རྒས་གསོ་ཁང་འདི་ཨ་མར་དྲན་རྟེན་དུ་བརྒྱབ་པ་ཡིན།

རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་སྒར་ལུགས་ཟུང་བསམ་འགྲུབ་གླིང་རྒས་གསོ་ཁང་གི་འགན་འཛིན་བསྟན་འཛིན་དོན་གྲུབ་དང་། ཁོང་གི་བཟའ་ཟླ་རྒས་གསོ་ཁང་དེ་ཀའི་སྦྱིན་བདག་གཙོ་བོ་ཨི་ཌ་ལི་ནས་ཡིན་པ་བོད་མིང་ལ་བསྟན་འཛིན་ཚེ་ལྷ་གཉིས་ལ་བཅར་འདྲི་ཞུས་ཡོད།

དྲི་བ། ཐོག་མར་སོ་སོ་ངོ་སྤྲོད་དང་འབྲེལ་རྒས་གསོ་ཁང་འདི་ཐོག་མར་བཙུགས་པ་དང་། ད་ལྟའི་གནས་སྟངས་ངོ་སྤྲོད་མདོ་བསྡུས་ཤིག་གནང་རོགས། 

ལན། ངའི་མིང་ལ་བསྟན་འཛིན་དོན་འགྲུབ་ཟེར་ཞིང་སྐྱེས་ཡུལ་གྲོ་མོ་ཡིན། ང་དགུ་ལོར་བོད་ནང་དུས་འགྱུར་བྱུང་རྗེས་ཨ་མ་ལགས་ཀྱིས་ཁྲིད་དེ་རྒྱ་གར་ལ་ཡོང་བ་ཡིན། སྐབས་དེར་ང་ལོ་བདུན་རེད། བཙན་བྱོལ་དུ་འབྱོར་རྗེས་སྒང་ཐོག་ནས་ལོ་ཁ་ཤས་བསྡད་པ་ཡིན། ༡༩༦༥ ལོར་མེལ་སོར་གཞིས་ཆགས་སུ་ཡོང་སྟེ་འཛིན་གྲྭ་ ༡༠ བར་སློབ་སྦྱོང་བྱས་པ་ཡིན།  ༡༩༧༦ ལོར་དམག་ཁོངས་སུ་ཞུགས་ཏེ་ལོ་ ༢༡ ཙམ་བསྡད་པ་ཡིན། ༡༩༩༩ ལོ་ནས་རྒས་གསོ་ཁང་འདིར་ལས་ཀ་མགོ་འཛུགས་བྱས་པ་ཡིན། རྒས་གསོ་ཁང་འདི་ཐོག་མར་ ༡༩༩༨ ལོར་བཙུགས་པ་རེད། སྐབས་དེར་འདིར་བགྲེས་སོང་ ༤༠ ཙམ་ཡོད། ༢༠༠༠ ལོར་ཁང་མིག་གསར་རྒྱག་བྱས་ཏེ། བགྲེས་སོང་ ༢༢ ཁ་སྣོན་བྱས་པ་རེད། སྤྱིར་བཏང་རྒས་གསོ་ཁང་འདི་བོད་གཞུང་ནང་སྲིད་ཀྱི་ཁྱབ་ཁོངས་ས་གནས་གཞིས་མགོའི་འོག་ཡོད་ཀྱང་། འགྲོ་སོང་སོགས་ཀྱི་ཐད་ནས་འགན་གཙོ་བོ་ཨི་ཌ་ལི་ནས་ཡིན་པའི་སྦྱིན་བདག་མོ་རང་གིས་འགན་བཞེས་བསྡད་ཡོད་པ་རེད། 

