ཞིག་ལ་ཁེ་ཕན་རེག་ན་ཡང་། སྤོ་ལོ་ནི་སྤོ་ལོ་རང་དུ་འདུག་རྒྱུ་ལས་མེད་པ་ལྟ་བུ་ཞིག་ཆགས་ཡོད་པ་རེད།
རེད། ང་ཙོ་གཞུང་དམངས་གཉིས་ཀས་རང་དོན་རང་གཅེས་ཀྱིས་ཕྱོགས་གང་ས་ནས་ཆིག་བསྒྲིལ་གྱི་ནུས་པ་སྤུངས་ཏེ་འཐབ་བྱུས་གསར་པ་དང་། ཁ་ཡོད་ལག་ཡོད་ཀྱི་ལག་ལེན་འཁེལ་རྒྱུ་འདི་གལ་ཆེན་པོར་མཐོང་གི་འདུག