ང་ཚོ་རང་གིས་འཐུས་ཤོར་ཕྱིན་པའི་ངོས་ནས་ཐག་གཅོད་ཡག་པོ་བྱ་འདུན་ཡོད་པར་མ་ཟད། ཕྱིན་ཆད་ཀྱང་འདི་ལྟ་བུའི་གནས་ཚུལ་མི་ཡོང་ཆེད་ནམ་རྒྱུན་འཕྲོད་བསྟེན་ཐད་གང་ཐུབ་གཟབ་ཀྱིན་ཡོད་ཐོག ད་ནས་བཟུང་འཕྲོད་བསྟེན་ཐོག་དེ་བས་ཀྱང་ཤུགས་ཆེ་རུ་གཏོང་གི་ཡིན་ཞེས་ངྷ་ཤོད་བོད་ཁྱིམ་སློབ་སྤྱིས་གསུངས་ཡོད།
དེ་རིང་འདི་གའི་གསར་འགོད་པ་ངྷ་ཤོད་བོད་ཁྱིམ་སློབ་གྲྭའི་སྤྱི་ཁྱབ་ཡིག་ཚང་དུ་བཅར་ཏེ། སློབ་སྤྱི་ཆོས་དབྱངས་དོན་གྲུབ་ལགས་སུ་སློབ་ཕྲུག་ཚོར་ཟས་དུག་ཕོག་པའི་སྐོར་བཀའ་འདྲི་ཞུས་པར་ཁོང་གིས་གསུངས་དོན། སྤྱིར་རེས་གཟའ་ཉི་མའི་ཕྱི་དྲོའི་ཆུ་ཚོད་ ༣ དང་ ༤ ཙམ་ལ་སློབ་ཕྲུག་འགའ་ན་མགོ་ཚུགས་པ་དང་། ཉིན་དེར་ཕལ་ཆེར་སློབ་ཕྲུག་སུམ་ཅུ་ཙམ་སྨན་ཁང་དུ་འགྲོ་དགོས་བྱུང་པས་ལྟ་རུ་ཕྱིན་པ་ཡིན། སྐབས་དེར་སློབ་ཕྲུག་ཚོར་ཞེ་མེར་ལངས་པ་དང་གྲོད་ཁོག་བཤལ་བ། ཚ་བ་འཕར་བ། མགོ་ན་བ་སོགས་བྱེད་ཀྱིན་འདུག་མོད་དེ་ཙམ་ཚབས་ཆེན་པོ་མི་འདུག དེར་བརྟེན་ནད་གཡོག་གིས་སྐབས་བབ་ཀྱི་སྨན་བཅོས་གང་ལེགས་གནང་ཡོད།
ཉིན་དེའི་ཕྱི་ཉིན་ན་བཞིན་པའི་སློབ་ཕྲུག་གི་གྲངས་ཚད་མང་དུ་ཕྱིན་འདུག་ལ། ང་ལ་ཟས་དུག་ཤོར་བ་མིན་ནམ་སྙམ་པའི་དོགས་པ་ལངས་བྱུང་། སྐབས་དེར་ངས་བསམ་པར་ཟས་དུག་ཡིན་ཚེ་འཕྲལ་དུ་བོད་སྨན་བརྟེན་ན་དགའ་བ་མེད་དམ་སྙམ་པ་དང་། སྨན་རྩིས་ཁང་གི་འགན་འཛིན་རྟ་མགྲིན་ལགས་སུ་བཀའ་འདྲི་ཞུས་པར། ཁོང་གིས་ལམ་སང་ཛ་དྲག་ཐོག་སློབ་ཕྲུག་ཚོར་བརྟག་དཔྱད་དང་སྨན་བཅོས་བྱེད་ཆེད་སྨན་པ་གཉིས་བཏང་བྱུང་མོད། དེའི་རྗེས་སློབ་ཕྲུག་ན་བ་ཇེ་མང་དུ་ཕྱིན་སྟབས་ཁོང་གཉིས་ཀྱི་སྟེང་དུ་ད་དུང་སྨན་པ་གསུམ་བཏང་སྟེ། བསྡོམས་པས་སྨན་པ་ལྔས་འཕྲལ་དུ་སྨན་བཅོས་ཀྱི་བྱ་བ་བསྒྲུབས་ཡོད།
སྨན་པ་རྣམས་ཀྱིས་བརྟག་དཔྱད་བྱས་པ་བརྒྱུད་ཁོང་ཚོར་བརྒྱ་ཆའི་བརྒྱ་ཟས་དུག་རེད་ཟེར་རྒྱུ་ཁག་ཀྱང་། ཟ་མ་ཞིག་ལ་རྐྱེན་བྱས་འདུག་སྟབས་རིན་ཆེན་མང་སྦྱོར་ཆེན་མོ་བཏང་ཚེ་ཕན་གི་རེད་གསུངས་ཏེ། སློབ་ཕྲུག་ཚོར་རིན་ཆེན་མང་སྦྱོར་ཆེན་མོ་བཏང་ཡོད། སྐབས་དེར་སྨན་པ་རྣམས་ཀྱིས་ནད་ཚ་ཚབས་ཆེན་པོ་མི་འདུག་ཅེས་གསུངས་པ་དང་བརྟག་དཔྱད་སྐབས་སློབ་ཕྲུག་ཚོའི་ཁྲོད་ནས་ཆུ་གཏོང་དགོས་རིགས་སློབ་གྲྭའི་སྨན་ཁང་དུ་བཏང་སྟེ་ཆུ་བཏང་ཡོད་པར་མ་ཟད། སློབ་ཕྲུག་ཚོར་ཆུ་གཏོང་སྐབས་བོད་ཁྱིམ་སྨན་པ་ཆུང་བདག་ལགས་སྐད་བཏང་སྟེ། རྒྱ་སྨན་གྱི་ཐོག་ནས་ཀྱང་སྨན་བཅོས་དང་སློབ་ཕྲུག་བཅུ་གཉིས་ལ་ཆུ་བཏང་བ་སོགས་སྐབས་དེར་གནས་ཚུལ་ཡག་པོ་ཆགས་ཏེ། ང་ཡང་སེམས་ཅུང་ཙམ་ལྷོད་ལྷོད་ཆགས་ནས་དགོང་མོའི་ཆུ་ཚོད་ ༡༠ ཙམ་ལ་ཕྱིར་ནང་དུ་ལོག་པ་ཡིན།
ཡིན་ནའང་། ཆུ་ཚོད་ ༡༡ ཙམ་ལ་སྨན་ཁང་ནས་ཁ་པར་བསླེབས་ཏེ་སློབ་ཕྲུག་གཅིག་ལ་ཚ་བ་ཆེན་པོ་འཕར་བསྡད་འདུག ནད་ཚ་ཅུང་ཙམ་ལྕི་མོ་འདུག་ཟེར་བས་ལམ་སང་བདེ་ལེགས་སྨན་ཁང་དུ་ཁྲིད་པ་ཡིན། བདེ་ལེགས་སྨན་ཁང་གིས་འཕྲད་དུ་བརྟག་དཔྱད་བྱེད་དགོས་པ་དང་དབུགས་བཏང་བ་སོགས་ཛ་དྲག་གི་མྱུར་སྐྱོབ་ཆ་ཚང་བྱས་མོད། སློབ་ཕྲུག་དེར་གཅིན་པ་འབབ་ཐུབ་ཀྱི་མི་འདུག་པས་སྨན་ཁང་ཆེན་པོ་ཞིག་ཏུ་ཁྲིད་ཐུབ་ན་ཡག་གི་རེད་གསུངས་བྱུང་།
དེར་བརྟེན་དབུགས་བཏང་སྟེ་ཁ་ཐུག་དེར་རྒྱ་གར་ཊྲན་ཌ་ Tanda སྨན་ཁང་དུ་ཕྱིན་པ་ཡིན། ཊྲན་ཌ་སྨན་ཁང་གིས་ཀྱང་འཕྲལ་དུ་བརྟག་དཔྱད་དང་སྨན་བཅོས་སོགས་སྨན་ཁང་ཆེན་པོས་མྱུར་སྐྱོབ་བྱེད་དགོས་པ་ཚང་མ་བྱས་སོང་མོད། སྟབས་མ་ལེགས་པར་རྐྱེན་ལམ་དུ་ཤོར་སོང་། སྨན་པས་དངོས་གནས་བྱས་ན་ཟས་དུག་ཙམ་གྱིས་རྐྱེན་ལམ་དུ་འགྲོ་སྲིད་གི་མ་རེད་ཅེས་ཧང་སང་སང་གིས་བརྗོད་ཀྱིན་འདུག
སློབ་ཕྲུག་དེ་སྦེལ་ཀོབ་གཞིས་ཆགས་ནས་ཡིན་པ་དང་། ད་ལྟ་འཛིན་རིམ་དགུ་བའི་སློབ་མ་ཡིན་ལ་རང་ལོ་ ༡༧ ཡིན་འདུག ཁོའི་ནམ་རྒྱུན་གྱི་གཟུགས་པོའི་གནས་སྟངས་དང་འཕྲོད་བསྟེན་མི་བཟང་རྒྱུ་མེད་ཟེར།
ཡང་སློབ་སྤྱི་མཆོག་ལ་ཟས་དུག་འདི་ཟ་མ་གང་ཞིག་ཟོས་པར་བརྟེན་ནས་བྱུང་མིན་སྐོར་དྲིས་པར། ཁོང་གིས། ང་ཚོས་ད་ལྟའི་ཆར་ཟ་མ་འདི་ཟོས་ནས་ཟས་དུག་ཕོག་པ་རེད་ཅེས་ལབ་ཐུབ་ཀྱི་མི་འདུག གང་ཡིན་ཟེར་ན་ཟས་དུག་རང་ཡིན་ན་སྤྱི་ཡོངས་ནས་སློབ་ཕྲུག་ཡོངས་ལ་ན་དགོས་པ་ཞིག་ཡིན་མོད། སློབ་ཕྲུག་བརྒྱ་ཆའི་མང་ཤོས་ན་མེད་སྟབས་མཐའ་གཅིག་ཏུ་ཟས་དུག་རེད་ཀྱང་ཟེར་ཐུབ་ཀྱི་མི་འདུག་མོད། ད་ལྟ་བདེ་ལེགས་སྨན་ཁང་གིས་བརྟག་དཔྱད་གནང་བཞིན་ཡོད་ལ། ཁོང་ཚོས་མཇུག་འབྲས་སྙན་ཐོ་བསླེབ་རྗེས་གནས་ཚུལ་གསལ་བོ་ཆགས་ངེས་རེད་ཅེས་གསུངས། ཡིན་ནའང་། ཁོང་གིས་བརྔོས་ཐུག་ནང་དུ་སྒོ་ང་ཡོད་པར་མ་ཟད། དེ་དང་མཉམ་དུ་སྒོ་ངའི་ཁུ་བ་བཟོས་ཡོད་པས་སྒོ་ངའི་ཟས་དུག་ཕོག་པའི་དོགས་པ་མང་དུ་ཟ་གི་འདུག