ཁྲིམས་ལུགས་གཅིག་ལ་ལག་ལེན་བསྟར་སྟངས་གཉིས་ཡོད།

ཕྱི་ལོ་ ༢༠༠༩ རྫོགས་ལ་ཉེ་བའི་སྐབས་འདིར་དམངས་གཙོའི་རྒྱལ་ཁབ་ཁག་གིས་སོ་སོའི་རྒྱལ་ཁབ་གཙོས་འཛམ་གླིང་ཧྲིལ་བོའི་འགྲོ་བ་མིའི་ཐོབ་ཐང་གི་གནས་བབ་ལ་བསྐྱར་ཞིབ་དང་། ལེགས་བཅོས་བཏང་སྟེ་གནས་ཚུལ་ཕྱོགས་སྡོམ་བྱེད་ཀྱིན་པའི་སྐབས་དང་བསྟུན་ཏེ། ཕྱི་ཚེས་ ༡༨ ཉིན་འདི་གའི་གསར་འགོད་པ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ལས་རོགས་བྱམས་པ་སྨོན་ལམ་ལགས་སུ་ལོ་སྔ་ཕྱིའི་འཛམ་གླིང་སྤྱིའི་འགྲོ་བ་མིའི་ཐོབ་ཐང་གི་གནས་བབ་དང་འབྲེལ་ཏེ། རྒྱ་ནག་དང་བོད་ནང་གི་འགྲོ་བ་མིའི་ཐོབ་ཐང་སྐོར་ལ་བཅར་འདྲི་ཞུས་ཡོད།

དྲི་བ། ཕྱི་ལོ་ ༢༠༠༩ ལོ་རྫོགས་ལ་ཉེ་བའི་སྐབས་འདིར་ཕྱིར་མིག་ཅིག་བལྟས་ཏེ། ༢༠༠༩ ལོའི་འཛམ་གླིང་སྤྱི་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ལ་བསྐྱར་ཞིབ་ཅིག་བྱས་ན་ལེགས་ཉེས་ཀྱི་གནས་སྟངས་གང་འདྲ་བྱུང་ཡོད་དམ།   

ལན། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་འགྲེམས་སྤེལ་བྱས་ཏེ་ད་བར་ལོ་ ༦༡ ཙམ་འགྲོ་བཞིན་ཡོད་ལ། གསལ་བསྒྲགས་དེའི་ནང་མི་རིགས་དང་ཕོ་མོ། ལམ་ལུགས་དང་རིག་གཞུང་སོགས་ལ་དབྱེ་འབྱེད་མེད་པར་མི་ཚང་མར་ཐོབ་ཐང་གཅིག་མཚུངས་ཡོད་དགོས་སྐོར་བཀོད་ཡོད། ལྷག་པར་དུ་ཕྱི་ལོ་ ༢༠༠༦ ལ་མཉམ་འབྲེལ་རྒྱལ་ཚོགས་ཀྱིས་འགྲོ་བ་མིའི་ཐོབ་ཐང་སྒྲིག་འཛུགས་ལ་བསྒྱུར་བཅོས་བཏང་ཞིང་། ལོ་གཅིག་རེར་ཚོགས་འདུ་ཐེངས་བཞི་རེར་འཚོགས་རྒྱུའི་ཐག་གཅོད་བྱས་ཏེ། འགྲོ་བ་མིའི་ཐོབ་ཐང་སྐོར་ལ་གོམ་སྟབས་གསར་པ་ཞིག་སྤོས་ཡོད། འོན་ཀྱང་། རྒྱལ་ཁབ་ཁ་ཤས་ནང་འགྲོ་བ་མིའི་ཐོབ་ཐང་ཐོག་དཀའ་ངལ་མུ་མཐུད་གནས་ཡོད། ཆབ་སྲིད་ཀྱི་གནས་སྟངས་དང་། དཔལ་འབྱོར་སོགས་ཀྱི་དབང་གིས་འགྲོ་བ་མིའི་ཐོབ་ཐང་དོན་འཁྱོལ་ཡོང་གིན་མེད། ལྷག་པར་དུ་ད་ལོར་མཚོན་ན་འཛམ་གླིང་ནང་དཔལ་འབྱོར་དངུལ་རྩའི་དཀའ་ངལ་གྱི་དབང་གིས་འགྲོ་བ་མིའི་ཐོབ་ཐང་ལ་དོ་སྣང་ཆུང་དུ་ཕྱིན་ཡོད། རྒྱལ་ཁབ་ཁ་ཤས་ཀྱིས་ཁ་ནས་འགྲོ་བ་མིའི་ཐོབ་ཐང་ཤུགས་ཆེར་གླེང་གིན་ཡོད་ནའང་། ལག་ལེན་གྱི་ཐོག་ནས་སོ་སོའི་རྒྱལ་ཁབ་ཀྱི་ཁེ་ཕན་དང་ཕྱི་འབྲེལ་ཨང་དང་པོར་བཞག་སྟེ། འགྲོ་བ་མིའི་ཐོབ་ཐང་ལ་དོ་སྣང་མེད་པ་དང་། གཞན་གྱི་དཀའ་ངལ་ལ་སྣང་མེད་བྱེད་པ་སོགས་ཡོང་གིན་ཡོད།    

