ཐ་མ་ནག་པོ་སྤྱོད་མཁན་མང་དུ་འགྲོ་ཡི་འདུག་ཟེར།

ང་ཚོའི་གཞོན་སྐྱེས་མང་པོ་ཞིག་གིས་ཐ་མ་ནག་པོ་འཐེན་པ་ནུབ་ཕྱོགས་ཀྱི་དར་སྲོལ་ཞིག་ཏུ་ངོས་འཛིན་བྱས་ཏེ་རྗེས་འབྲངས་པ་དང་།  ལྷག་པར་རྒྱ་གར་གྱི་ཁོར་ཡུག་ནང་དེའི་རིགས་ལ་དམིགས་བསལ་གྱི་དམ་དྲག་མེད་པའི་དབང་གིས་རྒྱ་ཁྱབ་དུ་ཕྱིན་པ་རེད་ཅེས་ཀུན་ཕན་ཚོགས་པའི་འགན་མཛིན་བསྟན་འཛིན་ལེགས་འཕེལ་ལགས་ཀྱིས་བརྗོད་བྱུང་།

ཉེས་པའི་ལོ་འདི་གའི་རིང་བཞུགས་སྒར་གཙོས་པའི་བཙན་བྱོལ་བོད་མིའི་སྤྱི་ཚོགས་ནང་སློབ་ཤོར་བ་དང་ལས་མེད་ཀྱི་རིགས་མང་དུ་ཕྱིན་ཏེ། སྤྱི་ཚོགས་འདིའི་གྲུ་ཟུར་རེ་ན་གཞོན་སྐྱེས་ཚོས་ཉི་མ་འཁྱོལ་ཐབས་དང་རང་ཉིད་ཀྱི་ལང་ཚོ་འཕྲོ་བརླག་ཏུ་གཏོང་བའི་གནས་ཚུལ་བྱུང་བཞིན་པར་མ་ཟད། དེའི་རིགས་ཀྱིས་སྨྱོ་རྫས་རིགས་འདྲ་མིན་སྤྱད་དེ་སྤྱི་ཚོགས་ནང་འདིའི་རིགས་རྒྱ་ཁྱབ་དུ་འགྲོ་བ་དང་། ལྷག་པར་དུ་སློབ་གྲྭ་ཁག་ཏུ་སྨྱོ་རྫས་སྤྱོད་མཁན་མང་དུ་འགྲོ་གྱིན་ཡོད་པ་རེད།

