སྨོན་ལམ་འཕར་མ་ལས་འཕྲོས་པའི་གཏམ། ཨ་དགེ།

                       ཨ་རིག་དགེ་མཐོང་།

 ད་ལོ་དགེ་ལུགས་པའི་སྨོན་ལམ་འཕར་མ་གོ་སྒྲིག་ཚོགས་ཆུང་གིས་འབད་བརྩོན་བྱས་པ་ལ་བརྟེན་ནས། རྡོ་རྗེ་གདན་ནས་དགེ་ལུགས་པའི་སྨོན་ལམ་འཕར་མ་འཚོགས་ཐུབ་པའི་སྐལ་བ་ལྡན་པ་དང་། ཚོགས་ཀྱི་གྲལ་མགོར་༧ གོང་ས་སྐྱབས་མགོན་མཆོག་བྱོན་པ་མ་ཟད། དགའ་ལྡན་ཁྲི་བ་དང་ཤར་བྱང་གི་ཆོས་རྒྱལ་རྣམ་གཉིས་གཙོས་རིས་མེད་ཀྱི་སྐྱེས་ཆེན་དམ་པ་རྣམས་ཕེབས་པ་དང་། དགེ་འདུན་འདུས་པ་རྒྱ་མཚོ་གྲངས་ལས་འདས་པ་ཞིག་ཕེབས་པ་ནི་དགའ་འོས་པའི་དོན་དག་ཅིག་རེད།  དེ་དང་སྟབས་བསྟུན་ནས་གསུང་ཆོས་ཀྱང་ཡག་པོ་ཞིག་ཞུ་ཐུབ་བྱུང་བ་ནི་ཆོས་ཞུ་བ་རྣམས་ཀྱི་སྐུ་བསོད་རེད་ལབ་ན་ཕལ་ཆེར་མི་འགྲིག་རྒྱུ་ཡོད་པ་མ་རེད་བསམ།  འདིའི་སྐབས་སུ་གདན་ས་ཁག་གཙོས་དགོན་པ་གྲྭ་ཚང་གི་དགེ་འདུན་པ་རྣམས་བཞུགས་ཡུལ་མཐུན་རྐྱེན་ཡག་པོ་ཞིག་གོ་སྒྲིག་གནང་འདུག་པ་དེ་ནི།  སྨོན་ལམ་གོ་སྒྲིག་ཚོགས་ཆུང་དང་གསུང་ཆོས་གོ་སྒྲིག་པ་རྣམས་ཀྱི་བཀའ་དྲིན་ལས་མ་འདས།  ད་དུང་དགེ་འདུན་པ་མང་ཆེ་བས་ལུས་ཀྱི་སྤྱོད་ལམ་དང་ངག་གིས་བཀའ་མོལ་གསུང་སྟངས་སོགས་ཧ་ཅང་ཕྱི་སྐལ་ལྡན་དང་བ་འདྲེན་པའི་མིག་རྒྱན་དང་ནང་བསོད་ནམས་བསགས་པའི་ཞིང་ས་ལོས་ཡིན་བསམ་པ་ཞིག་ཡོད་ཚད་ལ་ངང་གིས་སྐྱེས་ཡོད་ཁོ་ཐག་ཡིན།  འོན་ཀྱང་ཡག་ས་མང་ལ་སྡུག་ས་མེད་པ་ཞིག་ཀྱང་མ་ཡིན་ཏེ། དཔེར་ན། སྨོན་ལམ་འཕར་མ་འཚོགས་པའི་སྐབས་སུ་དགེ་འདུན་པ་འགའ་ཤས་ཀྱི་སྤྱོད་ཚུལ་ནི་ཁྱིམ་པ་སུན་འབྱིན་པའི་ལས་ཤ་སྟག་རེད། ཁོག་སྟོད་དུ་དཀར་ནག་ཁྲ་གསུམ་གྱོན་པ་དང་། ཁོག་སྨད་དུ་རྐང་སྣམ་རིང་བོ་གྱོན་ནས་ཤམ་ཐམ་འོག་བསྣར་ནས་འགྲོ་གིན་འདུག  