ངའི་ཕ་ཡུལ་དིང་རི་ལ་ཡར་རྒྱས་ཅི་ཡང་བྱུང་མེད། ཕ་ཡུལ་འཛུགས་སྐྲུན་བྱ་བར་མཐུན་རྐྱེན་མེད་པའི་ཁར། རང་དབང་ཡང་ཡོད་པ་མ་རེད་ཟེར།
ཕྱི་ཚེས་ ༢༣ ཉིན་འདི་གའི་གསར་འགོད་པས་ཉེ་ཆར་བོད་ནས་གསར་དུ་འབྱོར་ཞིང་ཕ་ཡུལ་དིང་རི་དང་རང་ལོ་ ༤༠ ཡིན་པའི་ཉི་མ་དང་རང་ལོ་ ༣༢ ཡིན་པའི་པ་སངས་ལགས་གཉིས་ལ་རྒྱ་གཞུང་གིས་བཤད་པ་བཞིན་བོད་ནང་དང་ལྷག་པར་དུ་དིང་རི་ས་ཁུལ་གྱི་འཚོ་བའི་གནས་སྟངས་ལ་འགྱུར་བ་གང་འདྲ་ཞིག་བྱུང་ཡོད་མེད་བཅར་འདྲི་བྱས་པར། ཉི་མ་༼གསང་མིང་༽ལགས་ཀྱིས་བརྗོད་དོན། ང་རང་སྔོན་མ་ཕྱི་ཕྱོགས་སུ་འགྲོ་མྱོང་མེད། རང་ཡུལ་ནས་ཞིང་གྲོང་གི་འཚོ་བ་རོལ་མཁན་ཞིག་ཡིན། དེ་ལྟར་ཡང་། སེམས་ཁོང་གི་རེ་འདུན་དང་སྨོན་ལམ་ཉག་ཅིག་གཏད་སའི་སྐྱབས་མགོན་༧རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་ཆེད། ད་ལོ་མ་འོངས་པར་མཇུག་འབྲས་ཅི་འབྱུང་ལ་མ་ལྟོས་པར་འདིར་ཡོང་བ་ཡིན། ང་ལ་མཚོན་ན་ནང་མི་ ༥ ཡོད་ལ། ས་ཞིང་མུའུ་ ༡༠ ཡོད། ས་ཞིང་དེའི་སྟེང་ལོ་གཅིག་ལ་འབྲུ་རིགས་རྒྱ་མ་ ༡༥༠༠ ལྷག་ལས་ཡོང་གི་མེད་ཅིང། དེས་མི་ལྔའི་ལོ་གཅིག་གི་ཁ་ཟས་འདང་དགོས་པ་མ་ཟད། འབྲུ་རིགས་རྒྱ་མ་ ༧༠༠ ལྷག་ལོ་རྗེས་མའི་ས་བོན་ལ་གསོག་འཇོག་བྱ་དགོས་པ་རེད། དེ་འདྲ་ཡིན་དུས་ཟ་འབྲུ་དེ་གཅིག་པུས་ང་ཚོའི་འཚོ་བ་འཁྱོལ་དཀའ་བས་ང་རང་ཉེ་འགྲམ་གྱི་རྫོང་དང་ཞང་གི་ས་ཁུལ་དག་ཏུ་སོང་སྟེ་ཞོར་ལས་ཏོག་ཙམ་བྱས་ཏེ་ནང་མིའི་ཁ་གསོ་ཐབས་བྱེད་ཀྱིན་ཡོད། ཅེས་དང་། ཡང་ཁོང་གིས། ད་ལྟ་རྒྱ་མིས་ང་ཚོའི་མི་མང་གི་འཚོ་བ་ཡར་རྒྱས་ཕྱིན་པའི་གནས་ཚུལ་གང་སར་