དྲི་བ། ལོ་སྔོན་མ་དག་དང་བསྡུར་ན་ད་ལོ་འཛམ་གླིང་གི་འགྲོ་བ་མིའི་ཐོབ་ཐང་གི་གནས་སྟངས་གང་འདྲ་ཆགས་ཡོད་མེད་དང་། གལ་སྲིད་སྔར་ལས་ཇེ་སྡུག་ཏུ་ཕྱིན་ཡོད་ན་རྒྱལ་ཁབ་གང་དག་ནང་ཇེ་སྡུག་ཏུ་ཕྱིན་ཡོད་དམ།

ལན། ད་ལོ་གཅིག་པུར་འཛམ་གླིང་གི་འགྲོ་བ་མིའི་ཐོབ་ཐང་ལ་ཡག་སྡུག་གི་འགྱུར་བ་མངོན་གསལ་དོད་པོ་དེ་འདྲ་བཤད་ཁག་པོ་རེད། སྤྱི་ཚོགས་ཁྱོན་ཡོངས་ནས་འགྲོ་བ་མིའི་ཐོབ་ཐང་སྐོར་ལ་དོ་སྣང་སྔར་བས་ཤུགས་ཆེ་རུ་འགྲོ་བཞིན་ཡོད། དེ་གང་ཡིན་ཟེར་ན། འཛམ་གླིང་ཤར་ནུབ་གང་སར་འགྲིམ་འགྲུལ་སྟབས་ཇེ་བདེར་ཕྱིན་པ་དང་། ལྷག་པར་དུ་བརྡ་འཕྲིན་བརྒྱུད་ལམ་སྣ་ཇེ་མང་དང་སྤུས་ཇེ་ལེགས་སུ་ཕྱིན་པའི་རྐྱེན་གྱིས་འགྲོ་བ་མིའི་ཐོབ་ཐང་གི་གོ་རྟོགས་དང་། དགོས་མཁོའི་འདུ་ཤེས་སྔར་ལས་ཚད་ཇེ་མཐོར་ཕྱིན་ཡོད་པ་རེད་སྙམ། སྤྱིར་རྒྱལ་ཁབ་གང་ཞིག་ཡིན་རུང་འགྲོ་བ་མིའི་ཐོབ་ཐང་གི་དཀའ་ངལ་ཡོངས་སུ་སེལ་ཡོད་པ་དེ་འདྲ་དཀོན་པོ་རེད། ལྷག་པར་དུ་ད་ལོའི་ཨ་རིའི་འགྲོ་བ་མིའི་ཐོབ་ཐང་སྙན་ཐོའི་ནང་། ཨེ་ཤ་ཡའི་ནང་གི་རྒྱ་ནག་དང་འབར་མ། བྱང་ཀོ་རི་ཡ། ཨེ་རན། སུ་ཌན་སོགས་སུ་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་འགྲོ་བཞིན་ཡོད་པར་ངོས་འཛིན་བྱས་ཡོད། རྒྱལ་ཁབ་དེ་དག་ད་ལོ་ཙམ་མ་རེད། ལོ་ལྟར་འགྲོ་བ་མིའི་ཐོབ་ཐང་སྡུག་ཤོས་ཀྱི་གྲས་སུ་ཚུད་ཡོད་ཀྱང་། སྙན་ཐོའི་ནང་མཚན་སྨོས་པ་ཙམ་ལས་མཇུག་གནོན་བྱེད་པ་དང་ཉེས་པ་གཏོང་བ་སོགས་ལག་ལེན་དོན་སྨིན་ལྡན་པ་ཞིག་ཡོང་ཁག་པོ་རེད།

