ཆོས་བརྒྱུད་སྤྱི་འཐུས་དགོས་པའི་གནས་ལུགས་བདེན་དར་མ། ཐུབ་བསྟན་རྒྱལ་མཚན་གྱིས།

བོད་གངས་ཅན་གྱི་ལྗོངས་འདི་བཞིན་ཆོས་ལྡན་གྱི་ཞིང་ཁམས་ཞིག་ཡིན་ལ་མི་མང་གི་ཆེད་དུ་བཙུགས་པའི་སྲིད་གཞུང་འདི་ཡང་ཆོས་སྲིད་ཟུང་འབྲེལ་གྱི་སྲིད་གཞུང་ཞིག་ཏུ་བཞུགས་ནས་ལོ་བརྒྱ་ཕྲག་དང་སྟོང་ཕྲག་བརྒལ་ཡོད་ནའང་བསྟན་དགྲ་རྒྱ་དམར་གྱིས་རྨང་ནས་བཅོམ་སྟེ་རྒྱལ་བ་དོན་གྱི་བདག་པོ་ཡང་ས་མཐར་འགྱར་དགོས་པའི་དུས་ངན་གྱི་གནས་སྟངས་ཤིག་བྱུང་བ་རེད། འོན་ཀྱང་ཕམ་ས་ནས་རྒྱལ་དགོས་པ་དང་འགྱེལ་ས་ནས་ལངས་དགོས་པའི་དོན་གནད་ཞིག་ཏུ་བརྩིས་ཏེ་༧གོང་ས་སྐྱབས་མགོན་ཆེན་པོ་མཆོག་ནས་འཕྲལ་ཕུག་རྒྱང་གསུམ་གྱི་གཟིགས་རྒྱང་རིང་པོ་ལ་གཟིགས་ནས་དྲུག་ཅུ་ཐམ་པ་ལོར་བོད་མི་མང་སྤྱི་འཐུས་ལྷན་ཚོགས་འདི་བཞིན་ཆ་རྐྱེན་དང་རྒྱས་སྤྲོས་ཡོད་མེད་ལ་མ་ལྟོས་པའི་ཆོལ་ཁ་ཆོས་བརྒྱུད་དང་བཅས་པའི་འཐུས་མིའི་ངོ་ཚབ་མཚོན་པའི་ལྷན་ཚོགས་ཤིག་བཙུགས་ཏེ་སྔར་བོད་དུ་ཡོད་པའི་སྐུ་དྲག་རིང་ལུགས་ཀྱི་སྲིད་གཞུང་དེ་བཞིན་རང་དབང་འདྲ་མཉམ་གྱི་ཐོག་ནས་རང་རང་གི་སྐུ་ཚབ་མཚོན་པའི་དབུ་ཁྲིད་དེ་དམངས་ནས་འདེམས་ཆོག་པའི་དམངས་གཙོའི་ཕྱོགས་སུ་བསྒྱུར་གནང་མཛད་ཡོད། ༧གོང་ས་སྐྱབས་མགོན་ཆེན་པོ་མཆོག་དང་བཅའ་ཁྲིམས་རིན་པོ་ཆེ་གཉིས་དབུ་བཞུགས་ཐོག་རྙིང་དོར་བཅུད་ལེན་གྱིས་གང་ཐད་ནས་རིམ་པ་བསྒྱུར་བཅོས་བཏང་ཡོད་ནའང་ཆོལ་ཁ་དང་ཆོས་བརྒྱུད་ཀྱི་འཐུས་མི་ཡོང་སྟངས་དེར་བསྒྱུར་བཅོས་རྩ་བ་ནས་བཏང་མེད། ལྷག་པར་དུ་ཆོས་བརྒྱུད་ཀྱི་འཐུས་མི་དགོས་མིན་སྐོར་བཅའ་ཁྲིམས་རིན་པོ་ཆེ་གཏན་ལ་ཕབ་དུས་མཁས་པ་དང་ཉམས་མྱོང་ཅན་མི་ཉུང་བས་བགྲོ་གླེང་ཤུགས་ཆེ་གནང་བ་མ་ཟད་རང་གཞུང་འདི