སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བརྒྱ་དང་བཅུ་བཞི།

བློ་བཟང་གིས། གྲོགས་པོའི་ཟ་ཁང་ནང་ནས་རང་གི་གང་ཐུབ་ཐུབ་ཀྱི་ལས་ཀ་བྱེད་བཞིན་ཡོད་ལ། ལས་ཡུན་རིང་བ་དང་ལས་ཀ་ལྕི་སྟབས། ཟ་མ་ཡང་མང་བོ་ཟ་མ་ཐུབ་པར་མཐའ་མར་དབུགས་ཀྱི་དཀའ་ངལ་ཞིག་འཕྲད་ཀྱི་ཚོར་སྣང་ཞིག་ཁོ་རང་ལ་སྐྱེ་བ་རེད། དེ་དུས་ཁོས་རང་གི་གྲོགས་པོ་ཞིག་གི་ལས་སྐྱུར་ངལ་གསོ་བྱས་ཡོད་པ་དེ་ཁོ་རང་གི་ཚབ་དུ་སྐད་བཏང་ནས། ཁོ་རང་དུས་རྒྱུན་བསྡོད་སའི་གྲོགས་པོ་བཟའ་མི་གཉིས་ཀྱི་ནང་དུ་ངལ་གསོ་བྱེད་དུ་སོང་བ་རེད། དགོང་མོ་དེར། གྲོགས་པོ་བཟའ་མི་གཉིས་ལ་རང་གི་དབུགས་ལ་དཀའ་ངལ་ཕྲན་པུ་ཞིག་འདུག སང་ཉིན་ལས་ཀར་འགྲོ་རྒྱུ་མིན། ངལ་གསོ་ཡིན།

གྲོགས་པོའི་རྒན་མོ་དེས། དེ་འདྲ་བྱས་ནས་ཉལ་བསྡད་པ་ཡིན་ན་གཏན་ནས་འགྲིག་གི་མ་རེད། སང་ཞོགས་གཅིན་པ་བརྟག་དཔྱད་བྱེད་དུ་སོང་བ་ཡིན་ན་ཡག་པོ་ཡོད་ངེས་ཡིན། ཡིན་གཅིག་མིན་གཅིག་སོང་། ང་རང་ལས་ཀར་འགྲོ་དུས་སུ་ཁྱེད་རང་ཡར་བླངས་ཆོག དེ་ནས་གཅིན་པ་ཁུར་ནས་བརྟག་དཔྱད་བྱེད་དུ་སོང་།

ཕྱིར་ཉིན་ཞོགས་པ་སྔ་བོ་ཁོ་མོ་ལས་ཀར་འགྲོ་བའི་སྐབས་སུ་བློ་བཟང་གཉིད་ལས་བླངས་ཀྱང་། བློ་བཟང་ཕྱིར་གཉིད་དུ་གཡུར་བ་དང་གྲོགས་པོ་ཡང་གཉིད་ལ་དགའ་བ་ཞིག་ཡིན་སྟབས། ཁོ་གཉིས་ཀ་ཁོ་མོ་ཕྱིར་ཉིན་གུང་ཁ་ལག་ཟ་རུ་ཡོང་རེག་བར་དུ་གཉིད་ལ་ཤོར་བ་རེད།

ཁོ་མོ་ཉིན་གུང་ཕྱིར་ནང་དུ་སླེབས་དུས། བློ་བཟང་དང་ཁོ་མོའི་རྒན་པོ་གཉིས་ད་དུང་ཉལ་ནས་ཡོད་པ་མཐོང་མ་ཐག བློ་བཟང་ཡར་ལོངས། ད་དངོས་ནས་ཉལ་འདུག་རན་མ་རེད། རྒན་པོ་ཁྱེད་གཉིས་སྨན་ཁང་དུ་བརྟག་དཔྱད་བྱེད་དུ་སོང་ཟེར་ནས་ཨུ་ཚུགས་བརྒྱབ་དེ་ཡར་ལ་བླངས་པ་རེད།

བློ་བཟང་ཡར་ལ་ག་ལེར་བླངས་དུས། མགོ་ནང་དུ་སེར་འཐོམ་འཐོམ་ཞིག་ཤར་བ་དང་ཁོས་རང་གི་གྲོགས་པོ་ལ་ང་མགོ་གཡོམ་འཁོར་གྱི་འདུག ཁྱེད་རང་གིས་བལྟས་ན་ག་རེ་རེད་དྲན་གྱི་འདུག ངས་རང་གི་དབུགས་ཀྱི་མ་འདང་བར་བསམ་གྱི་ཡོད་ཀྱང་། དེ་གཅིག་བུ་ཡིན་ས་རེད་ཀོ ད་ནི་ཁྱེད་རང་ག་ལེར་སྔོན་དུ་སོང་ནས་སྒང་ནས་གླ་བྱེད་རླངས་འཁོར་ཞིག་རེག་གི་ཨེ་འདུག་ལྟ་རོགས། ང་རང་ག་ལེར་སྐེས་འཛེགས་བརྒྱུད་དེ་ངལ་གསོ་ཞོར་དུ་འོང་།

