སྐད་ཡིག་སྲུང་སྐྱོབ་ཀྱི་བསམ་ཚུལ་ཕྱོགས་སྡོམ།

ཁ་སང་གཟའ་ཉི་མའི་ཉིན་གངས་སྐྱིད་དུ་བོད་སྐད་ཡིག་སྐོར་གྱི་བགྲོ་གླེང་ཚོགས་འདུ་ཞིག་ཚོགས་ཏེ། མ་འོངས་པར་ལག་ལེན་དངོས་ཀྱི་ཐོག་ནས་བོད་སྐད་ཡིག་སྲུང་སྐྱོབ་ཡོང་ཐབས་ཐད་བསམ་ཚུལ་ཕྱོགས་སྡོམ་གྱིས་རྒྱབ་སྐྱོར་མཚན་རྟགས་བཀོད་སོང་།

ཟླ་འདིའི་ཚེས་ ༡༧ ཉིན། གངས་སྐྱིད་དཔེ་མཛོད་ཚོགས་ཁང་གསར་བའི་ནང་བོད་ཀྱི་སྐད་ཡིག་རྒྱུན་འཛིན་ཚོགས་པའི་གོ་སྒྲིག་འོག  ༼བོད་ཀྱི་སྐད་ཡིག་གི་ད་ལྟའི་གནས་བབ་དང་འབྱུང་འགྱུར་གྱི་འཕེལ་ཕྱོགས་གླེང་བ༽ཞེས་པའི་བགྲོ་གླེང་ཚོགས་འདུ་ཞིག་ཚོགས་ཏེ། བཀའ་སྤྱི་གཉིས་ཀྱིས་བསྒྲུབས་ཟིན་པའི་སྐད་ཡིག་སྲུང་སྐྱོབ་སྐོར་གྱི་དགེ་སྐྱོན་དང་།  མ་འོངས་པར་བཀའ་སྤྱི་གཉིས་ཀྱིས་ངེས་པར་དུ་བསྒྲུབ་དགོས་པའི་སྐད་ཡིག་སྲུང་སྐྱོབ་ཀྱི་ཐབས་ལམ་དང་དེ་ལག་ལེན་བསྟར་ཕྱོགས་བཅས་བརྗོད་གཞི་གཉིས་ཐོག  སྔ་དྲོའི་ཆུ་ཚོད་ ༩ ནས་ཕྱི་དྲོའི་ཆུ་ཚོད་ ༤ པའི་བར་ཕན་ཚུན་བགྲོ་གླེང་དང་དྲི་བ་དྲིས་ལན་བཅས་གནང་སོང་། བགྲོ་གླེང་ཚོགས་འདུ་སྟེང་ས་རཱ་མཐོ་སློབ་ཀྱི་དགེ་རྒན་དང་སྤྱི་འཐུས་ཟུར་པ་ཆབ་བྲག་ལྷ་མོ་སྐྱབས་དང་། ནོར་གླིང་མཐོ་སློབ་ཀྱི་སློབ་སྤྱི་དང་སྤྱི་འཐུས་ལས་ཐོག་སྒྲོལ་དཀར་སྐྱབས། དཔེ་མཛོད་པར་སྐྲུན་སྡེ་ཚན་གྱི་རྩོམ་སྒྲིག་པ་ན་གཱ་སངས་རྒྱས་བསྟན་དར། ཨ་རིའི་ཨིན་ཌའི་ཡ་ན་མཐོ་སློབ་ཀྱི་དགེ་རྒན་དགེ་འདུན་རབ་གསལ།  དེ་བཞིན་དྷ་སའི་ཉེ་འདབས་ཁུལ་གྱི་སློབ་གྲྭ་དང་ཤེས་ཡོན་ཚོགས་སྡེ་ཁག་ཏུ་དགེ་རྒན་གྱི་ཕྱག་ལས་གནང་བཞིན་པའི་ཤེས་རབ་དར་རྒྱས་དང་། རེབ་མདོ་སེང་གེ་སོགས་གདན་ཞུས་བགྲོ་གླེང་པ་ ༡༥  དང་། ཟུར་ཞུགས་པ་བཅས་མི་གྲངས་ ༦༠ ཙམ་གྱིས་ཆུ་ཚོད་ ༨ ཙམ་གྱི་རིང་བགྲོ་གླེང་དང་གྲོས་བསྡུར་བསམ་ཚུལ་གནང་སོང་།

