དེ་རིང་གི་འཁྲབ་སྟོན་གྱི་རྣམ་པ་ལས་སྒྱུ་རྩལ་གྱི་ཁ་ཕྱོགས་ལ་གསར་གཏོད་ཀྱི་རྣམ་པ་ལྡན་ཞིང་ཡར་རྒྱས་ཀྱི་ཚོར་སྣང་ཞིག་བྱུང་སོང་། མ་འོངས་པར་ཡང་གཙོ་བོ་བོད་ཀྱི་གནའ་རབས་ཀྱི་གླུ་གར་སྒྱུ་རྩལ་མི་ཉམས་རྒྱུན་འཛིན་དང་། དེ་དང་མཉམ་དུ་དེང་དུས་དང་མཐུན་པའི་ཟློས་གར་སྒྱུ་རྩལ་རིགས་འབུར་དུ་ཐོན་པ་ཞིག་ཡོང་རྒྱུར་འབད་བརྩོན་གནང་རྒྱུ་གལ་ཆེན་པོ་རེད་ཅེས་དཔལ་རྒྱལ་བ་ཀརྨ་པ་མཆོག་གིས་གསུངས་ཡོད།
བོད་གཞུང་ཟློས་གར་ཚོགས་པ་དབུ་བརྙེས་ཏེ་མི་ལོ་ ༥༡ འཁོར་བའི་དུས་དྲན་དང་། ལྔ་བཅུའི་དུས་དྲན་མཇུག་བསྡོམས་ཀྱི་མཛད་སྒོ་དེ་ཁ་སང་ཕྱི་དྲོར་བོད་གཞུང་ཟློས་གར་ཚོགས་ཁང་ནས་ཚོགས་ཡོད་པ་དང་། སྐུ་མགྲོན་གཙོ་བོར་དཔལ་རྒྱལ་བ་ཀརྨ་པ་མཆོག་ཕེབས་འདུག་ལ། བཙན་བྱོལ་བོད་གཞུང་གི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། ཟློས་གར་ཚོགས་པའི་ཚོགས་མི་ཟུར་བ་དང་འབྲེལ་ཡོད་མི་སྣ་བཅས་མི་གྲངས་ ༡༥༠ ལྷག་འདུ་འཛོམས་བྱུང་ཡོད། མཛད་སྒོའི་ཐོག་མར་ཀརྨ་པ་མཆོག་གིས་ཟློས་གར་ཚོགས་པའི་མཆོད་ཁང་ལ་རབ་གནས་མཛད་ཅིང་། ཁམས་སྐྱེ་རྒུ་མདོའི་ས་ཡོམ་དང་། ཉེ་ཆར་ལ་དྭགས་དང་མདོ་སྨད་འབྲུག་ཆུ་བཅས་སུ་རང་བྱུང་ཁམས་ཀྱི་གོད་ཆགས་ཐེབས་པའི་མི་མང་རྣམས་ལ་གདུང་སེམས་མཉམ་སྐྱེད་དང་བསྔོ་བ་སྨོན་ལམ་གྱི་མར་མེ་སྒྲོན་འབུལ་ཞུས་ཡོད།
དེའི་རྗེས་ཟློས་གར་ཚོགས་པའི་སྤྱི་ཁྱབ་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་ཀྱིས་ལོ་འཁོར་ལས་བསྡོམས་སྙན་སྒྲོན་དང་སྦྲགས་འདས་པའི་ལོ་གཅིག་རིང་ཕྱི་རྒྱལ་ཡུལ་གྲུ་ཁག་དང་རྒྱ་གར་གྱི་མངའ་སྡེ་ཁག དེ་བཞིན་བོད་མི་འདུས་སྡོད་ཀྱི་ས་གནས་དང་སློབ་གྲྭ་ཁག་ཏུ་འཁྲབ་སྟོན་གནང་བ་ངོ་སྤྲོད་གནང་སོང་། རྒྱལ་བ་ཀརྨ་པ་མཆོག་གིས་༼ བོད་གཞུང་ཟློས་གར་ཚོགས་པའི་ལོ་རྒྱུན་ཀུན་བཟང་ཞིང་གི་མཆོད་སྤྲིན་མིག་ཡིད་རྣ་བའི་དགའ་སྟོན ༽ ཞེས་པའི་དཔེ་དེབ་དང་༼ སྐྱོར་མོང་ལུང་གི་འཁྲབ་གཞུང་དྭངས་ཤེལ་མེད་ལོང ༽ ཞེས་པའི་འཁྲབ་གཞུང་དེབ་གཟུགས་དང་བརྙན་འཁོར་མཉམ་སྦྱར་དབུ་འབྱེད་གནང་ཡོད་ཅིང་། སྐབས་དེར་རྔོན་པ་རུ་ཁག་དང་རྒྱ་ལུ་རུ་ཁག་གཉིས་ཀྱིས་རྐང་གཞས་དང་འཁྲབ་གཞས། མཉམ་གཞས་སོགས་འགྲན་བསྡུར་བྱས་མཐར་རྒྱ་ལུ་རུ་ཁག་ལ་ཨང་དང་པོ་དང་། རྔོན་པ་རུ་ཁག་ལ་ཨང་གཉིས་པ་བཅས་ཐོབ་སྟེ་རུ་ཁག་དེ་གཉིས་དང་། མི་ལོ་ ༢༠ འཁོར་བའི་ཟློས་གར་ཚོགས་མི་དང་གཟུ་དཔང་པ་བཅས་ལ་བྱ་དགའི་གསོལ་རས་གནང་ཡོད།
རྒྱལ་བ་ཀརྨ་པ་མཆོག་གིས་བཀའ་སློབ་གསུང་བཤད་གནང་དོན། སྤྱིར་ང་རང་ཆོས་སྲིད་གང་གི་ཐད་ལ་ཤེས་རྒྱ་ཆུང་བ་དང་། ལྷག་པར་དུ་ཟློས་གར་རིག་གནས་ཐད་དམིགས་བསལ་ཞུ་ཐུབ་པ་གང་ཡང་མི་འདུག ཡིན་ནའང་། བོད་གཞུང་ཟློས་གར་ལ་མཚོན་ན། བོད་པའི་རིག་གནས་སྲུང་སྐྱོབ་བྱེད་སའི་བསྟི་གནས་གལ་ཆེན་ཞིག་ཆགས་ཡོད་ལ། ལྷག་པར་དུ་དེང་སང་འཛམ་གླིང་སྟེང་བོད་ལ་གླུ་གར་གྱི་རྒྱ་མཚོ་ཞེས་འབོད་ཀྱིན་ཡོད་པ་དང་། ཕུལ་ཏུ་བྱུང་བའི་དམངས་ཁྲོད་གླུ་གར་དུ་མ་ཞིག་བོད་གངས་ཅན་གྱི་ལྗོངས་སུ་མི་རབས་ནས་མི་རབས་བརྒྱུད་དེ་བྱུང་ཡོད་སྟབས། འདི་དག་མི་ཉམས་རྒྱུད་འཛིན་དང་ཉམས་པ་སླར་གསོ་བྱ་རྒྱུ་དེ་ཟློས་གར་ཚོགས་པའི་གཞི་རྐང་གི་ལས་འགན་གཙོ་བོ་ཆགས་ཡོད་ལ། ཚོགས་པ་འདིའི་སྔ་གཞུག་བར་གསུམ་གྱི་ཚོགས་མི་རེ་རེའི་ངོས་ནས་རང་ཉིད་ལ་ཡོད་པའི་འགན་འཁྲི་སེམས་ནས་མི་འདོར་བར་རྒྱལ་བའི་དགོངས་པ་བསྒྲུབས་ཤིང་། བོད་མིའི་ཆོས་སྲིད་ཀྱི་དོན་ལ་ལེགས་སྐྱེས་འཕར་མ་ཞིག་ཕུལ་ཐུབ་པ་བྱུང་བ་དེར་ང་རང་གི་ངོས་ནས་བཀའ་དྲིིན་རྗེས་དྲན་ཞུ་རྒྱུ་ཡིན་ལ། མ་འོངས་པར་ཡང་མུ་མཐུད་དེ་རྡོག་རྩ་གཅིག་སྒྲིལ་དང་ལྷག་བསམ་རྣམ་དག་གི་ཐོག་ནས་འབད་བརྩོན་གནང་རོགས་ཞེས་འབོད་སྐུལ་ཞུ་རྒྱུ་ཡིན།