དྲི་བ། རྒས་གསོ་ཁང་འདིའི་སྒྲིག་གཞི་དང་ཉིན་རེའི་འགྲོ་སྟངས་གང་འདྲ་ཡོད་དམ།  

ལན། བགྲེས་སོང་ཚོར་གཉིད་ཞེ་དྲག་མེད་སྟབས་ཞོགས་པ་སྔ་བོ་ཆུ་ཚོད་ ༤ སྟེང་ཡར་བཞེངས་ཀྱི་ཡོད། ཆུ་ཚོད་ ༦ སྟེང་ཆུ་ཁོལ་རེ་འབུལ་གྱི་ཡོད། ཆུ་ཚོད་ ༧ སྟེང་ཞོགས་ཇ་རེད། ཆུ་ཚོད་ ༧ དང་ཕྱེད་ནས་ ༨ དང་ཕྱེད་བར་ཞོགས་པའི་ཞལ་འདོན་སྐྱོར་གྱི་ཡོད། ཆུ་ཚོད་ ༨ དང་ཕྱེད་ཀ་ནས་ལས་ཀ་དམིགས་བསལ་མེད་སྟབས། སེ་ར་སོགས་མཐའ་ཁོར་གྱི་དགོན་པ་ཁག་ལ་མཆོད་མཇལ་དུ་འགྲོ་བ་དང་། འགའ་རེ་ཡིས་རྒས་གསོ་ཁང་གི་ཁོར་ཡུག་ནང་སྔོ་ཚལ་འདེབས་ལས་བྱེད་ཀྱི་ཡོད། ཆུ་ཚོད་ ༡༠ ཐོག་གསོལ་ཇ་ཞིག་འབུལ་བཞིན་ཡོད། ཉིན་གུང་ཆུ་ཚོད་ ༡༢ ཐོག་གུང་ཟས་མཆོད་ཀྱི་ཡོད། དེ་ནས་ཉིན་རྒྱབ་ཆུ་ཚོད་ ༣ སྟེང་ཡང་བསྐྱར་གསོལ་ཇ་ཞིག་འབུལ་བཞིན་ཡོད། ཉིན་རྒྱབ་ཆུ་ཚོད་ ༣ དང་ཕྱེད་ཀ་ནས་ ༤ དང་ཕྱེད་བར་ཞལ་འདོན་ཡོད། ཕྱི་དྲོའི་ཆུ་ཚོད་ ༦ སྟེང་དགོང་ཟས་རེད། དགོང་མོའི་ཆུ་ཚོད་ ༦ དང་ཕྱེད་ཀ་ཙམ་ལ་མི་གཞན་གྱིས་ཎི་དང་སྒྲོལ་མ་གསོག་སྒྲུབ་ཀྱི་འདོན་བཅོལ་བཞག་པ་ཁག་སྒྲུབ་ཀྱི་ཡོད། ཉིན་གཅིག་གི་ལས་རིམ་རྫོགས་རྗེས་གཟུགས་པོ་བདེ་བོ་ཡོད་མཁན་ཚོས་བརྙན་འཕྲིན་ལ་ལྟ་བཞིན་ཡོད། དགོང་མོའི་ཆུ་ཚོད་ ༡༠ སྔོན་ལ་ཉལ་དགོས་པ་རེད།

དྲི་བ། འདི་ཀའི་བགྲེས་སོང་ཚོར་སྨན་ཁང་དང་ཉལ་ཁང་གི་མཐུན་རྐྱེན་གང་འདྲ་ཡོད་པ་དང་། ཁོང་ཚོར་ཞབས་ཞུ་སྒྲུབ་མཁན་གྱི་ལས་བྱེད་ག་ཚོད་ཡོད་དམ།