ཁྱབ་བསྒྲགས་བྱེད་ཀྱིན་ཡོད་ཀྱང་། དེ་ཚོ་ཁྱབ་བསྒྲགས་ཁོ་ན་ལས་དངོས་ཡོད་གནས་ཚུལ་མ་རེད་ལ། ང་ཚོའི་ཕ་ཡུལ་དུ་ད་ལྟ་ཡང་གློག་དང་སྡོད་ཁང་། ཟ་མ་མི་འདང་བ་སོགས་ཀྱི་དཀའ་ངལ་དེ་རྒྱུན་ལྡན་གྱི་དཀའ་ངལ་ཆགས་ཡོད། གལ་སྲིད། ང་ཚོར་རང་ཉིད་ཀྱི་འཚོ་བ་དང་དཔལ་འབྱོར་སོགས་ཡར་རྒྱས་གཏོང་རྒྱུའི་རེ་བ་དང་དམིགས་ཡུལ་ཡོད་ཀྱང་རང་གི་འདོད་བློ་བཞིན་སྒྲུབ་ཆོག་པའི་རང་དབང་དང་མཐུན་རྐྱེན་ཡོད་པ་མ་རེད། ཅེས་བརྗོད་བྱུང།
དེ་བཞིན། པ་སངས་༼གསང་མིང་༽ལགས་ཀྱིས་བརྗོད་དོན། ང་ཡང་གནས་སྟངས་གཅིག་མཚུངས་འདིའི་འོག་འཚར་ལོངས་བྱུང་བ་ཡིན་ལ། ང་ཚོའི་དམིགས་ཡུལ་ནི་ང་ཚོར་ཕོ་བ་འགྲེང་ཙམ་ལས་མེད་ཀྱང་སེམས་པ་སྐྱིད་པོ་ཞིག་ཡོང་རྒྱུ་དེ་ཡིན། ཡིན་ནའང། ང་ཚོ་ནི་རང་དབང་མེད་པའི་རྒྱལ་ཁབ་ཅིག་གི་མི་ཡིན་པ་དང་། རང་གི་རྩ་བའི་བླ་མ་ཡང་གཞན་ཡུལ་ཏུ་གྱར་དགོས་པའི་གནས་སྟངས་སོགས་ཀྱིས། ང་ཚོར་བདེ་བ་དང་སྐྱིད་པའི་དུས་ཤིག་ནམ་ཡང་ཤར་མ་མྱོང་། ང་ཚོས་སྒྲུབ་ཐུབ་པ་ནི་བོད་ལ་རང་བཙན་ཐོབ་ཆེད་སྨོན་ལམ་དང་༧གོང་ས་མཆོག་ལ་རེ་བ་བཅངས་ཡོད་པ་དེ་རེད། ཅེས་དང་བརྗོད་བྱུང་ལ། ཡང་ཁོང་གིས། རྒྱ་གཞུང་གིས་ང་ཚོ་བོད་མི་རྒན་པ་ཚོ་འདིར་ཡོང་བར་དམིགས་བསལ་གྱི་དཀའ་ལས་དེ་འདྲ་སྤྲད་མྱོང་མེད་ནའང་། ད་ལྟ་ཕྲུ་གུ་རྒྱ་གར་ཏུ་གཏོང་བར་དངུལ་གྱི་ཆད་པ་གཅོད་ཀྱིན་འདུག་ལ། གལ་སྲིད་ཕྲུ་གུ་གཅིག་འདིར་བཏང་བ་ཤེས་རྟོགས་བྱུང་ཚེ་རྒྱ་སྒོར་ ༤༠༠༠ ལྷག་གི་ཆད་པ་གཅོད་ཀྱིན་ཡོད་པ་དང་། ཕ་ཡུལ་དུ་ཡོད་པའི་ཕྲུ་གུ་ཚོར་ཡི་གེ་ཤེས་མིིན་དང་ཡར་རྒྱས་འགྲོ་མིན། ཁྱིམ་ཚང་གི་དཀའ་ངལ་སོགས་ལ་མི་བལྟ་བར་སློབ་གྲྭར་གཏོང་དགོས་པའི་བཙན་བཀའ་གཏོང་གིན་ཡོད་པ་དང་། སློབ་གྲྭའི་ནང་རྒྱ་ཡིག་གཙོ་བོར་བཟུང་སྟབས་སློབ་མ་མང་ཆེ་བས་བོད་ཡིག་གི་འབྲི་ཀློག་མི་ཤེས་པའི་ཚད་དུ་སླེབས་ཡོད་ཀྱང་། རང་ཉིད་ལ་ཤེས་ཡོན་གྱི་རྨང་གཞི་ཅི་ཡང་མེད་སྟབས། བུ་ཕྲུག་དག་གི་མདུན་ལམ་དང་མི་རིགས་རང་ལ་ཡོད་པའི་རིག་གནས་དང་གོམས་གཤིས་སོགས་ཉམས་འགྲོ་བ་སོགས་ལ་དམིགས་ཏེ། ཕྱིར་ཕ་ཡུལ་ཏུ་ལོག་རྗེས་རྒྱ་ནག་གི་གནོན་ཤུགས་དང་ཆད་པ་སོགས་ཅི་ཡོང་ལ་མ་ལྟོས་བར་ངས་རང་གི་བུ་འདིར་བསྐྱལ་རྒྱུ་ཡིན། ཅེས་བརྗོད་བྱུང་།
ཉི་མ་དང་པ་སངས་གཉིས་ནི་བོད་ལྗོངས་དིང་རི་ས་ཁུལ་ནས་ཡིན་ཞིང་། ཉེ་ཆར་བོད་ནས་གསར་དུ་འབྱོར་རྗེས་༧གོང་ས་མཆོག་ལ་མཇལ་ཁ་ཞུ་རྒྱུ་རེ་བ་ཆེན་པོ་བཅངས་ཡོད་འདུག ༧གོང་ས་མཆོག་ལ་མཇལ་ཁ་ཞུས་རྗེས་ཕྱིར་རང་ཡུལ་དུ་ལོག་འཆར་ཡོད་ཚུལ་ཡང་གསར་འགོད་པར་འགྲེལ་བརྗོད་གནང་བྱུང།
http://www.voanews.com/tibetan/video.cfm སྤུན་ཟླ་ཚོ། འབྲེལ་ཐག་འདི་ལ་གཟིགས་རྒྱུ་མ་བརྗེད་ཅིག་ལགས།
འདྲ་མཉམ་མེད་པ། རང་ས་ནས་ལས་མེད་དུ་གྱུར་བ། རང་ས་ནས་རང་དབང་མེད་པ་སོགས་ཀྱི་དཀའ་ངལ་གྲངས་ཀྱི་མི་ལོངས་པ་ཞིག་ཡོད་པ་ནི། བོད་ནས་ཡོང་མཁན་གྱི་བོད་མི་བསམ་ཡོད་སུས་ཡིན་ཡང་ཤེས་ངེས་ཡིན་དུས། འུ་ཅག་གིས་ཨ་ཁ་དང་ཅི་དྲག་ཟེར་བ་ཙམ་གྱིས་མི་ཕན་པར། དེ་དག་བོད་ནང་དུ་ཕྱིར་ལོག་རྒྱུ་ཡིན་དུས། བོད་ཡུལ་ནས་བོད་རང་གི་བྱེད་ཐུབ་པའི་ལས་གཞི་དག་ངོ་སྤྲོད་གང་ཙམ་བྱེད་རྒྱུ་དེ་ནི་དྲི་བ་གཏོང་བ་ལས་ཀྱང་གལ་ཆེན་པོ་ཆགས་ཡོད་པ་རེད།
