སོ་སོའི་ལུས་དེ་བོད་མིའི་ཤ་ཁྲག་ལས་གྲུབ་པའི་ལུས་པོ་ཆགས་ཡོད་སྟབས། མ་འོངས་པར་ཁྱེད་རང་ཚོས་རང་ཉིད་བོད་པ་ཡིན་བསམ་པའི་འདུ་ཤེས་མ་བརླག་པའི་ཐོག་ནས་བོད་མི་རིགས་ཀྱི་རིག་གཞུང་ལ་བདག་པོ་རྒྱག་ཐུབ་ན། བོད་པའི་རྣམ་པ་ཚང་གི་ཡོད་ཅེས་༸གོང་ས་མཆོག་གིས་པ་ཏི་ཀུལ་བོད་ཁྱིམ་དུ་བཀའ་སློབ་གནང་ཡོད།
ཟླ་འདིའི་ཕྱི་ཚེས་ ༡༦ ཉིན་གྱི་སྔ་དྲོར་༸གོང་ས་མཆོག་བཞུགས་སྒར་ནས་རྒྱ་གར་བྱང་ཕྱོགས་ཧི་མ་ཅན་མངའ་སྡེའི་མུ་ན་ལི་དང་ཇིལ་སི་པི་ས་གནས་སུ་ཆིབས་བསྒྱུར་གནང་ཡོད་ལ། ཕེབས་ལམ་དུ་ཀུ་ལུའུ་ས་གནས་སུ་ཡོད་པའི་དྭགས་པོ་བཤད་སྒྲུབ་གླིང་གི་དྭགས་པོ་དགོན་པར་ཞབས་སོར་བཀོད་པ་དང་། དགོན་པའི་དགེ་འདུན་པ་རྣམས་ཀྱིས་༸གོང་ས་མཆོག་ལ་རིགས་ལམ་རྩོད་སྒྲུབ་ཀྱི་ཐོག་ནས་དམ་བཅའ་དང་རྟགས་གསལ་སྤྱན་འབུལ་ཞུས་ཤིང་། ༸གོང་ས་མཆོག་གིས་དེར་ཡོད་ཕྱི་གླིང་བ་དང་རྒྱ་རིགས། རང་རིགས་སེར་སྐྱ་མང་ཚོགས་ ༣༠༠༠ བརྒལ་བར་སྔོན་འགྲོའི་གསུང་ཆོས་དང་བྱང་སེམས་ཀྱི་སྡོམ་པ་བསྩལ་བར་མ་ཟད། དྭགས་པོ་རིན་པོ་ཆེ་མཆོག་གིས་༸གོང་ས་མཆོག་ལ་མནྜལ་རྟེན་གསུམ་འདེགས་འབུལ་ཞུས་ཡོད་པ་རེད། ཉིན་རྒྱབ་༸གོང་ས་མཆོག་མུ་ན་ལི་ནས་པ་ཏི་ཀུལ་བོད་ཁྱིམ་ལས་རིགས་སློབ་གྲྭར་ཆིབས་བསྒྱུར་བསྐྱངས་ཏེ། དགེ་ལས་སློབ་ཕྲུག་རྣམས་ལ་བཀའ་སློབ་གསུང་བཤད་གནང་ཡོད་པ་རེད།
སྐབས་དེར་༸གོང་ས་མཆོག་གིས། ད་ལྟའི་དུས་འདིར་ང་ཚོ་བོད་མི་རྣམས་ས་ཆ་གང་སར་ཁ་འཐོར་དུ་གནས་ཡོད་པ་རེད། ཡིན་ནའང་། ང་ཚོ་བོད་པ་ཡིན་པ་དེ་མ་ཤི་བར་དུ་འགྱུར་བ་འགྲོ་རྒྱུ་ཁྱོན་ནས་ཡོད་པ་མ་རེད། སོ་སོའི་ལུས་དེ་བོད་མིའི་ཤ་ཁྲག་ལས་གྲུབ་པའི་ལུས་པོ་ཆགས་བསྡད་ཡོད་སྟབས། མ་འོངས་པར་ཁྱེད་རང་ཚོའི་རང་ཉིད་བོད་པ་ཡིན་བསམ་པའི་འདུ་ཤེས་མ་བརླག་པའི་ཐོག་ནས་བོད་མི་རིགས་ཀྱི་རིག་གཞུང་ལ་བདག་པོ་རྒྱག་ཐུབ་པ་ཡིན་ན། བོད་པའི་རྣམ་པ་ཚང་གི་ཡོད། སོ་སོའི་ཤ་ཁྲག་རུས་གསུམ་བོད་པ་ཡིན་ཡང་བོད་སྐད་དང་བོད་ཡིག་མི་ཤེས་པར་མ་ཟད། རང་གི་རིག་གཞུང་ལ་དོ་སྣང་མེད་པའི་ངང་བསྡད་ན། བོད་པ་ཕྱེད་ཀ་ལྟ་བུ་ཞིག་རེད་ཅེས་བཀའ་སློབ་གནང་བ་དང་འབྲེལ། དེར་ཡོད་ལས་བྱེད་ཟུར་པ་བགྲས་སོང་ཁག་ཅིག་ལ་ཐུགས་བརྩེ་བ་ཆེན་པོས་འཚོ་གནས་ཀྱི་དུས་སྐབས་འདི་དོན་ལྡན་གྱིས་བསྐྱལ་དགོས་པ་དང་། མི་ཚེ་མཐའ་མའི་དུས་སྐབས་འདིར་དགེ་བ་སྒྲུབ་པ་དང་མཉམ་དུ་རང་ཉིད་ཀྱི་སྨན་བཅོས་འཕྲོད་བསྟེན་ལ་བདག་པོ་ཡག་པོ་རྒྱག་དགོས་པའི་བཀའ་སློབ་གནང་ཡོད་ལ། དེར་ཡོད་སྐྱེ་རྒུ་མདོའི་ས་ཡོམ་བྱུང་ཡུལ་གྱི་སློབ་མ་ཁག་ཅིག་ལ་དམིགས་བསལ་གྱི་མཇལ་ཁ་དང་བཀའ་སློབ་གནང་ཡོད་པ་རེད།
དེ་རིང་སྔ་དྲོར་ཐེངས་འདིའི་དྭགས་པོ་བཤད་སྒྲུབ་གླིང་དགོན་པ་དང་པ་ཏི་ཀུལ་བོད་ཁྱིམ་ལས་རིགས་སློབ་གྲྭ མུ་ན་ལིར་བཅས་ཀྱི་མཛད་འཕྲིན་ཡོངས་སུ་གྲུབ་ཏེ་རོ་ཐང་ལར་བསང་གསོལ་གྱི་མཛད་སྒོ་ཞིག་གནང་ཡོད་ལ། ཉིན་རྒྱབ་སི་པ་ཁུལ་ཏུ་ཆིབས་བསྒྱུར་གནང་ཡོད།
གསར་འགོད་པ་དོན་གོ།
སློབ་གསོ་ཁོ་ན་བཏང་བ་ཙམ་གྱིས་སློབ་གསོ་འཕེལ་རྒྱས་སུ་གཏོང་མི་ཐུབ།
གོང་ས་མཆོག་གིས་ཀྱང་གསུང་ནས་འདུག་རྒྱུ་ལས་དམིགས་ཡུལ་ཡོད་པའི་སློབ་གསོའི་འཆར་གཞི་ཞིག་དང་སྲིད་ཇུས་ཅིག་གཏན་འབེལ་བྱས་ནས་ཤེས་རྒྱག་དགོས་པར་འདོད། གསུང་ནས་བསྡད་པ་ཁོ་ནས་གོང་ས་མཆོག་གིས་མི་ལོ་བཞི་བཅུ་ལྷག་གི་སྔོན་ནས་དགེ་འདུན་པའི་སྡེ་ཡིས་ཚན་རིག་ལ་འབད་པ་བྱོས་ཞེས་ཡང་ནས་བསྐྱར་དུ་གསུངས་ཀྱང་། ན་ནིང་ཚན་རིག་འཛིན་གྲྭ་ཐོག་མ་ཙམ་ལས་ཐོན་མ་ཐུབ་ལ། ཁོ་ཚོ་ཡང་ལོ་རེར་གཟའ་འཁོར་འགའ་མ་གཏོགས་ཚན་རིག་སློབ་སྦྱོང་དང་ཉམས་ལེན་གྱི་གོ་སྐབས་མེད་པ་རེད། འདི་ལྟར་གསུངས་ནས་བསྡད་ན་མ་འོངས་པའི་མི་ལོ་སུམ་ཅུ་འགོར་ཚེ་ཡང་བསྐྱར་ང་ཚོས་སློབ་གསོ་འཐུས་ཤོར་རུ་བཏང་སོང་ཞེས་འགྱོད་པ་སྐྱེས་དུས་ཚར་སོང་བ་རེད།
ང་ཚོས་༧གོང་ས་མཆོག་སངས་རྒྱས་སམ་ཆེ་གེ་མོ་ཞིག་གི་སྤྲུལ་བ་ཡིན་པའི་ངོས་ནས་བལྟ་བ་དང་། བོད་དོན་ཆེ་ཕྲ་ཐམས་ཅད་ཁོང་གཅིག་པུས་བྱེད་ཐུབ་པར་འདོད་པའི་སྒྱིད་ལུག་གི་བསམ་བློ་དེས་ང་ཚོ་རང་ཉིད་ནུས་མེད་དུ་གཏོང་གི་ཡོད། ང་ཚོས་ཁོང་ཡང་འགྲོ་བ་མི་ཞིག་ཡིན་པ་དང་ཐང་ཆད་རྒྱུ་དང་ན་རྒྱུ། ཚ་རྒྱུ། སྐོམ་རྒྱུ། ལྟོགས་རྒྱུ་སོགས་ཡོད་པ་ང་རང་ཚོ་དང་གཅིག་མཚུངས་སུ་བལྟས་ནས། ང་ཚོ་དང་འདྲ་མཚུངས་ཀྱི་མི་གཅིག་གིས་རླབས་ཆེན་གྱི་ལས་དོན་ཞིག་སྒྲུབ་པར་བལྟས་ན་དྲིན་ཆེན་དུ་ཚོར་ཤུགས་ཆེ་བར་མཐོང་།
ཤིན་ཏུ་ལེགས།
༧གོང་ས་མཆོག་མི་རིགས་ཀྱི་ངོ་བོ་མཚོན་པའི་མི་སྣ་གྲགས་ཅན་ཞིག་ཡིན་པ་བདེན་ན་ཡང་། ད་ལྟའི་ཁོང་ནི་ལོ་ན་བདུན་བཅུ་དོན་ལྔ་ལ་སླེབས་པའི་མི་རྒན་ཞིག་ཡིན་པས་ངལ་གསོ་དང་ལྷོད་སྡོད་དགོས་པ་སྨྲོས་མེད་རེད། གསོན་ཤུགས་དང་མི་རིགས་ཀྱི་ལར་ཞེན་མེད་པའི་སྐྱབས་བཅོལ་ནང་གི་སློབ་ཕྲུག་ཚོ་དང་མི་མང་ཚོར་བཀའ་སློབ་གནང་རྒྱུ་མང་མེད་ཀྱང་ཉུང་མེད་པ་གཏན་འཁེལ་རེད། བླ་སྤྲུལ་དང་མི་ཆེན་ག་གེ་མོ་ཁ་ཤས་ཀྱིས་༧གོང་ས་མཆོག་རྒྱུ་དངོས་འཚོལ་སྒྲུབ་དང་རང་གི་མཚན་སྙན་གོང་མཐོར་འགྲོ་བྱེད་ཀྱི་ལག་ཆ་འབའ་ཞིག་ཏུ་བེད་སྤྱོད་གཏོང་བཞིན་པ་འདིར་བློ་རེ་ཕམ། གཞིས་ལུས་བོད་རིགས་རྣམས་ངོ་མ་སྙིང་རེ་རྗེ།