༢༠༠༨ ལོར་འདི་གའི་གསར་ཁང་གིས་བཅར་འདྲི་བརྒྱུད་བཙན་བྱོལ་ནང་རེག་དུག་ན་ཚ་ཡོད་མཁན་ ༣༠༠ ཡོད་པའི་གནས་ཚུལ་ཕྱིར་བསྒྲགས་བྱས་ཡོད་ཀྱང་། ད་ལྟའི་ཆར་ཡང་འདིའི་ཐད་ཉམས་ཞིབ་དང་རོགས་སྐྱོར་བྱེད་མཁན་ཚོས་ནད་རིགས་དེ་ཡོད་པའི་གྲངས་འབོར་མང་རུ་འགྲོ་བ་ལས་ཉུང་དུ་ཕྱིན་མེད་པའི་སྐད་ཆ་འདུག་སྟབས།  ཕྱི་ཚེས་ ༡ ཉིན་འདི་གའི་གསར་འགོད་པས་ཀུན་ཕན་ལས་ཁུངས་སུ་བཅར་ཏེ་འགན་འཛིན་བསྟན་འཛིན་ལེགས་འཕེལ་ལགས་སུ་ང་ཚོའི་སྤྱི་ཚོགས་ནང་སྨྱོ་རྫས་སྤྱོད་མཁན་གྱི་རིགས་མང་དུ་འགྲོ་བའི་རྒྱུ་རྐྱེན་དང་དེ་དག་འགོག་པའི་ཐབས་ལམ། དེ་བཞིན་རེག་དུག་ན་ཚའི་སྐོར་བཅས་གནས་ཚུལ་ཁག་ཅིག་གི་ཐད་ནས་བཀའ་འདྲི་ཞུས་པར་ཁོང་གིས།  ངས་རང་གི་ལས་ཀའི་ཉམས་མྱོང་ལས་ཤེས་པ་ལྟར་ན། ང་ཚོའི་སྤྱི་ཚོགས་ནང་སྨྱོ་རྫས་རིགས་དང་དམིགས་བསལ་ཐ་མ་ནག་པོ་འཐེན་པའི་རིགས་དར་ཁྱབ་འགྲོ་བཞིན་པའི་རྒྱུ་རྐྱེན་གཙོ་བོ་ནི། རྒྱ་གར་སྤྱི་ཚོགས་ནང་དེའི་རིགས་ལ་དམིགས་བསལ་གྱི་དམ་དྲག་བྱེད་ཀྱི་མེད་པར་མ་ཟད། དབྱིན་སྐད་དུ་ marowana  ཞེས་པའི་ཐ་མ་དེ་བཞུགས་སྒར་གཡས་གཡོན་གྱི་སྦག་སུ་གཙོས་པའི་ཇ་ཁང་ཆེ་ཆུང་ཁག་དང་། རྩེད་མོ་རྩེས་ས་འདྲ་མིན་ནང་རིན་གོང་ཁེ་བོའི་ཐོག་རག་གིན་ཡོད་པ་དང་། དེ་བཞིན་ང་ཚོའི་གཞོན་སྐྱེས་གང་མང་ཞིག་གིས་དེ་ནི་ནུབ་ཕྱོགས་རྒྱལ་ཁབ་གྱི་དར་སྲོལ་ཞིག་ཏུ་མཐོང་སྟེ་རྗེས་འབྲངས་བྱེད་ཀྱིན་ཡོད་པ་དང་། རྒྱ་གར་གྱི་གྲོང་ཁྱེར་ཆེ་ཁག་མང་ཆེ་བའི་ནང་དར་ཁྱབ་ཆེ་བ་དང་ནུབ་ཕྱོགས་ཀྱི་མི་སྣ་འདྲ་མིན་དང་འབྲེལ་འདྲིས་བྱས་ཏེ་ཁོར་ཡུག་དེའི་ནང་མཉམ་ཞུགས་གནང་བའི་དབང་གིས་ང་ཚོའི་སྤྱི་ཚོགས་ནང་རིམ་བཞིན་དར་ཁྱབ་དུ་ཕྱིན་པ་ཞིག་རེད་ལ། ཡང་སྒེར་གྱི་སྨན་ཁང་གང་མང་དུ་སྨན་རང་དགར་ཉོས་ཆོག་པ་སོགས་ཀྱིས་རྒྱ་ཁྱབ་དུ་ཕྱིན་པའི་དབང་གིས་ང་ཚོའི་སྤྱི་ཚོགས་ནང་ཐ་མ་ནག་པོ་སྤྱོད་མཁན་མང་དུ་འགྲོ་བཞིན་འདུག   ཐ་མ་དེའི་རིགས་དེ་ང་ཚོས་ནམ་རྒྱུན་འཐེན་བཞིན་པའི་ཐ་མ་ལྟ་བུ་མིན་པར། ཐད་ཀར་མིའི་ཀླད་རྩ་དང་སྙིང་རྩ་གཙོས་པའི་ལུས་པོའི་ནང་གི་ཡན་ལག་གཙོ་བོའི་རིགས་ལ་གནོད་སྐྱེལ་ཀྱིན་པར་མ་ཟད། དམིགས་བསལ་དེ་འཐེན་པའི་རིགས་ཀྱི་མིག་ལ་སྐྱོན་འབྱུང་གི་ཡོད་པ་དང་། མིའི་ལུས་ཟུངས་ཟད་དེ་ན་ཚ་འདྲ་མིན་འགོ་སླ་བའི་གནས་སུ་བསྐྱལ་གྱིན་ཡོད་ལ། དེའི་རིགས་མང་ཆེ་བར་གློ་ཚད་ཀྱི་ན་ཚ་མང་པོ་འབྱུང་གི་ཡོད་ཅེས་འགྲེལ་བརྗོད་གནང་བྱུང་།