ལན། ཉལ་ཁང་དང་ཞལ་ལག་མཆོད་ས་ཡག་པོ་ཡོད་པ་རེད། སྨན་བཅོས་ཐོག་ལས་ཀ་བྱེད་མཁན་མི་གཅིག་དང་། བགྲེས་སོང་ཚོ་ལ་ལྟ་རྟོག་རོགས་རམ་བྱེད་མཁན་བུ་མོ་ཞིག ཞལ་ལག་བཟོ་མཁན་མ་བྱན་གཉིས། གསང་སྤྱོད་འཁྲུད་ཁང་དང་། ཁོར་ཡུག་གཙང་བཟོ་བྱེད་མཁན་གཅིག ང་རང་གིས་སྤྱི་ཡོངས་ལ་ལྟ་རྟོག་བྱེད་ཀྱི་ཡོད། ཁྱོན་བསྡོམས་ང་ཚོར་ལས་བྱེད་ ༥ ཙམ་ལས་མེད། འདིར་ལས་བྱེད་རག་རྒྱུ་དཀའ་ལས་ཁག་པོ་འདུག གང་ཡིན་ཟེར་ན། འདིའི་ནང་གི་མི་ཚང་རྒན་འཁོགས་ཡིན་པ་མ་ཟད། ནད་གཅོང་དང་སེམས་པ་ཐང་པོ་མེད་པ་སོགས་ཡིན་སྟབས། ཞབས་ཞུ་སྒྲུབ་མཁན་རག་གི་མི་འདུག དཀའ་ངལ་ཆེ་ཤོས་གང་རེད་ཟེར་ན། བགྲེས་སོང་ཁ་ཤས་སོ་སོའི་ནང་ནས་ཨུ་ཚུགས་བརྒྱབ་སྟེ་འདུག་རྒྱུ་མང་དྲགས་སྟབས། ལུས་ནད་གཅོང་དང་སེམས་པ་ཐང་བོ་མེད་པ་ཆགས་འདུག དེ་དག་ལ་གཉོར་སྐྱོང་བྱ་རྒྱུ་དཀའ་ལས་ཁག་ཤོས་རེད།

དྲི་བ། འདས་པའི་ལོ་མང་རིང་ཀྱག་ཀྱོག་གི་བགྲོད་ལམ་རིང་པོ་བརྒྱུད་མྱོང་མཁན་བོད་མི་རྒན་རབས་པ་མང་པོ་ཞིག་དང་མཉམ་གཤིབ་རྒྱུན་རིང་བྱས་པའི་ཉམས་མྱོང་ཁྲོད་ཁྱེད་ལ་བག་ཆགས་ཟབ་ཤོས་ག་རེ་བཞག་སོང་ངམ། 

ལན། ཉམས་མྱོང་ཟེར་ན་འདྲ། རྒན་འཁོགས་ཚོའི་སྟེང་ནས་ཡ་མཚན་དགོས་ས་དང་། མིའི་མི་ཚེ་ཟེར་བ་འདི་ལ་ངོས་འཛིན་མི་འདྲ་བ་སྣ་ཚོགས་ཤིག་སྐྱེས་སོང་། རྒན་འཁོགས་ཚོ་ལ་གཅིག་གྱུར་གྱི་སྣང་ཚུལ་ཞིག་ཡོད་པ་ནི། ལོ་ཅི་ཙམ་རྒས་ཀྱང་ཆུང་ཆུང་བྱིས་པའི་དུས་ཀྱི་བག་ཆགས་དེ་གསལ་བོར་བསྡད་འདུག སྔོན་མ་ཆབ་མདོ་ནས་ཡིན་པའི་བགྲེས་སོང་ཞིག་ཡོད། ཁོས་རྟག་པར་ཁྲོམ་སྲང་དང་རླངས་འཁོར་ལམ་ཁར་འགྲོ་རྒྱུར་དགའ་བོ་བྱེད་ཀྱི་འདུག རྗེས་སུ་ཤེས་རྟོགས་བྱུང་བ་ལྟར་ན། ཁོ་ཆུང་དུས་ཚོང་པ་ཞིག་རེད། ཆབ་མདོ་དང་ལྷ་ས། གྲོ་མོ་དང་བཀའ་སྦུག ཀ་ལི་ཀ་ཏ་བཅས་ནས་ཆུ་ཚོད་སོགས་ཀྱི་ཚོང་བརྒྱབ་འདུག རྒན་འཁོགས་ཚང་མ་ལོ་ག་ཚད་མཐོ་རུ་ཕྱིན་པ་དང་བསྟུན་ཏེ། བསམ་བློ་བྱིས་པའི་དུས་སྐབས་ཆགས་ཡོང་གི་འདུག དེ་དང་མཉམ་དུ་སེམས་པ་གུ་དོག་ཆགས་ཏེ། ཕན་ཚུན་མི་འགྲིག་པ་ཆུང་ཚགས་བྱུང་ན་ཡང་བརྗེད་རྒྱུ་མེད་པར་སེམས་ལ་བཟུང་འདུག དཔེར་ན། ཕོར་བ་ཞིག་གི་ཆེད་དུ་ཁ་རྩོད་ཤོར་ན་ཡང་ལོ་བཞི་ལྔའི་རྗེས་སུ་ད་དུང་སེམས་ལ་ཉར་འདུག་ལ། ཅི་ཙམ་འགོར་ཡང་རྙོག་དྲ་ཕྲན་བུ་བྱུང་སྐབས་རེ་རེ་བཞིན་གླེང་ཡོང་གི་འདུག 

