ངྷ་ས་བདེ་དོན་ལས་ཁུངས་ཀྱིས་ངྷ་སའི་མང་ཚོགས་ཚོས་འདི་ལོའི་ལོ་སར་སྐབས་རྒྱས་སྤྲོས་ཀྱི་རྣམ་པ་གང་ཡང་བྱེད་མི་ཆོག་པའི་གསལ་བསྒྲགས་སྤེལ་ཡོད་འདུག
ཕྱི་ཚེས་ ༦ ཉིན་ངྷ་ས་བདེ་དོན་ལས་ཁུངས་ནས་གསལ་བསྒྲགས་ཤིག་བཀྲམས་ཏེ་ངྷ་སར་གནས་སྡོད་མང་ཚོགས་ཚོས། འདི་ལོའི་ལོ་སར་རྒྱས་སྤྲོས་ཀྱི་རྣམ་པའི་ཐོག་ནས་གཏོང་མི་ཆོག་པའི་གསལ་བསྒྲགས་སྤེལ་ཡོད་ལ། གསལ་བསྒྲགས་དེའི་ནང་དུ་འདི་ལོ་བཙན་བྱོལ་བོད་གཞུང་གི་གཞུང་ཞབས་ལས་བྱེད་ཚོས་གཞིས་ལུས་བོད་མི་རྣམས་ལ་གདུང་སེམས་མཉམ་སྐྱེད་ཆེད་ལོ་སར་གཏོང་མི་ཆོག་པའི་བཀའ་ཕེབས་ཡོད་སྟབས། ངྷ་སར་གནས་སྡོད་བོད་རིགས་མང་ཚོགས་ཚོས་ཀྱང་ལོ་སར་སྐབས་གཞས་ཞབས་བྲོ་འཁྲབ་པ་དང་། གླུ་ལེན་གར་རྩེད་ལ་རོལ་བ། ཤོག་སྤག་སྦར་བ་སོགས་མི་བྱེད་པར་གདུང་སེམས་མཉམ་སྐྱེད་བྱ་དགོས་སྐོར་བཀོད་ཡོད།
འདི་གའི་གསར་འགོད་པས་ངྷ་ས་བདེ་དོན་ཚེ་རིང་ཕུན་ཚོགས་སུ་དེའི་སྐོར་བཀའ་འདྲི་ཞུས་པར། ཁོང་གིས་ཕྱི་ཚེས་ ༥ ཉིན་བོད་གཞུང་ནང་སྲིད་ལས་ཁུངས་བརྒྱུད་བཀའ་ཤག་གིས་སྤེལ་བའི་གསལ་བསྒྲགས་དེ་འདི་གར་བཏང་སོང་ལ། གསལ་བསྒྲགས་དེ་ནི་རྒྱ་བལ་འབྲུག་གསུམ་དུ་ཡོད་པའི་ས་གནས་མགོ་འཛིན་ཚང་མར་ཕུལ་བ་ཞིག་རེད་འདུག དེ་ལྟར་ས་གནས་མགོ་འཛིན་ཚང་མར་འབུལ་དོན་ནི་ས་གནས་མགོ་འཛིན་ཚོའི་ཁྱབ་ཁོངས་འོག་ཡོད་པའི་མང་ཚོགས་ཚོར་སྤེལ་བ་ཞིག་ཀྱང་ཆགས་ཀྱི་ཡོད་པར་བརྟེན། ངྷ་སའི་མང་ཚོགས་ཚོས་ཀྱང་ལོ་སར་སྐབས་ཆོས་ཕྱོགས་ཀྱི་བྱེད་སྒོ་ཁག་ལས་སྤྲོ་སྐྱིད་ཀྱི་རྣམ་པ་མེད་པའི་ཐོག་ནས་ལོ་སར་གཏོང་དགོས་པའི་གསལ་བསྒྲགས་སྤེལ་བ་ཡིན་སྐོར་གསུངས་ཡོད།
བདེ་དོན་ལས་ཁུངས་གིས་ད་ལོར་བོད་མི་མང་གིས་ལོ་གསར་གཏོང་ཆོག་མི་ཆོག་གི་འགན་ཞིག་འཁུར་གྱིན་ཡོད་པ་ངོ་མཚར་ཆེ། ༢༠༠༨ལོར་བོད་མི་དེ་འདྲ་མང་པོ་ཞིག་གི་ལུས་སྲོག་ལ་གྱོང་རྒུད་བྱུང་བའི་ལོ་དེར་ཁོང་ཚོ་འཇམ་ཅག་ཅག་གིས་བསྡད་སོང་། མི་མང་སྒེར་ངོས་ནས་ལོ་གསར་མི་གཏོང་བའི་ལས་འགུལ་མ་སྤེལ་བར་དུ་ཚིག་གཅིག་ཀྱང་གྲག་མ་སོང་།