གཟའ་ཟླ་བའི་དགོང་མོར་ཛ་དྲག་གི་མྱུར་སྐྱོབ་བྱེད་དགོས་པའི་སློབ་ཕྲུག་ཉི་ཤུ་ལྷག་ཡོད་ལ། ཁ་སང་ནས་བཟུང་སློབ་ཕྲུག་ཚོ་བརྟག་དཔྱད་བྱེད་ཆེད་བདེ་ལེགས་སྨན་ཁང་དུ་བཏང་བ་ཡིན། སྤྱི་ཡོངས་ནས་ཐེངས་འདིར་ཟས་དུག་ཕོག་པའི་སློབ་ཕྲུག་ཉིས་བརྒྱ་ལྷག་རེད་ཅེས་དང་། ད་ལྟ་སློབ་ཕྲུག་ཚང་མ་ཛ་དྲག་གི་ཉེན་ཁ་ལས་ཐར་ཡོད་ཅེས་གསུངས།
མཇུག་མཐར་ཁོང་ལ་ཐེངས་འདིའི་གནད་དོན་འདིར་མཐིལ་ཕྱིན་པའི་བརྟག་དཔྱད་དང་མ་འོངས་པར་འདི་ལྟ་བུའི་གནས་ཚུལ་མི་ཡོང་རྒྱུར་ཐབས་ཤེས་གནང་གི་ཡོད་མེད་སྐོར་དྲིས་པར། ཁོང་གིས་གསུངས་དོན། ཐེངས་འདིར་ང་ཚོ་ལ་སློབ་གསོ་ཆེན་པོ་ཞིག་ཐོབ་པ་རེད་ལ། ད་ལྟ་སློབ་ཕྲུག་ཚོ་ཉེན་ཁའི་གནས་སུ་ཡོད་སྟབས་དེའི་ཐོག་ཤུགས་རྒྱག་གི་ཡོད་ཀྱང་། མ་འོངས་པར་གནས་ཚུལ་འདིའི་བྱུང་རྐྱེན་ལ་ཞིབ་འཇུག་དང་འགན་གཙོ་བོ་སུའི་སྟེང་དུ་ཡོད་མེད་དེར་བརྟག་དཔྱད་མཐིལ་ཕྱིན་པ་བྱ་རྒྱུ་ཡིན། གནས་ཚུལ་འདི་དབུས་སྤྱི་ཁྱབ་ཡིག་ཚང་ལ་སྙན་སེང་ཞུས་ཡོད་ལ། དབུས་ནས་ཐེ་བྱུས་གནང་གི་རེད། དེ་བཞིན་ང་ཚོ་རང་གིས་འཐུས་ཤོར་ཕྱིན་པའི་ངོས་ནས་ཐག་གཅོད་ཡག་པོ་བྱ་འདུན་ཡོད་པར་མ་ཟད། ཕྱིན་ཆད་ཀྱང་འདི་ལྟ་བུའི་གནས་ཚུལ་མི་ཡོང་ཆེད་ནམ་རྒྱུན་འཕྲོད་བསྟེན་ཐད་གང་ཐུབ་གཟབ་ཀྱིན་ཡོད་ཐོག ད་ནས་བཟུང་འཕྲོད་བསྟེན་ཐོག་དེ་བས་ཀྱང་ཤུགས་ཆེ་རུ་གཏོང་གི་ཡིན་ཞེས་གསུངས།
དེའི་རྗེས་དགེ་ཆེ་ཚུལ་ཁྲིམས་སྐལ་བཟང་ལགས་ཀྱིས་ཕྲན་ཁྲིད་ནས་སྨན་ཁང་དང་ཐབ་ཚང་གཉིས་ནང་ལྟ་སྐོར་དུ་བསྐྱོད་ཅིང་། ངེད་གཉིས་སྨན་ཁང་དུ་འབྱོར་སྐབས་ད་དུང་དེ་རུ་སློབ་ཕྲུག་རེ་ཟུང་ལ་སྨན་པས་བརྟག་དཔྱད་བྱེད་ཀྱིན་འདུག་ལ། ཡང་མུ་མཐུད་སྨན་གཏོང་དགོས་པའི་སློབ་ཕྲུག་བཅུ་ལྷག་སྨན་ཁང་གི་ཉལ་ཁང་དུ་བསྡད་འདུག དགེ་ཆེ་མཆོག་གིས་སྤྱིར་ཁ་སང་བདེ་ལེགས་སྨན་ཁང་དུ་བརྟག་དཔྱད་བྱས་པ་བརྒྱུད། ད་ལྟ་སློབ་ཕྲུག་ཡོངས་དྲག་སྐྱེད་བྱུང་ཡོད་ཀྱང་། སློབ་ཕྲུག་དེ་ཚོ་མུ་མཐུད་སྨན་བསྟེན་དང་ངལ་གསོ་བྱེད་དགོས་པའི་རིགས་རེད་ཅེས་གསུངས།
ཁོང་གིས་ཀྱང་ཟས་དུག་གི་ནད་ཚ་ཡིན་ན་སློབ་ཕྲུག་སྤྱི་བྱིངས་ལ་ན་དགོས་པ་ཞིག་ཡིན་མོད། འཛིན་རིམ་དྲུག་པ་ཡན་གྱི་སློབ་ཕྲུག་མ་གཏོགས་ན་མེད་སྟབས། གནས་ཚུལ་འདིའི་བྱུང་རྐྱེན་གསལ་བོ་ཤེས་ཀྱི་མི་འདུག་གསུངས་ལ། སྨན་ཁང་གིས་བརྟག་དཔྱད་མཇུག་འབྲས་ནི་ཐེངས་འདིའི་བྱུང་རྐྱེན་གཙོ་བོ་ངོས་ཟིན་པའི་ཐབས་ལམ་ཡག་ཤོས་སུ་མཐོང་གི་ཡོད་འདུག