ཁོང་གིས་མུ་མཐུད་དོན།  འདས་པའི་ལོ་འགའི་རིང་བཞུགས་སྒར་དུ་གཞོན་སྐྱེས་མང་པོ་ཞིག་གིས་ཐ་མ་ནག་པོ་སྤྱད་དེ་དཀའ་ངལ་འཕྲད་བཞིན་པའི་རིགས་མང་པོ་བྱུང་ཡོད་སྟབས།  དེའི་ཁྲོད་ཀྱི་མི་ ༡༢༠ ལྷག་ལ་ཀུན་ཕན་ལས་ཁུངས་ཀྱིས་སྨན་བཅོས་དང་བརྟག་དཔྱད་ཀྱིས་སྤངས་ཐབས་བྱས་པ་ཡིན།  དེ་ཡང་གཙོ་བོ་དོ་བདག་སོ་སོའི་ངོས་ནས་བསམ་བློ་བཏང་སྟེ་ང་ཚོ་བཙལ་ཡོང་དུས་ང་ཚོས་ཐད་ཀར་ལྡི་ལིར་ཡོད་པའི་སྨན་ཁང་ནང་བཏང་སྟེ་ཟླ་ ༦ རིང་བོད་གཞུང་འཕྲོད་བསྟེན་ལས་ཁུངས་ཀྱི་རོགས་སྐྱོར་འོག་སྨན་རིན་སྐར་གང་ཡང་སྤྲོད་མི་དགོས་པའི་ཐོག་སྨན་བཅོས་བྱེད་ཀྱིན་ཡོད་པ་རེད།  ཡིན་ན་ཡང་། སྤངས་ཟིན་པ་ཁག་ཅིག་ལ་ཕ་མ་དང་ཁྱིམ་ཚང་ཡོད་པ་དང་ཁག་ཅིག་ལ་མེད་པའི་དབང་གིས། ཡང་བསྐྱར་འཐེན་པའི་ཉེན་ཁ་ཡོད་སྟབས། ང་ཚོས་ཁྱིམ་ཚང་དང་ནང་མི་མེད་པའི་རིགས་ལ་རྗེས་ཀྱི་ལྟ་སྐྱོང་ (after care) ཞེས་པའི་ཁང་པ་དམིགས་སུ་བཙུགས་ཏེ་བདག་སྐྱོང་བྱེད་ཀྱིན་ཡོད། ཁག་ཅིག་ལ་ལས་ཀ་འདྲ་མིན་སྤྲད་དེ་རྩ་བ་ནས་སྤངས་ཐུབ་པ་བྱུང་ཡོད་སྟབས། ང་ཚོའི་ལས་ཁུངས་ཀྱིས་མ་འོངས་པར་ཤེས་རབ་དགའ་ཚལ་སློབ་གླིང་ཉེ་འགྲམ་དུ་ས་གསར་བ་ཞིག་ཉོས་ཡོད་པའི་ཐོག་ལས་ཁུངས་གསར་བ་ཞིག་རྒྱག་འཆར་ཡོད་ལ། དེའི་ནང་བོད་པ་རང་གི་སྨན་པ་དང་ལས་བྱེད་བསྡུ་རུབ་ཀྱིས་དེའི་ཐོག་ལ་དམིགས་བསལ་ལས་ཀ་སྤེལ་རྩིས་ཡོད་ཚུལ་འགྲེལ་བརྗོད་གནང་བྱུང་།
 