རེད་རེད། ད་ལོ་ཁོང་ཚོར་ན་ཚ་ཞིག་ཡོད་ངེས། དེ་ནི་གཞན་གང་ཡང་མ་ཡིན་པར་ཉེ་ཆར་རྒྱ་ནག་གིས་ང་ཚོའི་སྐུ་ཚབ་ཚོར་རྡ་རམ་ས་ལའི་གཞུང་ནི་ཁྲིམས་འགལ་རེད། དེས་བོད་མི་མང་གི་ཚབ་མཚོན་ཐུབ་གྱིན་མ་རེད་ཅེས་བརྗོད་པ་དེས་ཁོང་ཚོའི་རྩམ་ཁུག་རིན་པོ་ཆེ་ལ་བརྡབ་བསིག་འདྲ་ཐེབས་མི་ཡོང་ངམ་སྙམ་པའི་འཇིགས་སྐྲག་ཅིག་སླེབས་སོང་བ་ཡིན་གྱི་རེད།
ལོ་གསར་ལ་རྟེན་འབྲེལ་སྒྲིག་སྟངས།
ཤ་མང་བཟས་དྲགས་ལུས་ནད་མང་། །
ཆང་མང་འཐུང་དྲགས་ལབ་རྙོག་མང་། །
འགྲོ་སོང་ཆེ་དྲགས་བསོད་ཟད་མང་། །
ལོ་གསར་ཞེས་པ་རྣམ་རྟོག་མང་། །
འོན་ཀྱང་ཆོས་ཕྱོགས་རྟེན་འབྲེལ་ལ །
སྐུ་འདྲ་སྒྲིག་ལ་ཡོན་ཆབ་ཕུལ། །
མཆོད་མེ་སྤོར་ལ་སྤོས་བསང་ཐོངས། །
འདི་ཕྱིའི་དོན་གྲུབ་སྨོན་ལམ་ཐོབ། །
ལོ་གསར་ལ་བཀྲ་ཤིས་བདེ་ལེགས།
རེད་མ་གཞི་སྨོན་ལམ་རྒྱག་རྒྱུ་དེ་ཡང་བོད་ཀྱི་གོམས་སྲོལ་ཞིག་རེད། དོན་ངོ་མའི་འབབ་ས་ཞིག་ལ་བབ་ནས་བལྟས་ན་སྨོན་ལམ་ཞིག་གིས་གང་ཡང་ཡོང་གི་མ་རེད། དེ་ལས་རང་ཉིད་ཀྱི་ནུས་པ་དང་འཇོན་ཐང་ལ་དཔག་པའི་བོད་མིའི་དཀའ་སྡུག་སེལ་ཐབས་དང་ཁྱོད་རང་ཉིད་དང་གཞིས་བཞུགས་བོད་མི་ཚང་མ་མགྱོག་ནས་མྱུར་དུ་བོད་ནང་ལ་ལོག་ཐུབ་པའི་ལས་དཀའ་དེ་འདྲ་རྩོམ་རྒྱུ་ཡོད་པ་མ་བརྗེད་རོགས།
འོ་ཡ ཟས་མི་བཟའ་བའི་ངོ་རྒོལ་དེས་སྡུག་གྱོང་རང་གི་མགོར་ལྷུང་།
ང་རྡ་ས་ནས་འདུག་མ་མྱོང་། རྡ་སར་ཆ་རྒྱུས་ཆེན་པོ་མེད། འོན་ཀྱང་ངའི་མཐའ་འཁོར་དུ་ཡོད་པའི་གྲོགས་པོ་དང་ལས་གྲོགས་གསུམ་བོད་ནས་ཡོང་བ་ལས་གཞན་ཚང་མ་རྒྱ་གར་ནས་ཡོང་བ་དང་དེའི་ནང་ནས་ཀྱང་རྡ་ས་ནས་ཡོང་བ་རྐྱང་ཡིན། དེའི་ངའི་རྡ་སའི་སྐོར་གང་འཚམ་ཤེས་ཀྱི་ཡོད། ཁོང་ཚོས་བཤད་པ་ལྟར་ན་རྡ་ས་ནས་ལོ་གསར་མ་བྱེད་