དྲི་བ། རྒྱ་ནག་གཞུང་ལ་མཚོན་ན། ཕྱི་ལོ་ ༢༠༠༩ ནི་དམིགས་བསལ་གྱི་ལོ་ཞིག་ཆགས་ཡོད་སྟབས། ལོ་འདིའི་ནང་རྒྱ་ནག་གཞུང་གི་རྩ་ཁྲིམས་དང་ས་གནས་བཅའ་ཁྲིམས། དེ་བཞིན་འགྲོ་བ་མིའི་ཐོབ་ཐང་སོགས་ལ་ལེགས་ཉེས་ཀྱི་འགྱུར་བ་གང་འདྲ་ཕྱིན་ཡོད་དམ།

ལན། ༢༠༠༩ ལོར་བོད་ནང་གི་གནས་སྟངས་རྒྱུན་ལྡན་མ་ཡིན་པ་ཞིག་ལ་ངོས་འཛིན་བྱེད་ཀྱིན་ཡོད། གང་ཡིན་ཟེར་ན། ལོ་འདི་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་དབུ་བརྙས་ཏེ་ལོ་ ༦༠ འཁོར་བའི་དུས་དྲན་དང་། ༡༩༨༩ ལོར་རྒྱ་ནག་ནང་དམངས་གཙོ་དང་རང་དབང་གི་ལས་འགུལ་སྤེལ་ཏེ་ལོ་ ༢༠ འཁོར་བ། རྒྱ་ནག་གིས་རྒྱལ་སྤྱིའི་འགྲོ་བ་མིའི་ཐོབ་ཐང་ལ་མཚན་རྟགས་བསྐྱོན་ཏེ་ལོ་ ༡༠ འཁོར་བ། ༡༩༥༩ ལོར་བོད་རྒྱ་ནག་གི་དབང་བསྒྱུར་འོག་ཚུད་དེ་ལོ་ ༥༠ འཁོར་བ། སྔར་ལོ་བོད་ནང་ཞི་རྒོལ་བྱུང་སྟེ་ལོ་ ༡ འཁོར་བ་སོགས་ཀྱི་དུས་ཚོད་མང་པོ་ཞིག་ལ་ཐུག་ཡོད། དུས་དྲན་དེ་དག་ལམ་ལྷོང་ཡོང་ཆེད་དང་ཕྱི་ལོགས་སུ་ངོམ་སོ་བྱ་ཆེད། ནང་ཁུལ་ལ་དམ་དྲག་དང་རྡུང་རྡེག་ཚ་ནན་བཏང་བའི་དུས་ཚོད་སྡུག་ཤོས་ཤིག་ཆགས་ཡོད། ལྷག་པར་དུ་ད་ལོ་ཕྱི་ཟླ་ ༡ ནང་རྒྱ་གཞུང་གིས་གཏན་འབེབས་བྱས་པའི་ ༢༠༠༩ ལོའི་སྤྱི་ཚོགས་ལས་དོན་ཐད་ཀྱི་ཡིག་ཆ་ཞིག་གི་དོན་ཚན་ ༡༥ ནང་། བོད་ཀྱི་ས་ཁུལ་དུ་རྡུང་རྡེག་ཚ་ནན་གྱི་ལས་འགུལ་མུ་མཐུད་སྤེལ་དགོས་པ་དང་། ཆབ་སྲིད་དྲིལ་བསྒྲགས་ཤུགས་ཆེ་རུ་གཏོང་དགོས་པ། དགོན་སྡེ་ཁག་ལ་དོ་དམ་ནན་ཏན་བྱ་དགོས་པ་སོགས་ཀྱི་བཀོད་ཁྱབ་བཏང་ཡོད། དེ་བཞིན། སྔར་ལོ་བོད་ནང་ཞི་རྒོལ་བྱུང་རྗེས་བོད་ཀྱི་ས་ཁུལ་ཡོངས་ཀྱི་སྲིད་ཇུས་འཛིན་ཕྱོགས་ཐད་བསྐྱར་ཞིབ། ཆོལ་ཁ་གསུམ་གྱི་གྲོང་ཁྱེར་ཆེ་ཁག་གི་མི་མང་འདུ་འཛོམས་ལྟེ་གནས་དག་ཏུ་ཞིབ་བཤེར། གནས་སྡོད་དང་འགྲུལ་བཞུད་བར་ཁྲིམས་གཞི་གསར་བཟོ། ལྷ་ས་ལྟ་བུར་མཚོན་ན། མཚན་ནུབ་གློ་བུར་དུ་ཉེན་རྟོག་པ་དང་དམག་མི་མང་པོ་མི་ཚང་དག་ཏུ་ཉུལ་ཏེ་ཞིབ་བཤེར་བྱས་པ། རྒྱ་གཞུང་གི་གསར་འགྱུར་ནང་ཐོན་པ་ལྟར་ན། སྐབ་དེར་དགོང་མོ་གཅིག་ལ་མི་ཚང་ ༤༠༠༠ ལྷག་ལ་སྔོག་བཤེར་དང་། མི་སེར་ ༩༠༠༠ ལྷག་ལ་འདྲི་བརྩད་བྱས་ཡོད། དེ་བས་ཚབས་ཆེ་ཤོས་ཁྲིམས་ཐག་གཅོད་པ་དེ་རེད། སྔར་ལོ་ཞི་རྒོལ་བྱུང་ནས་ད་ལྟའི་བར་བོད་མི་ ༣༦༠ ལྷག་ལ་ཁྲིམས་ཆད་བཏང་ཡོད། དེ་ནི་འདས་པའི་ལོ་ངོ་ཉི་ཤུའི་རིང་གི་ཚད་མཐོ་ཤོས་དེ་ཆགས་ཡོད། དེ་བས་ཚབས་ཆེ་ཤོས་ཤིག་ནི། ཉེ་ཆར་བློ་བཟང་རྒྱལ་མཚན་དང་བློ་ཡག་གཉིས་དམར་གསོད་བཏང་བ་དེ་རེད། འདི་ནི་ ༢༠༠༩ ལོའི་བོད་ནང་གི་འགྲོ་བ་མིའི་ཐོབ་ཐང་གི་དཔེ་མཚོན་གསལ་ཤོས་དེ་རེད།