གསར་འགོད་པ། ཨ་རིག་འགྱུར་མེད།
བོད་གཞུང་དབུ་གཉེས་ནས་ད་ལྟའི་བར་བྱུང་མ་མྱུང་བའི་བྱ་ཞིག་རེད། ལས་བྱེད་པ་རྣམས་པ། མ་འཇོན་ན་དགོང་པ་ཞུ་རོག་གནང་ཐུགས་རྗེའི་གཟུགས།
སྤྱི་ཚོགས་ཆེན་པོ་ཞིག་ནང་ག་རེ་ཡིནའང་བྱུང་སྲིད་པས་ཕ་མ་གཉིས་སེམས་ཕམ་མ་གནང་རོགས། བོད་རིགས་ཀྱི་ཡ་ལ་བཙུགས་ས་ལས་ཞེས་པར་བཅོལ་ན་དེས་ཁྱེད་ལ་སེམས་གསོ་ཐུབ་ངེས
སེར་སྨད་བློ་དགའ་ལགས་ད་རེས་ཁྱེད་ག་བ་ཡོད།སྔོན་མ་མ་སུ་རི་བོད་ཁྱིམ་
གྱིས་སློབ་ཕྲུག་དང་དྷ་ཤོད་བུ་ཁྱིམ་གིས་ཕྲུ་གུ་ཚོ་བོད་ཕྲུག་གཅིག་པ་རེད།
དྲ་གྲོགས་འཇམ་དབྱངས་ལགས་གི་གསུང་ནང་བཞིན་འདི་ལྟ་བུའི་སློབ་སྤྱི་དང་འབྲེལ་ཡོད་ལས་བྱེད་རྣམས་ཀྱི་བྱེད་སྟངས་ནི་རྒྱ་མི་གོང་ཁྲན་ལས་
ཀྱང་ཐབས་སྐྱོ་བ་རེད། ད་ལྟའི་གནས་ཚུལ་འདི་ནམ་རྒྱུན་ཁོ་པ་ཚོས་སློབ་ཕྲུག་ཚོའི་བཟའ་བཏུང་གི་
རིགས་དང་འཕྲོད་བསྟེན་ལ་དོ་སྣང་རྩ་ནས་བྱེད་ཀྱི་མེད་པའི་རྟགས་རེད། འབྲེལ་ཡོད་བོད་གཞུང་དང་སློབ་ཕྲུག་སོ་སོའི་ཕ་མའི་ངོས་ནས་ཀྱང་སློབ་སྤྱི་འདི་ལྟ་བུ་དང་ལས་བྱེད་འདི་ལྟ་བུ་དག་ལ་ཐེར་འདོན་ནན་པོ་བྱེད་དགོས།
འདས་གྲོང་སུ་འགྱུར་བའི་སློབ་མ་དེའི་ཆེད་དུ་དྲ་གྲོགས་རྣམས་པས་མ་ཎི་གང་མང་འདོན་རོག ། ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔
འདི་ལྟ་བུའི་སློབ་སྤྱི་དང་འབྲེལ་ཡོད་ལས་བྱེད་རྣམས་ཀྱི་བྱེད་སྟངས་ནི་རྒྱ་མི་གོང་ཁྲན་ལས་ཀྱང་ཐབས་སྐྱོ་བ་རེད། ད་ལྟའི་གནས་ཚུལ་འདི་ནམ་རྒྱུན་ཁོ་པ་ཚོས་སློབ་ཕྲུག་ཚོའི་བཟའ་བཏུང་གི་རིགས་དང་འཕྲོད་བསྟེན་ལ་དོ་སྣང་རྩ་ནས་བྱེད་ཀྱི་མེད་པའི་རྟགས་རེད། འབྲེལ་ཡོད་བོད་གཞུང་དང་སློབ་ཕྲུག་སོ་སོའི་ཕ་མའི་ངོས་ནས་ཀྱང་སློབ་སྤྱི་འདི་ལྟ་བུ་དང་ལས་བྱེད་འདི་ལྟ་བུ་དག་ལ་ཐེར་འདོན་ནན་པོ་བྱེད་དགོས། རྒྱ་ལ་ངན་པ་ལང་ཤོར་དུ་བཏང་ན་རྗེས་མར་ད་དུང་ཅི་ཡང་བྱུང་སྲིད། དེས་ན་འབྲེལ་ཡོད་ཚང་མས་ཇོ་བཟང་གི་རྟུལ་ཞུགས་མི་འཛིན་པར་ཞུ།
སེར་སྨད་བློ་དགའ་ལགས་ད་རེས་ཁྱེད་ག་བ་ཡོད། བོད་ཕྲུག་གཅིག་རེད།