་བཞིན་ཆོས་སྲིད་ཟུང་འབྲེལ་གྱི་གཞུང་ཞིག་ཡིན་པར་དང་༧གོང་ས་སྐྱབས་མགོན་ཆེན་པོའི་རླབས་ཆེན་དགོངས་གཞི་ཡིན་པ་བཅས་གཞིར་བཞག་ཐོག་ནས་ཆོས་བརྒྱུད་འཐུས་མི་དགོས་པའི་བཅའ་ཁྲིམས་གཏན་ལ་ཕབ་ཡོད་པ་མ་ཟད་ལག་ལེན་གྱི་ཐོག་ནས་ཀྱང་དེ་ལྟར་འགྲོ་གིན་ཡོད། འོན་ཀྱང་ཆགས་སྡང་དུག་ཆུས་མྱོས་པའི་བོན་རྒྱ་བསྟན་འཛིན་རབ་རྒྱས་ལྟ་བུ་ལོག་ལྟ་ཅན་གྱི་གང་ཟག་རྣམས་ཀྱིས་གོང་གི་དགོས་པ་དང་དགོངས་གཞི་སོགས་དྲན་ཡུལ་དུ་འཆར་བའི་དུས་གཏན་ནས་མི་སྲིད་པ་མ་ཟད་གྲོས་ཚོགས་རྭ་བའི་ནང་འཐུས་མི་ཞེ་གསུམ་གྱི་ནག་ཉེས་ཡོངས་རྫོགས་སེར་མོ་བ་དང་ཆོས་བརྒྱུད་ཀྱི་འཐུས་མི་ལ་གཡོག་ནས་ཆོས་བརྒྱུད་ཀྱི་སྤྱི་འཐུས་མི་དགོས་པའི་གནས་ལུགས་དམར་ཧྲེང་མ་ཞེས་པའི་ཆོས་བརྒྱུད་འཐུས་མི་དག་ལ་སྐྱོན་བརྗོད་ཀྱི་རྩོམ་ཡིག་དོན་ཚན་བདུན་ཅན་ཞིག་སྤེལ་ཡོད། དེས་ན་ཁོང་གིས་སྨྲ་བརྗོད་རང་དབང་ལོངས་སུ་སྤྱོད་པའི་ཁུལ་ཡིན་ནའང་གནས་ལུགས་དང་རྒྱུ་མཚན་གྱི་ཐོག་ནས་དོན་ཚན་བདུན་པོ་ལ་གནད་དུ་གནོན་པའི་ལན་ཞིག་འཕྲོད་མིན་ལ་མ་ལྟོས་པའི་གསལ་བཤད་ཅིག་བྱ་འདོད་སྐྱེས། མ་གཞི་འཁྱོག་བརྗོད་ཀྱི་བཀའ་མོལ་དང་བདེན་པར་རྒྱབ་ཀྱིས་ཕྱོགས་པའི་ཞེན་ཁོག་གཉིས་པོ་དེ་རང་ཉིད་ཀྱི་གཤིས་ལུགས་དང་འགལ་བ་ཡིན་པར་སོང་གང་ཟག་སུ་ཡིན་རུང་ཐུགས་ལ་མ་བབས་ཀྱང་དང་ལེན་གཏན་ནས་བྱེད་ཐབས་མེད་པའི་རང་གཤིས་ཤིག་ཡིན། ཁོང་གི་རྒྱུ་མཚན་དང་པོ། ཆོས་བརྒྱུད་སྤྱི་འཐུས་ཟེར་བ་འདི་ད་ལྟའི་བར་ཏུ་༼དུ༽་དྲང་བདེན་གྱི་ལམ་ནས་འདེམས་ཐུབ་མེད་ལ། མ་འོངས་པར་ཡང་འདེམས་མི་སྲིད། དེ་ནི་དཔེ་གཅིག་སྟེ་དགེ་ལུགས་པ་ལ་ཆ་བཞག་ནས་བལྟས་ན་གསལ་བོར་ཤེས་ཐུབ། འདས་མ་ད་གསུམ་གྱི་སྐབས་གང་ཡིན་ཡང་དགེ་ལུགས་སྤྱི་འཐུས་ཡིན་ན་བློ་གླིང་དང་སེར་བྱེས་གང་རུང་གི་གྲྭ་བ་ཞིག་ཡིན་པའི་ཁྱབ་བ་ཡོད། དེ་ནི་དགེ་ལུགས་སྤྱི་འཐུས་ཀྱི་ཤེས་ཚད་ཅན་གྲྭ་ཚང་དེ་གཉིས་མ་གཏོགས་གཞན་ལ་མེད་སོང་བ་མིན། དགེ་ལུགས་སྤྱི་འཐུས་ནི་འོས་ཤོག་གིས་བཟོ་དགོས་ལ་འོས་འདེམས་མཁན་གྱི་གྲྭ་བ་གྲྭ་ཚང་དེ་གཉིས་ལས་མང་ཅན་གྱི་དགོན་པ་ཞིག་དགེ་ལུགས་པ་ཚང་ལ་མེད་པའི་ཆ་ནས་ཡིན། དེ་བཞིན་རྙིང་མ་ལ་མཚོན་ནའང་གཅིག་རྣམ་གྲོལ་གླིང་གི་ཡིན་པས་ཁྱབ་ལ། ཕལ་ཆེར་བོན་པོ་ལའང་གཅིག་སྨན་རིའི་གླིང་གི་ཡིན་པས་ཁྱབ་པ་ཡོད། ལན། དམངས་གཙོའི་ལུང་པའི་ནང་འཐུས་མི་དེ་འོས་ཤོག་ལམ་ནས་བཟོ་དགོས་པ་དེ་དགེ་ལུགས་པ་གཅིག་པུ་མ་ཟད་ཆོས་བརྒྱུད་དང་ཆོལ་ཁ་ཡོངས་རྫོགས་གཅིག་མཚུངས་ཡིན། འོས་མང་ཉུང་གི་ལམ་ནས་འཐུས་མི་བསྐོས་པ་དེ་དྲང་པོ་མ་བྱུང་ན་བཙན་བྱོལ་ནང་དུ་ཆོལ་ཁ་གསུམ་གྱི་ནང་ནས་མི་འབོར་མང་ཤོས་དེ་དབུས་གཙང་ཆོལ་ཁ་རེད། དེས་ན་ལོ་རྗེས་མ་བཀའ་ཁྲི་གདམ་དུས་འོས་མང་ཤོས་འཕེན་མཁན་དེ་དབུས་གཙང་ཡིན་པ་ཟུར་ལྟས་ལེབ་མཐོང་རེད། དེར་ཁྱེད་ཀྱིས་དྲང་བདེན་མ་བྱུང་བཤད་ཕོད་དམ།  རྒྱུ་མཚན་གཉིས་པ། ཆོས་བརྒྱུད་སྤྱི་འཐུས་ནི་ཆོས་བརྒྱུད་དེའི་གྲུབ་མཐའ་ལ་མཁས་ཚད་རྒྱས་པ་དང་ལྷག་བསམ་གྱི་ཆ་ནས་འོས་འདེམས་བྱེད་ཀྱིན་མེད། ཁ་བདེ་བོ་དང་། སྣོག་བརྒྱབ་ནས་གྱོང་མི་རེག་པ་ཞིག མགོ་བདེ་བོ་དང་དྲན་རིག་རྒོད་པོ་ཅན་གྱི་མི་སྣ་ཞིག་བཙལ་གྱིན་ཡོད་པས་འདི་ལྟར་ཆོས་བརྒྱུད་སྤྱི་འཐུས་འདེམས་པས་ཆོས་བརྒྱུད་སྤྱི་འཐུས་ཚོས་ཆོས་བརྒྱུད་རང་གི་མཚན་སྙན་སྲུང་མ་ཐུབ་པ་རེད། ལན། ཆོས་བརྒྱུད་སྤྱི་འཐུས་དེ་ཤེས་ཡོན་དང་ལྷག་བསམ་གྱི་ཆ་ནས་འོས་འདེམས་མ་བྱེད་ནས་མགོ་བདེ་དྲན་རིག་རྒོད་པོ་དང་ཕོ་སུ་རྒོད་ཀྱི་ལམ་ཁ་ཞིག་སྤྱི་འཐུས་གྲོས་ཚོགས་ནང་འགྲོ་ས་ཡོད་ན་ཆོལ་ཁའི་འཐུས་མི་ཚོས་མི་སྨྲ་བའི་བརྟུལ་ཞུགས་བྱེད་དགོས་དོན་གང་ཡིན་ནམ། བཅའ་ཁྲིམས་དང་ཡོངས་སུ་འགལ་ནས་སྤྱི་སྐལ་སྒེར་སྤྱོད་བྱས་ནས་ཧམ་བཤད་རི་ཙམ་བྱས་ནས་འདུག་མཁན་རྣམས་ལ་ལྷག་བསམ་དང་ཤེས་ཡོན་ཅན་སུས་སྐྱོན་བརྗོད་བྱས་སོང་། འོ་ན་ཆོས་བརྒྱུད་འཐུས་མིར་ཤེས་ཡོན་མེད་པ་མགོ་བདེ་དྲན་རིག་རྒོད་པོ་ཡིན་ན་ཁྱེད་ཀྱིས་དགེ་ལུགས་སྤྱི་འཐུས་རྒན་བེ་རི་འཇིགས་མེད་ནི་ཀུན་གྱིས་ངོས་ལེན་ཚད་མཐོ་བྱེད་པའི་རྒན་རབས་ཤེས་ཡོན་པ་ཞིག་རེད། འདས་པའི་ལོ་རྒྱུས་ནང་བཙན་བྱོལ་རྩོམ་རིག་གི་གཞི་རྐང་འཛིན་མཁན་གྱི་མི་སྣ་ཞིག་ཡིན། ཞེས་གསུངས་པ་དེ་དང་དངོས་སུ་འགལ་བ་ལྟག་སྤྲོད་ཀྱི་བཀའ་མོལ་གནང་འདུག། རྒྱུ་མཚན་གསུམ་པ། ཆོས་བརྒྱུད་སྤྱི་འཐུས་ནི་བོད་བསྟན་སྲིད་གང་ལའང་མི་ཕན། ད་ལྟའི་བར་ཏུ་ཕྱིར་བལྟས་ཤིག་གནོངས་དང་། དགེ་ལུགས་སྤྱི་འཐུས་ཀྱིས་དགེ་ལུགས་པར་ཕན་མེད་ལ། རྙིང་མའི་སྤྱི་འཐུས་ཀྱིས་རྙིང་མ་བར་ཡང་ཕན་མེད། སྲིད་ཕྱོགས་ནས་དེ་ལས་ཀྱང་ཞུ་མ་དགོས་པ་ཞིག་རེད། ཆོས་སྲིད་གང་ལའང་མི་ཕན་བཞིན་དུ་ད་དུང་ཁྲི་ཐོག་ལ་བཙུགས་བཞག་ན་གླེན་རྟགས་ཤིག་མ་རེད་དམ།  ལན། ༧གོང་ས་སྐྱབས་མགོན་ཆེན་པོས་དུས་གསུམ་གསལ་གཟིགས་ཀྱིས་ཆོས་བརྒྱུད་སྤྱི་འཐུས་ས་མིག་ཟུར་བཅད་ཀྱི་བཅའ་ཁྲིམས་ནང་བཀོད་པ་དེ་ཆོས་སྲིད་གང་ལ་མི་ཕན་པ་ཤེས་བཞིན་དུ་ཁོང་གིས་གླེན་རྟགས་བྱེད་པ་ཞིག་ཡིན་ནམ། ཡང་ན་༧གོང་ས་ཆེན་པོས་ཁྱེད་ཚོས་ཡོང་ཁུངས་མ་འདྲ་ནས་ཡོང་ཡོད་ནའང་འདིར་སླེབས་ཚར་དུས་སྤྱི་མི་རྣལ་མ་ཞིག་བྱེད་དགོས་ཤིག་གདམས་པ་དེ་ཆོས་བརྒྱུད་སྤྱི་འཐུས་ཚོས་རང་གི་རྩ་བའི་བླ་མའི་བཀའ་ལ་དགོངས་དགོས་སམ།  རྒྱུ་མཚན་བཞི་བ། ཆོས་བརྒྱུད་སྤྱི་འཐུས་ཟེར་བ་འདི་མ་འོངས་པར་ཉེན་ཁ་ཞིག་ཆགས་ཡོད། ང་ཚོའི་འདས་པའི་ལོ་རྒྱུས་ནང་དུ་ཆོས་ལུགས་དང་གྲུབ་མཐའ་ཁ་ལ་ཁྱེར་ནས་སྲིད་དོན་གྱི་ལས་ཀ་བྱས་ཏེ་ནང་འཁྲུག་ལངས་པ་དང་། ཤི་རྨས་བྱུང་བ། སྲིད་དབང་ཤོར་བ་སོགས་ཀྱི་གནས་ཚུལ་མང་དུ་བྱུང་ཡོད་པ་བཞིན། ཕྱོགས་ཞེན་ཤ་སྟག་གིས་བཟོ་སྐྲུན་ལས་འོང་གིན་པའི་ཆོས་བརྒྱུད་སྤྱི་འཐུས་ཟེར་བ་འདི་ཡང་མ་འོངས་པར་ཉེན་ཁ་ཞིག་ཆགས་སྲིད་པ་རེད། ལན། ཁྱེད་རི་བོང་གནམ་་རྡིབ་ཀྱི་སེམས་ཁྲལ་དགོས་དོན་མེད། ང་ཚོ་འདས་པའི་ལོ་རྒྱུས་ཀྱི་ནང་དུ་ལྷག་པའི་རྙོག་དྲ་ཚང་མ་སྐུ་དྲག་དང་མི་དྲག་རེ་གཉིས་ཀྱིས་ཕུ་དཀྲུགས་མདའ་དཀྲུག་བྱས་པ་ལས་ཆོས་བརྒྱུད་ཀྱི་འཐུས་མིའི་མཚན་མེད་ནའང་ངོ་ཚབ་མཚོན་པའི་མི་སྣ་སུ་གང་གིས་བཟོ་མྱོང་མེད། རྒྱུ་མཚན་ལྔ་བ། དམངས་གཙོའི་སྲིད་གཞུང་སྐད་གྲགས་ཅན་དང་། ཚད་མཐོ་བོ་ཅན་ཨ་རི་དང་རྒྱ་གར་ལྟ་བུའི་ནང་དུའང་ཆོས་ལུགས་མི་འདྲ་བ་མང་པོ་ཡོད་ལ་ཆོས་དད་རང་དབང་ཡང་ཚད་ཧ་ཅང་མཐོ་མོད། ཆོས་བརྒྱུད་སྤྱི་འཐུས་དང་ཆོས་ལུགས་སྤྱི་འཐུས་ཟེར་བ་ཞིག་མེད།  ཡོད་ཚད་དེ་དག་ལ་བསྟུན་དགོས་མེད་ནའང་དགོས་པ་ལྷག་པོ་མེད་ས་ནས་དམིགས་བསལ་ཞིག་བྱས་པ་ལ་དགོས་པ་མེད། དེའི་ཕྱིར་ང་ཚོ་ལའང་ཆོས་བརྒྱུད་སྤྱི་འཐུས་ཟེར་བ་ཞིག་དགོས་དོན་མེད། གལ་སྲིད་དགོས་ན་དགོས་ཟེར་མཁན་གྱི་ཆོས་བརྒྱུད་ཡོད་ཚད་ལ་ཆ་སྙོམས་ཀྱིས་གོ་སྐབས་སྤྲད་དགོས་པ་ཞིག་རེད། ལན། ཡོད་ཚད་ལ་ལད་བཟློས་བྱེད་དགོས་མེད་ན་གོང་གི་རྒྱལ་ཁབ་གཉིས་པོ་ལ་དཔེར་ལྟ་དགོས་དོན་མེད་དགོས་ན་ཨ་རྒྱ་གཉིས་ལ་གྲོས་ཚོགས་གོང་འོག་དང་ཕྱི་སྲིད་དང་ནང་སྲིད་སོགས་རྣམ་གྲངས་ཧ་ཅང་མང་བས་དེ་ཚོ་ཁྱེད་ཀྱིས་ཁ་སྐོང་ཐུབ་བམ། ད་དུང་ཁྱེད་ཀྱིས་དོན་ཚན་བདུན་གྱི་ཐོག་ནས་ཆོས་བརྒྱུད་འཐུས་མི་འགོག་བཞིན་པའི་ཁར་ཆོས་བརྒྱུད་ཀྱི་སྤྱི་འཐུས་དགོས་ཟེར་མཁན་ཚང་མ་ལ་སྤྲད་དགོས་ཤིག་རང་ཚིག་སྔ་ཕྱི་འགལ་བ་སོང་མི་འདུག་གམ། རྒྱུ་མཚན་དྲུག་པ། ཆོས་ལུགས་པ་ལ་ལས་དེ་ནི་ཐོབ་ཐང་ཞིག་ལ་ངོས་འཛིན་གྱིན་འདུག་ལ། མི་སྐྱ་ཁ་ཤས་ཀྱིས་ཀྱང་ཆོས་ལུགས་པ་ཚོར་འོས་ཤོག་གཉིས་ཡོད་པ་རེད་ཅེས་དེ་ནི་ཆོས་ལུགས་པས་དབང་ཡོད་ཆེན་པོ་ཞིག་བྱས་པ་དང་། དེ་ལ་བརྟེན་ནས་ཆོས་ལུགས་པས་ཁེ་བཟང་ཆེན་པོ་ཞིག་ཟ་བཞིན་ཡོད་པའི་ལྟ་ཚུལ་ཞེ་ཐག་པ་ནས་ཡོད། ཡིན་ནའང་། དེ་ནི་ཐོབ་ཐང་ཞིག་མིན་ལ་དེ་ལ་བརྟེན་ནས་ཆོས་ལུགས་པར་ཕན་པ་ལྟ་ཞོག ཆོས་བརྒྱུད་སྤྱི་འཐུས་སུ་འོས་ཐོན་པ་དག་ལའང་དཀའ་ངལ་མང་པོ་ཞིག་འཕྲད་བཞིན་ཡོད། དཔེར་ན། རྒན་བེ་རི་འཇིགས་མེད་ནི་ཀུན་གྱིས་ངོས་ལེན་ཚད་མཐོ་བྱེད་པའི་རྒན་རབས་ཤེས་ཡོན་པ་ཞིག་རེད། འདས་པའི་ལོ་རྒྱུས་ནང་བཙན་བྱོལ་རྩོམ་རིག་གི་གཞི་རྐང་འཛིན་མཁན་གྱི་མི་སྣ་ཞིག་ཡིན། ཡིན་ནའང་དེའི་རྐྱེན་བྱས་ནས་དྲ་ཐོག་ནས་ཁ་རྡུང་ཚད་མེད་པ་ཞིག་རེག་ཡོད། ཁོང་ལ་གནོད་ཀྱིན་ཡོད་མེད་མི་ཤེས་མོད། ངས་བལྟས་ན་ཆོས་བརྒྱུད་སྤྱི་འཐུས་ཟེར་བ་ནི་བདག་ཕུང་གཞན་ཕུང་ཞིག་རེད། ལན། ཆོས་བརྒྱུད་པ་སུ་ཞིག་གིས་དེར་ཁེ་བཟང་དང་ཐོབ་ཐང་གཉིས་ཀ་ལ་ངོས་འཛིན་ཞུས་ཀྱི་མེད་དེ་ནི་སེར་མོ་བ་ཚོའི་བདེ་སྡུག་དེ་རང་གི་སྲིད་ཞུང་ལ་ཞུ་མཁན་གྱི་བང་ཆེན་ལྟ་བུ་ཞིག་དང་རེ་དོགས་བྲལ་ཏེ་མཐོ་དམན་ཀུན་གྱི་བདེ་སྡུག་ལ་གཟིགས་དཔྱད་གནང་མཁན་ཞིག་ལ་ངོས་འཛིན་དང་དམིགས་ཡུལ་གཉིས་ཀ་དེ་ཡིན། ཆོས་བརྒྱུད་འཐུས་མིས་མི་