ཧྲང་ཧེ་རུ་ད་ལོའི་འཛམ་གླིང་འགྲེམས་སྟོན་བྱེད་ལ་ཉེ་བའི་སྐབས་འདིར། རྒྱ་ནག་གིས་རེག་དུག་ནད་པ་རྒྱ་ནག་ཏུ་ཡོང་བར་བཀག་སྡོམ་བྱེད་པའི་རྩ་འཛིན་ཡིག་ཆ་དེ་ཐོག་མའི་ཐོ་གཞུང་ལས་རྦད་དེ་བསུབ་ཡོད་འདུག
ཕྱི་ཚེས་ ༢༧ ཉིན་བྷེ་བྷེ་སི་གསར་ཁང་གིས་གནས་ཚུལ་སྤེལ་བ་ལྟར་ན། སྤྱིར་རྒྱ་ནག་གིས་རེག་དུག་གིས་མཚོན་པའི་འགོས་ནད་ཅན་གྱི་ནད་པ་མང་པོ་ཞིག་རྒྱ་ནག་ཏུ་ཡོང་བར་བཀག་སྡོམ་ནན་མོ་བྱེད་ཀྱིན་ཡོད་ནའང་། སླེབས་ལ་ཉེ་བའི་ཧྲང་ཧེ་གྲོང་ཁྱེར་གྱི་འཛམ་གླིང་འགྲེམས་སྟོན་ཆེན་མོའི་སྐབས་འདིར། རྒྱ་ནག་རྒྱལ་སྲིད་སྤྱི་ཁྱབ་ཁང་གིས་རེག་དུག་ནད་པ་རྒྱ་ནག་ཏུ་ཡོང་བར་བཀག་སྡོམ་བྱེད་བཞིན་པའི་རྩ་འཛིན་ཡིག་ཆ་སྟེ། རྒྱ་གཞུང་གིས་གཏན་འབེབས་བྱས་པའི་༼འཕྲོད་བསྟེན་སྔོན་འགོག་རྩ་ཡིག༽་དང་༼ཕྱི་རྒྱལ་མི་རིགས་སྣེ་ལེན་དོ་དམ་བྱ་ཕྱོགས༽ཞེས་པ་ལས་རྦད་དེ་བསུབ་ཡོད་པ་རེད། དེའི་སྟབས་ཀྱིས་མཉམ་འབྲེལ་རྒྱལ་ཚོགས་ཀྱིས་རྒྱ་ནག་གི་བྱེད་སྟངས་གསར་པ་དེར་བསྟོད་བསྔགས་བྱས་ཡོད་པར་མ་ཟད། རྒྱལ་ཁབ་གཞན་པ་ཡང་རྒྱ་ནག་གི་བྱེད་སྟངས་དེའི་རྗེས་སུ་འབྲངས་དགོས་པའི་འབོད་སྐུལ་ཞུས་ཡོད་འདུག རྒྱལ་ཚོགས་དྲུང་ཆེ་བྷེན་ཀེ་མོན་གྱིས་རེག་དུག་ནད་པ་རྒྱལ་ཁོངས་སུ་འཛུལ་པར་བཀག་སྡོམ་བྱས་པ་ཡིན་ན། རྗེས་ཕྱོགས་འཛམ་གླིང་ཡོངས་སུ་རག་དུག་ན་ཚར་གདོང་ལེན་བྱེད་རྒྱུར་དཀའ་ངལ་འཕྲད་ངེས་རེད་ཅེས་བརྗོད་འདུག་ལ། རྒྱ་ནག་རྒྱལ་སྲིད་སྤྱི་ཁྱབ་ཁང་གི་ཁྲིམས་ལུགས་འགན་འཛིན་གྱིས་ཀྱང་། ཐོག་མར་ང་ཚོས་རེག་དུག་དང་རིམས་ནད་ཀྱི་ཉེན་ཁར་བལྟས་ཏེ་བཀག་སྡོམ་བྱས་པ་ཡིན་ཚུལ་བརྗོད་ཡོད་ལ། ཡང་ཁོང་གིས་ཉེ་བའི་ལོ་ཤས་ནང་རྒྱ་ནག་ཏུ་རྒྱལ་སྤྱིའི་རང་བཞིན་གྱི་བྱ་འགུལ་གང་མང་ཞིག་སྤེལ་བའི་ཉམས་མྱོང་ལ་གཞིགས་ན། རེག་དུག་དང་རིམས་ནད་ཡོད་པའི་ཕྱི་རྒྱལ་བ་རྒྱལ་ཁོངས་སུ་འཛུལ་ཡང་གནོད་པ་གང་ཡང་མི་འདུག་ཅེས་བརྗོད་ཡོད་འདུག ད་ལྟ་འཛམ་གླིང་ཐོག་རེག་དུག་ནད་པར་ནང་འཛུལ་བཀག་སྡོམ་བྱེད་པའི་རྒྱལ་ཁབ་ ༦༠ ཙམ་དང་། དེ་མིན་ནད་པའི་འགྲུལ་བཞུད་ཐད་བཀག་སྡོམ་གང་ཡང་མི་བྱེད་པའི་ས་ཁུལ་དང་རྒྱལ་ཁབ་ ༡༡༠ ཙམ་ཡོད་འདུག
http://www.hindustantimes.com/world-news/world/Sarkozy-Bruni-in-China-on-three-day-visit/Article1-536749.aspx