༧གོང་ས་ཏཱ་ལའི་བླ་མ་དགུང་གྲངས་བཞི་ཙམ་ནས་རང་གི་འཁྲུངས་ཡུལ་དང་ཞལ་གྱེས་ཏེ་ཆེས་དཀའ་ལ་རིང་བའི་འགྲུལ་བཞུད་ཅིག་གིས་ལྷ་སར་ཕེབས་ཡོད་ཅིང་། ཁོང་ཉིད་དགུང་ལོ་བཅུ་དྲུག་ཐོག་རྒྱལ་སྲིད་ཆོས་སྲིད་བཞེས་པ་ནས་བཟུང་རྒྱལ་ཁབ་དང་མི་རིགས་ཀྱི་དོན་དུ་འགྲུལ་བཞུད་བྱེད་པའི་འགོ་འཛུགས་གནང་དགོས་བྱུང་ཡོད།
དུས་དེ་ནས་ད་ལྟའི་བར་ཁོང་གིས་འགྲུལ་བཞུད་ཀྱི་མཚམས་བཞག་མེད་ཅིང། ཁོང་ནི་ཧ་ལམ་འཛམ་གླིང་འདིའི་སྟེང་གི་འགྲུལ་བཞུད་ཆེས་མང་ཤོས་ཀྱི་མི་སྣ་དེ་ཡང་ཡིན་སྲིད། མ་གཞི་ཁོང་ཉིད་བྱིས་པའི་དུས་སྐབས་ནས་ཐག་རིང་པོར་འགྲུལ་བཞུད་བྱེད་པའི་རྣམ་པ་ཅན་གྱི་རྩེད་མོ་རྩེ་བའམ་ཚུགས་ཀ་སྟོན་པ་དེ་ལྷན་སྐྱེས་སུ་ཡོད་ཚུལ་ཁོང་གི་རང་རྣམ་ནང་བྲིས་ཡོད།
ལོ་རབས་ལྔ་བཅུ་བའི་ནང་༧གོང་ས་མཆོག་ཐོག་མར་རྒྱ་ནག་དང་ཕྱིས་སུ་རྒྱ་གར་དུ་ཕེབས་ཤིང་། ཆེས་ཐོག་མའི་འགྲུལ་བཞུད་དེ་དག་གི་སྐབས་ནས་བཟུང་ཁོང་གིས་ཐུགས་སེམས་ཀྱི་དབུས་སུ་བཅངས་ཡོད་པ་དེ་ནི་རང་གི་ལུང་པའི་མ་འོངས་པའི་གནས་སྟངས་དང་། ཕྱི་ཡུལ་གྱི་གནས་སྟངས་ཤེས་འདོད་ཀྱི་ཁོང་གི་ལྷན་སྐྱེས་རང་བཞིན་གྱི་འདུན་པ་དེ་གཉིས་ཡིན་ལ། ཁོང་གིས་རང་ཡུལ་གྱི་རང་དབང་རྩོད་ལེན་དང་། ཤེས་ཡོན་གྱི་འཚོལ་སྙེག་དེ་གཉིས་འགྲུལ་བཞུད་ལས་གྲུབ་པའི་འགྲུལ་བཞུད་ཅིག་གི་ནང་དུ་བྱེད་པའི་ཐོག་མའི་འགོ་འཛུགས་ཀྱང་ཡིན།
ཕྱི་ལོ་ ༡༩༥༩ ལོར་ཁོང་ཉིད་རང་ཡུལ་དང་བཙན་དབང་གིས་ཞལ་གྱེས་དགོས་བྱུང་ཞིང་། སྐབས་དེའི་ཁོང་གི་འགྲུལ་བཞུད་ཀྱི་ངོ་བོ་དང་གནས་སྟངས་ནི་ཧ་ཅང་འཇིགས་སྣང་དང་སྐྱོ་སྣང་གིས་ཁེངས་པ་ཞིག་ཡིན་མོད། ཕྱིས་སུ་བྱུང་བའི་ཁོང་གི་འགྲུལ་བཞུད་དང་དེ་དག་གི་དོན་སྙིང་དང་གཟི་བརྗིད་ཀྱི་ངོས་ནས་བཤད་ན། འགྲུལ་བཞུད་དེ་ཡང་གཟི་བརྗིད་ཀྱི་བྱུང་བ་ཞིག་ཅི་ལ་མིན།