ཟེར་གི་རེད། བཀའ་ཁྱབ་བསྒྲགས་གི་རེད། གསལ་བསྒྲགས་སྤེལ་གི་རེད། འོན་ཀྱང་ལོ་གསར་བྱེད་མཁན་ནི་དེ་ལྟར་བསྒྲགས་མཁན་སྤེལ་མཁན་ཚོ་རེད། མ་བདེན་ན་རྡ་ཤོད་ཀྱི་སྡེབ་ཚོང་ཁང་རྣམས་ཀྱི་ནང་དུ་ལོ་གསར་གྱི་གསོལ་སྟོན་བྱེད་སྤྱད་ཀྱི་ཚོང་རྫས་ཉོ་རུ་ཁོང་ཚོ་ཡོང་ཡོད་མེད་ལ་བལྟས་པས་ཤེས་ལབ་སོང་། ད་བྱས་ན་ལོ་གསར་བྱེད་ཀྱི་ཡོད་མེད་ཀྱི་གནད་དོན་ལྟ་ས་གཙོ་བོ་དེ་ཕལ་ཆེར་རྡ་སའི་གཡས་གཡོན་གྱི་ཚོང་ཁང་དག་དང་དེ་བཞིན་མེག་ལོའི་སྲང་ལམ་གྱི་འཕྲལ་སེལ་ཚོང་བ་ཚོར་ཚོང་ཡོང་ཡོད་མེད་ཀྱི་སྟེང་ཤེས་རབས་བཤད་སོང་། གསར་འགོད་པ་དང་ཟིན་པ་ཚོས་ཁོང་ཚོར་ཉམས་ཤིག་ཞོགས་ཕལ་ཆེར་ལྷང་ལ་འབུད་རྒྱུ་ཞིག་ཡོད་ས་རེད།
ལོ་གསར་བྱེད་དགོས་མི་དགོས་དང་། ལོ་གསར་བྱས་མ་བྱས་ཀྱི་ཕན་གནོད། ད་དུང་ལོ་གསར་གྱི་དགོས་པ་དགེ་མཚན་སོགས་མང་པོ་ཞིག་གི་ཐད་ཆེད་རྩོམ་ཞིག་འབྲི་བཞིན་ཡོད། ཉིན་ཁ་ཤས་རྗེས་ནས་དུས་བབ་ལ་བསྐུར་གི་ཡིན།
ང་རང་ཆུང་དུས་ལོ་གསར་ལ་དགའ་སྣང་དང་སྤྲོ་སྣང་ཚད་མེད་ཞིག་སྐྱེས་མྱོང་ཡང། དུས་ད་ལྟ་བསམ་བློ་ཞིག་གཏོང་སྐབས་འདས་ཟིན་པའི་ལོ་གསར་རྣམས་ནི་མིང་ཙམ་ལས། ངོ་མ་དེ་ནི་མ་ཡིན་པ་ར་འཕྲོད་བྱུང། ཅི་སྟེ་མ་འོངས་པར་གཞིས་བྱེས་མཉམ་འཛོམས་ཀྱི་དུས་ཤིག་འབྱུང་ནས། ཕ་ཡུལ་གངས་ལྗོངས་སུ་ལོ་གསར་ཞིག་གཏོང་རྒྱུ་འབྱུང་ན། དེ་ནི་ངའི་མི་ཚེ་ནང་གི་ལོ་གསར་སྐྱིད་ཤོས་དེ་ཡིན་པ་སྨོས་མི་དགོས་ལ། དེ་ནི་ངའི་མི་ཚེའི་ནང་བརྗེད་པར་དཀའ་བའི་དུས་ཤིག་ཀྱང་ཡིན་པ་བཤད་མི་དགོས།
ང་ནི་ཕ་ཡུལ་རིག་མ་མྱོང་བའི་བཙན་བྱོལ་བོད་ཕྲུག་ལས་དམན་ཞིག་ཡིན་ལ། ཕ་ཡུལ་དུ་ཐེངས་ཤིག་བསྐྱོད་རྒྱུ་ནི་ངའི་རྨི་ལམ་ཡིན་ལ། ངའི་དམ་བཅའ་ཞིག་ཀྱང་ཡིན།
ཕ་ཡུལ་ཡ་ཕ་ཡུལ།
ང་མགྱོགས་མྱུར་ཁྱེད་ཕྱོགས་སུ་སླེབས་ཐུབ་པའི་སྨོན་ལམ་ཡོད།
ལོ་གསར་རྒྱས་སྤྲོ་མ་བྱས་ནས་མི་ལོ་བཅུ་གཉིས་ཡིན།