་་་་་་་་་་་་་་་་་་་་་་རང་གི་བུ་མོ་ཐར་མ་མཚོ་ལ་བྲིས།
བུ་མོ་ཆུང་ཆུང་ཁྱེད དོན་དངོས་སུ
སྐྱེ་བ་ནས་ང་དང་ཅི་ཞིག་གི་འབྲེལ་བ་ཡོད་མེད་སུས་ཤེས
འོན་ཀྱང་ ད་རེབས་ཕ་བུའི་མིང་ཐོག་ནས་ཁྱེད་རང་སླེབས
འཛམ་གླིང་འདིར་སླེབས་ནས་ལོ་ངོ་གཅིག
ཏག་ཏག ལོ་ངོ་གཅིག་ཏག་ཏག་འགོར་སོང་
དེ་རིང་ནི་ཕྱི་ལུགས་ཀྱི་སྲོལ་ཞིག་འབྲེལ་བའི་གཏམ་རྒྱུད་དེ
སྐྱེས་སྐར་གྱི་ཉིན་མོ་ཞིག་བསུས་དུས
ཁྱེད་ཀྱི་མཐའ་བསྐོར་དུ་ཕ་ངོ་ཤེས་མཁན་དང་མ་ངོ་ཤེས་མཁན་འགའ
མི་ཚེའི་ཤིས་ཚིག་སྒྲོག་མཁན་མི་ཉུང་བ་ཞིག་འཁོར
དེ་དུས ཁྱེད་ཀྱི་རང་གི་ལག་པ་ཆུང་ཆུང་དེ་གཉིས་གནམ་ལ་གཡུགས་ཀྱིན
མགྲོན་པོ་ཚོར སླད་མེད་ཀྱི་འཛུམ་མདངས་ཤིག་ག་ལེར་མངོན
ཁྱེད་ཀྱི་ཨ་མའི་ལག་ཟས་སྒོང་སྤོར་གྱི་གསོལ་སྟོན
ཁྱེད་ཀྱི་ཕ་རྒན་ངའི་ལག་ཟས་བོད་ཟས་འགའ
ད་དུང་ ཨ་མ་རྒན་མོའི་ཉོས་པའི་མངར་ཆུ་དང་མངར་ཆའི་རིགས
ཕྱི་མི་ཚོས་ཉོས་པའི་ལག་སྐྱེས་མི་ཉུང་བ་ཞིག
སྐྱེད་ཚལ་དེ་ནས ཁྱེད་དང་ལོ་ན་ཅུང་ཆེ་བའི་བྱིས་པ་དག་གིས
མིག་ཟུང་ཆུང་ཆུང་ཆ་མི་ཉུང་བ་འགའི་ཁྱེད་ལ་བལྟ་ཞོར
ཁྱེད་རང་གི་ལོ་ངོ་གཅིག་གི་ཚེ་སྲོག་གི་བསྟོད་གླུ་བླངས
ཁྱེད་ཀྱི་སྐྱེ་སྐར་ལ་བཀྲ་ཤིས་བདེ་ལེགས
ཁྱེད་ཀྱི་འཚོ་བ་གསར་བའི་སྨོན་འདུན་ཡོད་ཚད
ཁྱེད་ཀྱི་བྱིས་པའི་ལང་ཚོའི་མེ་ཏོག་རེ་རེ
དབྱར་དགུན་སྟོན་དཔྱིད་ཀྱི་རྨི་ལམ་མཐའ་དག
བསམ་དོན་ལྷུན་འགྲུབ་ཡོང་བར་ཤིས་ཚིག་ཡོད
སྐྱེ་སྐར་བཟང་
གཅེན་པོ་ལགས། ཉིད་ཀྱིས་བདག་གི་བུ་མོའི་སྐྱེས་སྐར་ལ་ཤིས་ཚིག་ཕུལ་བ་དེར་ངས་བདག་གི་བུ་མོའི་ཚབ་བྱས་དེ་བཀའ་དྲིན་ཆེ་ཞུ། ཡུན་རིང་ཞིག་ལ་མཇལ་རྒྱུ་མི་འདུག ད་སྐབས་གཞི་ནས་མཐོང་བ་དེར་དགའ་ཡོད་ལགས།
ཐར་མ་མཚོ།
ཁྱེད་ན་ནིང་མི་ཡུལ་འདིར་ཕེབས་སྐབས།
