བསྟན་འགྲོའི་ཆེད་དུ་འབུམ་ཚོགས།

བྱམས་བརྩེའི་ཨ་མའི་སྙིང་གི་དུམ་བུ།།
གཅེས་པའི་བུ་ཕྲུག་རྐྱེན་ལམ་སོང་བའི།།
ལས་དབང་མྱ་ངན་སེམས་ཀྱིས་མ་འཆུན།།
འོ་དོད་འབོད་སྒྲ་འུར་འུར་ཟིང་ཟིང་།།

སྙིང་སྡུག་བྲལ་བའི་ཤུལ་ལུས་གཉེན་ཉེ།།
ཡིད་སེམས་གདུང་བ་དྲག་པོས་གཟིར་ནས།།
བརྒྱལ་དང་དྲན་པ་མུན་སྟུག་ཀློང་དུ།།
བར་མེད་མནར་བའི་ཚུལ་འདི་སུས་བཟོད།།

ཀྱེ་ཧུལ་བསླུ་མེད་དཀོན་མཆོག་རྣམ་གསུམ།།
དམྱལ་སྣང་ས་ཁར་མངོན་སུམ་འཕོས་འདྲེས།།
བོད་འབངས་སེམས་ཅན་སྡུག་བསྔལ་འདི་འདྲ།།
མྱོང་དགོས་ཅི་ཞེས་ཞེ་བློ་རྨོངས་བྱང་།།

བརྩེ་མེད་ས་བདག་གཏུམ་དྲག་ཅན་ལ།།
ཉེས་མེད་ཚེ་སྲོག་གཉོམ་ཆུང་འདི་དག།།
ཐར་མེད་གཤིན་རྗེའི་ཡུལ་དུ་འཁྲིད་པའི།།
འགོག་མེད་དཀའ་གཙིགས་སུ་ཡིས་ཕབས་ཨང་།།

རྡུལ་རླུང་འཚུམས་མའི་མཐོ་སྒང་གྲོང་བརྡལ།།
ཁྲག་དང་མིག་ཆུའི་རྒྱུན་གྱིས་གང་ནས།།
ངུ་ངག་དབྱངས་ལྟ་རྣ་བར་འཛུལ་དུས།།
སྙིང་འདི་ཚལ་བར་གཤགས་ལ་ཕྱོགས་སོ།།

རྟེན་གསུམ་བཞེངས་བསྐྲུན་ཚར་དུ་དངར་ཞིང་།།
བཤད་གྲུབ་བསྟན་པའི་སྲོག་སྙིང་བཟུང་བའི།།
དགོན་སྡེ་དུ་མ་ཞིག་རལ་བཏང་བས།།
འགྲོ་བའི་ལས་སྣང་བསམ་ཡིད་འདས་སོ།།

ཀུན་བཟོད་མ་དེ་མ་བཟོད་དྲག་ནས།།
འགུལ་རིམ་བདུན་དང་གྲངས་ཆུང་གཅིག་གི།
ལྡང་སྟབས་གཅིག་གིས་ཚེ་སྲོག་ཁྲི་ཕྲག།།
འདི་ལྟར་སྡུག་བསྔལ་གཡང་ལ་སྒྱུར་སོང་།།

མཛེས་ལྗོངས་སུམ་རྩེན་གནས་སུ་འགྲན་ཞིང་།།
གླུ་བྲོའི་གཞིས་ཁྱིམ་མཚན་སྙན་འབར་བའི།།
བོད་ཡུལ་སྐྱེ་རྒུ་མདོ་ཡི་ཡུལ་དེ།།
སྐད་ཅིག་ཤུལ་ཙམ་བཟོས་འདི་བདེན་ནམ།།

ཤེས་རིག་འོད་སྣང་འགྱེད་པའི་དགེ་རྒན།།
ཕུགས་བསམ་མེ་ཏོག་རྒུམ་པའི་སློབ་ཚོགས།།
ས་ཆེན་གླལ་པའི་འདར་གསིག་གཅིག་གིས།།
རྡོ་འདམ་གཏིབས་འོག་གཏན་དུ་མནན་སོང་།།

མི་མངོན་དབྱིངས་ཀྱི་རྩ་གསུམ་རྒྱ་མཚོ།།
ཉམས་ཐག་འགྲོ་བའི་ཚུལ་འདི་གཟིགས་ནས།།
ཐུགས་རྗེའི་འཇུག་པ་ནམ་ཡང་བསྐུལ་ན།།
ཅིས་ཀྱང་བརྩེ་བས་ལན་ཅིག་དགོངས་འཚལ།།

འཕགས་ཡུལ་སེར་བྱེས་བྱ་བྲལ་གྲྭ་རྒོད་ནས།

ཐག་རིང་ནས་བསྟན་འགྲོའི་ཆེད་དུ་འབུམ་ཚོགས་ལ་རྗེས་སུ་ཡི་རང་ཞུ།