གསར་འགོད་པའི་བཅར་འདྲིའི་སྐབས། སྐད་ཡིག་རྒྱུན་འཛིན་ཚོགས་པའི་ཚོགས་གཙོ་འབྲོག་རུ་ཆོས་གྲགས་ལགས་ཀྱིས་ ༼ང་ཚོའི་གཞུང་གི་ཁྲིམས་དང་སྒྲིག་ཡིག་ནང་དུ་སྐད་ཡིག་སྲུང་སྐྱོབ་སྐོར་གྱི་ཡིག་ཆ་མང་པོ་ཞིག་ཡོད་པ་རེད་དེ། ལག་ལེན་གྱི་ཐོག་ནས་འཐུས་ཤོར་ཆེན་པོ་འགྲོ་བཞིན་ཡོད་སྟབས། མ་འོངས་པར་ལག་ལེན་འབབ་ཐུབ་རྒྱུར་ཐབས་ཤེས་གནང་དགོས་རྒྱུ་གལ་ཆེན་པོ་རེད། ༽ ཅེས་བརྗོད་དེ། བགྲོ་གླེང་གི་དམིགས་ཡུལ་གཙོ་བོ་ནི་སྐད་ཡིག་སྲུང་སྐྱོབ་ལས་དོན་དེ་ཁྲིམས་དང་སྒྲིག་གཞི་ཙམ་ཡིག་ཆ་ནང་འཁོད་རྒྱུ་ཁོ་ནས་ཙམ་མ་ཡིན་པར། དེ་དངོས་སུ་སྤྱི་ཚོགས་ཁྲོད་ལག་ལེན་ལ་འབེབས་རྒྱུ་གལ་ཆེན་པོ་ཡིན་སྟབས།  ད་ལྟའི་བར་བཙན་བྱོལ་སྤྱི་ཚོགས་ནང་ཤེས་ཡོན་སློབ་གསོ་རང་གི་སྟེང་ཕྱག་ལས་གནང་མྱོངས་མཁན་གྱི་ཤེས་ལྡན་པ་ཁག་ཅིག་གདན་ཞུ་གནང་སྟེ། སོ་སོའི་འདས་པའི་ཉམས་མྱོང་གཞི་ལ་བཞག་ཐོག་མ་འོངས་པར་བོད་རང་གི་སྐད་ཡིག་སྲུང་སྐྱོབ་སྐོར་ལ་ཁ་ཡོད་ལག་ཡོད་ཀྱིས་སྒྲུབ་ཐབས་ཅི་ཞིག་ཡོད་མེད་སྐོར་བསམ་ཚུལ་བསྡུ་རུབ་གནང་རྗེས། ཐེངས་འདིར་མཉམ་ཞུགས་གནང་མཁན་གྱི་བགྲོ་གླེང་པ་དང་ཟུར་ཞུགས་པ་ཡོངས་ཀྱི་རྒྱབ་གཉེར་མཚན་རྟགས་དང་བཅས།  འཆར་ཟླ་ ༨ པའི་ནང་བཀའ་སྤྱི་གཉིས་ལ་སྙན་ཞུར་འབུལ་རྒྱུ་དེ་ཡིན་སྐོར་གསལ་བཤད་གནང་སོང་།