དྲི་བ། རྒྱ་ནག་དབུས་གཞུང་གིས་ལོ་སྔ་ཕྱིར་འགྲོ་བ་མིའི་ཐོབ་ཐང་སྲུང་སྐྱོབ་དང་ཡར་རྒྱས་གཏོང་ཕྱོགས་སྐོར་ལ་གཏན་འབེབས་མང་པོ་ཞིག་བྱས་ཡོད་ཀྱང་། བོད་པའི་ས་གནས་ཁག་ཏུ་ལག་ལེན་བསྟར་ཕྱོགས་དེ་འདྲའི་སྐྱོ་བོ་ཡིན་དོན་གང་ཡིན་ནམ།

ལན། དེ་བདེན་པ་རེད། ད་ལོའི་ཕྱི་ཟླ་ ༥ ནང་རྒྱ་ནག་དབུས་གསར་འགྱུར་དྲིལ་སྒྲོག་སྡེ་ཚན་གྱིས་ཕྱི་ལོ་ ༢༠༠༩ དང་ ༢༠༡༠ ལོའི་རྒྱ་ནག་གི་འགྲོ་བ་མིའི་ཐོབ་ཐང་སྐོར་གྱི་ཡིག་ཆ་ཞིག་ཁྱབ་བསྒྲགས་བྱས་ཡོད། སྐབས་དེར་ང་ཚོའི་ངོས་ནས་ཀྱང་། རྒྱ་ནག་གི་འགྲོ་བ་མིའི་ཐོབ་ཐང་སྐོར་ལ་བཟང་ཕྱོགས་ཀྱི་རེ་བ་ཞིག་བརྒྱབས་པ་རེད། ཡིག་ཆ་དེར་རྒྱ་ནག་གི་འགྲོ་བ་མིའི་ཐོབ་ཐང་དང་གྲངས་ཉུང་མི་རིགས་ཁག་གི་ཐོབ་ཐང་ཇེ་ལེགས་སུ་བཏང་སྟེ། སྲོག་ཁྲིམས་ཉུང་དུ་གཏོང་རྒྱུ་དང་ཕྱི་གསལ་ནང་གསལ་བཟོ་རྒྱུ་སོགས་བཀོད་ཡོད། ཡིག་ཆ་དེ་ཕྱི་ཟླ་ ༥ ནང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་ཕུལ་ཡོད་ལ། ཧང་སང་དགོས་པ་ཞིག་ལ་སྐབས་དེར་རྒྱ་ནག་གི་སྐུ་ཚབ་ཀྱིས་མཉམ་འབྲེལ་རྒྱལ་ཚོགས་ཀྱི་ཚོགས་མིའི་རྒྱལ་ཁབ་གཞན་དག་གིས་ཀྱང་ཡིག་ཆ་འདི་ལྟ་བུ་འབུལ་དགོས་པའི་སྐུལ་སློང་བྱས་ཡོད། དེ་བཞིན། རྒྱ་གཞུང་གིས་ ༢༠༠༡ ལོར་རྩ་ཁྲིམས་བསྒྱུར་བཅོས་བྱས་པའི་ནང་། རྒྱལ་ཁབ་ཀྱི་འགྲོ་བ་མིའི་ཐོབ་ཐང་འགན་ལེན་དང་སྲུང་སྐྱོབ། ཅེས་བཀོད་ཡོད་སྟབས་རྒྱལ་ཁབ་མང་པོས་དེ་ལ་བསྔགས་བརྗོད་གནང་ཡོད། འོན་ཀྱང་། ཡིག་ཆ་དེ་བཏོན་ཏེ་དུས་ཚོད་རིང་པོ་མ་སོང་གོང་ལྷ་སར་བོད་མི་གཉིས་དམར་སྲོད་བཏང་ཡོད། དེར་བརྟེན། རྒྱ་ནག་དབུས་གཞུང་གིས་གཏན་འབེབས་ནང་བཀོད་པའི་འགྲོ་བ་མིའི་ཐོབ་ཐང་དང་། གྲངས་ཉུང་མི་རིགས་ཀྱི་ཁེ་ཕན་དེ་དག་རྒྱལ་ཁབ་ཕྱི་ཕྱོགས་ལ་མགོ་སྐོར་གཏོང་བྱེད་ཀྱི་ལག་ཆ་ཞིག་ཏུ་ངོས་འཛིན་མི་བྱེད་ཀ་མེད་རེད། རྒྱ་ནག་གི་ཡིག་ཆ་དེ་ཞིབ་ཏུ་ཀློག་པ་ཡིན་ན། ད་བར་རྒྱ་ནག་ནང་འགྲོ་བ་མིའི་ཐོབ་ཐང་ལ་གནོད་སྐྱོན་བྱུང་བ་ཡོངས་རྫོགས་མི་སྒེར་དང་ཚོགས་སྡེ་རེ་ཟུང་གི་མགོར་གཡུགས་ཡོད། དོན་དངོས་ཐོག་ད་བར་གྱི་དཀའ་ངལ་ཡོངས་རྫོགས་གཞུང་གི་དབང་འཛིན་པ་ཚོས་བཟོས་པ་ཁོ་ན་རེད།

དྲི་བ། ཨ་རི་གཙོས་པའི་དམངས་གཙོའི་རྒྱལ་ཁབ་ཁག་གི་འགྲོ་བ་མིའི་ཐོབ་ཐང་གི་སྙན་ཐོའི་ནང་ལོ་ལྟར་རྒྱ་ནག་ལ་ཁ་རྡུང་དྲག་པོ་གཏོང་གིན་ཡོད་པ་དེས་རྒྱ་ནག་གི་ལག་ལེན་དངོས་ལ་ཕན་གནོད་གང་འདྲ་ཡོང་གིན་ཡོད་དམ།