ལོ་རབས་དྲུག་ཅུ་བའི་ནང། ༡༩༥༩ ནས་ ༡༩༦༩ བར་ཁོང་ཉིད་གཙོ་ཆེ་བ་རྒྱ་གར་ནང་ལོགས་སུ་འགྲུལ་བཞུད་བྱས་ཤིང། སྐྱབས་བཅོལ་བོད་མིའི་ཐོག་མིའི་མུན་ནག་གི་དུས་སྐབས་དེ་མཇུག་བསྒྲིལ་ཆེད་ཁོང་ཉིད་བོད་མི་སྐྱབས་བཅོལ་བར་ལམ་སྟོན་དང་སེམས་གསོའི་ཆེད་དུ་འགྲུལ་བཞུད་གནང་ཡོད་ལ། དེ་དང་ཆབས་གཅིག་ལོ་རབས་དྲུག་ཅུ་བའི་སྨད་ནས་བཟུང་ཉི་ཧོང་དང་ཐེ་ལན་དུ་འགྲུལ་བཞུད་གནང་འགོ་ཚུགས་ཡོད། འདི་ནི་རྒྱ་གར་དུ་སྐྱབས་བཅོལ་ལ་འབྱོར་ནས་ཕྱི་ཡུལ་དུ་ཕེབས་པ་ཆེས་ཐོག་མ་དེ་རེད།
དེ་བཞིན་དུ་ལོ་རབས་བདུན་ཅུ་བའི་ནང། ༡༩༦༩ ནས་ ༡༩༧༩ བར། སུད་སིར་ཐེངས་ལྔ་་དང། དེ་བཞིན་དུ་ནུབ་འཇར་མན། ཨོ་སུ་ཊི་རི་ཡ། ནོར་ཝེ། ཌན་མག ཨེར་ལན་ཌི། སྦེལ་འཇམ། ནུས་ཐེར་ལན་ཌི། ཨེ་ཋ་ལེ། གྷི་རིའི་སི། མོ་སུ་ཀོ་སོགས་ཁྱོན་རྒྱལ་ཁབ་བཅུ་གཉིས་ཙམ་གྱི་ནང་ཐེངས་བཅུ་དྲུག་ཙམ་ཕེབས་འདུག དུས་སྐབས་འདི་ནས་ཁོང་ཉིད་གླིང་ཆེན་ཨེ་ཤ་ཡ་དང་ནུབ་ཕྱོགས་ཡུ་རོབ་རྒྱལ་ཁབ་ཁག་ཏུ་ཆིབས་བསྒྱུར་བསྐྱངས་འགོ་ཚུགས་ཡོད།
ལོ་རབས་བརྒྱད་ཅུ་བའི་ནང། ༡༩༨༠ ནས་ ༡༩༨༩ བར་རྒྱལ་ཁབ་ཉེར་ལྔ་ཙམ་གྱི་ནང་ཐེངས་ལྔ་བཅུ་ང་གཉིས་ཙམ་ཕེབས་ཡོད། དེ་ནང་ནས་མང་ཤོས་ཨ་རི་ལ་ཐེངས་བདུན་དང། འཇར་མན་ལ་ཐེངས་བརྒྱད། ཧྥི་རན་སི་དང་སུད་སི་ལ་གཉིས་ལ་ཐེངས་ལྔ་རེར་ཕེབས་འདུག་ཅིང་། ནོར་ཝེ་དང་ཨོ་སི་ཊི་རི་ཡ་གཉིས་ལ་ཐེངས་གཉིས་རེ་བཅས། རྒྱལ་ཁབ་དེ་དག་གི་ཁོངས་སུ་ཤར་ནུབ་རྒྱལ་ཁབ་མང་པོ་ཡོད་ཅིང་། དུས་སྐབས་འདི་ནས་ཨེ་ཤ་ཡ་དང་ཡུ་རོབ་ཙམ་མ་ཡིན་པར་གླིང་ཆེན་ཨ་མེ་རི་ཁའི་ཁོངས་གཏོགས་ཨ་རི་དང་ཁེ་ན་ཌ་སོགས་སུ་ཆིབས་བསྒྱུར་བསྐྱངས་འགོ་ཚུགས་ཡོད།
