ཉི་མ་ལྷ་སྒྲོན་བློ་བཟང་གི་འཁྲིས་སུ་འབྱོར་མ་ཐག ཕོ་གསར་རྨ་བྱ་འདྲ་བོ་ང་སྒུག་ནས་བསྡད་འདུག་ཟེར་ནས་དགད་མོ་དགོད་ཞོར་དུ། ཡ་འགྲོ ང་རང་དངོས་ནས་སྐེས་འཛེགས་སྒང་དུ་ཡར་འགྲོ་རྒྱུར་ལ་དངོས་ནས་དཀའ་ངལ་འདུག ཁྱེད་རང་གིས་ང་རང་འཐེན་ནས་སོང་ན་འགྲིག་གི་རེད་དམ་ཟེར་ཞོར་དུ་བློ་བཟང་གི་རྒྱབ་ལོག་ནས་སྐེ་རེག་ལ་འཐམ་པ་རེད།
བློ་བཟང་གིས། དེ་བས་ཀྱང་སེམས་སུ་ཚ་ཤད་ཅིག་རྒྱག་གི་ཡོད་ཀྱང་། ངོ་གདོང་ཡོངས་སུ་འཛུམ་མདངས་ཤིག་དང་བཅས་དེ་འགྲིག་དང་འགྲིག་ཟེར་བཞིན་སྐེས་འཛེགས་སྒང་དུ་གོམ་པ་རེ་རེ་བཞིན་སྤོས་པ་རེད། སྐབས་དེར་མི་ཞིག་གིས་ཁོ་གཉིས་ཀྱི་རྒྱབ་ལོག་ནས་མཐོང་བ་ཡིན་ན་ནི། དེ་ནི་གསར་དུ་ངོ་ཤེས་མ་ཐག་པའི་ཕོ་མོ་གཉིས་ཡིན་པ་གཏན་ནས་ཤེས་མི་ཐུབ་པ་མ་ཟད། དེ་ནི་དངོས་ནས་བརྩེ་བ་ཟབ་པའི་ཕོ་མོ་གཉིས་ཡིན་པར་འཁྲུལ་ངེས་ཡིན་པ་རེད། འོན་ཀྱང་། ཉི་མ་ལྷ་སྒྲོན་ནི་དངོས་ནས་བུད་མེད་ཁ་ཁོག་མེད་པའི་གཤིས་རྒྱུད་འཇམ་པའི་བུད་མེད་ཅིག་ཡིན་པ་བློ་བཟང་གི་སྔ་ས་ནས་ཤེས་ཡོད་པ་རེད་ལ། ཕོ་གསར་མང་བོ་ཞིག་གི་རེ་བ་རྒྱག་ས་ཡང་ཆགས་ཡོད་ཀྱང་། དེ་དག་གི་ལག་པར་ལས་སླ་བོ་ཡོང་གི་མེད་པ་རེད།
རི་སྒང་སྐྱ་བོ་དེ་ནས་འཁྲབ་ཚན་དངོས་སུ་མགོ་འཛུགས་པ་བྱས་པ་དང་། ངལ་གསོའི་སྐབས་སུ་བློ་བཟང་ལ་ཁོ་རང་གི་གྲོགས་པོ་རང་གྲོལ་གྱིས་ཀ་ར་ཞིག་སྤྲད་དེ། ཨ་རོགས། ཁྱེད་རང་ལ་རླུང་རྟ་རྒྱུགས་བཞིན་འདུག ཉི་མ་ལྷ་སྒྲོན་གྱིས་སྤྲད་སོང་ཞེས་བཤད་དུས། བློ་བཟང་གིས་གྲོགས་པོ་རང་གྲོལ་ལ་ཀུ་རེ་མ་རྩེད་ཅེས་བཤད་པ་རེད།
གྲོགས་པོ་རང་གྲོལ་གྱིས། ཀུ་རེ་མིན། མི་རློམ་ན་ཕར་བལྟས་ཤིག ཉི་མ་ལྷ་སྒྲོན་གྱིས་ཁྱེད་རང་ལ་ལྟ་བཞིན་ཡོད་པ་མཐོང་མ་སོང་ངམ་ཞེས་བཤད་མ་ཐག བློ་བཟང་གིས་ག་ལེར་བུད་མེད་ལས་ཀ་བ་དག་གི་ཁྲོད་དུ་ག་ལེར་བལྟས་དུས་སུ། ཉི་མ་ལྷ་སྒྲོན་གྱིས་ཁོ་རང་གི་ཕྱོགས་སུ་མགོ་བོ་སྡེབས་ཀྱིན་པའི་ངང་ཚུལ་དང་མཐོང་རྗེས་སུ་གཟོད་ནས་གྲོགས་པོ་རང་གྲོལ་གྱིས་ཀུ་རེ་བྱེད་ཀྱི་མེད་པ་རྟོགས་པ་རེད།