ལན། རྩ་བའི་ཆ་ནས་ང་ཚོ་བཙན་བྱོལ་གཞུང་གིས་འཐབ་རྩོད་རྒྱུན་རིང་བྱས་པའི་ནུས་པ་ཟེར་ན་འདྲ་ལ། རྒྱལ་སྤྱིའི་ཐོག་གི་གནོན་ཤུགས་ཟེར་ནའང་འདྲ། ལོ་སྔ་ཕྱིར་རྒྱ་གཞུང་གིས་འགྲོ་བ་མིའི་ཐོབ་ཐང་དང་གྲངས་ཉུང་མི་རིགས་ཀྱི་ཐོབ་ཐང་ཐོག་སྲིད་བྱུས་མང་པོ་ཞིག་གཏན་འབེབས་བྱེད་ཀྱིན་འདུག དཔེར་ན། གྲངས་ཉུང་མི་རིགས་གང་ཞིག་ཡིན་རུང་མི་འབོར་ས་ཡ་གཅིག་ལོང་ན། རྒྱལ་ཡོངས་མི་དམངས་འཐུས་མིའི་ཚོགས་ཆེན་གྱི་ཚོགས་གཞོན་གྱི་ཞབས་སྟེགས་འབུལ་རྒྱུ་བྱས་ཡོད། འོན་ཀྱང་། དེ་དག་སྤྱི་ཁོག་གི་ལམ་ལུགས་ཙམ་རེད། འགྲོ་བ་མིའི་ཐོབ་ཐང་ལ་རྡབ་གསིག་འགྲོ་སའི་སྣེ་མོ་དག་ལ་ལག་པ་འཆང་གིན་མེད།  དབུས་གཞུང་གིས་གཏན་འབེབས་གང་འདྲ་ཞིག་བྱས་ཡོད་ཀྱང་། ས་གནས་ལ་གནད་དོན་ཞིག་བྱུང་མ་ཐག་རྡུང་རྡེག་ཚ་ནན་དང་འཛིན་བཟུང་བཙོན་འཇུག དྲག་གནོན་དམར་གསོད་གང་བྱུང་བྱེད་ཀྱིན་ཡོད། རྩ་ཁྲིམས་དང་བཅའ་ཁྲིམས། ཉེས་ཁྲིམས། ཐོབ་ཐང་ཡོངས་རྫོགས་ཟུར་དུ་བཞག་སྟེ། ལག་བསྟར་གྱི་དབང་ཚད་འཕར་མ་ཞིག་བེད་སྤྱོད་གཏོང་གིན་ཡོད། ཡང་གནད་དོན་རེ་ཟུང་ཐོག་དབུས་གཞུང་གི་འགྲོ་བ་མིའི་ཐོབ་ཐང་ཐད་ཀྱི་སྲིད་བྱུས་དང་། ས་གནས་ནས་སྲིད་བྱུས་དེ་ལག་ལེན་བསྟར་སྟངས་ཀྱི་ལས་རིམ་གཉིས་རྒྱབ་འགལ་ལྟ་བུ་ཆགས་ཀྱིན་ཡོད། དཔེར་ན། ད་ལོ་ལས་བྱེད་སྟོང་ཕྲག་མང་པོ་གཞི་རིམ་ལ་རྟོག་དཔྱོད་དུ་བཏང་བ་དང་། དགོན་སྡེ་དང་སློབ་གྲྭ་ཁག་ཏུ་ཆབ་སྲིད་དྲིལ་བསྒྲགས་སྤེལ་ཏེ། གཞུང་དང་ལྟ་བ་མི་མཐུན་པའི་རིགས་ལ་གནོན་བཙིར་བྱེད་པ་སོགས་བྱུང་ཡོད། འོ་ན་རྒྱ་ནག་གི་འགྲོ་བ་མིའི་ཐོབ་ཐང་ལ་ཡར་རྒྱས་ཁྱོན་ནས་མེད་དམ་ཟེར་ན། དེ་ཡང་མ་རེད། གོམ་པ་ཆུང་ངུ་རེ་སྤོ་བཞིན་ཡོད་པ་རེད། ད་བར་འགྲོ་བ་མིའི་ཐོབ་ཐང་ཐོག་སྐད་ཆ་མེད་མཁན་རྒྱལ་ཁབ་ཅིག་གིས་ཉེ་ལམ་གྱི་གཏན་འབེབས་དེ་འདྲ་ཞིག་བཟོས་པ་ཙམ་གྱིས་རླབས་ཆེན་དུ་ངོས་འཛིན་བྱས་ཆོག རྒྱ་ནག་གིས་འགྲོ་བ་མིའི་ཐོབ་ཐང་གི་ལས་ཁུངས་ཟུར་དུ་འཛུགས་རྒྱུའི་འཆར་གཞི་ཡང་འདུག ཉེ་ཆར་ཨ་རིའི་སྲིད་འཛིན་རྒྱ་ནག་ལ་ཕེབས་སྐབས། ལོ་རྗེས་མའི་ཟླ་ ༣ ཡས་མས་ནང་རྒྱ་ནག་ནས་འགྲོ་བ་མིའི་ཐོབ་ཐང་སྐོར་ལ་གྲོས་མོལ་གནང་རྒྱུ་བྱས་ཡོད། འོན་ཀྱང་། ད་ལྟའི་ཆར་རྒྱལ་སྤྱིའི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་ནང་ལྟར་གོམ་པ་སྤོ་ཐུབ་ཀྱིན་ཡོད་པ་མ་རེད། རྒྱ་ནག་གི་མཁས་པ་ཚོས་བརྗོད་པ་ལྟར་ན། རྒྱ་ནག་དབུས་མཐོ་རིམ་དཔོན་རིགས་ནང་། རྒྱ་ནག་དེ་འགྲོ་བ་མིའི་ཐོབ་ཐང་ཚད་ལྡན་ཞིག་གི་ཐོག་བསྐྱོད་རྒྱུར་འདོད་པ་ཡོད་མཁན་མང་ནའང་། དོགས་པ་རྣམ་རྟོག་མང་པོ་ཞིག་གི་དབང་གིས་གློ་བར་དུ་འགྱུར་བ་བཏང་ན་རྒྱ་ནག་གཞུང་མགོ་རྟིང་སློག་རྒྱུར་ཞེད་སྣང་སྐྱེ་བཞིན་ཡོད་ཟེར།