སྙིང་རྗེ་སློབ་ཕྲུག་ཁོང་སློབ་སྤྱི་དང་དགེ་རྒན་ཚང་མ་ནི་སྒོར་མོ་ཆེད་དུ་ རྔམ་ནས་སློབ་ཕྲུག་དེ་ཚོ་ལ་དོ་སྣང་བྱེད་རྒྱུ་ཁག་པོ་རེད་ ང་ཚོ་ཁོང་ཆེད་དུམ་ཎི་གང་མང་འདོད་རོགས། ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔
ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོཾ་མ་ཎི་པདྨེ་ཧཱུྂཿ པདྨ་འདམ་གྱིས་མ་གོས་ལྟར། སྲིད་གསུམ་དྲི་མས་མ་གོས་པའི། སྲིད་པའི་པདྨོ་ལས་བྱུང་བའི། བདེ་བ་ཅན་དུ་སྐྱེ་བ་བར་ཤོག།
སློབ་ཕྲུག་དེ་སྙིང་རྗེ། ལས་བྱེད་ཚོས་ཟས་རྙིང་དེ་འདྲ་སྤྲད་དེ་ཧང་སང་ཡ་རང་རེད།
སྤོབས་པ་མཐའ་ཡས་ཀྱིས་གསུང་བ་ལྟར་རྒྱ་མིས་སོ་བས་དུག་བཏང་བ་ཡིན་མི་སྲིད་པ་མ་རེད།
ད་རེས་སེར་སྨད་བློ་དགའ་དྲ་རྒྱས་ནང་ཕེབས་མི་འདུག་སྔོན་མ་མ་སུ་རི་བོད་ཁྱིམ་ནས་སྒྲིག་འགལ་སློབ་མ་ཁ་ཤས་ཕྱིར་ཕུད་བྱས་པ་དེ་ལ་མི་རྒྱུ་གཉིས་ཀྱིས་དཀའ་ལས་བརྒྱབ་ནས་བོད་ཕྲུག་ཚོ་ལ་ཤ་ཚ་དང་ཞེན་ཁོགས་ཚ་མདོག་བྱས་སོང་ད་རེས་ཕྲུ་གུ་སྐྱེན་ལམ་དུ་སོང་ན་ཡང་གོ་ཚོར་མི་འདུག
སྔོན་མ་ཁོ་རང་ལ་དཀའ་ངལ་འཁྲད་ནས་བུ་མོ་དེ་ལེན་ཀ་བལ་ཡུལ་བར་ཕྱིན་པ་རེད་དེ་བུ་མོ་མ་རགས་ནས་སྟོང་བ་ལོག་དགོས་བྱུང་བ་རེད་ད་རེས་སེམས་ཤུགས་ཆག་པ་མ་ཡིན་ནམ།
དྲ་གྲོགས་ཚོ་གསུང་དང་།
སྤེན་པ་ལགས་། ངོ་མ་གནས་ཚུལ་དེ་འདྲ་ཞིག་ཡིན་ན་་་་་་སློབ་སྤྱིའི་མི་མཁྱེན་པ་གང་ཡིན་ནམ ཡང་ན་མཁྱེན་ཀྱང་གསར་འགོད་པ་མ་གསུངས་པ་རེད
ཡང་ན་སྨན་པས་ནད་རྟགས་མ་ཆོད་པ་ཞིག་སློབ་གྲོགས་ཚོའི་ཤེས་སོང་བ་རེད
བོད་ཕྲུག་སློབ་མ་གཅིོག་འདས་གྲོང་ཕྱིན་པ་ནི་བློ་ཕམ་གྱི་གནས་ཚུལ་ཡིན་ནམ་རྒྱུན་དུ་འཕྲོད་བརྟེན་ལ་དོན་སྣང་མ་གནང་པའང་ནོར་ཕྲུལ་ཆེན་པོ་ཡིན།་་འོན་ཀྱང་གནས་ཚུལ་དངོས་ཀྱང་ཤེས་དགོས་པར་བསམ།
གང་ལ་ཞེས་ན།དོན་དངོས་ནི་སློབ་མ་དེར་སྔོན་ནས་ཁས་མའི་གནད་གཞི་ཚབ་ཆེེན་ཡོད་ལ་དེ་བེད་སྤྱོད་མེད་པར་གྱུར་ལ་ཉེ་བ་ཡིན་པ་དང་བཏབ་ཁེལ་སློབ་གྲྭར་ཟས་དུག་གི་གནས་ཚུལ་ལྷག་ཡོད་པས་དེའི་གནོན་ཤུགས་གཟོད་མ་ཐུབ་པར་བློ་བུར་ཐོབ་རྒྱབ་ཏུ་འདས་གྲོང་ཆག་པ་ཡིན་འདུག་པ་ནི་ཁོང་གི་འཛིན་གྲོགས་རྣམས་ཀྱིས་གསུང་བཞིན་འདུག་