བློ་བཟང་གིས་སྐེས་འཛེགས་རིང་མོ་དེ་ཡི་མགོ་ལ་སླེབས་རེག་བར་དུ་ངལ་གསོ་ཉི་ཤུ་ལྷག་བརྒྱབ་པ་རེད། སྤྱིར་ན་ལོ་ལོན་ལོ་གྱ་བཅུ་ཅན་ནད་ཚ་མེད་མཁན་ཞིག་ཡིན་ན། སྐེས་འཛེགས་དེ་ནས་ངལ་གསོ་བྱེད་དགོས་པ་ཞིག་མིན་ན་ཡང་བློ་བཟང་གིས་ངལ་གསོ་ཉི་ཤུ་ལྷག་བྱེད་དགོས་བྱུང་དུས་སུ། བློ་བཟང་གིས་རང་གི་སེམས་ལ་ད་ནི་དངོས་ནས་ཤི་བའི་དུས་སུ་སླེབས་ཡོད་པ་འདྲ་སྙམ་ཞོར་རྡོ་སྟེགས་དེ་ནས་ངལ་གསོ་བཞིན་སྐབས་སུ། གྲོགས་པོ་དེས་ངའི་ལག་དུ་གླ་བྱེད་རླངས་འཁོར་ཨེ་རེག་མ་བལྟས། ཁྱེད་རང་གི་ལས་ཀ་བྱེད་སའི་གྲོགས་པོ་དེ་ཡི་ཕུ་བོའི་སྤག་སྤག་བཏང་ནས་ཡོང་འདུག་པ་འཕྲད་སོང་།

བདེ་ལེགས་སྨན་ཁང་གི་ཉལ་ཁྲིའི་སྟེང་ན་བློ་བཟང་ལ་གནམ་ཁབ་ཞིག་བརྒྱབ་ཡོད་པ་དང་ཉེ་འཁོར་དུ་ཁོ་རང་གི་གྲོགས་པོ་བཟའ་མི་གཉིས་དང་། ཁོ་རང་གི་གྲོགས་པོ་རྙིང་ཤོས་དེ་ཡང་སླེབས་ཡོད་པ་མ་ཟད། ཁོང་ཚོས་སུ་ཞིག་གི་ཁྲག་བློ་བཟང་གི་ཁྲག་དང་འཚམ་པོ་ཡོད་མེད་བཤད་ཀྱིན་པའི་སྒང་དུ་བློ་བཟང་གི་གཟུགས་པོ་ན་དྲོད་ཟེར་བ་མེ་སྟག་ཙམ་ཞིག་མ་གཏོགས་མེད་པའི་སྣང་བ་དང་བཅས་དེ། ཉལ་ཁྲིའི་སྟེང་ནས་གྲང་ཤ་ཟ་བཞིན་པའི་ངང་ཚུལ་དེ་འཁྲིས་ཀྱི་ཉལ་ཁྲིའི་སྟེང་གི་བོད་པའི་ཕོ་གསར་མོ་གསར་དེ་གཉིས་ཀྱིས། ཇོ་ལགས། ཁྱེད་རང་གྲང་གི་ཡོད་ས་རེད། ངེད་གཉིས་ཀྱི་ཉལ་ཆས་འདི་ཡང་ཁྱེད་རང་གི་གོན་རོགས་ཟེར་བ་དེར་བློ་བཟང་གིས་མགོ་གཡུགས་བྱེད་པ་ལས། མི་ངོ་ཡག་པོ་ཞིག་མི་ཟིན་པར་གྱུར་བ་རེད།

སྨན་པས་བརྟག་དཔྱད་བྱས་པ་བརྒྱུད། བློ་བཟང་གི་གྲོགས་པོ་ཁོང་ཚོ་སུས་ཁྲག་ཡིན་ཡང་འཚམ་པོ་མེད་པར་བཤད་པ་དང་། དོ་ནུབ་ཁྲག་རྒྱག་མ་ཐུབ་པ་ཡིན་ན། ཁོ་རང་གི་ཚེ་སྲོག་ལ་ང་ཚོའི་འགན་ལེན་བྱེད་ཐུབ་ཀྱི་མེད། ཁྱེད་རང་ཚོ་ལ་ངོ་ཤེས་དེ་འདྲ་སྐད་གཏོང་རྒྱུ་ཡོད་ན་གཏོང་། དེ་མིན་ང་ཚོ་ལ་ཐབས་ཤེས་མི་འདུག ད་དུང་། རྒྱ་གར་གཞུང་གི་སྨན་ཁང་དུ་ཁྲག་ཉོས་དེ་རྒྱག་རྒྱུ་ཡོད་རབས་འདུག ཁྱེད་ཚོ་དེ་རུ་སོང་ན་འགྲིག་གི་རེད།