བོད་པ་ཞིག་གིས་བོད་སྐད་མ་ཤེས་ན་དེ་ནི་བ་ལང་ཞིག་གིས་རྩྭ་ཟ་མི་ཤེས་པ་དངའདྲ། བོད་པ་ཞིག་བོད་ཀྱི་རིགས་གཞུང་ལ་དུང་པ་མེད་ན་དེ་ནི་བ་ལང་ཞིག་རྩྭ་ལ་དུང་པ་མེད་པ་དངའདྲ། བོད་པ་ཞིག་གིས་གཞན་སྐད་ཁོ་ན་སྤྱོད་ན་དེ་ནི་བ་ལང་ཞིག་གིས་རྟ་སྐད་སྒྲོགས་པ་དང་གཉིས་སུ་མ་མཆིས་སོ།།
དྭགས་པོ་བཤད་སྒྲུབ་གླིང་གྲྭ་ཚང་ལ་གསུང་ཆོས་ལ་བཅར་སྐབས་ཀྱི་བློ་ཕམ་གྱི་མཐོང་ཐོས།
དང་པོ། དེ་རིང་གུས་རང་ཀུ་ལུ་དང་མ་ན་ལི་ཁུལ་ལ་སླེབས་སྐབས་༸གོང་ས་མཆོག་གི་བཀའ་ཆོས་ཞུ་རྒྱུའི་གོ་སྐབས་བཟང་པོ་ཐོབ་བྱུང། ནམ་རྒྱུན་ང་རང་དྷ་སར་གསུང་ཆོས་ཞུ་བར་བཅར་སྐབས་ལག་ཐོག་ཁ་པར་དང་། དཔར་ཆས་སོགས་འཁྱེར་མི་ཆོག་པ་དེ་ཤེས་ཀྱི་ཡོད་པས། ངས་གསུང་ཆོས་ལ་འགྲོ་མཁན་ངོ་ཤེས་རྣམས་ལ་ལག་ཐོག་ཁ་པར་དང་དཔར་ཆས་རིགས་འཁྱེར་ན་མི་འགྲིག་ཚུལ་བརྗོད་པ་ཡིན། འོན་ཀྱང་བློ་ཕམ་པ་ཞིག་ལ་གསུང་ཆོས་ར་བའི་ནང་ལག་ཐོག་ཁ་པར་འཁྱེར་བཅུག་གི་འདུག་ལ། ལུས་བཤེར་ཡང་དེ་ཙམ་དོ་གཟབ་ཀྱིས་བྱེད་ཀྱི་མི་འདུག འོ་ན་ས་ཁུལ་དེར་གསུང་ཆོས་ཞུ་མི་ཚང་མ་མི་བཟང་བ་ཤ་སྟག་དང། དྷ་སར་གསུང་ཆོས་ཞུ་མཁན་ཁོངས་སུ་དོགས་གནད་ཅན་ཡོད་པ་རེད་དམ།
གཉིས་པ། རྩ་བའི་དྭགས་པོ་གྲྭ་ཚང་གི་ངོས་ནས་བཀའ་ཆོས་ཞུ་སར་ཇ་གཡབ་སོགས་གོ་སྒྲིག་གང་ལེགས་གནང་འདུག་ཀྱང། བར་སྐབས་ཤིག་ལ་གློག་མེད་པར་བསྒྱུར་སྐབས། སྐམ་གློག་བེད་སྤྱོད་གནང་སོང། སྐབས་དེ་དུས་སྐམ་གློག་ལས་དུ་བ་ནག་པོ་ཧ་ཅང་མང་པོ་ཐོན་ནས་ཉེ་འཁྲིས་མི་མང་་པོ་ཞེད་ནས་བྲོས་གྲབས་བྱེད་དགོས་པའི་གནས་སྟངས་ཆགས་སོང། སྐབས་དེ་དུས་ངའི་སེམས་ཁྲལ་གཙོ་བོ་ནི་མི་མང་དེ་ཚོ་མ་ཡིན་པར་ཁོང་ཚོས་ཟང་ཟིང་བྱེད་བཞིན་པའི་རྣམ་པ་དེ་རེད། སྐབས་དེ་དུས་སྐུ་སྲུང་བ་རྣམས་ཀྱིས་ཟང་ཟིང་དུ་ལོང་བྱེད་རྒྱུ་མཚམས་འཇོག་བྱེད་ན་སྙམ་བྱུང།