དེས་ན་འུར་སྒྲོག་དང་སྙོག་གླེང་ཐོས་པ་ཟོས་མི་ལེགས།་འཕྲོད་བརྟེན་ཐོག་དོ་སྣང་མེད་དེ་ཙམ་མེད་པ་དངོས་ཡོད་རེད་ལ་དེ་ལྟ་བུའུ་གནས་ཚུལ་དྷ་ཤོད་སློབ་གྲྭ་ཙམ་མ་ཡིན་པར་བོད་སློབ་ཚུད་བའི་བོད་གཞིས་མང་ཆེ་བར་གནས་ཚུལ་དེ་རིགས་ཡོང་དང་ཡོང་བཞིན་ན་ཚང་མས་དུས་དང་རྣམ་པ་ཀུན་ཏུ་དོ་སྣང་གནང་དགོས།
ཐུགས་རྗེ་ཆེ།
རྒྱ་མིས་དུག་བཏང་བ་ཡིན་མི་སྲིད་པ་མ་རེད།
ཀྭ་ཡེ་དྲ་གྲོགས་ལྷན་རྒྱས།
འདས་གྲོངས་སུ་ཕྱིན་པའི་སློབ་ཕྲུག་ནི། ལྷོ་ཕྱོགས་བྷེལ་ཀོབ་ནས་ཡིན་པའི་བུ་བསྟན་འཛིན་དབྱིངས་གསལ། རང་ལོ་༡༧ དྷ་ཤོད་བོད་ཁྱིམ་སློབ་གྲྭའི་འཛིན་གྲྭ་དགུ་པའི་སློབ་མ་ཡིན་པ་ཞིག དྷ་སའི་ཉེ་འཁོར་གྱི་ཏྲན་ཌ་སྨན་ཁང་དུ་ཚེས་༢༠ ཉིན་གྱི་དགོང་མོ་འདས་གྲོངས་སུ་ཕྱིན་འདུག
གནས་ཚུལ་དེའི་རྒྱུ་རྐྱེན་ཇི་བཞིན་ད་དུང་ཡང་ཁ་གསལ་མེད་སྟབས་ང་ཚོ་ཚང་མས་གདུང་སེམས་མཉམ་བསྐྱེད་ཀྱིས་བརྟག་དཔྱད་ཞིབ་འཇུག་མཐིལ་ཕྱིན་པ་གནང་རྒྱུ་གལ་ཆེ།
ཚེ་འདས་དེ་ཉིད་༸འཕགས་མཆོག་ཕྱག་ན་པདྨོའི་མཉེས་ཤིང་རྗེས་སུ་བཟུང་སྟེ་མངོན་མཐོའི་གོ་འཕང་རིམ་བརྒྱུད་བླ་མེད་རྫོགས་བྱང་མྱུར་དུ་ཐོབ་པའི་གསོལ་འདེབས་ཤུགས་དྲག་བཅས།
ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ།
དྲ་གྲོགས་རྣམ་པ་ཚོ། ༼ སློབ་ཕྲུག་དེ་སྦེལ་ཀོབ་གཞིས་ཆགས་ནས་ཡིན་པ་དང་། ད་ལྟ་འཛིན་རིམ་དགུ་བའི་སློབ་མ་ཡིན་ལ་རང་ལོ་ ༡༧ ཡིན་འདུག ཁོའི་ནམ་རྒྱུན་གྱི་གཟུགས་པོའི་གནས་སྟངས་དང་འཕྲོད་བསྟེན་མི་བཟང་རྒྱུ་མེད་ཟེར། ༽ ཞེས་པས་དངོས་གནས་བྱས་ན་སློབ་ཕྲུག་དེའི་སྐོར་འགྲེལ་བཤད་བརྒྱབ་པའི་ཁུལ་རེད་མོད། རྣམ་པ་ཚོས་དེ་ལ་དོ་སྣང་མ་བྱུང་བ་ཡིན་ནམ། ཡང་ན་དེ་བས་ཀྱང་མང་དུ་ཤེས་འདོད་རྟོགས་འདོད་ཀྱིས་ཡིན་ནམ།
ཡིན་ནའང་། གསར་འགོད་པས་འགྲེལ་རྒྱག་པ་ལའང་ཚད་ཅིག་ཡོད་པས་དེ་ཙམ་གྱིས་མ་ཆོག་པ་ཞིག་ཏུ་མཐོང་གི་མེད་ལགས། གུས་བཅས། ཨ་རིག་གླེན་པས།
གནས་ཚུལ་འདི་ལ་ཧ་ལས་དགོས་དོན་ཡོད་པ་མ་རེད། སྔ་མོའི་ང་ཚོའི་བོད་ཀྱི་གཏམ་དཔེ་ལ་ ཞིམ་པོ་བྱུང་ན་གྲོད་ཁོག་ལྦོས་ནས་ཤི་ནའི་ཤི་ ཟེར་བ་ཞིག་ཡོད་པ་མ་ཡིན་ནམ། བྱས་ཙང་སློབ་ཕྲུག་ཚོས་ཞིམ་པོ་བྱུང་ཙང་གྲོད་ཁོག་ལྦོས་ལྦོས་བར་བཟས་པ་རེད། ཤེས་སོང་ངམ། ཧ་ཧ་ཧ་ཧ་ཧ་ཧ་ཧ་ཧ་
