མངའ་སྡེའི་དཔོན་རིགས་ཚོར་ཐུག་འཕྲད།

རྒྱ་གར་གྱི་དཔོན་རིགས་ཚོས་༧གོང་ས་མཆོག་གི་འཚེ་མེད་ཞི་བའི་ལངས་ཕྱོགས་ལ་རྒྱབ་སྐྱོར་གྱི་རྣམ་འགྱུར་ཤུགས་ཆེར་བསྟན་ཡོད་པར་མ་ཟད། ལྷོ་ཕྱོགས་བོད་མིའི་དཀལ་ངལ་ཐད་ལའང་རོགས་རམ་གནང་རྒྱུ་ཡིན་ཚུལ་བརྗོད་ཡོད་འདུག

བོད་གཞུང་དྲ་རྒྱའི་ཐོག་གནས་ཚུལ་སྤེལ་བ་ལྟར་ན། ཉེ་ཆར་སྤྱི་འཐུས་ཚོགས་གཞོན་རྒྱ་རི་སྒྲོལ་མས་མགོ་ཁྲིད་པའི་གྲོས་ཚོགས་ཀྱི་འཐུས་མིའི་སྐུ་ཚབ་ཁག་ཅིག་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེར་ཕེབས་ཏེ་མངའ་སྡེ་དཔོན་རིགས་ཚོར་ཐུག་འཕྲད་ཀྱིས་གནད་དོན་ཁག་ཅིག་གི་ཐད་བཀའ་བསྡུར་གནང་ཡོད་ལ། ལས་འཆར་ལེགས་པར་གྲུབ་རྗེས་ཕྱི་ཚེས་ ༦ ཉིན་སྐུ་ཚབ་རྣམས་་ཕྱིར་ངྷ་སར་འབྱོར་ཡོད་པ་རེད། ཐེངས་འདིའི་གཟིགས་སྐོར་སྐབས་བོད་ཀྱི་སྐུ་ཚབ་ཚོས་སྐྱེས་ཆེན་སོ་ཌར་ཤན་རྗེ་ Sudarshanji མཆོག་གིས་ཁོང་གི་ RSS ཚོགས་པའི་མགོ་གཙོའི་ལས་ཁུར་སྐབས་༧གོང་ས་སྐྱབས་མགོན་ཆེན་པོའི་ལངས་ཕྱོགས་ལ་རོགས་རམ་གང་ལེགས་གནང་བར་བསྟོད་བསྔགས་ཞུས་ཡོད་ཅིང་།  སྐབས་དེར་ཁོང་ཚོས་མངའ་སྡེའི་སྲིད་སྐྱོང་བ་ B S Yeddyurappa ཡེ་ཌི་ཡོར་རཱ་བྷ་མཆོག་དང་། མངའ་སྡེའི་ཕྱི་སྲིད་བློན་ཆེན་ཟུར་པ།  ཁ་གཏད་ཚོགས་པའི་ཚོགས་གཙོ། ཀོང་རི་སི་ཚོགས་པའི་ཚོགས་གཙོ། བློན་ཆེན་ཟུར་པ་སོཊ་དཔོན་རིགས་གང་མང་ཞིག་ལ་མཇལ་འཕྲད་གནང་ཡོད་ལ། མཇལ་འཕྲད་སྐབས་རྒྱ་གར་དཔོན་རིགས་ཚོས་༧གོང་ས་མཆོག་གི་འཚེ་མེད་ཞི་བའི་ལངས་ཕྱོགས་ལ་རྒྱབ་སྐྱོར་གྱི་རྣམ་འགྱུར་ཤུགས་ཆེར་བསྟན་ཡོད་འདུག ཐེངས་འདིར་སྤྱི་འཐུས་ཀྱི་སྐུ་ཚབ་མཉམ་དུ་བཙན་བྱོལ་བོད་གཞུང་གི་ལྷོ་སྤྱི་དང་གཞིས་ཆགས་ཁག་ལྔའི་གཞིས་མགོ། དེ་བཞིན་མཉམ་ལས་ཚོགས་པའི་མགོ་བ་སོགས་ཆེད་ཕེབས་གནང་ཡོད་འདུག སྐབས་དེར་བོད་མིའི་སྐུ་ཚབ་ནས་མངའ་སྡེ་དེའི་བོད་མིའི་དཀའ་ངལ་གླེང་སྐབས་མངའ་སྡེའི་དཔོན་རིགས་ཚོས་རྒྱབ་སྐྱོར་གཙང་མ་གནང་རྒྱུའི་ཁས་ལེན་གནང་ཡོད། ཉིན་མཐའ་མར་ཚོགས་གཞོན་རྒྱ་རི་སྒྲོལ་མ་དང་ཚོགས་གཙོ་ཟུར་པ་ཀརྨ་ཆོས་འཕེལ་ལགས་གཉིས་ཀྱིས་ལྷོ་གཞིས་ལུགས་བསམ་གླིང་དང་བདེ་སླར་གཞིས་ཆགས་ལས་ཁུངས་གཉིས་ཀྱི་མཐུན་འགྱུར་འོག་འདི་ལོའི་ཟླ་ ༨ པའི་ཚེས་ ༢༦ ནས་ ༣༡ བར་བྷེལ་ཀོབ་ཏུ་འཚོགས་འཆར་ཡོད་པའི་བོད་གཞུང་མང་རྒྱལ་ཡོངས་ཚོགས་ཆེན་དང་། ༧གོང་ས་མཆོག་ལ་བརྟན་བཞུགས། སྐྱབས་བཅོལ་ནང་གི་མང་གཙོའི་ལོ་འཁོར་ ༥༠ སོཊ་འཚོགས་རྒྱུའི་གྲ་སྒྲིག་ཐད་ལ་རྟོགས་ཞིབ་ཀྱང་གནང་ཡོད་པ་རེད།