ཉིན་མ་རེ་རེ་བཞིན་འཁྲབ་ཚན་འདྲ་མིན་གྱི་བར་གསེང་དུ་ཁོང་ཚོ་གཏན་ནས་ཁོམ་གྱི་མེད་པ་རེད་ལ། དེ་དང་འགྲོག་ནས་བློ་བཟང་དང་ཉི་མ་ལྷ་སྒྲོན་གཉིས་ཀྱི་བར་ཐག་ཡང་ཉེ་ནས་ཉེ་རུ་འགྲོ་བཞིན་ཡོད་པ་རེད། བློ་བཟང་དང་ཉི་མ་ལྷ་སྒྲོན་གཉིས་ནི་ཟ་ས་རུ་མཉམ་དུ་སླེབས་ཡོད་པ་དང་འཐུང་ས་ན་ལྷན་དུ་ཡོད་པ་དང་། ངལ་གསོ་བྱེད་ས་རུ་ཡང་ལྷན་དུ་འདུས་ཡོད་པ་རེད། འོན་ཀྱང་། ཁོ་གཉིས་ལ་ཐུན་མོང་གི་དགའ་ཕྱོགས་ཤིག་ཡོད་པ་དེ་ནི་ཕན་ཚུན་གྱི་འདས་པ་དག་ལ་ཕན་ཚུན་གྱི་མྱོང་བ་དག་གླེང་མོལ་བྱེད་རྒྱུ་དེ་ཡིན་པ་ཁོ་གཉིས་ཀྱི་ཉེ་འཁོར་གྱི་མི་སུས་ཀྱང་ཤེས་ཀྱི་མེད་པ་རེད།
དོན་དངོས་ཐོག་ཉི་མ་ལྷ་སྒྲོན་ནི་བཟའ་ཚང་བྱས་ཟིན་པའི་བྱིས་པ་གཅིག་གི་ཨ་མ་ཡིན་པ་མ་ཟད། ཁོ་རང་གི་བཟའ་ཚང་ཡང་གཞིས་གྲོང་དེ་ནས་སྤྱི་ལེ་བཞི་བཅུ་ལྔ་བཅུའི་མཚམས་ཀྱི་དམག་སྒར་ཞིག་གི་ནང་དུ་ཡོད་པ་རེད། ཁོ་མོ་ནི་ལོ་ན་བཅུ་དགུ་ཡིན་དུས་སུ་ཆང་ས་བརྒྱབ་པ་དང་། ལོ་ཉི་ཤུའི་སྒང་དུ་བྱིས་པ་དེ་སྐྱེ་བ་ཡིན་པ་རེད། བློ་བཟང་གིས་སེམས་ནང་དུ་དམ་བཅའ་ཞིག་ཡོད་པ་དེ་ནི་བྱིས་པ་ཞིག་གི་ཨ་མར་གྱུར་ཟིན་པའི་བྱམས་བརྩེ་ལྡན་པའི་ཁྱིམ་གཞི་ཞིག་གི་བདག་མོ་དེ་ལ་ལུས་འབྲེལ་གཏན་ནས་མི་འཇོག་པ་དེ་ཡིན་ཡང་། ཉེ་ཁོར་གྱི་མི་དག་གིས་ཁོ་གཉིས་ལ་ལུས་འབྲེལ་ཡོད་པར་ཐག་གཅོད་བྱེད་ཀྱི་ཡོད་པ་མ་ཟད། ཉིན་རེ་ནས་ཉིན་རེ་མྱི་ཁ་ཡང་ཆེ་རུ་འགྲོ་བཞིན་ཡོད་པ་རེད།
སྐབས་དེ་འདྲ་ཞིག་ལ་ཁོ་རང་གི་གྲོགས་པོ་རྡོར་རྗེ་སྐྱབས་ཀྱིས། བློ་བཟང་། ཉི་མ་ལྷ་སྒྲོན་ནི་དངོས་ནས་བུད་མེད་ཡ་རབས་ཤིག་རེད། ཁྱེད་རང་གི་མི་ཚེ་ཡི་གཏན་གྲོགས་དེ་འདྲ་ཞིག་རེག་པ་ཡིན་ན་དངོས་ནས་ཡག་པོ་རེད། འོན་ཀྱང་། ཁོ་མོ་ལ་བཟའ་ཚང་ཡོད་པ་དང་བྱིས་པ་ཞིག་གི་ཨ་མ་ཡང་ཡིན་པས་བསམ་བློ་བཏང་ན་ཡག་པོ་རེད་སྙམ། ཡིན་ཡང་། ཁྱེད་རང་གི་ག་རེ་བསམ་གྱི་ཡོད་མེད་ནི་ངས་ཀྱང་མི་ཤེས།