དྲི་བ། འདིར་ཡོད་པའི་བགྲེས་སོང་དག་གི་བྱེ་བྲག་གི་ལོ་རྒྱུས་གང་འདྲ་ཡིན་པ་དང་། ཁོང་ཚོ་རྒས་གསོ་ཁང་ལ་ཡོང་དགོས་པའི་རྒྱུ་མཚན་གཙོ་བོ་གང་དག་ལ་ཐུག་འདུག 

ལན། ད་ལྟ་འདིར་བགྲེས་སོང་ ༥༠ ཡོད་ལ། དེ་དག་ཁྲོད་ཕོ་ ༣༡ དང་། མོ་ ༡༩ ཙམ་འདུག ཕོ་མང་ཆེ་བ་དམག་མི་རྒན་པ་གཉེན་སྒྲིག་མ་བྱས་པར་བཟའ་ཟླ་བུ་ཕྲུག་གཅིག་ཀྱང་མེད་མཁན་རེད། མོ་རྣམས་ཀྱང་ཁྱོ་ག་གྲོངས་ཟིན་པ་དང་། ཡང་ན་མི་ཚེ་གང་བོར་ཁྱོ་ག་མེད་པར་མོ་ཧྲང་ལ་ལྷག་བསྡད་པ་དེ་འདྲ་རེད། ཁྱོ་ཤུག་གཉིས་ཀ་འདིར་ཡོང་ཡོད་པ་ ༤ ཙམ་ཡོད། ཁོང་ཚོ་སོ་སོར་བུ་ཕྲུག་མེད་མཁན་རེད། དེ་དག་འདིར་ཁང་མིག་གཅིག་ནང་སྡོད་དུ་བཅུག་ཡོད། དེང་སྐབས་ཕྱི་རྒྱལ་ཁག་ལ་མང་པོ་འགྲོ་བཞིན་ཡོད་སྟབས། མ་འོངས་པར་ཕ་མ་རྒས་གསོ་ཁང་ལ་བཅུག་སྟེ་སོ་སོ་ཕྱི་རྒྱལ་དུ་འགྲོ་ཐབས་བྱེད་མཁན་ཡོང་མི་སྲིད་པ་མ་རེད། ད་ལྟ་ནས་རེ་ཟུང་བསླེབས་སོང་། སོ་སོ་ཕྱི་རྒྱལ་དུ་འགྲོ་དགོས་པའི་དབང་གིས་ཕ་མ་རྒས་གསོ་ཁང་ལ་འཇུག་ཐབས་བྱེད་མཁན་དང་། སྔར་ནས་ཕྱི་རྒྱལ་དུ་ཕྱིན་ཡོད་མཁན་ཚོས་འདིར་འབྲེལ་བ་བྱས་ཏེ། ཕ་མ་རྒས་གསོ་ཁང་ལ་ལེན་རྒྱུར་ཐབས་ཤེས་བྱེད་མཁན་དེ་འདྲ་འདུག འདི་རིགས་གནས་ཚུལ་ཡག་རྟགས་མ་རེད།

དྲི་བ། ད་ལྟའི་ཆར་རྒས་གསོ་ཁང་འདིར་སྤྱིའི་འགྲོ་གྲོན་ག་ཚོད་ཡོད་པ་དང་། གྲོན་དངུལ་དེ་དག་ཇི་ལྟར་ཐབས་འཚོལ་གནང་གི་ཡོད་དམ།