ལོ་རབས་དགུ་བཅུ་བའི་ནང། ༡༩༩༠ ནས་ ༡༩༩ བར། ཁྱོན་རྒྱལ་ཁབ་བཞི་བཅུ་ཞེ་ལྔ་ཙམ་གྱི་ནང་ཐེངས་བརྒྱ་དང་བཞི་བཅུ་ཙམ་ཕེབས་འདུག དེ་དག་ལས་མང་ཤོས་ཨ་རི་ལྟ་བུ་ལ་ཐེངས་བཅུ་དྲུག་དང། འཇར་མན་ལ་བཅུ་བཞི། ཧྤ་རན་སི་ལ་བཅུ་བཞི། སི་བེ་སི་ལན་ཌི་ལ་ཐེངས་བཅུ། ཨེས་ཊ་ལེ་ལ་ཐེངས་བདུན་ཙམ་རེད། དུས་སྐབས་འདི་ནས་བཟུང་ཨེ་ཤ་ཡ་དང་། ཡུ་རོབ་ ཨ་རི་སོགས་ལས་གཞན་ལྷོ་ཨ་ཧྤི་རི་ཀའི་གླིང་ཆེན་གྱི་ནང་དུ་ཆིབ་བསྒྱུར་གནང་འགོ་ཚུགས་ཡོད།
སྟོང་ལོ་གསར་པ་སྟེ། ཕྱི་ལོ་ ༢༠༠༠ ལོ་ནས་ ༢༠༠༩ བར་རྒྱལ་ཁབ་རིགས་མི་འདྲ་བ་བཞི་བཅུ་ཞེ་གཉིས་ཙམ་གྱི་ནང་ཐེངས་བརྒྱ་དང་སུམ་ཅུ་ཙམ་ཕེབས་འདུག་ཅིང་། དེ་དག་ལས་མང་ཤོས་ཉི་ཧོང་ལ་ཐེངས་ཉི་ཤུ་དང། འཇར་མན་ལ་བཅུ་གསུམ། ཨ་རི་ལ་བཅུ་གཅིག། ཨེ་ཊ་ལེ་ལ་བཅུ་ཙམ་ཡིན་ཞིང། གཞན་རྒྱལ་ཁབ་དེ་དག་གི་ས་ཁུལ་ནི་ཧ་ཅང་མང་པོར་ཕེབས་ཡོད་པ་རེད།
འདི་ལྟར་དུས་རབས་སྔ་ཕྱི་གཉིས་ཀྱི་སྦྲེལ་མཚམས་ནས་༧གོང་ས་ཏཱ་ལའི་བླ་མ་རྒྱལ་ཁབ་མི་འདྲ་བ་བརྒྱ་ལྷག་གི་ནང་ཕེབས་ཐེངས་ཉིས་བརྒྱ་བཞི་བཅུ་བརྒལ་བར་ཕེབས་ཡོད་ཅིང་། རྒྱ་གར་ནང་ལོགས་ཀྱི་འགྲུལ་བཞུད་ནི་ཆ་སྙོམས་བྱས་ན་ལོ་རེར་རྒྱ་གར་རྒྱལ་ཡོངས་ལ་སྐོར་སྐྱོད་ཐེངས་རེ་གནང་ཡོད་ཅེས་བཤད་ཆོག་པ་ལྟ་བུ་རེད།
འོ་རེད་་་་་་ཁོང་གི་སྐུ་ཚེ་ནི་འགྲུལ་བཞུད་ཙམ་མ་ཡིན་ཞིང་འགྲུལ་བཞུད་འདི་དག་ཀྱང་འགྲུལ་བཞུད་ཙམ་ག་ལ་ཡིན། འགྲུལ་བཞུད་འདི་དག་གི་ཁྲོད་ནས་ཁོང་གིས་ཤེས་ཡོན་དང་ཉམས་མྱོང་གི་མཐོང་རྒྱ་བསྐྱེད་ཅིང་། འགྲུལ་བཞུད་འདི་དག་ལས་ཁོང་གིས་འཛམ་གླིང་མི་མང་ལ་ཤེས་ཡོན་དང་ཉམས་མྱོང་གི་མཐོང་རྒྱ་བསྐྱེད་དུ་བཅུག་ཡོད། དེ་བས་ཁོང་གི་འགྲུལ་བཞུད་དེ་འཛམ་གླིང་གི་གཡོ་འགུལ་ཞིག་ཡིན།