འདི་དག་རིག་ན་སེམས་སྐྱོ་ཞིང་དགེ་འདུན་པ་ཟེར་བའི་མིང་ཞིག་ཁོ་ཚོར་ཨེ་ཡོད་བསམ་པ་འདུག དེའི་ཕྱིར་༧གོང་ས་མཆོག་གིས་ཀྱང་ཐེངས་འདིར་ཁོག་སྟོད་ལ་རྒྱ་ལཱ་འདྲ་བོའི་སྲོལ་དང་ཁོག་སྨད་དུ་གྲྭ་ཆས་བསྣམས་པ་སོགས་ནི་ཡག་པོ་མི་འདུག་ཅེས་བཀའ་ཕེབས་སོང་། དེ་བཞིན་དུ་བླ་མ་སྤྲུལ་སྐུ་ཡིན་ཟེར་བའི་སྐྱེས་དམན་ཅན་ཚོ་ཡག་པོ་མི་འདུག་ཅེས་བཀའ་ནན་མོ་གནང་སོང་། ད་དུང་སོག་པོའི་མཁན་པོ་ལ་གྲྭ་བ་ཡིན་ཟེར་བའི་སྐྱེས་དམན་ཅན་སོག་པོ་ན་མང་གི  དེ་ཚོ་རྩ་བ་ནས་ཡག་པོ་མི་འདུག་ཅེས་དམིགས་གསལ་གྱིས་གསུངས།
          

དེ་བས་ཀྱང་ཐེངས་འདིར་ཞབས་འདྲེན་ཞུས་པ་ཞིག་ནི། དགེ་ལུགས་པའི་སྨོན་ལམ་འཕར་མ་འཚོགས་པ་དང་དགེ་འདུན་པ་ཡིན་ཟེར་བའི་རས་དམར་པོ་གྱོན་མཁན་དང་རས་སེར་བོ་གྱོན་མཁན་གྱི་གྲངས་ཀ་ཇེ་མང་དུ་སོང་བ་དེ་རེད། དུས་རབས་ཉེར་གཅིག་གི་ནང་འདིར། བོད་ཕྱི་ནང་ཀུན་དུ་གྲྭ་རྒྱུན་དཀོན་ལ་ལྷག་པར་གྲྭ་བ་ཟེར་དུས་ཤེས་ཡོན་མེད་པའི་སྡེ་ཞིག་ལ་ངོས་འཛིན་པའི་མི་བུ་བསམ་བློ་དྲི་མ་ངན་པས་སྦགས་ཡོད་མཁན་མང་། དེང་སང་གྲྭ་ས་གྲྭ་ཚང་ལ་གྲྭ་རྒྱུན་དཀོན་པ་མིག་མཐོང་ལག་ཟིན་ཡིན། འོན་ཀྱང་ད་ལོ་དགེ་ལུགས་པའི་སྨོན་ལམ་དང་གསུང་ཆོས་སྐབས་སུ་གྲྭ་བའི་ཁ་གྲངས་ཇེ་མང་དུ་སོང་བ་མ་ཟད། ཁྲི་གཉིས་དང་སྟོང་ཕྲག་འགའ་ཤས་བརྒལ་བ་རེད། ཐེངས་འདིར་སྨོན་ལམ་དང་གསུང་ཆོས་ཞུ་མཁན་མི་སྐྱ་ལས་གྲྭ་བ་མང་བ་འདིས་ཅི་ཞིག་མཚོན་མིན་ཕལ་ཆེར་མི་བུ་བསམ་བློ་ཅན་ཞིག་ཡིན་ན་ཤེས་ནུས།  