ངས་ཁྱེད་ལ་བཀྲིས་ཀྱི་གླུ་དབྱངས་ཕུལ་མྱོང་ཡོད་ལ།
ཁྱེད་ད་སྐབས་བགྲང་བྱ་གཅིག་འཁོར་བའི་དུས་དྲན་ལ།
ངས་ཁྱེད་ལ་འཁྲུངས་སྐར་གྱི་བཀྲིས་ཅིས་མི་ཞུ།
ཐར་མ་མཚོ།
ཁྱེད་ད་སྐབས་འཇིག་རྟེན་འདི་ག་འདྲ་ཞིག་ཡིན་པ་ག་ལ་རྟོགས།
ཟང་ཟིང་གི་འཇིག་རྟེན་འདི།
བརྗོད་མི་ཚར་བའི་འཕྲུལ་གྱི་སྒམ་ཆུང་ཞིག
འཕྲུལ་སྒམ་འདིས་བདེ་སྡུག་གི་འཚོར་བ།
ངམ་ངམ་ངང་གནང་སྲིད་ལ།
འཕྲུལ་སྒམ་འདིས་ཉིན་མ་ལོ་དང་ལོ་ཟླ་ཉིན་རེར་སྟོན་སྲིད།
ཐར་མ་མཚོ།
ཡོད་ཚད་ལ་བདེན་པར་མི་ལྟ།
དྲན་ཚད་ལ་རྗེས་དྲན་མ་བྱེད།
ཐར་མ་མཚོ།
ཁུ་བོ་ངས་ཁྱེད་ལ་བཤད་འདོད་ཀྱང་།
ཁྱེད་ཀྱི་ད་སྐབས་གོ་མི་སྲིད།
སྙིང་ཉེ་བའི་ཐར་མ་མཚོ།
མི་རིགས་ཀྱི་མཛངས་མ་ཞིག་དང་།
ཞི་བདེ་ཡི་ཕོ་ཉ་ཞིག
ངའི་རེ་སྨོན།
ཁྱེད་ཀྱི་མངོན་འདོད།
ཕ་ཡི་ཕུགས་བསམ།
མ་ཡི་གསོལ་འདེབ།
འབུར་ཐོ་ལགས། ཉིད་ཀྱི་ཟིན་བྲིས་མཛད་སྒོའི་སྟེང་དུ་ང་རང་བཅར་ཐུབ་མ་བྱུང་བ་དེར་དགོངས་འགལ་མེད་པ་ཞུ། ཕྱོགས་གཞན་ཞིག་ནས་ཉིད་ཀྱི་ཟིན་བྲིས་མཛད་སྒོའི་མགྲོན་ཤོག་ཡང་སླེབས་མ་སོང་། གང་ལྟར། ཉིད་རང་འདིར་ཕེབས་ནས་ངའི་བུ་མོའི་སྐྱེས་སྐར་ལ་ཤིས་ཚིག་བརྗོད་པ་དེར་དགའ་ནས་ཡོད།
ཁྱོའི་བྱིས་པའི་སྐྱེས་སྐར་ཉིན་མོ་རུ།།
བུ་འབུར་ཐོ་ཡོང་འདོད་སྐྱེས་མོད་ཀྱང་།།
ངའི་ཟིན་བྲིས་མཛད་སྒོ་ཡིན་ཕྱིར་ན།།
ཡོང་མ་ཐུབ་དགོངས་འགལ་མེད་པར་ཞུ།།
གཅན་བཟོད་རྒྱམ་ལགས། ཉིད་རང་ཕེབས་པ་སྔ་ནས་ཤེས་ཡོད། འོན་ཀྱང་། ཉིད་ཀྱིས་འདྲ་དཔར་ཞིག་གསུངས་འདུག