རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཡུལ་མི་རྣམས་ལ་ཆོས་དད་རང་དབང་གཏན་ནས་མེད་པ་དང་། རྒྱ་ནག་ནང་ཁྲིམས་ཀྱི་དབང་སྒྱུར་མེད་པར་གང་ཟག་གི་དབང་སྒྱུར་ཡིན་པའི་གནད་དོན་གསལ་སྟོན་བྱས་འདུག་ཟེར།
དེ་རིང་ཕྱི་ཚེས་ ༢༧ ཉིན་གྱི་ཞོགས་པའི་ཆུ་ཚོད་བཅུ་བའི་སྟེང་། གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བོད་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་གསར་འགོད་གསལ་བསྒྲགས་ཤིག་བསྐྱངས་ཡོད། དེ་ནི་འདི་ལོའི་ཕྱི་ཟླ་ ༩ པའི་ཚེས་ ༣༠ ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆོས་ལུགས་ལས་དོན་སྡེ་ཁག་གིས་༼ བོད་བརྒྱུད་ནང་བསྟན་གྱི་དགོན་པའི་དོ་དམ་བྱེད་ཐབས ༽ཞེས་པའི་སྐོར་ཡིག་ཆ་ཞིག་བཀྲམས་ཡོད་ལ། ཕྱི་ཟླ་ ༡༡ ཚེས་ ༡ ཉིན་ནས་དངོས་སུ་ལག་བསྟར་བྱ་རྒྱུ་ཡིན་ཚུལ་བསྒྲགས་ཡོད་སྟབས། དེ་ལ་བོད་བརྒྱུད་ནང་བསྟན་གྱི་བླ་ཆེན་ཁག་དང་དགོན་སྡེ་ཁག་གི་མཁན་སློབ། འདུས་མང་། མང་ཚོགས་བཅས་ནས་ངོས་ལེན་རྩ་བ་ནས་མེད་པར་མཐའ་གཅིག་ཏུ་ངོ་རྒོལ་བྱེད་ཀྱིན་ཡོད་པ་ཞིག་ཡིན་འདུག
སྐབས་དེར་ཆོས་རིག་བཀའ་བློན་མཆོག་གིས་གསལ་བསྒྲགས་སྒྲོག་སྦྱོང་གནང་དོན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སུ་”ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་དམངས་ལ་ཆོས་དད་ཀྱི་རང་དབང་ཡོད། རྒྱལ་ཁབ་ཀྱི་ལས་ཁུངས་དང་། སྤྱི་ཚོགས་ཀྱི་ཚོགས་པ། མི་སྒེར་བཅས་གང་ཡིན་རུང་བཙན་ཤེད་ཀྱིས་སྤྱི་དམངས་ལ་ཆོས་ལ་དད་མོས་བྱེད་དུ་འཇུག་པའམ་ཆོས་ལ་དད་མོས་བྱེད་དུ་མི་འཇུག་པ་བྱས་མི་ཆོག ཆོས་ལ་དད་པ་ཡོད་པའི་སྤྱི་དམངས་དང་ཆོས་ལ་དད་པ་མེད་པའི་སྤྱི་དམངས་སུ་ལའང་མཐོང་ཆུང་བྱས་མི་ཆོག