ད་ལོའི་སྐབས་འདིའི་གནས་ཚུལ་གོ་མྱོང་དང་ཐོས་མྱོང་མེད་པ་དག་ལ་ཁ་བརྡའི་ཚུལ་གྱིས་སྐད་ཆ་འགའ་ཞུས་ན། སྨོན་ལམ་འཕར་མ་དང་གསུང་ཆོས་སྐབས་ད་ལོ་དགེ་འདུན་པའི་ཁ་གྲངས་ཇེ་མང་དུ་སོང་ཟེར་བ་འདི་ངེས་དོན་གྱིས་སོང་བ་མིན་པར། རས་དམར་པོ་གྱོན་པའི་ལ་དྭགས་དང་འབྲས་ལྗོངས། བལ་ཡུལ་གྱི་ཤར་བ། བོད་ཀྱི་ཟ་འདྲེ་འགའ་སོགས་ཡོང་བས་རེད་ལ།  དེ་བཞིན་དུ་བྷི་ཧར་མངའ་སྡེའི་སྤྲང་བོ་དག་གིས་རས་སེར་བོ་རེ་གྱོན་ནས་སླེབས་པ་རེད། འདི་དག་གིས་རས་དམར་པོ་དང་སེར་བོ་གྱོན་ནས་སླེབས་དོན་ནི། དགེ་ལུགས་སྨོན་ལམ་འཕར་མ་ཡིན་པ་མ་ཟད། དགེ་ལུགས་པའི་སྐུ་འགྱེད་ཀྱི་སྒོར་མོའི་གྲངས་ཀ་ནམ་རྒྱུན་ལས་འཕར་ཏེ། ཇ་སྐབས་གཅིག་ལ་སྒོར་མོ་གཅིག་སྟོང་རེ་རག་དུས་དང་ལྔ་བརྒྱ་རག་དུས། དེ་མིན་ན་ཡང་སྒོར་མོ་བརྒྱ་ནི་དུས་རྒྱུན་ཡོད་པས་ཡིན། རྒྱ་གར་གྱི་ལས་ཀ་བ་ཞིག་གི་ཉིན་ལས་ལ་ཕོ་ཞིག་ཡིན་ཚེ་སྒོར་བདུན་ཅུ་དང་མོ་ལ་སྒོར་ལྔ་བཅུ་ལས་མེད། ད་དུང་ལས་ཀ་འདིའི་རིགས་རག་མཁན་ཚོ་ནི་འཇོན་ཐང་ཅན་དག་ཡིན། དེ་མིན་ཁོ་ཚོས་སློང་རྒྱག་པ་ལས་ཐབས་གཞན་མེད། ད་ལོ་བཀའ་བརྒྱུད་པའི་སྨོན་ལམ་འཚོགས་དུས་ཕྱག་འཁྱེར་ཡོད་མཁན་གྱི་དགེ་འདུན་པ་དག་ལས་གཞན་ལ་སྐུ་འགྱེད་སྤྲད་མི་འདུག  དེ་ནི་ཧ་ཅང་ཡག་པོ་ཞིག་རེད་དྲན་གི  དགེ་ལུགས་པའི་སྨོན་ལམ་འཕར་མ་ཚོགས་ཆུང་གི་གྲྭ་བ་དག་གིས་སྐུ་འགྱེད་ཕངས་མེད་སྦྱིན་པ་ནི་ཡག་རྟགས་ཤིག་མིན། ཁྱེད་ཅག་གིས་སེར་སྣ་མེད་པར་སྦྱིན་པའི་སྐུ་འགྱེད་འདི་ཡོང་སྟངས་ལ་བསམ་གཞིག་བྱེད་ཨེ་མྱོང་། ཤི་བོ་ཤི་མོ་ཚོའི་ད་ཟས་གཤིན་ཟས་ཡིན་ལ། དད་ལྡན་མང་ཚོགས་ཀྱིས་ཆོས་སེམས་ཁོ་ནས་དགེ་འདུན་པ་རྣམས་ལ་སྔོ་བ་སྨོན་ལམ་རེའི་ཕྱིར་ཏུ་སྤྲད་པ་ལས། རས་སེར་བོ་ཅན་དང་རས་དམར་པོ་ཅན་ཡོད་ཚད་ལ་སྤྲད་པ་མིན་པ་གསལ་བོ་རེད། འདིའི་ཕྱོགས་སུ་ཁྱེད་ཅག་གིས་བསམ་བློ་བཏང་ཨེ་མྱོང་། ངས་ཁྱེད་ཅག་གིས་དཀའ་ལས་བརྒྱབས་པ་ཧ་གོ་གི་ཡོད། ཡིན་ནའང་དཀའ་ལས་བརྒྱབས་པའི་འབྲས་བུ་ཆུད་ཟོས་དུ་མ་སོང་བ་ཞིག་ཁྱེད་ཅག་གིས་བྱེད་ཐུབ་མ་སོང་བ་དེ་རེད། དེང་སྐབས་འཛམ་གླིང་སྤྱིའི་དཔལ་འབྱོར་ཉམ་རྒུད་དུ་སོང་ནས་དཀའ་ངལ་འཕྲད་ཀྱིན་ཡོད་པ་རེད།  དུས་འདི་འདྲ་ཞིག་དང་བསྟུན་ནས་སྐུ་འགྱེད་སྒོར་སྟོང་ཕྲག་རེ་སྐར་ཆ་འགའ་ལ་འབད་རྩོད་བྱེད་མི་དགོས་པར་ལག་པ་བསྲིངས་རྐྱང་བྱས་ནས་ལེན་པ་ནི། དམ་པའི་ལྷ་ཆོས་དང་མཐུན་ཡང་དེང་གི་འཇིག་རྟེན་མི་ཆོས་དང་མི་མཐུན་གི
 

གང་ལྟར་གླེང་ན་གླེང་རྒྱུ་མང་ཡང་།  ངས་ཡོད་ཚད་གླེང་འདོད་མེད། འོན་ཀྱང་རང་ཉིད་ཀྱིས་དངོས་སུ་མཐོང་བ་འགའ་བཤད་འདོད་སྐྱེས། ཉིན་ཞིག་མཆོད་རྟེན་མདུན་ནས་སྨོན་ལམ་དངོས་གཞི་འཚོགས་དུས་ཤིག་ལ།  གྲྭ་བའི་ཆས་གོས་ཙམ་ཡང་གྱོན་མེད་པའི་མི་སྐྱ་ཞིག་གིས་སྐུ་འགྱེད་མཐོང་མ་ཐག་རས་དམར་པོ་གྱོན་ནས་སྐུ་འགྱེད་སྒོར་བརྒྱ་བླངས་པ་ནི་བདག་གཅིག་པུས་དངོས་སུ་མཐོང་བ་ཙམ་མིན་པར་ང་དང་ལྷན་དུ་ཡོད་པའི་སེར་བྱེས་གྲྭ་བ་འགས་མཐོང་ཡོད། ངས་དེ་མ་ཐག་པར་བླངས་ནས་ཁྱེར་ཡོང་ཡོད། གལ་སྲིད་དོགས་པ་ཟ་མཁན་རེ་ཡོད་ན་ཤོག་དང་བསྟན་ཆོག  གསུང་ཆོས་ཉིན་མཐའ་མའི་སྐབས་སུ་༧ གོང་ས་མཆོག་གིས་བོད་ནས་སླེབས་པའི་གསར་འབྱོར་བ་ཚོ་ལ་མཇལ་ཁ་གནང་གི་ཡིན་གསུངས་ནས་གསུང་ཆོས་ཉིན་གུང་ཆུ་ཚོད་གསུམ་པ་ཡས་མས་ཤིག་ལ་མཚམས་བཞག སྐབས་དེར་དགེ་འདུན་པའི་ཕྱེད་ཀ་མ་གཏོགས་སྐུ་འགྱེད་བརྒྱུད་ཚར་མེད། སྐུ་འགྱེད་སྒོར་ལྔ་བརྒྱ་རེ་ཡོད་ལ་སྐུ་འགྱེད་དེ་འཕྲོག་རྩོད་ཀྱིས་ལེན་མཁན་ཡང་བྱུང་ཡོད་པ་རེད། དེའི་ཉིན་སྐུ་འགྱེད་མ་རག་པའི་དགེ་འདུན་པ་རྣམ་དག་ག་ཚོད་ཅིག་ཡོད་རྒྱུ་རེད་ང་ཚོས་བསམ་བློ་བཏང་ན་ཤེས་ནུས། ཡང་དགེ་འདུན་པ་མིན་པའི་རས་དམར་སེར་གྱོན་མཁན་དག་གིས་ག་ཚོད་ཅིག་ལྷག་མ་བླངས་ཡོད་རྒྱུ་རེད་ང་ཚོས་བསམ་བློ་བཏང་ན་ཕལ་ཆེར་ཤེས་ནུས་པ་ཞིག་རེད། ད་དུང་སྦེལ་ཀོབ་གཞིས་གྲོང་གསུམ་པའི་མི་སྐྱ་སྐྲ་རིང་བོ་ཅན་ནམ་རྒྱུན་སེ་ར་དགོན་གྱི་ཟ་ཁང་དག་གི་སྒོ་འགྲམ་ན་ཨ་རག་འཐུང་ནས་བཟི་མཁན་དེ།  ད་ལོ་རྡོར་གདན་ནས་གཟན་ཤམ་གཙང་མ་ཞིག་གྱོན་ནས་སྐྲ་མ་བཞར་བར་སྔགས་པ་ཡིན་མདོག་གིས་འགྲོ་གིན་ཡོད་པ་ཕྲན་གྱིས་དངོས་སུ་རིག  རྗེས་སུ་གྲྭ་བ་འགས་མེ་འཁོར་ནང་ནས་ཁོ་མཐོང་སོང་ཟེར་ནས་ཕྲན་ལ་ལབ་བྱུང་།
    

ངའི་གྲོགས་པོ་ཞིག་གིས་ཕྲན་ལ་འདི་ལྟར་བཤད་སོང་།   བལ་ཡུལ་གྱི་ཕྲུ་གུ་སྐྱོ་བོ་གང་མང་ཞིག་གིས་ལུས་ལ་གྲྭ་ཆས་གྱོན་ཞིང་ཁོག་པ་ཁྱིམ་པ་མི་ནག་ལས་ཀྱང་སྡུག་པ་ཞིག་གིས་བསྡུས་ནས་གྲྭ་ཆས་རེ་བསྐོན་ནས་རྡོར་གདན་དུ་སླེབས་སོང་ཟེར།  འདི་ནི་ངས་གོ་ཐོས་ཙམ་ཡིན་ཡང་བདེན་ཤས་ཆེ་བར་སྙམ།  གནས་ཚུལ་འདི་ནི་བདེན་དཔང་ཡོད་པ་དང་ཕྲན་གྱིས་དངོས་སུ་རིག་པ་ཞིག་མིན།
       

མདོར་བསྡུས་ནས་བཤད་ན། སྨོན་ལམ་གོ་སྒྲིག་ཚོགས་ཆུང་གིས་ཚོགས་བསགས་ས་ནས་རྣག་བསགས་ཡོད་ཁོ་ཐག་ཡིན། དགེ་འདུན་པའི་སྡེ་ལ་བསྔོས་ཚར་བའི་སྐུ་འགྱེད་དེ་རྩ་བཞི་དང་འགལ་བ་ཞིག་གིས་བླངས་ན་རང་གཞན་གཉིས་ཀ་ཕུང་བའི་ལས་ཡིན་པ་ནི་སྐྱེས་ཆེན་དག་གིས་གསུངས་ཡོད་དེ། རང་ཅག་རྣམས་ཀྱི་དཔྲལ་བའི་མིག་དང་ཁོག་པའི་སྙིང་ལྟ་བུ་༧ གོང་ས་མཆོག་གིས་ཕྱི་ཆོས་པའི་གཟུགས་བརྙན་ཙམ་ལས། ནང་དུ་ལུང་རྟོགས་ཀྱི་ཡོན་ཏན་ཅི་ཡང་མེད་པར་ཁྱིམ་པ་སུན་འབྱིན་གྱི་རྩིང་སྤྱོད་ཁོ་ན་བྱས་ཏེ་ཤི་གསོན་དད་རྫས་སོགས་འགྱེད་ཕོགས་ལ་ལོངས་སྤྱོད་ཐུབ་ཙམ་ལས་མ་བྱུང་ན་རང་གཞན་གཉིས་ཕུང་སྦྱོར་གྱི་རྒྱུ་མ་གཏོགས་མེད། ཅེས་བཀའ་སློབ་ནན་མོ་གསུངས།   རྩ་བཞི་དང་ལྡན་པའི་གྲྭ་བ་ཞིག་ལ་འདི་ལྟར་གསུངས་ཡོད་ན་དེ་ལས་ལྡོག་པའི་རས་དམར་སེར་གྱོན་ནས་རྫུན་མ་འཁྲབ་མཁན་དག་ལ་ལྟ་ཅི་སྨོས།   རྗེ་གུང་ཐང་རིན་པོ་ཆེའི་བསླབ་བྱ་སྣ་ཚོགས་ལས།  ཟས་ཞིམ་མངར་འཛོམས་པའི་དཀོར་ནག་ལ།། འཛེམ་མེད་དུ་སྤྱོད་པའི་དྲེད་པོ་ཁྱོད།། ལོ་བྱེ་བ་འབུམ་ཕྲག་སྟོང་གི་བར།། ཟངས་ཞུན་གྱི་ཁུ་བ་འཐུང་ནུས་སམ།།  ཞེས་གསུངས། འདི་ཚོས་རང་གཞན་གཉིས་ཀར་གནོད་ཀྱིན་འདུག་ན། ང་ཚོས་འདིའི་ཕྱོགས་སུ་རྗེས་མ་ནས་དོ་སྣང་བྱེད་དགོས་པར་སྙམ། ད་དུང་གུང་ཐང་ཚང་གི་བསླབ་བྱ་སྐྱོན་ཡོན་གསལ་བའི་མེ་ལོང་ལས། བུ་ལོན་མེད་པ་ཞིག་འདོད་ན།། དད་གཤིན་དཀོར་རྫས་ལ་འཛེམ་དགོས།།  ཞེས་གསུངས་འདུག་ན། བུ་ལོན་འཇལ་མཁན་ལ་སྐབས་འདིར་མཚོན་ན། ཕུལ་མཁན་དང་ལེན་མཁན། བེད་སྤྱོད་གཏོང་མཁན་སོགས་འཇོག་དགོས་པ་རེད་སྙམ།  དེས་ན། དགེ་འདུན་པའི་སྡེ་ལ་ཕུལ་བའི་དཀོར་ཟས་འདི་ལྕགས་གོང་མེ་འབར་བ་ཞིག་དང་མཚུངས་པས། རང་ཅག་ལེན་མཁན་དང་ཕུལ་མཁན། དེ་བེད་སྤྱོད་གཏོང་བ་བོ་དག་གིས་ངེས་པར་གཟབ་དགོས་པའི་གནས་རེད། ངས་འདི་ལྟར་བྲིས་ན་ཕྲན་ལ་ཐོབ་བྱ་ཞིག་ཡོད་པ་མིན་མོད། འོན་ཀྱང་རྩོམ་རྙོག་འདི་འདྲ་ཞིག་སྤེལ་ན་ལོ་རྗེས་མ་ནས་སྨོན་ལམ་གོ་སྒྲིག་ཚོགས་ཆུང་དང་། ཡང་ན་གདན་སའི་ལས་ཀྱི་སྣེ་མོར་གཏོགས་པ་རྣམ་དཔྱོད་ལྡན་པ་ཞིག་གིས་གཟིགས་ན།  