ད་རེབས་འདྲ་དཔར་བཞག་མེད། འདྲ་དཔར་ཞིག་ཡོད་ཀྱང་འཇོག་ཁོམ་མ་བྱུང་ཐལ། ཁ་སང་དེ་རིང་གཉིས་ཀ་ཁོ་མོའི་སྐྱེས་སྐར་བཏང་བ་ཡིན། ཁ་སང་རང་གི་ངོ་ཤེས་བོད་པ་ཚོ་དང་དགའ་རོགས་མའི་ངོ་ཤེས་ཚོ་བོས་པ་ཡིན། དེ་རིང་དགའ་རོགས་མའི་ནང་མི་ཚོ་སླེབས་པ་རེད། ཉིན་འདི་གཉིས་ཀྱི་རིང་དུ་ཁོང་ཚོར་ཞབས་ཞུ་བྱས་དེ་ཁོམ་མ་སོང་། ད་ནི་ཚང་མ་ཕེབས་ཚར་རྗེས་སུ་ཟིན་བྲིས་སུ་ཡོང་ནས་སྤུན་ཟླ་དག་གི་ཟིན་བྲིས་གསར་བ་དག་ཀློག་བཞིན་ཡོད། དེ་ཡི་བར་ནས་ཁྱེད་རང་གཞི་བདག་ལྟ་བུ་ཞིག་གི་སྐྱེ་བླངས་དེ་མཆན་པུ་ཞིག་བཏགས་ནས་ཕེབས་ཚར་འདུག རྗེས་སུ་ཁོམ་དུས་སུ་ཡོང་གི་བསྡོད། བསམ་ཚུལ་གང་ཡོད་སྔར་བཞིན་ཤར་མར་གསུང་རྐྱང་བྱོས།
རྩིམ་ཡིག་སྔོན་ནས་བཀླགས་ཟིན། བུ་མོ་ཐར་མའི་པར་ཞིག་ཡོད་ས་རེད་དེ། དེང་སང་ངའི་རྩིས་འཁོར་ནང་ནས་དུས་བབ་ཚང་གི་པར་ཤར་གྱི་མི་འདུག
རང་བཙན་ལག་དེབ་ཀྱི་སྐོར་དེ་ཁ་གསལ་གཏིང་གསལ་ཞིག་ངས་རྩད་གཅོད་ཅིག་ཨེ་ཐང་བལྟ་ཡོང་ཡ།
གཉའ་འབྲོང་ཐུ་བུ་དང་ཅོ་རི་ཉི་མ་རྣམ་གཉིས་ལགས། ཁྱེད་རྣམ་པ་གཉིས་བདག་གི་བུ་མོའི་སྐྱེས་སྐར་ལ་ཤིས་ཚིག་བརྗོད་དུ་ཕེབས་པ་བཀའ་དྲིན་ཆེ་ལགས། ཅོ་རི་ཉི་མ་ལགས། རྡ་ས་ནས་རང་བཙན་ལག་དེབ་མེ་བསྲེག་གཏོང་དགོས་མིན་སྐོར་དེ་བརྩད་དེ་ཚར་ས་ཞིག་མ་རེད། དེ་ལས་རང་བཙན་ལག་དེབ་ཀྱི་མིང་འདི་གཏན་ནས་མེད་ས་ཞིག་ནས་ཁ་རོག་གེར་བསྡོད་མཁན་གྱི་བོད་མི་སྡར་མ་ང་འདྲ་བ་དག་གིས་རང་གི་མི་རིགས་འདི་ལ་སྲི་ཞུ་གང་ཞིག་སྒྲུབ་ཐུབ་མིན་སྐོར་ལ་བསམ་གཞིགས་རེ་བྱེད་རན་རེད་འདུག་ལགས།
ཁྱེད་ཀྱི་བུ་མོ་དེའི་བོད་སྐད་ཡག་པོ་ཤེས་མཁན་ཞིག་ཡོང་བ་སྨོན། ཁྱེད་ཀྱི་ཁྲག་རྒྱུད་ལ་བོད་སྐད་མི་ཤེས་མཁན་མེད་པར་ཤོག
རྡ་ས་ཕྱིན་ནས་རང་བཙན་ལག་དེབ་མེ་སྲེག་བཏང་ཚར་བས། ཁག་མེད་ཡ། བཙན་བྱོལ་བོད་གཞུང་ཞེས་པའི་མིང་ཡང་འགྱུར་འགྲོ་དུས་བྱེད་རྒྱུ་དེ་ལས་ག་རེ་ཡོད།
ཁྱེད་ཀྱི་བྱིས་པར་ནད་མེད་ཚེ་རིང་བསམ་དོན་ལྷུན་འགྲུབ་མྱུར་དུ་འཚར་ལོང་འབྱུང་བའི་སྨོན་འདུན་ཞུ།