དྲ་གྲོགས་འབྲུག་བྷེ་ལ་མཐའ་གཅིག་ཏུ་རྒྱབ་སྐྱོར་ཡོད།ངོ་མ་ཡ་མཚན་རེད།སྤྱིར་བཏང་བོད་མི་རིགས་འདི་མི་འབོར་ཧ་ཅང་ཉུང་ཉུང་ཡིན་པ་ཞིག་ལ།ད་ཐེངས་རྡ་ཤོད་སློབ་གྲའི་སློབ་མ་དེ་འདྲ་མང་པོ་ནད་པ་ཛ་དྲག་ཆགས་རུང་དམིགས་བསལ་སློབ་སྤྱི་དང་ལས་བྱེད་མི་སྣ་ཡོངས་ནས་དོ་སྣང་དེ་ཙམ་མེད་པ་ཐན་ནག་རེད།ད་རེས་སློབ་མ་རྐྱེན་འདས་སུ་ཕྱིན་པ་དང་ནད་པར་གྱུར་བཞིན་པ་དེ་དག་གི་ཚེ་སྲོག་གི་འགན་ཆ་ཚང་སློབ་སྤྱི་ཡོད་ངེས།ཐག་བཅོད་ནན་མོ་བྱ་རྒྱུ་མཁྱེནནན།།ལྷག་དོན་གསར་འགོད་པའི་བཅར་འདྲི་དངོས་ལེན་མ་བྱས་བ་ནི་ཁྲེལ་གཞུང་མེད་པའི་བྱ་སྤྱོད་དང་རྒྱ་གུང་ཁྲན་ཏང་གི་བྱ་སྤྱོད་ངོ་མ་དེ་ཕྱི་རུ་མངོན་པ་རེད།ཛབ་ཆེན་དང་ངོ་ཚ་མེད་པའི་འགན་འཛིན་ཐབས་སྡུག་རེད།
ཨ་རིག་འགྱུར་མེད་ལགས། འདས་གྲོངས་སུ་ཕྱིན་པའི་སློབ་ཕྲུག་དེའི་མིང་དང་ལོ་རྒྱུས་ཕོ་མོ་སོགས་རགས་ཙམ་འགོད་ཐུབ་ན་ཡག་པོ་འདུག།
སློབ་ཕྲུག་ཞིག་རྐྱེན་ལམ་དུ་ཤོར་བ་དངོས་ནས་བློ་འཕམ་ཡོད་། སློབ་གྲྭ་དེ་གའི་འབྲེལ་ཡོད་ལས་བྱེད་ཚང་མས་ལས་ཀ་འཐུས་ཤོར་ཕྱིན་འདུག་པའི་འགན་ཚང་མ་ཁྱེད་རང་ཚང་ལ་ཡོད་ངེས། མ་འོང་འདི་རིགས་མི་འབྱུང་བ་དང། སྔོན་འགོག་བྱ་རྒྱུར་འབྲེལ་ཡོད་ཚང་མས་ཐུགས་སྣང་རྒྱུན་མཐུད་བྱེད་དགོས།
གོང་གིས་སྨན་པས་བརྟག་དཔྱད་བྱེདབཞིནཔའི་པར་འདུ་ལ་གཟུགས་དང་ཤེས་བདོག་ཁག་པོ་ཞིག་མི་འདུག་ལ་སྤྱོད་པ་ངན་འདོག་ཁག་པོ་ཞིག་འདུག། ངོ་མ་བྱས་ན་གནས་ཚུལ་དེ་ཛ་དྲག་གི་ཉེན་ཁ་ཡིན་པ་འདི་ཙམ་གྱིས་ཕན་མི་ཐོགས་། སྨན་ཁང་ཆེན་པོ་ཞིག་ལ་འཕྲལ་དུ་བརྟག་དཔྱད་བྱེད་ཐུབ་དགོས། འདས་པོའི་ཆེད་དུ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔
ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔
༼སློབ་ཕྲུག་བཅུ་གཉིས་ལ་ཆུ་བཏང་བ་༠༽ ཛ་དྲག་གིས་ནད་པ་སྨན་བཅོས་བྱེད་ཐབས་ཆུ་གཏོང་ལུགས་དེ་གོ་བ་དང་པོ་ཡིན།
ངོ་མ་ང་ལ་མཐོང་རྒྱ་མེད་གི་ཡ།།།།
འདས་པོའི་ཆེད་དུ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔
ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔
རྡ་ཤོད་འདི་བ་བོད་ཁྱིམ་ཆཚང་ལས་ཚགས་ཚུད་མེད་པ་དང་། བོད་དྲི་མི་བྲོ་བ་རེད། ད་རེས་མི་ཞིག་འདས་པ་འདི་ནི་མགོ་ཁྲིད་ཚོར་འགན་ཡོད་ངེས།