རྒྱལ་ཁབ་ཀྱི་ཆོས་ལུགས་ཀྱི་རྒྱུན་ལྡན་བྱེད་སྒོ་སྲུང་སྐྱོང་བྱེད་རྒྱུ། མི་སུ་ཡིན་རུང་ཆོས་ལུགས་ལ་བརྟེན་ནས་སྤྱི་ཚོགས་ཀྱི་སྒྲིག་ལམ་གཏོར་བཤིག་གཏོང་བ་དང་། སྤྱི་དམངས་ཀྱི་ལུས་ཁམས་བདེ་ཐང་ལ་གནོད་འཚེ་གཏོང་བ། རྒྱལ་ཁབ་ཀྱི་སློབ་གསོའི་ལམ་ལུགས་ལ་འགོག་རྐྱེན་བཟོ་བ་བཅས་ཀྱི་བྱ་བ་བྱེད་མི་ཆོག ཆོས་ལུགས་ཀྱི་ཚོགས་པ་དང་ཆོས་ལུགས་ཀྱི་ལས་དོན་ཐད་ཕྱི་རྒྱལ་གྱི་སྟོབས་ཤུགས་ཀྱི་བཀོད་པར་ཉན་མི་དགོས།” ཞེས་གསལ་བསྟན་ཡང་། ཉེ་ཆར་ ༢༠༡༠ ཟླ་ ༩ ཚེས་ ༣༠ ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆོས་དོན་ལས་ཁུངས་ཀྱིས་བཀའ་ཡིག་ཨང་ ༨ པར་འབོད་པའི་ “བོད་བརྒྱུད་ནང་བསྟན་གྱི་དགོན་པའི་དོ་དམ་བྱེད་ཐབས།” ཞེས་པའི་ཡིག་ཆ་ཞིག་ཁྱབ་སྤེལ་བྱས་ཏེ། འདི་ལོ་ཕྱི་ཟླ་ ༡༡ ཚེས་ ༡ ནས་ལག་བསྟར་བྱེད་རྒྱུ་ཡིན་ཚུལ་འཁོད་འདུག དེ་ནི་གོང་དུ་དྲངས་པའི་རྩ་ཁྲིམས་ཀྱི་ཆ་རྐྱེན་དང་རྩ་འགལ་ཡིན་པ་མ་ཟད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཡུལ་མི་རྣམས་ལ་ཆོས་དད་རང་དབང་གཏན་ནས་མེད་པ་དང་། རྒྱ་ནག་ནང་ཁྲིམས་ཀྱི་དབང་སྒྱུར་མེད་པར་གང་ཟག་གི་དབང་སྒྱུར་ཡིན་པའི་གནད་དོན་གསལ་སྟོན་བྱས་འདུག ཅེས་དང་།
ཁོང་གིས་མུ་མཐུད་དུ་སྒྲོག་སྦྱོང་གནང་དོན། བོད་བརྒྱུད་ནང་བསྟན་སྤྱི་དང་བྱེ་བྲག་ཆོས་བརྒྱུད་སོ་སོའི་བླ་ན་མེད་པའི་དབུ་ཁྲིད་བླ་ཆེན་དང་། མཁས་དབང་རྣམ་པ་བོད་ཀྱི་ཕྱི་ལ་བཙན་བྱོལ་དུ་བཞུགས་བཞིན་པ་ཡིན་ཞིང་། ཆོས་ཕྱོགས་ཀྱི་ལམ་སྟོན་དང་། དཔེ་ཁྲིད། དབང་ལུང་མན་ངག་གི་བརྒྱུད་པ་སོགས་བཙན་བྱོལ་དུ་བོད་མིའི་ཁྲོད་དུ་ཡོད་པ་རྣམས་”བྱེད་ཐབས་”འདིའི་ལྐོག་གཡོའི་འོག་བོད་དུ་བཀག་སྡོམ་བྱ་རྒྱུར་དམིགས་པ་ཞིག་དང་། དགོན་སྡེ་སོ་སོའི་ཆོས་ཕྱོགས་ཀྱི་གལ་ཆེའི་བྱེད་སྒོ་ཁག་བྱེད་མི་ཐུབ་པའམ། བྱེད་ཐབས་ཧ་ཅང་དཀའ་བར་བཟོས་ཏེ་བོད་བརྒྱུད་ནང་བསྟན་གྱི་སྲོལ་རྒྱུན་དང་སློབ་གསོ་རྩ་མེད་གཏོང་རྒྱུ་མ་ཟད། བོད་བརྒྱུད་ནང་ཆོས་ཀྱི་སྙིང་དོན་བླ་སློབ་ཀྱི་འབྲེལ་བ་ཡང་བཅད་དེ། དགོན་སྡེ་ཁག་དང་ཆོས