ལན། རྒན་འཁོགས་དགོངས་ལོ་ ༦༥ ཟིན་ཡོད་པ་ཞིག་ཡིན་ན། གྲོང་སྡེ་སྤྱི་མིས་ས་གནས་མགོ་འཛིན་ལས་ཁུངས་ལ་སྙན་གསེང་ཞུ་དགོས་པ་དང་། གཞིས་མགོ་ཡིས་རྒས་གསོ་ཁང་ལ་བཀའ་ཕེབས་པ་ཡིན་ན་ཚུད་ཀྱི་ཡོད་པ་རེད། འགྲོ་སོང་ཐད་སྔོན་མ་ཉིས་སྟོང་བརྒྱད་དགུ་ལ་ལོ་རེར་ཧིན་སྒོར་འབུམ་དྲུག་རེ་ཙམ་རེད། ད་ཆར་ཟས་སོང་ཕར་བ་དང་བསྟུན་ཏེ་ལོ་རེར་སྒོར་འབུམ་བཅུ་ལྷག་འགྲོ་བཞིན་འདུག ཨི་ཌ་ལི་ནས་ཡིན་པའི་བསྟན་འཛིན་ཚེ་ལྷ་ལགས་ང་རང་གི་བཟའ་ཟླ་ཡིན་ལ། ད་ཆར་རྒས་གསོ་ཁང་འདིའི་སྦྱིན་བདག་གཙོ་བོ་ཡང་མོ་རང་ཡིན་པ་མ་ཟད། རྒས་གསོ་ཁང་འདི་ཐོག་མར་གསར་རྒྱག་གནང་མཁན་ཡང་མོ་རང་རེད། ད་བར་ལོ་ལྟར་ཧིན་སྒོར་འབུམ་དྲུག་རེ་གནང་གི་ཡོད། སྦྱིན་བདག་གཞན་རེ་ཟུང་གིས་ཀྱང་དངུལ་ཕྲན་བུ་རེ་སྤྲོད་ཀྱི་ཡོད། གལ་སྲིད་མ་འདང་བའི་གནས་ཚུལ་བྱུང་ན་ས་གནས་མགོ་འཛིན་ལས་ཁུངས་ཀྱིས་གནང་གི་ཡོད་པ་རེད།

དེའི་རྗེས་མུ་མཐུད་རྒས་གསོ་ཁང་གི་འགན་འཛིན་བསྟན་འཛིན་དོན་གྲུབ་ལགས་ཀྱི་སྐུ་ལྕམ་བསྟན་འཛིན་ཚེ་ལྷ་ལགས་སུ་བཅར་འདྲི་ཞུས།