རིགས་ཀྱི་རྩ་དོན་གྱི་ཆེད་དུ་རང་ཉིད་ཕུང་པ་དང་ཁ་རྡུང་རེག་པ་ལ་ཡ་མཚན་དགོས་ཡ་གང་ཡང་མེད་པས་སྔོན་བྱང་ཆུབ་སེམས་དཔལ་རྣམས་ཀྱི་རྟོགས་བརྗོད་ལ་གཟིགས་ན་ཤེས་ཐུབ། ད་དུང་ཁྱེད་ཀྱིས་མི་མང་ནང་ཁུལ་དུ་དཀྲོག་གཏམ་སྤེལ་བྱེད་ཀྱི་གསལ་ཁ་གང་ཡང་མེད་པའི་སྐད་ཆ་རིགས་ལ་གནས་སྐབས་དགག་དགོས་མ་མཐོང་བས་རེ་ཞིག་གཏམ་སྙོམས་སུ་འཇོག་རྒྱུ་ཡིན། རྒྱུ་མཚན་བདུན་པ། ང་ཚོའི་ཆོས་བརྒྱུད་སྤྱི་འཐུས་ནང་ན་ཆོས་བརྒྱུད་རང་གི་ལྟ་གྲུབ་ལ་བྱང་ཆ་ཆེ་བ་ཕར་ཞོག ཆོས་བརྒྱུད་རང་གི་བསླབ་ཁྲིམས་ཡང་གཙང་ཉར་གནང་མེད་པའི་མི་སྐྱ་རྒད་པོ་ཁ་ཤས་ཐོན་ཡོད། འདི་ནི་ཡ་མཚན་ལ་བསམ་བཞིན་སྲིད་དོན་གྱི་དགོས་དབང་ཞིག་གིས་རྩེད་མོ་རྩེས་ཀྱིན་པ་གསལ་བོར་ཤེས་ཐུབ། ལན། ཆོས་བརྒྱུད་རང་གི་འཐུས་མི་ཡིན་ན་སེར་མོ་བ་ཞིག་དགོས་པའི་ཁྱབ་པ་མེད་ལ་བཅའ་ཁྲིམས་ནང་དུའང་གསལ་མེད། སེར་མོ་བ་རྣམས་ཀྱི་བདེ་སྡུག་དང་བོད་བསྟན་སྲིད་མི་རིགས་དང་བཅས་པ་ལ་ཤ་ཞེན་ཡོད་པ་༧གོང་ས་སྐྱབས་མགོན་ཆེན་པོའི་ཅི་སྲུང་བཀའ་བསྒྲུབ་ཞུ་མཁན་གང་ཟག་གི་ངོ་གདོང་ལ་མ་ལྟས་པར་བཅའ་ཁྲིམས་གྱི་འབྲུ་དོན་གཙོ་བཟུང་གནང་སྟེ་གནས་ལུགས་དང་རྒྱུ་མཚན་ལ་གཞི་བཅོལ་ཏེ་གང་ཡིན་ནའང་བཤད་ཕོད་པ་དང་ལས་ཕོད་པའི་གང་ཟག་ཞིག་བྱུང་ན་དེ་ནི་ཆོས་བརྒྱུད་ཁག་གི་འཐུས་མི་ངོ་མ་དེ་ཡིན། མདོར་ན་ངས་འདི་ན་བཤད་པའི་སྐད་ཆ་ཚང་མ་དངོས་སུ་བོན་རྒྱལ་བསྟན་རབ་ལ་ཕོག་སྲིད་ནའང་དེའི་རྒྱུད་ནས་འདི་དྲའི་རིགས་ཅན་ལོག་རྟོག་རྒྱུན་ལྡན་གྱི་གང་ཟག་རྣམས་ལ་ཕོག་ངེས་ཡིན། འོན་ཀྱང་རང་ངོས་ནས་དགའ་་སྡུག་གི་ཚོར་བ་ཇི་ལྟར་སྐྱེས་རུང་གཏམ་སྙོམས་སུ་འཇོག་རྒྱུ་བརྩིིས་ཡོད། མ་དགོན་ནས། ཐུབ་བསྟནརྒྱལ་མཚན་གྱིས།