ལོ་རྒྱུས་ཐོག་གི་དེ་རིང་གི་ཉིན་མོ་སྟེ། གསུམ་བཅུའི་དུས་དྲན་གྱི་སྔ་ནུབ་ཏུ་ཕྲན་གྱིས་ཁོང་གི་ཞབས་རྗེས་ཀྱི་ཆ་ཤས་ཙམ་ཞིག་གླེང་ན་འདོད་མོད། ཁོང་གིས་ཞབས་རྗེས་ཀྱིས་འཛམ་གླིང་ཧྲིལ་པོར་ཁེབས་ཡོད་པས། ངས་གང་ཞིག་ནས་འགོ་འཛུགས་བྱེད་དགོས་པ་ཡང་མ་ཤེས་མོད། གང་ལྟར་ཁོང་གི་གྲུལ་བཞུད་ཀྱི་གྲངས་ཐོ་ཙམ་གླེང་བ་ཡིན།
མ་འོངས་པའི་དུས་རབས་ནང་མི་རྣམས་ཀྱིས་ཅི་ཞིག་གླེང་རྒྱུ་ཡིན་ནམ། བོད་པ་ཚོས་ཅི་ཞིག་གླེང་རྒྱུ་ཡིན་ནམ། སྲོང་བཙན་སྒམ་པོའི་མཛད་རྗེས་ནི་ལོ་སྟོང་གི་སྔོན་གྱི་ལོ་རྒྱུས་རེད། གེ་སར་རྒྱལ་པོ་ནི་རྟོག་བཏགས་དང་ལྷ་སྒྲུང་འདྲེས་པའི་སྙན་ངག་རེད། འོ་ན་༧གོང་ས་ཏཱ་ལའི་བླ་མ་ནི་ག་རེ་རེད་དམ། ནུབ་ཕྱོགས་པའི་ཁྲོད་ཏཱ་ལའི་བླ་མས་ནུབ་ཕྱོགས་སྤྱི་ཚོགས་ལ་ཁུ་སིམ་པའི་གསར་བརྗེ་silent revolution ཞིག་བྱས་པར་ངོས་འཛིན་མཁན་ཡོད་ཅིང་། དུས་རབས་ཉི་ཤུ་བའི་ནང་གི་ནུབ་ཕྱོགས་སྤྱི་ཚོགས་ཀྱི་བསམ་བློའི་འགྱུར་ལྡོག་དང་༧གོང་ས་ཏཱ་ལའི་བླ་མའི་འགྲུལ་བཞུད་འདི་དག་དང་འབྲེལ་བ་ཡོད་མཁན་འདོད་མཁན་གྱི་ཆེད་མཁས་པའང་ཡོད།
འོན་ཀྱང་་་་་་བོད་པས་་་་་་ལྷ་སྲུང་བསྟེན་ཕྱོགས་ཀྱི་བཀའ་སློབ་ཙམ་ལ་གཙོར་འདོན་བྱས། ཧ་ལམ་བཙན་བྱོལ་སྤྱི་ཚོགས་ཁྲོད་གནད་དོན་གཅིག་གི་ཐོག་རྩོད་གླེང་དང་། དེབ་གཞི་པར་འགྲེམས་ཀྱི་གྲངས་ཚད་མཐོ་ཤོས་སུ་བསྐྱལ། འདི་ནི་ང་ཚོས་ཁོང་གི་དགོངས་དོན་ལ་གཙུགས་ཆེན་བྱེད་སྟངས་ཤིག་དང་། ང་ཚོས་མངོན་སུམ་སྤྱི་ཚོགས་ལ་ཁ་གཏོད་ཚུལ་གྱི་ཟུར་ཞིག་ལོས་ཡིན།
མ་རེད་་་་མ་རེད་་་་་བོད་ནང་གི་བོད་མི་ཚོས་ཁོང་གི་དགོངས་དོན་བསྒྲུབ་ཕྱོགས་ཀྱི་སྙིང་སྟོབས་དང་། ཁོང་གི་དགོངས་དོན་ཤེས་འདོད་ཀྱི་འདུན་པ་དེ་བསམ་ཡུལ་ལས་འདས་པ་རེད། དེ་ལྟར་མིན་ན་་་་་ཁོང་གི་བཀའ་སློབ་གཅིག་གིས་ལོ་ངོ་སྟོང་ཕྲག་གི་ལོ་རྒྱུས་དང་སྤྱི་ཚོགས་ཀྱི་གོམས་ཕྱོགས་དང་འབྲེལ་བའི་དགའ་ཞེན་མང་པོ་ཞིག་གློ་བུར་ཏུ་བསྐྱུར་འཇོག་བྱེད་མི་སྲིད་ལ། རང་གི་རྒྱུ་ནོར་དང་མཛེས་རྒྱན་དུ་རློམ་པའི་དངོས་པོ་དག་རྩྭ་བཞིན་ག་ལ་སྲེག