བློ་བཟང་གིས་རང་གི་གྲོགས་པོ་དེ་ཡི་སྐད་ཆ་གོ་བ་དང་དགད་མོ་ཤུགས་ཆེན་པོ་དང་བཅས་དེ་དགོད་ཞོར་དུ། མི་གཞན་གྱིས་དེ་འདྲ་བསམ་ན་འགྲིག་གི་རེད། ཁྱེད་རང་གིས་དེ་འདྲ་བསམ་ན་ནི་དངོས་ནས་དགོད་སྤྱད་རེད། ཁྱེད་རང་གི་མཐོང་གསལ་རེད། འུ་གཉིས་ད་ལྟ་བར་དུ་ཁང་བ་གཅིག་གི་ནང་དུ་བསྡད་པ་རེད། ང་རང་མཚན་མོ་གཅིག་ལ་ཡང་ནང་དུ་མ་ཡོང་བ་དེ་འདྲ་ཁྱེད་རང་གི་དྲན་གྱི་འདུག་གམ། ཁོ་མོ་འདི་རུ་ཡོང་ནས་བསྡད་པ་དེ་འདྲ་ཡང་ཁྱེད་རང་ལ་དྲན་གྱི་འདུག་གམ། ད་དུང་། ངེད་གཉིས་ཀྱིས་ཕན་ཚུན་ལ་སྐད་ཆ་ཕན་ཚུན་ལ་སྣང་བ་འགྲོ་བའི་སྐོར་གླེང་བ་སོགས་ཐོས་མྱོང་ཡོད་དམ།
རྡོར་རྗེ་སྐྱབས་ཀྱིས། དེ་འདྲ་བཤད་ན། དེ་ཡང་བདེན་པ་རེད། ངས་ནམ་ཡང་ཁྱེད་རང་ནང་དུ་ལོག་མ་ཡོང་བའི་མཚན་མོ་ཞིག་བཤད་རྒྱུ་དངོས་ནས་མེད། རེད་དེ། ཁྱེད་རང་མཚན་མོ་ཕྱིར་ནང་དུ་ཡོང་བ་འཕྱི་བོ་དེ་འདྲ་མང་བོ་ཞིག་བྱུང་བ་མ་ཟད། ཁྱེད་རང་གིས་དངོས་སུ་མཚན་མོ་མི་ཉུང་བ་ཞིག་ལ་ཁོ་མོ་དང་ལྷན་དུ་ཁ་བརྡ་བྱེད་ཀྱིན་པ་ངས་མཐོང་མྱོང་ཡོད། ལུས་འབྲེལ་འཇོག་པ་ལ་ཡིན་གཅིག་མིན་གཅིག་ཁང་བ་འདིའི་ནང་དུ་ཡིན་དགོས་དོན་མེད་པ་རེད། དེ་འདྲ་མ་རེད་དམ། གང་ལྟར། ཁྱེད་གཉིས་ལ་ལུས་འབྲེལ་མེད་པ་ཡིན་ན་ཡག་པོ་འདུག འོན་ཀྱང་། ལུས་འབྲེལ་འཇོག་རྒྱུ་འདྲ་ཡིན་ན་བྱིས་པ་མ་ཆགས་པ་བྱས་ན་བཟང་གི་རེད། ཁོ་མོའི་མི་ཚེ་ལ་ཡང་འགན་ཞིག་འཁུར་ན་འགྲིག་གི་རེད།
མུ་འགོད།
གཅན་བཟོད་རྒྱམ་ལགས། ཉིད་རང་སྒྲུང་གཏམ་འདི་འགོ་བཙུགས་པ་ནས་ཧུར་བརྩོན་བྱས་དེ་འདི་རུ་ཕེབས་པ་དེར་དགའ་ཡོད། རྗེས་ཕྱོགས་ཀྱང་སྒྲུང་མཇུག་ལ་སླེབས་རེག་བར་དུ་ཕེབས་རྒྱུ་མ་བརྗེད་ཅིག
ཨ་རོགས་ཤ་ཁྲག ད་དྲ་ཐོག་ལ་ཤོག་དང་དཀའ་ངལ་དེ་མི་འདུག་ཡ། ཕལ་ཆེར་སྤྱི་འཐུས་གྲོས་ཚོགས་གྲོལ་སོང་བས་ཡིན་ས་རེད་ཡ། ང་ཚོས་དྲ་ཐོག་ནས་གྲོས་ཚོགས་དང་ཚོགས་སྒེར་བ་རེར་སྐྱོན་བརྗོད་དང་ཚིག་རྩུབ་བཤད་རྒྱུ་མང་དྲག་པས་སྲུང་མ་དམར་ནག་གཉིས་ཀྱིས་མཐུ་བཏང་དང་ནེ་ཨེ་ཡིན་ནམ་འདོད་ཀི ད་གང་ལྟར་དྲ་བར་འཇུག་པར་དཀའ་ངལ་ཅང་མི་འདུག
ཤ་ཁྲག་ལགས། སྒྲུང་རིང་འདི་ནམ་ཞིག་ལ་མཇུག་རྫོགས་ཀྱི་རེད། ངས་སྔོན་ཆད་ཁྱོད་ལ་༼ལེའུ་བརྒྱ་བ༽འམ་ཡང་ན་ ༼སྒྲུང་གཏམ་ལེའུ་བརྒྱ་མ༽ཞེས་བཤད་མྱོང་། དོན་དུ་ལེའུ་བརྒྱ་བྲིས་མཚམས་མཇུག་རྫོགས་རྒྱུ་ཡིན་ནམ།