་རྒྱུན་རྩ་མེད་བཟོ་རྒྱུའི་ཐབས་ལམ་ཉག་ཅིག་ཡིན་འདུག་ན། “བྱེད་ཐབས་” འདི་ལ་གཞིས་བྱེས་བོད་བརྒྱུད་ནང་བསྟན་གྱི་བསྟན་བདག་བླ་ཆེན་ཁག་དང་། དགོན་སྡེ་ཁག་གི་མཁན་སློབ། འདུས་མང་། མང་ཚོགས་བཅས་ནས་ངོས་ལེན་རྩ་བ་ནས་མེད་པ་མ་ཟད། མཐའ་གཅིག་ཏུ་ངོ་རྒོལ་བྱེད་ཀྱིན་ཡོད། ཅེས་བསྒྲགས་སོང་།
སྐབས་དེར་ཆོས་རིག་བཀའ་བློན་མཆོག་གིས་གསུངས་དོན། ངས་འཛམ་གླིང་ཐོག་མི་འབོར་མང་ཤོས་ཡིན་པའི་རྒྱ་ནག་གི་མགོ་ཁྲིད་ཚོས་བསམ་བློའི་འཁྱེར་སོ་ཇི་འདྲ་ཞིག་གི་ཐོག་ནས་སྒྲིག་གཞི་འདི་བཟོས་པ་ཡིན་ནམ་སྙམ་སོང་། རི་དྭགས་ཀྱི་རྔ་མ་བསྟན་ནས་བོང་བུའི་ཤ་བཙོང་ཞེས་པ་ལྟར། རྒྱ་ནག་གི་ཁྲིམས་དང་སྒྲིག་གཞིའི་ནང་དགེ་འདུན་པའི་བསླབ་པ་སློབ་གཉེར་སྐོར་ལ་ཚད་ལྡན་ཡིན་པའི་མཐོང་སྣང་ཞིག་སྤྲོད་ཀྱི་ཡོད་ཀྱང་། དོན་དངོས་ཀྱི་ལག་ལེན་ཐོག་བོད་དུ་དར་བའི་ནང་ཆོས་ཀྱི་འགྲོ་ལུགས་དང་ཡོངས་སུ་འགལ་ཡོད་པར་མ་ཟད། ལྷག་པར་དུ་འདས་པའི་རྒྱལ་རབས་ལོ་རྒྱུས་དང་ཆོས་འབྱུང་དང་རྦད་དེ་རྒྱབ་འགལ་ཆགས་ཡོད། ཆོས་པ་ཟེར་བ་རྒྱ་ཆེ་ས་ནས་བཤད་ན། བཀའ་བསྟན་འགྱུར་དང་སྡེ་སྣོད་གསུམ། དེ་ནས་འདུལ་བའི་སྡེ་སྣོད་ནང་། རབ་བྱུང་དགེ་འདུན་གྱི་སྡེ་རྣམས་ཇི་ལྟར་ཕེབས་དགོས་མིན་དང་ཇི་ལྟར་བཞུགས་དགོས་མིན། དེ་བཞིན་སོ་སོ་ཐར་པའི་མདོ་དང་། དགེ་སློང་གི་སྡོམ་ཁྲིམས་ ༢༥༣ བཅས་ཤིན་ཏུ་གསལ་པོ་ཞིག་ཡོད། དེ་ཚོ་ཟུར་དུ་བཞག་སྟེ་ཆོས་མེད་སྨྲ་བའི་དམར་པོའི་རྒྱལ་ཁབ་ཅིག་གིས་ཁྲིམས་དང་སྒྲིག་གཞི་བཟོས་པ་དེ། ཕྱི་ཚུལ་ནས་བྱེད་སྟངས་མཛེས་པོ་ཞིག་ཡོད་ནའང་དོན་དམ་ཐོག་དམར་གཞུང་གི་ལམ་ལུགས་འོག་བོད་ཀྱི་ཆོས་དང་རིག་གཞུང་རིམ་བཞིན་ཉམ་དམས་སུ་གཏོང་གིན་ཡོད་པ་གསལ་པོ་རེད། ཅེས་གསུངས་སོང་།
རྒྱ་གཞུང་གིས་ཁྱབ་བསྒྲགས་བྱས་པའི་ ༼ བོད་བརྒྱུད་ནང་བསྟན་གྱི་དགོན་པའི་དོ་དམ་བྱེད་ཐབས ༽ ཞེས་པའི་ཡིག་ཆ་དེར། བོད་
དེ་
གསར་འགོད་པ། དཔལ་ལྡན།