དྲི་བ། ཐོག་མར་ཁྱེད་རང་གི་ལོ་རྒྱུས་ཉུང་བསྡུས་ཤིག་ངོ་སྤྲོད་གནོངས་དང་།  

ལན། ངའི་བོད་མིང་ལ་བསྟན་འཛིན་ཚེ་ལྷ་ཟེར་གྱི་ཡོད། བོད་མིང་འདི་ ༡༩༩༨ ལོར་༧གོང་ས་ཏཱ་ལའི་བླ་མ་མཆོག་གིས་ང་ལ་གནང་བ་ཡིན། ང་རང་ཨི་ཌ་ལི་ནས་ཡིན་ཞིང་། འཛམ་གླིང་དམག་ཆེན་དང་པོའི་སྐབས་སྐྱེས་པའི་མི་རྙིང་པ་ཞིག་ཡིན། དམག་ཆེན་གཉིས་པའི་སྐབས་ང་རང་གི་ཕ་ལགས་འཇར་མན་ལ་དམག་འཁྲུག་རྒྱག་སྐབས་སྲོག་ཤོར་སོང་། སྦྱིར་ང་སྐྱེས་ས་གྲོང་གསེབ་ཡིན་ཡང་། ཕ་ལགས་འདས་རྗེས་ཨ་མས་ང་གྲོང་འཁྱེར་དུ་ཁྲིད་ཡོང་ནས་དྭ་ཕྲུག་ཁང་ཞིག་ལ་བཞག་པ་རེད། སྐབས་དེར་ཨ་མ་ལགས་ཀྱིས་དཀའ་ལས་བརྒྱབ་སྟེ་ངེད་གཉིས་ཀྱི་ཁ་གསོས་པ་རེད། དྭ་ཕྲུག་ཁང་དེ་ནས་སློབ་སྦྱོང་ཕྲན་བུ་བྱས་ཡོད་ཀྱང་། ཆ་རྐྱེན་གྱི་དཀའ་ངལ་འོག་མུ་མཐུད་སློབ་སྦྱོང་བྱས་མ་ཐུབ་པར་རྗེས་སུ་ང་རང་གིས་ཀྱང་ངལ་རྩོལ་བྱས་པ་ཡིན། རིམ་གྱིས་སྒེར་ངོས་ནས་ཚོང་རྒྱག་མགོ་བརྩམས་ཏེ་ས་ཆ་ཡག་པོ་ཞིག་ཏུ་དེབ་ཚོང་ཁང་ཞིག་གཉེར་ཐུབ་སོང་། སྐབས་དེར་ཚོང་ཧ་ཅང་ཡག་པོ་བྱུང་སོང་ལ། དངུལ་གང་འཚམ་བསོགས་ཐུབ་སོང་། རྗེས་སུ་ཨ་མ་ལགས་ལ་སྙུང་གཞི་ཞིག་ཕོག་སྟེ་ངས་མུ་མཐུད་ཚོང་ལས་གཉེར་མ་ཐུབ་པར་དེབ་ཚོང་ཁང་དེ་གཞན་ལ་བཙོང་སྟེ་ཨ་མ་ལགས་ལ་ནད་གཡོག་བྱས་པ་ཡིན། 

དྲི་བ། ཁྱེད་རང་ཐོག་མར་བོད་པ་ཚོར་འབྲེལ་འདྲིས་ཇི་ལྟར་བྱུང་བ་ཡིན་ནམ།

ལན། ཕྱི་ལོ་ ༡༩༩༤ ལོར་ང་རང་གི་གཟུགས་པོ་ཅུང་མི་བདེ་བ་ཆགས་སྐབས། བོད་པ་དང་འབྲེལ་བ་ཡོད་པའི་བསྐུ་མཉེ་ massage གཏོང་མཁན་བུ་མོ་ཞིག་དང་ཐུག་སྟེ་མོ་རང་གིས་བོད་པའི་སྐོར་ངོ་སྤྲོད་བྱས་སོང་། དུས་དེ་ནས་བཟུང་ང་རང་བོད་པའི་ཐོག་ལ་དོ་སྣང་བསླེབས་སོང་། ༡༩༩༦ ལོར་ང་རང་གི་ཨ་མ་ལགས་སྐུ་གྲོངས་སོང་། དེ་ནས་ང་རང་རྒྱ་གར་དུ་ཡོང་སྟེ་ཐེངས་དང་པོ་བོད་པའི་སྤྱི་ཚོགས་དང་འབྲེལ་འདྲིས་བྱུང་བ་ཡིན། སྐབས་དེར་ངས་བོད་པའི་སློབ་ཕྲུག་ ༡༤ ཙམ་ལ་སྦྱིན་བདག་བྱས་པ་ཡིན། ༡༩༩༨ ལོར་ང་ཐེངས་མ་གཉིས་པ་ཡོང་སྐབས། ཨ་མ་ལགས་ལ་དྲན་རྟེན་གྱི་ཆེད་དུ་རྒས་གསོ་ཁང་འདི་བརྒྱབ་པ་ཡིན། སྔོན་མ་རྒས་གསོ་ཁང་འདིའི་ཚབ་ཏུ་བྱ་གསོ་ཁང་ཞིག་ཡོད་ས་རེད། ༧གོང་ས་མཆོག་ཐེངས་ཤིག་འདིར་ཕེབས་ཏེ། ཕར་ཕྱོགས་སུ་ཉ་མང་པོ་ཞིག་ཚེ་ཐར་ལ་བཏང་ཡོད་པ་རེད། འོན་ཀྱང་འདི་ཕྱོགས་སུ་བྱ་གསོ་ཁང་བཙུགས་ཏེ། སྡིག་ལས་བྱས་ན་ཡག་པོ་མི་འདུག་གསུངས་ཏེ། བྱ་གསོ་ཁང་དེ་སྒོ་བརྒྱབ་ཅིང་ཤུལ་དུ་རྒས་གསོ་ཁང་ཞིག་འཛུགས་རྒྱུའི་འཆར་གཞི་སྒྲིག་གཞིན་པའི་སྐབས་དང་འཁེལ་ཏེ། རྒས་གསོ་ཁང་འཛུགས་སྐྲུན་གྱི་སྦྱིན་བདག་ཆ་ཚང་ང་རང་གིས་འགན་ལེན་བྱས་པ་ཡིན།