ཁོང་གིས་མུ་མཐུད་དུ་གསུངས་དོན། དེ་རིང་ང་རང་དབྱར་སྐྱིད་སྟེང་ཕེབས་ཐེངས་དང་པོ་ཡིན། དེ་རིང་གི་འཁྲབ་སྟོན་གྱི་རྣམ་པ་ལས་སྒྱུ་རྩལ་གྱི་ཁ་ཕྱོགས་ལ་གསར་གཏོད་ཀྱི་རྣམ་པ་ལྡན་ཞིང་ཡར་རྒྱས་ཀྱི་ཚོར་སྣང་ཞིག་བྱུང་སོང་། མ་འོངས་པར་ཡང་གཙོ་བོ་བོད་ཀྱི་གནའ་རབས་ཀྱི་གླུ་གར་སྒྱུ་རྩལ་མི་ཉམས་རྒྱུན་འཛིན་དང་། དེ་དང་མཉམ་དུ་དེང་དུས་དང་མཐུན་པའི་ཟློས་གར་སྒྱུ་རྩལ་རིགས་འབུར་དུ་ཐོན་པ་ཞིག་ཡོང་རྒྱུར་འབད་བརྩོན་གནང་རྒྱུ་གལ་ཆེན་པོ་རེད། ཐེངས་འདིའི་ཟློས་གར་ཚོགས་པའི་འཁྲབ་སྟོན་བརྒྱུད་བོད་ཀྱི་ཆོས་དང་རིག་གཞུང་སྲུང་སྐྱོབ་ཀྱི་སྙིང་སྟོབས་དང་། ནུས་པ་དེ་ད་ལྟའི་དུས་འདིར་ཡང་བོད་མིའི་སྤྱི་ཚོགས་ཁྲོད་ཉམས་མེད་པ་ཞིག་དང་། སྔར་ལས་དར་ཞིང་རྒྱས་པ་ཡོང་བའི་རེ་བ་དང་ཡིད་ཆེས་བྱེད་ཀྱིན་ཡོད་ཅེས་གསུངས་བྱུང་།
གསར་འགོད་པ། དོན་གོ་དང་དཔལ་ལྡན་རྒྱ་མཚོ།
ཟློས་གར་ཚོགས་པའི་ནང་བོད་ནང་གི་གླུ་བ་གླུ་མ་ནང་བཞིན་ཡོང་མི་ཐུབ་པའི་རྒྱུ་མཚན་གཙོ་བོ་དམངས་ཁྲོད་ནས་སྐད་དང་ལུས་ཀྱི་སྒྱུ་རྩལ་ཆ་ཅན་ཡོད་པ་ཚོ་བསྡུ་རུབ་མི་བྱེད་པས་རེད་འདོད། ཟློས་གར་དུ་ཚུད་དགོས་ན་འགོ་འདྲེན་ཡོད་དགོས་པ་ལས་མི་སྐྱོ་པོ་དང་གསར་འབྱོར་སོགས་ཚུད་ཐུབ་གྱི་མེད་པ་སྔ་ས་ནས་གོ་མྱོང་ཡོད།
རྒྱལ་བ་ཀརྨ་པ་མཆོག་གིས། ཁོང་གིས་༼ཟློས་གར་རིག་གནས་ཐད་དམིགས་བསལ་ཞུ་ཐུབ་པ་གང་ཡང་མི་འདུག༽ཅེས་གསུངས་པ་འདི་བོད་མི་ཚང་མར་དཔེ་སྟོན་ལེགས་པོ་ཞིག་རེད། བོད་མི་ཚང་མས་རང་ཉིད་ཀྱིས་ཤེས་དང་མི་ཤེས་ཀྱི་དབྱེ་མཚམས་གསལ་བོ་ཞིག་འབྱེད་རྒྱུ་གལ་ཆེ་གི། ད་ལྟའི་དུས་འདིར་བཙན་བྱོལ་གཞུང་གི་མི་སྐྱེས་ཚང་མ་མཁས་པའི་དབང་པོ་རེད། གཏམ་བཤད་བཤད་ཡོད་ཚད་ཐམས་ཅད་མཁྱེན་པ་རེད། ད་ལྟའི་བར་དུ་བཙན་བྱོལ་སྤྱི་ཚོགས་སུ་རིགས་གཅིག་རྐང་འཛིན་པའི་ཆེད་མཁས་པ་ཞིག་རི་བོང་གི་ར་རུ་གྱུར་ཡོད་པར་ཀྱང་ཁག་མི་འདུག