ཀརྨ་བསམ་འགྲུབ་བཟུང་འདུག

                 
རྒྱ་གཞུང་གིས་བོད་རིགས་ཚོང་པ་དང་བོད་ཀྱི་རིག་དངོས་ཤུལ་བཞག་བསྡུ་རུབ་གནང་མཁན་ཀརྨ་བསམ་འགྲུབ་ལགས་འཛིན་བཟུང་བྱས་ཡོད་འདུག

རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། རང་ལོ་ ༤༠ ལ་སོན་པའི་བོད་ཀྱི་ཚོང་པ་སྐུ་ཞབས་ཀརྨ་བསམ་འགྲུབ་ལགས་རྒྱ་ནག་ཉེན་རྟོག་པས་འཛིན་བཟུང་གིས་ཟླ་ ༥ རིང་བཀག་ཉར་བྱས་ཡོད་འདུག་ལ། ཁོང་ནི་ཕྱི་ཟླ་ ༡ པོའི་ནང་རྒྱ་ནག་ཁྲིན་ཏུའུ་གྲོང་ཁྱེར་དུ་ཉེན་རྟོག་པས་འཛིན་བཟུང་བྱས་པ་ཞིག་ཡིན་པ་དང་། རྗེས་སུ་དོན་རྐྱེན་བྱུང་སའི་ཤིན་ཅང་ས་གནས་ཁྲིམས་ཁང་ཞིག་ཏུ་བསྐྱལ་ཡོད་འདུག  འདིའི་ཐད་ཁོང་གི་ཁྲིམས་རྩོད་པས་བརྗོད་དོན། ཕྱི་ལོ་  ༡༩༩༨ ལོར་ཡང་ཁོང་ལ་གཏེར་སྔོག་དང་ཇག་པ་རྒྱག་མཁན་ཡིན་པའི་ཉེས་མིང་བཏགས་ཏེ་ཆབ་སྲིད་ཀྱི་དཀའ་ངལ་ཞིག་འཕྲད་ཡོད་པ་རེད། གནད་དོན་ལྷག་ནས་ཡུན་རིང་ཕྱིན་སྟབས་བསྐྱར་དུ་འཛིན་བཟུང་བྱས་དོན་སྐོར་ཤེས་ཀྱི་མི་འདུག་ལ། མུ་མཐུད་དོན་དོན་རྐྱེན་དེ་འདྲ་ཞིག་ཡོང་གི་རེད་ནམ་ཡང་བསམ་མྱོང་མེད། གང་ཡིན་ཟེར་ན་གནད་དོན་དེ་ནི་ལོ་མང་པོའི་གོང་ནས་བྱུང་ཟིན་པ་ཞིག་རེད།  སྐབས་དེར་ཤིན་ཅང་ཉེན་རྟོག་པས་ཀརྨ་བསམ་འགྲུབ་ལགས་སུ་འཕྲོག་བཅོམ་གྱི་ཉེས་པ་སོགས་གང་ཡང་མེད་པ་གསལ་པོ་བཟོས་ཟིན་པར་མ་ཟད། ཇག་རྐུན་གཞན་པ་ཚོར་ཉེས་ཆད་ཀྱང་བཅད་ཡོད་པ་རེད་ཅེས་བརྗོད་ཡོད་འདུག

ཤེས་རྟོགས་བྱུང་བ་ལྟར་ན། ཀརྨ་ལགས་ཀྱིས་བོད་ཀྱི་རིག་གཞུང་ཐད་ཀྱི་འགྲེམ་སྟོན་ཁང་ཞིག་གསར་དུ་བཙུགས་ཡོད་ལ། སྒེར་ངོས་ནས་འཛམ་གླིང་ཐོག་བོད་ཀྱི་སྒྱུ་རྩལ་དང་རིག་དངོས་གང་མང་ཞིག་བསྡུ་རུབ་བྱེད་ཀྱིན་ཡོད་འདུག ཁོང་གི་རིག་དངོས་འགྲེམ་སྟོན་ཁང་དེ་ནི་འཛམ་གླིང་སྟེང་བོད་ཀྱི་རིག་དངུས་བསྡུ་རུབ་མང་ཤོས་དེ་ཆགས་ཡོད་འདུག ལོ་འདི་དག་གི་རིང་ལ་བོད་ཀྱི་མཁས་པ་དང་སྒྱུ་རྩལ་བས་བོད་མི་རིགས་ཀྱི་དཀའ་སྡུག་གི་སེམས་ཚོར་ཕྱིར་བསྟན་པར་རྒྱ་གཞུང་གིས་བཙོན་འཇུག་བཀག་ཉར་བྱས་ཡོད་ལ་མང་དག་ཅིག་གར་སོང་ཆ་མེད་དུ་གྱུར་ཡོད་པ་རེད།

གསར་འགོད་པ། དཔལ་ལྡན་རྒྱ་མཚོ།