མཐའ་མར་ཁོང་གིས་རེག་དུག་ན་ཚ་དང་འབྲེལ་ནས་བརྗོད་དོན། ད་ལྟའི་ཆར་ང་ཚོའི་བཙན་བྱོལ་སྤྱི་ཚོགས་ནང་བོད་གཞུང་འཕྲོད་བསྟེན་ལས་ཁུངས་དང་འདེམས་ཀ་ཚོགས་པ། ཀུན་ཕན་བཅས་མཉམ་རུབ་ཐོག་རེག་དུག་གི་ནད་འབུ་ HIV དང་རེག་དུག་ཐོག་ལས་ཀ་བྱེད་ཀྱིན་ཡོད། སྤྱིར་ང་ཚོའི་བཙན་བྱོལ་སྤྱི་ཚོགས་ཆུང་ཆུང་ཞིག་ཡིན་ནའང་། སྨྱོ་རྫས་སྤྱོད་མཁན་ནི་ནུབ་ཕྱོགས་པའི་རྩི་སྟངས་ལྟར་ན་མང་ཤོས་ཤིག་ཆགས་འདུག  ད་ལྟའི་ཆར་གཞིས་ཆགས་ཁུལ་རེ་གཉིས་མ་གཏོགས་མང་ཆེ་བའི་ནང་ན་ཚ་དེའི་རིགས་ཁྱབ་ཡོད་པ་དང་། ལྷག་པར་དུ་བཞུགས་སྒར་ཁུལ་ཏུ་སྔོན་མ་མི་གྲངས་ ༣༠༠ ཡོད་པའི་སྐོར་གསལ་བསྒྲགས་བྱས་ཡོད་པ་དེ་ལས་མང་དུ་མ་གཏོགས་ཉུང་དུ་ཕྱིན་ཡོད་པ་མ་རེད་ལ། གཞིས་ཆགས་ཁུལ་ལས་བཞུགས་སྒར་ཁུལ་དུ་མང་བ་ཡོད་པའི་ཚོད་དཔག་བྱེད་ཀྱིན་ཡོད་པ་རེད། དེ་བཞིན་གཞོན་སྐྱེས་ཚོར་ན་ཚ་དེའི་རིགས་མང་བར་མ་ཟད། ལྷག་པར་དུ་བོད་ནས་ཡོང་མཁན་ཚོར་མང་བ་ཡོད་པ་ཞིག་ཏུ་མཐོང་གི་ཡོད་ཅེས་འགྲེལ་བརྗོད་གནང་བ་དང་འབྲེལ། ཁོང་གིས། མ་འོངས་པར་ན་ཚ་དེའི་རིགས་ཡོད་པའི་རིགས་ལ་སྔོན་འགོག་གི་ཐབས་ལམ་དང་སློབ་གསོ་རྒྱག་རྒྱུ་གལ་ཆེན་པོ་ཡིན་པར་མ་ཟད། ན་ཆ་དེའི་རིགས་ཡོད་པའི་གཞོན་སྐྱེས་དག་གི་ཕ་མ་དང་གཉེན་ཉེ། གྲོགས་པོ་ཡོངས་ཀྱིས་དེའི་རིགས་སྦས་གསང་མི་བྱ་བར། ཁ་གསལ་བོའི་ཐོག་ནས་ལས་ཁུངས་སུ་བཅར་བ་དང་། ཁ་པར་དང་དྲ་རྒྱ་སོགས་བརྒྱུད་ལམ་འདྲ་མིན་གྱི་སྟེང་ནས་ང་ཚོར་འབྲེལ་བ་བྱས་ཏེ་ན་ཚ་སེལ་ཐབས་བྱ་རྒྱུའི་རེ་བ་དང་འབོད་སྐུལ་ཡང་གནང་བྱུང་བར་མ་ཟད། བཙན་བྱོལ་བོད་མིའི་སློབ་གྲྭ་ཁག་གི་འཛིན་རིམ་ ༡༠ ནས་ ༡༢ བར་གྱི་སློབ་མ་ཚོས་ཀྱང་སྦྱར་རྩི་དང་ས་སྣུམ་སོགས་སྤྱོད་ཀྱིན་པའི་རིགས་མང་པོ་ཡོང་གི་ཡོད་སྟབས། དེར་ཡོད་དགེ་རྒན་དང་ཕ་མ་ཡོངས་ཀྱིས་དེའི་ཐད་ལ་དོ་སྣང་དང་འགོག་ཐབས་བྱ་དགོས་པའི་རེ་བ་དང་འབོད་སྐུལ་ཡང་གནང་བྱུང་།

ཀུན་ཕན་ཞེས་པའི་ཚོགས་པ་འདི་ནི། ༢༠༠༠ ལོའི་ཕྱི་ཟླ་ ༡༢ པའི་ནང་བཙན་བྱོལ་བོད་མིའི་སྤྱི་ཚོགས་ནང་སྨྱོ་རྫས་རིགས་སྤྱོད་མཁན་ལ་དམིགས་ཏེ་གསར་འཛུགས་གནང་བ་ཞིག་ཡིན་འདུག་ལ། དེ་དང་འབྲེལ་ཚོགས་པ་འདིས་རེག་དུག་ན་ཚ་ཡོད་མཁན་རིགས་ལའང་རོགས་སྐྱོར་བྱེད་ཀྱིན་ཡོད་པ་རེད། ད་ལྟའི་ཆར་སྨྱོ་རྫས་སྤྱོད་མཁན་མི་ ༡༢༠ ལྷག་ལ་རོགས་སྐྱོར་བྱས་ཡོད་འདུག  མ་འོངས་པར་ལས་ཁུངས་འདི་གཞི་རྒྱ་ཆེ་རུ་བཏང་སྟེ་སྤྱི་ཚོགས་ནང་བོད་པ་རང་གིས་ཐ་མ་ནག་པོ་སྤྱོད་མཁན་རིགས་ལ་ལྟ་རྟོག་དང་སྨན་བཅོས་བྱ་རྒྱུའི་དམིགས་ཡུལ་དང་ལས་འཆར་སྒྲིག་གིན་ཡོད་འདུག

གསར་འགོད་པ། དོན་གོ།