དབྱིན་ཇིའི་རྒྱལ་སྲས་གཉེན་སྒྲིག

དེ་རིང་ཕྱི་ཚེས་ ༢༩ ཉིན་གྱི་ཞོགས་པའི་དབྱིན་ཡུལ་གྱི་ཆུ་ཚོད་ ༡༠ སྐར་མ་བཅོ་ལྔའི་སྟེང་། དབྱིན་ཇའི་རྒྱལ་སྲས་ཝེལ་ལེམ་ (William ) ལགས་དང་། ལྕམ་སྐུ་ཀཱ་ཊེ་( Kate Middleton )ལགས་རྣམ་གཉིས་དབྱིན་ཇའི་རྒྱལ་ས་ལོན་ཌོན་གྱི་ཝེ་སི་ཝི་མེན་སིཏར་ (Westminster Abbey) ཞེས་པའི་ཡེ་ཤུ་ལྷ་ཁང་དུ་གཉེན་སྒྲིག་བྱས་ཡོད།

གཉེན་སྟོན་མཛད་སྒོ་དེའི་སྟེང་འཛམ་གླིང་ཡུལ་གྲུ་གང་ས་ནས་གནད་ཡོད་སྐུ་མགྲོན་ ༡༩༠༠ ལྷག་ཕེབས་ཡོད་པའི་ཁྲོད། ཨོ་སི་ཊི་ལི་ཡའི་སྲིད་བློན་དང་དབྱིན་ཇའི་སྲིད་བློན་སོགས་གཙོས་རྒྱལ་ཁབ་འདྲ་མིན་གྱི་མཐོ་རིམ་དཔོན་རིགས་ ༥༠ ཙམ་ཕེབས་ཡོད་མ་ཟད། འཛམ་གླིང་གི་རྒྱལ་བོའི་རིགས་རྒྱུད་ཀྱི་མི་སྣ་མང་པོ་ཞིག་ཀྱང་ཆེད་དུ་མགྲོན་འབོད་བྱས་ཡོད་འདུག

གཉེན་སྟོན་གྱི་ཉིན་འདིར་དབྱིན་ཇིའི་རྒྱལ་ས་ལོན་ཌོན་གྲོང་ཁྱེར་ནང་རྒྱལ་ཁབ་ཕྱི་ནང་གི་ལྟ་སྐོར་བ་དྲུག་འབུམ་ ༦༠༠༠༠༠ ལྷག་འདུ་འཛོམས་བྱུང་ཡོད་ཅིང་། ཕྱི་མི་མང་པོར་མགྲོན་ཁང་མ་རག་སྟབས་གྲོང་ཁྱེར་གྱི་སྲང་ལམ་ཀུན་དུ་གུར་བརྒྱབ་ཏེ་བསྡད་ཡོད་འདུག གཉེན་སྒྲིག་དངོས་གཞིའི་སྐབས་སུ་ལོན་ཌོན་གྲོང་ཁྱེར་ཡོངས་སུ་ལྟད་མོ་བས་ཁེངས་ཏེ། གཉེན་སྒྲིག་མཛད་སྒོ་བསྡུ་སའི་ལྷ་ཁང་དང་རྒྱལ་ཁང་ཕྱི་ནང་། དེ་བཞིན་གཞུང་ལམ་གང་སར་བརྙན་ལེན་དང་དཔར་ལེན་འཕྲུལ་ཆས་བཙུགས་ཏེ་ཐད་གཏོང་རྒྱང་སྲིང་བྱས་ཡོད། སྲང་ལམ་གཡས་གཡོན་དུ་སྤྲོ་སྐྱིད་ཁང་ ༥༠༠༠ ལྷག་གོ་སྒྲིག་བྱས་ཡོད་འདུག

དབྱིན་ཇིའི་རྒྱལ་སྲས་མཆོག་གི་གཉེན་སྒྲིག་མཛད་སྒོ་དེར་རྒྱལ་སྤྱིའི་གསར་འགྱུར་བརྒྱུད་ལམ་ཆེ་ཁག་ཚང་མས་གདེང་འཇོག་ཚད་མཐོན་པོ་བྱས་ཡོད་ཅིང་། ཉིན་འགའི་སྔོན་ནས་གསར་འགོད་པ་གསུམ་སྟོང་ལྷག་ལོན་ཌོན་ལ་འབྱོར་ཡོད་འདུག དབྱིན་ཡུལ་གྱི་བྷེ་བྷེ་སི་ BBC གསར་ཁང་དང་། ཨ་རིའི་སི་ཨན་ཨན་ CNN གསར་ཁང་སོགས་ཀྱིས་ཉིན་གང་བོར་ཐད་གཏོང་བྱས་ཏེ། འཛམ་གླིང་གི་མི་གྲངས་ཐེར་འབུམ་གཉིས་ ༢༠༠༠༠༠༠༠༠༠ ལྷག་གིས་བརྙན་འཕྲིན་བརྒྱུད་གཉེན་སྟོན་མཛད་སྒོར་གསན་གཟིགས་བྱས་ཡོད་འདུག

དབྱིན་ཇིའི་རྒྱལ་སྲས་ཝེལ་ལེམ་གྱི་བཟའ་ཟླ་ཀཱ་ཌེ་ནི་འབྱོར་ལྡན་ཁྱིམ་ཚང་ཞིག་ནས་ཡིན་པ་དང་། ཁོང་གཉིས་ལོ་ ༡༠ ཙམ་གྱི་ཡར་སྔོན་ནས་ཕན་ཚུན་བར་བརྩེ་བ་ཆགས་ཏེ་དགའ་རོགས་ཀྱི་འབྲེལ་བ་ཡོད་ཅིང་། མཚམས་རེ་རེར་ཁོང་གཉིས་བར་དགའ་བ་ཕྲན་བུ་རེ་བྱུང་སྟེ་དགའ་རོགས་ཀྱི་འབྲེལ་བ་བཅད་དེ། བློས་ཐུབ་ཀྱི་གྲོགས་པོ་བྱས་ཏེ་བསྡད་པའི་གནས་ཚུལ་ཡང་ཡོད་མོད། དུས་ཡུན་ཐུང་ངུའི་རྗེས་སུ་བསྐྱར་དུ་གྲོགས་པོའི་ས་མཚམས་ལས་བརྒལ་ཏེ། དགའ་རོགས་ཆགས་པ་སོགས་ཀྱི་གཏམ་རྒྱུད་སྙིང་རྗེ་བོ་རེ་ཡང་ཡོད།  

གསར་འགོད་པ། བནྡེ་སྐྱབས།