ད་དུང་མེ་མདའ་དང་དམག་དཔུང་གི་གདོང་དུ་ལངས་ནས་ ་་་་་ཁོང་ཉིད་བོད་དུ་གདན་ཞུ་བྱེད་དགོས་པའི་འབོད་ཚིག་ག་ལ་སྒྲོགས།
དེའི་ཕྱིར་ཁོང་གི་འགྲུལ་བཞུད་ཀྱི་ཁ་ཕྱོགས་རང་ཡུལ་དུ་ཕྱོགས་ཐུབ་དང་། ཁོང་ཉིད་རང་ཡུལ་གྱི་ས་ཕྱོགས་གང་སར་སྐོར་སྐྱོད་བྱེད་ཐུབ་པ་དེ་ཁོང་གི་ཐུགས་རེ་ཞིག་ཡིན་ལ། བོད་མི་མང་གི་རེ་བ་ཞིག་ཡིན། དེ་བས་བོད་ནང་༧གོང་ས་ཏཱ་ལའི་བླ་མའི་འགྲུལ་བཞུད་བྱེད་པའི་ཉིན་མོ་ནི་ང་ཚོའི་བདེ་སྐྱིད་ཀྱི་ཉིན་མོ་གཅིག་པུ་ཡིན། མདོར་བསྡུས་ན་༧གོང་ས་སྐྱབས་མགོན་ཏཱ ་ལའི་བླ་མའི་འགྲུལ་བཞུད་ནི་ང་ཚོའི་སྟོབས་ཤུགས་ཡིན། སྤོབས་པ་ཡིན། རེ་བ་ཡིན། བདེ་སྐྱིད་ཡིན། འདི་ནི་བདག་གི་གསུམ་བཅུའི་དུས་དྲན་གྱི་སྐད་འབོད་ཡིན།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཁྱེད་རང་གི་རྩོམ་འདི་ཡག་པོ་འདུག་པས་རྒྱ་ཡིག་ཏུ་བསྒྱུར་ཏེ་གསུམ་བཅུའི་ཉིན་མོ་དེ་རང་ལ་པོ་ཞུན་དྲ་ཚིགས་ལ་བསྐུར་བ་ཡིན། ཟླ་༣ཚེས་༡༤ཉིན་གཞི་ནས་བཀོད་འདུག ཁྱེད་རང་གིས་གཅིག་གཟིགས་ཙམ་གནང་དང་།http://news.boxun.com/news/gb/intl/2010/03/201003140008.shtml
ཨ་འབྲུག་ཅེས་པའི་མིང་འདི་གོ་མ་ཐག་ནས་གཏིང་ཟབ་ཅིང་རྒྱ་ཆེ་བའི་བརྗོད་གཞི་ཞིག་འཁུར་ཡོང་ཡོད་པ་གཏན་འཁེལ་བ་ཞིག་ལ་ངོས་འཛིན་ཡོད་པ་ནང་བཞིན་དེ་རིང་ཡང་འདི་འདྲའི་དོན་སྙིང་ལྡན་པའི་བརྗོད་གཞི་ཞིག་གི་ཐོག་ལ་བསམ་ཞིབ་བ་ྱས་ཡོད་པ་དངོས་གནས་དགའ་འོས་པ་ཞིག་རེད།
ངོས་འཛིན་དང་བསྐྱར་ཞིབ་ནི། མ་འོངས་པའི་མདུན་ལམ་ཡིན་ཞིང་ད་ལྟའི་གནས་བབ་ཀྱི་སྒུལ་ཤུགས་ཀྱང་ཡིན་སྲིད། དེས་ན། ཨ་འབྲུག་དཀོན་མཆོག་ལགས་ཀྱིས་གནད་ལ་འཁེལ་ཞིང་དོན་ལ་གནས་པ། ངོས་འཛིན་ཟབ་ཅིང་དཔྱད་གཞིགས་ཀྱི་རིན་ཐང་ལྡན་པའི་ཆེད་རྩོམ་ཞིག་བྲིས་གནང་ཡོད་པར་ཡི་རངས་ཡོད།
ངོས་ལེན་ཡོད་ན་མེད་ན་བསམ་ཚུལ་དེ་ཡིན།
མུ་ཏིག་ཆུང་ཆུང་གི དགོངས་ཚུལ་དེ་ཡང་མུ་ཏིག་ཆུང་ཆུང་ལྟ་བུ་ཞིག་རེད། བདེན་པ་རེད། ཁྱེད་ཀྱི་གསལ་བཤད་གནང་བ་དེ་ཡང་ཕྱོགས་གཅིག་ནས་བདེན་པ་རེད། འོན་ཀྱང་ཁྱེད་ཀྱིས་ཞིབ་གཟིགས་ཤིག་གནོངས་དང། བོད་གཞུང་དྲ་ཚིགས་ནང་གི་ཤེས་བྱ་དུས་དེབ་མང་པོ་ཞིག་ཁ་ཕྱེ་མི་ཐུབ་ལ། འགའ་ཞིག་ལ་བོད་ཡིག་མི་འཆར། འགའ་ཞིག་ལ་ཆད་ལྷག་སོང་ཡོད། འོན་ཀྱང་ངས་འདི་དག་སྐྱོན་བརྗོད་ཀྱི་ཆེད་དུ་གཏན་ནས་བྲིས་མེད། ལེགས་བཅོས་ཤིག་ཡོང་བར་རེ་འདུན་ཞུས་པ་ཙམ་ཡིན། དེ་མིན་འབྲེལ་ཡོད་ལས་ཁུངས་སུ་བཅར་ཀྱང་འགྲིག་མོད། བྱེད་ཐབས་དེས་ང་ལ་སྣ་བསུན་བཟོས་ཚར་བས་ངས་ཟིན་བྲིསཤིག་སྤེལ་བ་ལགས།
གཞན་ཁྱེད་ཀྱིས་ཁ་ཕྱིར་འཁོར་ནས་ངའི་རྩོམ་བྱང་ལ་སྐྱོན་བརྗོད་ཅིག་གནང་འདུག དེ་ཡང་ཕྱོགས་གཅིག་ནས་རྒྱུ་མཚན་ལྡན་པ་རེད། འོན་ཀྱང་དེ་གཉིས་རྦད་དེ་ཐ་དད་རེད་འདོད།
ཏཱ ་ལའི་བླ་མ་ཞེས་པའི་མཚན་འདི་བྱུང་རིམ་སོགས་བཤད་མི་དགོས་པར་བྱ། མཚན་གྱི་རྣམ་གྲངས་འདི་༸གོ་ས་རྒྱལ་བ་རིན་པོ་ཆེར་ཆེད་སྤྱོད་ཀྱི་མཚན་གལ་ཆེན་ཞིག་ཡིན་ཞིང་། འདི་ལ་ཆོས་སྲིད་ལོ་རྒྱུས་ཀྱི་རྒྱབ་ལྗོངས་དང་། སྐུ་ཉིད་ཀྱི་དམིགས་བསལ་མཁྱེན་ཡོན་གྱི་ཁྱད་ཆོས་ཚང་མ་གཞི་གཅིག་ཏུ་འདུས་པའི་གོ་དོན་ཡོད་པ་རེད།
དེ་བཞིན་དུ་༸གོང་ས་མཆོག་སྐུ་ཉིད་ཀྱིས་ཀྱང་འདི་ཉིད་བེད་སྤྱོད་གནང་གི་ཡོད། དཔེར་ན་ཏཱ་ལའི་བླ་མའི་དགེ་རྩ་ཞེས་པ་ལྟ་བུ་དང་། དེ་བཞིན་དུ་ཁོང་གིས་གལ་ཆེན་དོན་ཆེན་དུ་བརྩི་གནང་མཛད་པའི་གསུང་འཕྲིན་དང་གསུང་རྩོམ་མང་པོ་ཞིག་གི་མཇུག་བྱང་དང་རྩོམ་བྱང་སོགས་སུ་ཆེད་སྤྱོད་གནང་འདུག