ཁོང་གཉིས་ཀྱི་ཕ་ཡུལ་ལ་ཡར་རྒྱས་མེད་པ་དངོས་ཡོད་རེད་ལ་ད་དུང་བོད་ཀྱི་ས་ཁུལ་མང་བོ་ཞིག་འདི་འདྲ་ཡིན་པའི་དངོས་སྤངས་ཡོད་རེད་
ཨ་ཁ་འདི་དྲན་དུས་ངོ་མ་ཡིད་ཐང་འདྲ་ཆད་ཡོང་གི ད་དུང་གཞིས་ལུས་ཀྱི་སྤུན་ཟླ་ཅི་འདྲ་མང་བོའི་ཚེ་སྲོག་དང་ལྟོར་ཕོར་གྱི་རང་བཟོ་ཤོར་བཞིན་ཡོད་ཨང་
རེད། ང་ཚོ་བོད་ཀྱི་ཞིང་འབྲོག་ས་ཁུལ་དུ་དམིགས་བསལ་དུ་ཡར་རྒྱས་ཕྱིན་མེད་པའི་རྣམ་པ་ཧ་ཅང་གསལ་པོ་ཡོད་ཅིང༌། དེ་བས་ཀྱང་མི་རིགས་འདྲ་མཉམ་གྱི་ཐོབ་ཐང་ལོངས་སྤྱོད་བྱ་རྒྱུ་མེད་པའི་དཀའ་ངལ་ཡོད། ཁོང་གཉིས་ནས་བཙན་བྱོལ་གྱི་རང་དབང་དང་གཞོན་སྐྱེས་ཚོར་སློབ་གཉེར་གྱི་གོ་སྐབས་བཟང་པོ་དེ་དག་དངོས་སུ་མཐོང་ཆེད་བུ་ཕྲུག་སློབ་གཉེར་ཆེད་གཏོང་རྒྱུར་འདུན་པ་དེ་ལྟ་བུ་ཡོད་པ་ནི་ང་ཚོའི་ཕ་ཡུལ་ཡར་ར྄ྒྱས་གཏོང་རྒྱུར་ཕན་ཐོགས་བསྒྲུབ་རྒྱའི་ཆ་ཤས་ཤིག་རེད། ཡིན་ནའང་བོད་དུ་ཕྱིར་ལོག་བྱ་མཁན་ཞིག་ཚགས་ཤོག་སྟེང་དུ་ཕྱིར་ལོག་བྱ་མཁན་ཡིན་པའི་བསམ་ཚུལ་ཤོད་ཕོད་པ་བློ་སྟོབས་རེད་ལ། འབྲི་ཕོད་པའང་འགན་འཁྲི་ཞིག་ཡིན་སྲིད། ལས་ཀ་གང་ཞིག་བྱས་ཀྱང་ཕན་གནོད་གཉིས་ལ་བལྟ་དགོས་པས། ངའི་བལྟ་ཚུལ་བྱས་ན་ཁོང་གཉིས་བོད་དུ་ལོག་མཁན་ཡིན་པ་དེ་དེར་བཀོད་དགོས་དོན་མཐོང་གི་མི་འདུག དེ་ངའི་བསམ་ཚུལ་ཡིན། བཙན་བྱོལ་ནང་སྨྲ་བརྗོད་རང་དབང་ཁ་རྩེར་འཁོན་ཡོད་ལ། གསར་འགྱུར་གྱི་ལྗིད་ཁོག་འཚོལ་བའི་ཆེད་དུ་གསར་འགོད་པས་གསར་འགྱུར་མཁོ་སྤྲོད་པ་ག་དུས་ཡིིན་ནའང་ག་ཚོད་གཏིང་རིང་དུ་འདྲུད་ཨེ་ཐུབ་ལྟ་བ་འདི་ནི་ང་ཚོའི་གསར་འགོད་པ་ཚོའི་ལེགས་ཆ་ཞིག་ཏུ་མཐོང་གི་མེད། དེ་ནི་ངའི་བསམ་ཚུལ་ཡིན།