དྲི་བ། རྒས་གསོ་ཁང་འདི་ཐོག་མར་འཛུགས་སྐྲུན་གྱི་མ་དངུལ་དང་། ད་ལྟ་མི་མཐུད་འཛིན་སྐྱོང་བྱེད་ཀྱིན་པའི་ལོ་རེའི་འགྲོ་སོང་གི་དངུལ་ཆ་ཚང་ཁྱེད་རང་སྒེར་ངོས་ནས་གཏོང་གི་ཡོད་དམ། ཡང་ན་ཁྱེད་རང་གིས་གཞན་ནས་རོགས་ཚོགས་འཚོལ་བཞིན་ཡོད། 

ལན། མགོ་མཇུག་བར་གསུམ་གྱི་འགྲོ་སོང་ཡོངས་རྫོགས་ང་རང་སྒེར་ངོས་ནས་གཏོང་གི་ཡོད། གྲོགས་མོ་རེ་ཟུང་གིས་ང་ལ་རོགས་པ་བྱ་དགོས་ཟེར་ནས་དངུལ་ཏོག་ཙམ་རེ་སྤྲད་སོང་། འོན་ཀྱང་ཁོང་ཚོ་ཡང་རྒྱུ་ཆེན་པོ་ཡོད་མཁན་དེ་འདྲ་མ་རེད། ལས་ཀ་བྱས་ཏེ་དཀའ་ལས་རྒྱག་མཁན་རེད། ༡༩༩༨ ལོར་རྒས་གསོ་ཁང་འདིའི་ཐོག་མའི་འཛུགས་སྐྲུན་ཐད་ཧིན་སྒོར་འབུམ་བཞི་བཅུ་ཞེ་ལྔ་ ༤༥༠༠༠༠༠ ཙམ་ཕྱིན་སོང་། དུས་དེ་ནས་བཟུང་ལོ་ལྟར་ཧིན་སྒོར་འབུམ་དྲུག་ ༦༠༠༠༠༠ རེ་འཆར་ཅན་གྱིས་གཏོང་གི་ཡོད། རོབ་རྩིས་བྱས་ན་རྒས་གསོ་ཁང་འདིའི་སྟེང་ལ་ད་བར་ཧིན་སྒོར་བྱེ་བ་གཅིག་དང་ས་ཡ་གཅིག་ ༡༡༠༠༠༠༠༠ ལྷག་བཏང་ཟིན། རྒས་གསོ་ཁང་འདི་ཡོངས་སུ་གྲུབ་སྟེ་དབུ་འབྱེད་མཛད་སྒོའི་སྟེང་༧གོང་ས་མཆོག་ཆིབས་སྒྱུར་བསྐྱངས་པ་རེད། སྐབས་དེར་ངས་ཁོང་ལ། སྦྱིར་ང་རང་རྒྱུ་ཆེན་པོ་ཡོད་མཁན་ཞིག་མིན་ལ། ཡོད་པ་དེ་ཡང་དཀའ་ལས་བརྒྱབ་སྟེ་བསོགས་པ་ཡིན་སྟབས། བེད་སྤྱོད་ཡག་པོ་ཞིག་གཏོང་ཐུབ་ན་བསམ་སྟེ། རྒས་གསོ་ཁང་འདིར་བདག་པོ་བརྒྱབ་པ་ཡིན། ཞེས་ཞུས་པ་ཡིན་ལ། དེའི་ཞོར་དུ་ང་ལ་བོད་པའི་མིང་ཞིག་གནང་རོགས་ཞུས་སྐབས། ༧གོང་ས་མཆོག་གིས་ང་ལ། བསྟན་འཛིན་ཚེ་ལྷ། ཞེས་བསྩལ་སོང་། ང་རང་དགའ་དྲགས་ཏེ་ཉིན་གང་བོར་ངུས་བསྡད་པ་ཡིན།