ཕྲན་གྱིས་དེ་སྔོན་ནས་རང་གི་ཆེད་རྩོམ་དག་གི་ནང་དུ་ཁོང་གི་མཚན་བེད་སྤྱོད་བྱེད་ཚུལ་ལ་བསམ་བློ་བཏང་མྱོང་ལ། སྐུ་ཉིད་ཀྱི་དགོངས་ཚུལ་ལྟ་བུའི་བསམ་ཚུལ་ཡོད་མཁན་མ་པའང་ཤེས་ཀྱི་ཡོད། འོན་ཀྱང་མཇུགམཐར་ང་རང་གིས་༸གོང་ས་མཆོག་དང་༸གོང་ས་ཏཱ་ལའི་བླ་མ་ཞེས་པ་འདི་རྩོམ་ཡིག་ནང་བེད་སྤྱོད་ཀྱིས་འབྲི་བཞིན་ཡོད། རྒྱུ་མཚན་ཚང་མ་གནས་སྐབས་གསལ་བཤད་བྱེད་མི་དགོས་པ་བྱོས།
གང་ལྟར་དགོངས་འཆར་གནང་བར་ཐུགས་རྗེ་ཆེ།
༼༧གོང་ས་ཏྰ་ལའི་བླ་མ་དང་ཁོང་གི་འགྲུལ་བཞུད༽ཞེས་པའི་ཁ་བྱང་དེ་ཡང་ཁྱད་མཚར་ཞིག་རེད། སྐུ་ཉིད་བོད་སྐད་ལ་དུང་ཞེན་དེ་ཙམ་ཡོད་བཞིན་དུ་༧རྒྱལ་བ་ཡིད་བཞིན་ནོར་བུ་ཞེས་བོད་མི་རིགས་ཀྱི་དད་གུས་བརྩེ་གསུམ་མཚོན་པའི་མཚན་མཆོག་འདི་བཞག་ནས། ༧གོང་ས་ཏྰ་ལའི་བླ་མ་དང་ཁོང་གི་་་་་་་ཞེས་ཕྱི་རྒྱལ་མི་ཚོའི་ལད་ཟློས་བྱས་པ་ཡག་པོ་མ་མཐོང་། ད་བར་དུ་ང་ཚོར་རང་གི་དབུ་ཁྲིད་ལ་མི་རིགས་རང་གིས་བཏགས་པའི་མིང་གཙང་མ་ཞིག་ཀྱང་མེད་པ་མིན་འགྲོ་དྲན་སོང་། དེའི་ཕྱིར་ཁྱེད་ཀྱིས་ཨ་གསར་བྱེད་སྟངས་འདི་ཉེན་ཁ་འདྲ་བོ་ཞིག་ཀྱང་མཐོང་སོང་། བོད་རིགས་ཚོའི་ཆེད་སྐུ་སྒེར་ཡིག་ཚང་གིས་ཀྱང་རྒྱལ་བ་རིན་པོ་ཆེ་ཞེས་བོད་ཡིག་དང་བོད་རིགས་ཚོའི་ཆེད་དུ་དྲ་རྒྱ་སྣུམ་པོ་ཞིག་ཕྱེ་གནང་འདུག དེའི་ནང་ཏྰ་ལའི་བླ་མ་ཞེས་མཚན་མ་ཕུལ་བའང་གློ་བུར་དུ་བྱུང་ཞིག་མ་ཡིན་པར། དམིགས་ཡུལ་དང་དགོས་པ་རྒྱུ་མཚན་ལ་བསམ་བློ་བཏང་ནས་མཚན་དེ་བཏགས་པ་རེད་བསམ།