དྲི་བ། རྒྱ་ནག་གི་མངའ་ཁུལ་སོ་སོར་འགྲོ་བ་མིའི་ཐོབ་ཐང་གི་ཁྲིམས་གཞི་ལག་བསྟར་བྱེད་ཕྱོགས་ཐད་མ་འདྲ་བའི་ཆ་དང་། མི་རིགས་དབྱེ་འབྱེད་ཀྱི་ཆ་དེ་འདྲ་མཐོང་གིན་ཡོད་དམ།

ལན། རྒྱ་ནག་དེ་མི་རིགས་ང་དྲུག་ལས་གྲུབ་པའི་རྒྱལ་ཁབ་ཅིག་ཡིན་ཡང་། ཁྲིམས་ཀྱི་ཐོབ་ཐང་གཅིག་པ་ཡིན་ཟེར་གྱིན་ཡོད། འོན་ཀྱང་། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། བོད་ནང་གི་འགྲོ་བ་མིའི་ཐོབ་ཐང་གཉིས་བར་ཁྱད་པར་ཆེན་པོ་ཡོད། དེ་ང་ཚོ་གཅིག་པུའི་མཐོང་ཚུལ་ཙམ་མ་རེད། ཕྱི་རྒྱལ་ཁག་གི་འགྲོ་བ་མིའི་ཐོབ་ཐང་ཚོགས་པ་ཁག་ལའང་གཅིག་མཚུངས་ཀྱི་མཐོང་ཚུལ་དེ་བྱུང་ཡོད། གང་ཡིན་ཟེར་ན། ༡༠༨༩ ལོར་རྒྱ་ནག་ནང་རྙོག་དྲ་བྱུང་སྐབས་ཁྲིམས་རྩོད་པ་གླས་ཆོག་ལ། ལོ་ཉི་ཤུའི་རྗེས་སུ་བོད་ནང་རྙོག་དྲ་བྱུང་སྐབས་ཁྲིམས་རྩོད་པ་གླ་བཅུག་མེད། བོད་པའི་བཙོན་པ་ཚོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་ཉེས་ཁྲིམས། དེ་བཞིན་སྤྱི་དམངས་ཀྱི་ཞུ་གཏུགས་ཁྲིམས་གཞི་གང་ཅིར་དབྱེ་འབྱེད་ཆེན་པོ་བྱས་ཡོད། དཔེར་ན། བོད་ནང་གི་ཕུར་བུ་ཚེ་རིང་རིན་པོ་ཆེ་དང་དོན་འགྲུབ་དབང་ཆེན། ཐབས་མཁས་རྒྱ་མཚོ་དང་བརྩོན་འགྲུས་སོགས་ལ་ཁྲིམས་རྩོད་པ་གླ་བཅུག་མེད། དེ་ལྟར་ཁྲིམས་ཀྱི་ཐོག་ནས་མི་རིགས་དབྱེ་འབྱེད་བྱས་པ་དེ་འགྲོ་བ་མིའི་ཐོབ་ཐང་རྡོག་རོལ་ཚབས་ཆེ་ཤོས་རེད། མི་རིགས་ང་དྲུག་དེ་ཁྲིམས་ལུགས་གཅིག་གི་འོག་ཡིན་ཟེར་བཞིན་དུ་ལག་བསྟར་བྱེད་སྟངས་གཉིས་ཡོད། དེར་མ་ཟད་སྔར་ལོ་རྒྱ་རིགས་ཁྲིམས་རྩོད་པ་འགས་ ༼ སྤྱི་དམངས་ཀྱི་ཁྲིམས་ལུགས་ཞབས་ཞུ་ལྟེ་གནས་ཁང་ ༽ ཞེས་པ་ཞིག་བཙུགས་ཏེ། བོད་རིགས་ཚོའི་བྱེད་སྟངས་ལ་ཁྲིམས་ཐོག་ནས་ཞིབ་འཇུག་བྱེད་ཆེད་དང་རྒྱལ་ཁབ་ཀྱི་ཁྲིམས་ལུགས་ལ་བརྩི་བཀུར་ཡོང་ཆེད་ཚོགས་པ་དེ་བཙུགས་པ་རེད། འོན་ཀྱང་། ད་ལོ་ཚོགས་པ་དེས་བོད་ནང་གི་ ༣།༡༤ དོན་རྐྱེན་ཐད་སྙན་ཐོ་ཞིག་བཏོན་པ་ལ་བརྟེན་ཏེ་ཚོགས་པ་དེ་སྒོ་རྒྱག་ཏུ་བཅུག་ཡོད།