དྲི་བ། ཁྱེད་རང་བསྟན་འཛིན་དོན་གྲུབ་ལགས་དང་ཇི་ལྟར་གཉེན་སྒྲིག་བྱས་པ་ཡིན་ནམ།

ལན། ང་རང་རྒས་གསོ་ཁང་འདིིའི་སྦྱན་བདག་ཡིན་སྟབས། ང་འདིར་ཡོང་ཐེངས་རེར་བསྟན་འཛིན་དོན་འགྲུབ་ཀྱིས་སྣེ་ལེན་བྱེད་ཀྱི་ཡོད་པ་རེད་ལ། གཞན་ང་ལ་དོན་དག་ག་རེ་ཡོད་ཀྱང་ཁོང་གིས་རོགས་རམ་བྱེད་ཀྱི་ཡོད་པ་རེད།  ༢༠༠༣ ཁོ་རང་གི་ཨ་མ་ལགས་འདས་གྲོངས་སུ་ཕྱིན་སོང་། སྤྱིར་བོད་པ་ཚོས་རྒན་འཁོགས་ཚོར་བྱམས་སྐྱོང་བྱེད་སྟངས་དང་། ཕ་མ་འདས་གྲོངས་སུ་ཕྱིན་སྐབས་ཆོས་ཕྱོགས་ཀྱི་བྱེད་སྒོ་མང་པོ་ཞིག་སྒྲུབ་ཀྱི་ཡོད་པ་དེ་ཧ་ཅང་ཡག་པོ་ཞིག་ཏུ་མཐོང་སོང་། ལྷག་པར་དུ་བསྟན་འཛིན་དོན་གྲུབ་ལགས་ཀྱི་ཨ་མ་གྲོངས་སྐབས། ཁོ་རང་གིས་ལུས་ངག་ཡིད་གསུམ་གྱི་ཐོག་ནས་མྱ་ངན་དང་དགེ་སྦྱོར་མང་པོ་ཞིག་བྱས་པ་དེ་ལ་ང་རང་ཡིད་འགུལ་ཐེབས་སོང་། ང་རང་ལ་མཚོན་ན་ཡང་ཨ་མ་ལགས་གྲོངས་ཟིན་པ་རེད། ད་ཆར་ང་ལ་བཟའ་ཟླ་དང་ནང་མི་གཞན་ཡོད་པ་མ་རེད། ལོ་རྒན་འཁོགས་ཆགས་ཡོང་སྐབས་རྟེན་ས་ཁེན་ས་ཞིག་མེད་ན་ཡོང་གི་མ་རེད། བསྟན་འཛིན་དོན་གྲུབ་ཀྱི་གནས་སྟངས་ཀྱང་ང་དང་གཅིག་མཚུངས་རེད། དེར་བརྟེན། ངེད་གཉིས་ལོ་རྒན་འཁོགས་ཡིན་ཡང་ ༢༠༠༥ ལོར་གཉེན་སྒྲིག་བྱས་ཏེ་མཉམ་དུ་བསྡད་པ་ཡིན། ད་ལྟ་ཁོ་རང་ལོ་ ༥༨ དང་ང་ལོ་ ༧༤ ལ་བསླེབས་ཡོད། 

གསར་འགོད་པ། དོན་འགྲུབ་བཀྲ་ཤིས།