གསུམ་པ། གསུང་ཆོས་ཉན་མཁན་མང་པོ་ཞིག་ས་གནས་འདིར་གནས་སྡོད་བྱེད་མི་ཧི་མ་ལ་ཡ་ཁུལ་གྱི་མི་རིགས་རྣམས་རེད་འདུག ཁོང་ཚོས་གསུང་ཆོས་ཉན་རྒྱུ་གཙོར་འདོན་མི་བྱེད་པར། ༸གོང་ས་མཆོག་གིས་བཀའ་ཆོས་གནང་བཞིན་པའི་སྐབས་སུ་རང་ཉིད་ཀྱི་ཕྲུ་གུ་དང་། ཉེ་འཁྲིས་མི་རྣམས་ལ་སྐད་ཤུགས་ཆེན་པོས་གླེང་མོལ་བྱས་ནས་ཆོས་ཉན་མཁན་རྣམས་ལའང་བར་ཆད་བྱེད་བཞིན་འདུག
མདོར་ན། ད་ལྟ་༸གོང་ས་མཆོག་ཇི་ས་པ་དང། མ་ན་ལི་ཁུལ་མཛད་འཕྲིན་སྐྱོང་བཞིན་པར་སོང། སྐུ་ཕྱཱའི་ཐད་འབྲེལ་ཡོད་ཚང་མས་ཐུགས་སྣང་ཡོང་བ་ཞུ་རྒྱུ་ཡིན། ཐུགས་རྗེ་ཆེ།།།
བོད་ཀྱི་ངོ་བོ་བ་མ་བརླག་པ་དང་བོད་པའི་རྣམ་པ་མ་ཡལ་བའི་སླད་བོད་ཡིག་དང་བོད་སྐད་ཤེས་དགོས་པ་དང། བོད་རང་གི་ཐུན་མོང་མ་ཡིན་པའི་རིག་གཞུང་ལ་བདག་གཅེས་གནང་དགོས་པས།
བོད་མི་ཚང་མས་བོད་ཡིག་སྦྱང་དགོས་པ་དང་བོད་སྐད་རྒྱག་དགོས་པ་བོད་ཀྱི་རིག་གཞུང་ལ་བདག་གཅེས་བྱེད་དགོས་པ་ནི་བོད་ཀྱི་ངོ་བོ་དང་རྣམ་པ་མ་ཡལ་བ་དང་མ་བརླག་མ་ཉམས་པར་བྱེད་པའི་ཐབས་དང་དེ་རྒྱུན་འཛིན་དར་སྤེལ་དང་ཡར་རྒྱས་གོང་འཕེལ་དུ་གཏོང་བའི་ཐབས་བླ་མེད་དེ་ཡིན་པ་སྨོས་མེད་རེད།་
གསང་གསོལ། བསང་གསོལ།
ཆིབས་བསྒྱུར། ཆིབས་སྒྱུར།
ཆོས་རྔ་ཆེན་པོའི་སྒྲ་ཡིས་ནི། །སེམས་ཅན་སྡུག་བསྔལ་མཐར་བགྱི་ཤོག །བསྐལ་པ་བྱེ་བ་བསམ་ཡས་སུ། །ཆོས་བསྟན་མཛད་ཅིང་བཞུགས་གྱུར་ཅིག །
གངས་ཅན་བསྟན་འགྲོའི་ཆེད་དུ་འཕགས་མཆོག་ཕྱག་ན་པདྨོ་༸ རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཞབས་ཡུན་རིང་བརྟན་ཅིང་ཐུགས་བཞེད་ལྷུན་གྱིས་འགྲུབ་པར་ཤོག །