དཔེར་ན་ང་ཚོས་བོད་པ་ནང་ཁུལ་ལ་སྐད་ཆ་བཤད་སྐབས་ང་ཚོ་ཏྲི་བྷེ་ཏྲི་རེད་མི་ཟེར་བར། ང་ཚོ་བོད་པ་རེད་་་་་་་ཟེར་བ་མ་རེད་དམ། འོན་ཀྱང་ཉིད་ཀྱི་རྩོམ་གསར་ཤོས་འདི་ཀློག་མ་ཐུབ་ཀྱང་ནང་དོན་ཡག་པོ་ཡོད་ཤག་བྱས་ཡོད། ཁྱེད་ཀྱི་རྩོམ་སྔོན་མ་ཀློག་མྱོང་བས་ཚོད་དཔག་ཐུབ།
གང་ཉིད་ཀྱི་འགྲུལ་བཞུད་ཁྲོད་ནས་རྙེད་པའི་བསླབ་བྱ་རྣམས་བོད་མི་ཡོད་ཅོག་གི་སེམས་ལ་ངལ་གསོ་སྟེར་བར་སྨོན།།
ཡག་པོ་རེད་་་་ཨ་འབྲུག་ལགས་ལ་ཐུགས་རྗེ་ཆེ་ཞུ་བཞིན་ཡོད།
ཀློག་པ་པོར་བཅོས་རོགས། ངའི་ལག་པ་འདི། ཡང་བཏགས་ནོར་ཐེབས་འདུག
ཀློག་པ་དག་གིས་དགའ་བསུ་དང་བཅས་གཟིགས་པར་ངས་ཀྱང་ཐུགས་རྗེ་ཆེ་ཞུ་རྒྱུ་དང་། ཞར་དུ་༸གོང་ས་མཆོག་གིས་ཤུགས་རྐྱེན་ཆེ་ཤོས་དེ་བོད་པའི་སྤྱི་ཚོགས་སུ་ཐེབས་ཡོད་དམ་སྤྱི་ཚོགས་གཞན་གྱི་ནང་ཐེབས་ཡོད། དེ་བཞིན་དུ་ཁོང་གི་ཤུགས་རྐྱེན་གཙོ་བོ་དེ་ཕྱོགས་གང་དུ་ཐེབས་ཡོད་མེད་སོགས་ལ་རིག་པ་བཏོན་ན་དེ་ལས་ཀྱང་དགའ།
ཐུགས་རྗེ་ཆེ།འགྲུལ་བཞུད་ཕྱོགས་བསྡུས་ཀྱི་གུས་པ་ལྟ་བུ་ཁུག་ཀྱོག་ཡོད་མི་རྣམས་ལ་༧གོང་ས་མཆོག་གི་འཛོད་འཔྲིན་ཅི་ལྟར་རྒྱས་བཞིན་ཡོད་པའི་གསལ་བཤད་ཅིག་ཆགས་སོང་།གུས་པས་བསྐྱར་དུ་ཁྱེད་ལ་སྙིང་ཐག་པར་ནས་ཐུགས་རྗེ་ཆེ་ཞུ་རྒྱུ་དང་མ་འོངས་ཡང་དེ་ལྟར་སྤེལ་བའི་རེ་བ་ཡོད།
མིང་ཞེས་བཅོས་རོགས?
ཨ་འབྲུག་ལགས། ཁྱེད་རང་ལ་རིགས་གཅིག་རྐང་འཛིན་ཟེར་བའི་མི་ཚིག་འདི་བེད་སྤྱོད་བཏང་ན་མི་ཆོག་རྒྱུ། རྩོམ་ལབ་ན་གནས་ཚུལ་ཕྱོགས་བསྡུས་འདི་ཧ་ཅང་ཡག་པོ་རེད། གང་ལྟར་སྙིང་བོ་ཅན་ཞིག་བྲིས་འདུག ཡོང་ནས་བཀླགས་ཟིན་པ་མ་ཟད། དགའ་སྣང་དང་བཅས་ཕྱིར་བུད་སོང་ང་།
མི་སེམས་འགུལ་བ་ཞིག་བྲིས་འདུག་ལ་གོང་ས་མཆོག་གི་ཞབས་སོར་འཛམ་གླིང་རྒྱལ་ཁབ་ཁག་ཏུ་འཁོད་པའི་བརྒྱུད་རིམ་དེ་དག་ངོ་སྤྲོད་ཡག་པོ་གནང་འདུག རྩོམ་བཟང་འདི་ལྟ་བུ་གང་མང་མང་སྤེལ་བར་སྨོན།