འདི་འདྲའི་སྤྱི་ཚོགས་ཤིག་ཏུ་རིགས་གཅིག་རྐང་འཛིན་ཞིག་ཅི་ལྟར་འབྱུང་ངམ། གལ་སྲིད། རིགས་གཅིག་རྐང་འཛིན་བརྒྱ་ཕྲག་ཅིག་ཡོད་པའི་དབང་དུ་བཏང་ནའང་། སྤྱི་ཚོགས་འདི་འདྲ་ཞིག་གི་ནང་ནས་རང་གི་ནུས་འཇོན་དང་བསྟུན་པའི་ལས་ཀ་སྒྲུབ་ས་ཞིག་དང་ནུས་པ་འདོན་ས་ཞིག་རེག་ཁག་པོ་རེད། ཁྲིམས་ལུགས་ཆེད་སྦྱོང་བ་སྒྱུ་རྩལ་གྱི་ལས་སྒོར་མངགས་པའམ། དཔལ་འབྱོར་ཆེད་སྦྱོང་བ་འཕྲོད་བསྟེན་གྱི་ལས་སྒོར་མངགས་པ་ལྟ་བུའི་མགོ་མེད་མཇུག་མེད་ཀྱི་འགྲོ་སྟངས་འདི་དག་ཀྱང་། རྩ་བ་མཁས་པའི་དབང་པོར་རློམ་མཁན་དང་ཐམས་ཅད་མཁྱེན་པར་འཇུག་མཁན་དག་གིས་བསྐྱེད་པ་རེད།
༼ བོད་གཞུང་ཟློས་གར་ཚོགས་པའི་ལོ་རྒྱུན་ཀུན་བཟང་ཞིང་གི་མཆོད་སྤྲིན་མིག་ཡིད་རྣ་བའི་དགའ་སྟོན ༽
༼ སྐྱོར་མོང་ལུང་གི་འཁྲབ་གཞུང་དྭངས་ཤེལ་མེད་ལོང ༽
གོང་གི་གསར་འགྱུར་ལས་འདིར་ཐད་བཤུས་བྱས་པ་ཡིན།
“བོད་གཞུང་ཟློས་གར་ཚོགས་པའི་ལོ་རྒྱུན་ཀུན་བཟང་ཞིང་གི་མཆོད་སྤྲིན་མིག་ཡིད་རྣ་བའི་དགའ་སྟོན།” ཞེས་པའི་ནང་གི་ལོ་རྒྱུན་ཞེས་པ་ལོ་རྒྱུས་ཡིན་མིན་ཁ་ཚོན་གཅོད་ཐབས་བྲལ། ད་དུང་ཞིབ་གཟིགས་གནང་དང་།
“སྐྱོར་མོང་ལུང་གི་འཁྲབ་གཞུང་དྭངས་ཤེལ་མེད་ལོང་།”
ཞེས་པའི་ནང་གི་སྐྱོར་མོང་ལུང་ཞེས་པ་སྟོད་ལུང་སྐྱོར་མོ་ལུང་ཡིན་ན་ནི། སྐྱོར་མོང་བྲིས་པ་དེ་ནོར་བ་འདྲ། དྭངས་ཤེལ་མེད་ལོང་། ཟེར་བ་ཡང་ནོར་བ་འདྲ། མེད་ལོང་དང་མེ་ལོང་གང་ཡིན་ཞིབ་དཔྱད་ཡོད་པ་ཞུ།།
ཁྲིམས་དཔོན་བསེ་རུས།
ད་དུང་ཡང་ཟློས་གར་ཚོགས་པའི་གླུ་བ་ཚོས་བོད་ནང་གི་གླུ་བ་ཚོས་ལངས་པའི་གླུ་ལྟ་བུ་ཡོང་མི་ཐུབ་པ་དེ་གཙོ་བོ་མི་མང་ཉུང་གི་ཁྱད་པར་ཤོར་བ་མིན་འགྲོ
ངོ་མ་དམ་པ་དེ་ཉིད་ཀྱི་མཁྱེད་སྟོབས་ལས་གནའ་བོའི་འུ་ཚུ་གི་གླུ་གར་སྒྱུ་རྩལ་གྱི་སྣང་བརྙན་རང་བཞིན་ངང་མིག་ལམ་དུ་འཆར་ཡོང་གི