དྲི་བ། སྔར་ལོའི་བོད་ནང་གི་ཞི་རྒོལ་ཁྲོད་རྒྱལ་སྤྱིའི་ཁྲིམས་ལུགས་དང་འགྲོ་བ་མིའི་ཐོབ་ཐང་ལས་བརྒལ་བའི་བྱེད་སྤྱོད་འདྲ་སྤེལ་ཡོད་དམ།   

ལན། ཉེ་ཆར་ང་རང་ཚོགས་འདུ་ཞིག་ལ་བཅར་སྐབས་སྔར་ལོ་བོད་ནང་གི་ཞི་རྒོལ་ཡོངས་རྫོགས་ལ་སྡོམ་ཐོ་ཞིག་བཟོས་ཏེ་འཁྱེར་བ་ཡིན། སྡོམ་ཐོ་དེའི་ནང་རོབ་རྩིས་བྱས་ན་བོད་མི་ཚོས་ངོ་རྒོལ་རྣམ་པ་མི་འདྲ་བ་ ༨༠ ཙམ་སྤེལ་འདུག དེ་དག་ཡོངས་རྫོགས་རྒྱལ་སྤྱིའི་ཁྲིམས་ལུགས་དང་མཐུན་པ་རྐྱང་ཆགས་བསྡད་ཡོད་ལ། འཚེ་མེད་ཞི་བའི་ལས་འགུལ་ཡིན་པའི་སྟེང་ལ་འགྲོ་བ་མིའི་ཐོབ་ཐང་གི་སྲུང་སྐྱོབ་ཐོབ་འོས་པའི་ལས་འགུལ་ཞེ་གཅིག་རེད། དེ་བཞིན། རྒྱ་ནག་གི་འགྲོ་བ་མིའི་ཐོབ་ཐང་ཐད་ཀྱི་གཏན་འབེབས་ནང་། གནད་དོན་གང་རུང་ཞིག་གི་ཐོག་མི་དམངས་མང་པོ་འདུ་འཛོམས་ཀྱིས་ཞི་བའི་སྐད་འབོད་བྱས་པ་ཡིན་ན། གཞུང་གི་འབྲེལ་ཡོད་མགོ་ཁྲིད་ཚོ་མི་དམངས་ཁྲོད་དངོས་སུ་ཕེབས་ཏེ། ལན་འདེབས་དང་གསལ་བཤད་བྱས་ཏེ་འདུ་འཛོམས་ཞོལ་འཇགས་གཏོང་དགོས། ཞེས་བཀོད་ཡོད་ཀྱང་། སྔ་ཕྱིར་བོད་ནང་ཁྱོན་བསྡོམས་ལས་འགུལ་འདྲ་མིན་ ༥༠༠ ལྷག་བྱུང་བ་ཚང་མར་གཞུང་གི་བཀའ་རྒྱའི་འོག་དྲག་གནོན་བྱས་ཡོད།