དེ་རིང་གི་གནས་ཚུལ་དེ་རྒྱུད་སློབ་གྲྭ་ཁག་གི་སློབ་སྤྱི་དང་དགེ་རྒན་དེ་མིན་ལས་བྱེད་རྣམས་ཀྱིས་སློབ་ཕྲུག་ཚོའི་བཟའ་བཅའི་རིག་ལ་དོ་སྣང་ཆེར་བཞེས་གནང་རོག་ཞེས་འབོད་སྐུལ་གྱི་ཚུལ་དུ་ཞུ་འདོད་བྱུང། འདས་གྲོང་སུ་འགྱུར་བའི་སློབ་མ་དེའི་ཆེད་དུ་དྲ་གྲོགས་རྣམས་པས་མ་ཎི་གང་མང་འདོན་རོག ། ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔ ཨོྃམཎིཔདྨེཧཱུྃ༔
དྲ་གྲོགས་ཤེལ་དཀར་བློ་བཟང་ལགས། ཉིད་ཀྱིས་གསུངས་པ་ལྟར་བཅོས་དགོས་པ་རྣམས་བཅོས་ཟིན་མོད། ཟ་མ་འདི་ཟོས་ནས་ཞེས་པ་བཅོས་མེད། དེ་ཕལ་ཆེར་དེ་ལྟར་གོ་བདེ་བ་ཡོད་སྙམ། རྒྱུ་མཚན། སློབ་ཕྲུག་ཚོས་ཟ་མ་འདི་ཟོས་ནས་ན་བ་རེད་ཟེར་ནས་ཐག་མི་ཆོད་ཅེས་གསུངས་སྟབས་རེད། མ་བྱན་གྱིས་ཟ་མ་འདི་བཟོས་ནས་ན་བ་རེད་ཟེར་བའི་དོན་མ་རེད།
གང་ལྟར་འདི་ལྟར་ལམ་སྟོན་གནང་ན་དངོས་གནས་དགའ་བཞིན་སྤྲོ་བཞིན་དུ་དང་ལེན་བྱེད་རྐྱང་ཡིན་པས་གཞུག་ཕྱོགས་ཀྱང་མུ་མཐུད་དེ་ལམ་སྟོན་གནང་རོགས། གུས་བཅས། ཨ་རིག་གླེན་པས།
སློབ་གྲྭ་དེ་གའི་འབྲེལ་ཡོད་ལས་བྱེད་ཚང་མས་འཐུས་ཤོར་ཕྱིན་འདུག ངོ་མ་བྱས་ན་གནས་ཚུལ་དེ་ཛ་དྲག་གི་ཉེན་ཁ་ཡིན་པ་ཤེས་པར་བྱས་ཏེ་བོད་སྨན་དང་སློབ་གྲྭ་དེ་གའི་སྨན་ཁང་ཆུང་ཆུང་དེ་ལས་གཞན་བདེ་ལེགས་སྨན་ཁང་ལྟ་བུའི་སྨན་ཁང་ཆེན་པོ་ཞིག་ལ་འཕྲལ་དུ་བརྟག་དཔྱད་བྱེད་ཐུབ་ན་སློབ་ཕྲུག་དེའི་ཚེ་སྲོག་མ་ཤོར་བའི་རེ་བ་ཡོད་བཟོ་འདུག།
བོད་ཁྱིམ་སློབ་གྲྭ་ཕལ་ཆེར་གྱིས་དེ་ལྟར་བྱེད་ཀྱི་འདུག གནས་སྐབས་ཀྱི་འགྲོ་གྲོན་སོགས་ལ་བལྟས་ཏེ་ཧ་ལམ་མིའི་རེ་བ་རྫོགས་རྫོགས་བར་དེ་གར་ཉལ་ནས་ཐབས་ཟད་འུ་ཐུག་མཚམས་ལ་སླེབ་དུས་གཞི་ནས་སྨན་ཁང་ཆེ་སར་སྐྱེལ་ཐབས་བྱེད་ཀྱི་འདུག དེ་དུས་ཕལ་ཆེར་མིའི་རེ་བ་མེད་པ་རེད།
གཉིས་ནས་ང་ཚོ་ཚང་མས་མཁྱེན་གསལ་རེད། བོད་སྨན་གྱིས་ནད་རྙིང་རིགས་དང་དེ་ཡང་དུས་ཡུན་རིང་པོ་བསྟེན་མ་གཏོགས་ཛ་དྲག་གི་ན་ཚ་དེའི་རིགས་ལས་གློ་བུར་དུ་བསྐྱབ་ཁག་པོ་རེད།།
གསར་འགོད་ལ་ལགས།
གཞེན་སྐུལ་ཞུ་རྒྱུར། འདས་གྲོངས་སུ་ཕྱིན་པའི་སློབ་ཕྲུག་དེའི་མིང་དང་ལོ་རྒྱུས་རགས་ཙམ་འགོད་ཐུབ་ན་ཡག་པོ་འདུག།
ནོར་བ། བཅོས་པ།
་སློབ་ཕྲུག་སུམ་བཅུ་ཙམ། སློབ་ཕྲུག་སུམ་ཅུ་ཙམ།
དེ་ཙམ་ཆབས་ཆེན་པོ་མི་འདུག དེ་ཙམ་ཚབས་ཆེན་པོ་མི་འདུག
འཕྲད་དུ་བོད་སྨན། འཕྲལ་དུ་བོད་སྨན།
འཕྲད་དུ་སྨན་བཅོས་ཀྱི་བྱ་བ་བསྒྲུབས་ཡོད། འཕྲལ་དུ།
ཟ་མ་འདི་ཟོས་ནས། ཟ་མ་འདི་བཟོས་ནས།
གལ་ཏེ་ལེགས་ཆ་ཡོད་ན་མྱུར་དུ་བཅོས་རོགས།