ཕྱི་ཚེས་ ༡༢ ཉིན་རྒྱ་ནག་ཀོང་ཞི་ཀྲུང་རིགས་རང་སྐྱོང་ལྗོངས་ཞིན་ཝེ་གྲོང་རྡལ་དུ་མང་ཚོགས་དང་དྲག་ཆས་ཉེན་རྟོག་པའི་བར་འཁྲུག་འཛིང་ཤོར་ཏེ་མི་མང་པོ་ཞིག་ལ་རྨས་སྐྱོན་ཚབས་ཆེན་ཕོག་ཡོད་འདུག
རྒྱ་གཞུང་གིས་ཞི་ཝེ་གྲོང་རྡལ་བརྒྱུད་མྱུར་བགྲོད་གཞུང་ལམ་བཟོ་བསྐྲུན་ཆེད། ལོ་འགའི་སྔོན་ནས་བཟུང་ལམ་རྒྱུད་དུ་ཁེལ་བའི་མང་ཚོགས་ཀྱི་ས་ཞིང་ཡོངས་ལ་རྒྱ་སྒོར་ཁྲི་ ༢༠༠༠ ལྷག་གི་ས་རིན་སྤྲོད་རྒྱུ་ཁས་ལེན་བྱས་ཏེ། མང་ཚོགས་ཀྱི་ལག་ནས་ས་ཞིང་གཞུང་ལ་བླངས་རྗེས་མང་ཚོགས་ལ་ས་རིན་གྱི་སྒོར་མོ་སྤྲད་མེད་པ་རེད། ཉིན་འགའི་སྔོན་ལ་གྲོང་སྡེ་དེའི་མང་ཚོགས་རེ་འགའ་ས་གནས་སྲིད་གཞུང་ལ་སོང་སྟེ་ས་རིན་སྤྲོད་དགོས་པའི་རེ་འདུན་ཞུས་སྐབས། ས་གནས་སྲིད་གཞུང་གིས་ཉེན་རྟོག་བཏང་སྟེ་ཁོ་ཚོ་འཇུ་བཟུང་བཀག་ཉར་བྱས་པར་བརྟེན། ས་གནས་མང་ཚོགས་ཐབས་ཟད་འུ་ཐུག་ཏུ་གྱུར་ཏེ། ཕྱི་ཚེས་ ༡༢ ཉིན་མང་ཚོགས་སྟོང་ཕྲག་ལྷག་མཉམ་འཛོམས་ཐོག་ས་གནས་སྲིད་གཞུང་གི་མཐའ་སྐོར་ཏེ་ངོ་རྒོལ་སྐད་འབོད་བྱས་ཡོད་འདུག སྐབས་དེར་སྲིད་གཞུང་གིས་དྲག་ཆས་དཔུང་དམག་བརྒྱ་ཕྲག་འགའ་འབོད་འགུག་གིས་མང་ཚོགས་ཐོག་དྲག་གནོན་བྱ་རྒྱུར་གྲ་སྒྲིག་བྱེད་སྐབས། ས་གནས་མང་ཚོགས་ཚོས་ཀྱང་མགོ་མ་སྒུར་བར་དྲག་ཆས་དཔུང་དམག་ཁ་གཏད་བཅག་སྟེ། ཕྱོགས་གཉིས་བར་འཁྲུག་འཛིང་ཤོར་ཏེ་ས་གནས་མང་ཚོགས་བཅུ་གྲངས་ཤིག་ལ་རྨས་སྐྱོན་ཚབས་ཆེན་ཕོག་ཡོད་འདུག
ཛ་དྲག་གི་གནས་ཚུལ་དེ་བྱུང་མ་ཐག་ས་གནས་སྲིད་གཞུང་གིས་ཡང་བསྐྱར་དམག་མི་དང་ཉེན་རྟོག་པ་མང་པོ་འཕར་སྣོན་བྱས་ཏེ། ས་གནས་སྲིད་གཞུང་གི་ཉེ་འཁོར་གཞུང་ལམ་ཁག་བཀག་སྡོམ་བྱས་ཡོད་པར་མ་ཟད། གནས་ཚུལ་རྒྱ་ཁྱབ་ཏུ་མི་འགྲོ་བའི་ཆེད་གསར་ལམ་དང་དྲ་ལམ་ཁག་ལའང་བཀག་སྡོམ་ནན་མོ་བྱས་ཡོད་འདུག
གསར་འགོད་པ། ཚེ་རིང་རྒྱལ།
ཞིང་པའི་ཟོར་བ་ཞིང་པའི་སྐེ་ལ་འཇོག བཟོ་བའི་ཐོ་བ་བཟོ་བའི་མགོ་བོར་འཕྱར།
འདི་ནི་ད་ལྟའི་ཏང་གི་དར་རྟགས་ཏེ། རང་སྲོག་རང་གིས་ལེན་པའི་སྔ་ལྟས་སོ།
ཆེ་ཆུང་གནས་ཚུལ་འདི་རིགས་མང་ན་ཡང། གསར་ལམ་དག་ཏུ་ཐོན་པ་ཧ་ཅང་ཉུང།
མེ་སྟག་ཆུང་ཡང་རི་བོ་བསྲེགས་པའི་དཔེའི། ངོ་མཚར་ལྟད་མོ་མི་རིང་མཐོང་བར་འགྱུར།
འདི་ནི་བཟང་ཕྱོགས་ཀྱི་སྔོན་བརྡ་སྟེ་རྒྱ་ནག་མི་མང་ལ་གོ་རྟོགས་ཅུང་ཙམ་སད་ཡོད་པ་མཚོན་ལ། མ་ཚད་མང་ཚོགས་ཀྱི་དཀའ་སྡུག་ཕྱི་ལོག་དུ་མངོན་ཡོང་བ་ནི་འགོག་མི་ཐུབ་པའི་རི་གཟར་གྱི་རྦབ་རྡ་ཡིན། རྒྱུད་རིམ་འདི་ལྟ་བུའི་ཁྲོད་ནས་ང་ཚོས་དཀའ་ངལ་སེལ་རྒྱུར་རེ་བ་ཆེན་པོ་ཡོད།