འདི་ལ་ཐུགས་བསམ་རེ་བཞེས་ནས་ཡར་རྒྱས་དང་ཚགས་ཚུད། རང་གཞན་གཉིས་ཀ་ལ་ཕན་པ་ལས་མི་གནོད་པ་ཞིག་བྱེད་རྒྱུའི་རེ་བ་ཙམ་ཡིན། དེ་མིན་འགའ་ཤས་ཀྱིས་རྩོམ་ཡིག་འདི་ཀློག་མ་ཤེས་ནས་དྲིན་ཆེན་ལ་དྲིན་ལོག། གཡང་ལ་ལ་རྡོ་ཁ་བྱས་འདུག་ཟེར་མཁན་ཡོད་སྲིད་པ་རེད།
          

འོན་ཀྱང་ངའི་ལྷག་བསམ་རྣམ་དག་གིས་སྐད་ཆ་ཚིག་གཅིག་བཤད་འདོད་པ་ནི། སྤྱིར་དགེ་འདུན་པའི་སྡེ་ལ་སྐུ་འགྱེད་མ་རྒྱག་ཟེར་བ་མིན་པར། འགྱེད་རྒྱག་སྐབས་གཟབ་དགོས་ཀྱིན་འདུག ད་དུང་སྨོན་ལམ་སྐབས་སུ་ངས་དགེ་ལུགས་པ་གཅིག་པུ་ལ་སྐུ་འགྱེད་སྤྲོད་དགོས་ཟེར་བ་མིན་པར། དགེ་འདུན་པ་དངོས་གནས་ཤིག་དང་གྲྭ་བ་གཙང་མ་ཞིག་གི་ཕྱག་ཏུ་འབུལ་རོགས་ཞེས་འབོད་སྐུལ་ཞུས་པ་ཡིན།  ནམ་རྒྱུན་༧གོང་ས་མཆོག་གི་གསུང་ཆོས་དང་སྨོན་ལམ་འཕར་མ་ལྟ་བུའི་སྐུ་འགྱེད་ཆེན་པོ་ཡོད་དུས་རྒྱ་གར་དང་བལ་ཡུལ། ལ་དྭགས་དང་འབྲས་ལྗོངས། ཕྱོགས་མཐའ་གང་ནས་ཕེབས་པའི་དགེ་འདུན་པ་ཞིག་ཡིན་ན། རང་ཁོངས་ཀྱི་དགོན་པ་ཞིག་གི་ཕྱག་ཁྱེར་རམ་ངོས་ལེན་ཚད་ལྡན་དགོས་པར་གཏན་ཁེལ་ན་དེའི་འགྲིག་གི་རེད་བསམ། གོང་གི་སྐད་ཆ་འདི་ནི་རྒྱལ་བའི་བསྟན་པ་དང་བསྟན་པའི་སྦྱིན་བདག་རྣམས་ལ་དམིགས་ནས་བྲིས་པ་ཞིག་ཡིན་པས་དགེ་རྩ་རྒྱ་ཆེན་པོ་ཡོད་པར་ཡིད་ཆེས་བྱས་ཡོད། དེའི་མཐུ་ལ་བརྟེན་ནས་རྒྱལ་བསྟན་ཕྱོགས་ཀུན་དུ་དར་ཞིང་འགྲོ་ཀུན་བདེ་སྐྱིད་ལྡན་པའི་རྒྱུ་རུ་འགྲོ་བར་སྨོན།