བགྲོ་གླེང་སྐབས་སུ་བཙན་བྱོལ་གཞུང་གི་ངོས་ནས། མ་འོངས་པར་ཤེས་ཡོན་སློབ་སྟོན་ཚོགས་ཆུང་དང་། སློབ་དེབ་རྩོམ་སྒྲིག་ཚན་ཆུང་དང་། སློབ་གྲྭ་ཁག་གི་སློབ་སྤྱི་དང་དྲུང་ཆེ། དེ་བཞིན་ཤེས་ཡོན་འཛིན་སྐྱོང་སྡེ་ཁག་དག་གི་གནད་ཡོད་ལས་གནས་བཅས་ཀྱི་ཐོག  བོད་རང་གི་སྐད་ཡིག་ལ་མཁས་ཤིང་སློབ་གསོའི་ལས་དོན་ལ་ཉམས་མྱོང་དང་མཁྱེན་རྒྱ་ཡོད་མཁན་གྱི་རིགས་བསྐོ་འཇོག་དགོས་པ་དང་། གཞོན་སྐྱེས་ཚོར་བོད་སྐད་ཡིག་གི་གཞི་རྩ་འཇགས་ཐུབ་ཆེད། ཤེས་ཡོན་སྲིད་བྱུས་གསར་བ་དེ་དམའ་རིམ་ནས་མཐོ་རིམ་བར་མུ་མཐུད་ལག་བསྟར་ཐུབ་རྒྱུར་འབད་བརྩོན་བྱ་དགོས་སྐོར། དེ་བཞིན། སློབ་མའི་སེམས་ཁམས་དང་འཚམ་པའི་ཀློག་དེབ་སྣ་ཚོགས་དང་། འགུལ་རིས་བརྙན་ཕབ་སོགས་བསྒྱུར་སྐྲུན་དང་རྩོམ་སྒྲིག་གི་སྡེ་ཚན་ཞིག་གསར་དུ་འཛུགས་དགོས་པ་སོགས་ཀྱི་ཐད་གླེང་སློང་ཤུགས་ཆེན་པོ་གནང་སོང་ལ།  སྐབས་དེར། བོད་ཀྱི་དཔེ་མཛོད་ཁང་གི་ལོ་རྒྱུས་ཉམས་ཞིབ་པ་མགོ་ལོག་དམ་ཆོས་དཔལ་བཟང་ལགས་ཀྱིས་༼ དགེ་རྒན་གྱི་དཔུང་སྡེ་ཚད་ལྡན་ཞིག་མེད་ཚེ་ཇི་ལྟར་བྱས་ཀྱང་ཡོང་ཐབས་མེད་པ་ཞིག་རེད། དགེ་རྒན་གྱི་དཔུང་སྡེ་ཚད་ལྡན་ཞིག་ཡོང་བར་དགེ་རྒན་ལ་ལྟ་རྟོག་བྱེད་མཁན་གྱི་ཚོགས་སྡེ་ཞིག་གསར་འཛུགས་བྱ་དགོས༽ ཞེས་བརྗོད་སོང་།

གཞན་ཡང་། བོད་ཀྱིས་སྐད་ཡིག་རྒྱུན་འཛིན་ཚོགས་པའི་ངོས་ནས།  ལོ་སྔོན་མའི་ནང་བོད་གཞུང་གི་ལྷན་ཁང་བརྒྱད་དང་གཞུང་འབྲེལ་མ་ཡིན་པའི་ཚོགས་པ་ཁག་བཅས་ལ་སྙན་ཞུ་ཕུལ་ཏེ།  དུས་རྒྱུན་ཕྱག་ལས་ཁྲོད་བོད་ཡིག་བེད་སྤྱོད་ཀྱི་ཚད་ཇེ་མཐོར་གཏོང་ཐབས་ལ་སྒྲིག་གཞི་བཟོ་དགོས་པའི་རེ་སྐུལ་ཞུས་ཡོད་པ་དང་། དེ་བཞིན། བོད་གཞུང་གི་སྒྲིག་གཞིའི་འོག་ཡོད་པའི་རྒྱ་བལ་འབྲུག་གསུམ་གྱི་ལས་ཁུངས་མ་ལག་ཁག་ནང་། ལས་བྱེད་སྐོ་འཇོག་སྐབས་བོད་ཡིག་གི་ཤེས་ཚད་ཡག་པོ་ཡོད་མེད་ཐད་རྒྱུགས་ལེན་ཚད་གཞི་བཟོ་དགོས་པ་སོགས་ཀྱི་ཐད། མི་མང་ ༡༧༠༠ ཡི་མཚན་རྟགས་བཀོད་པའི་སྙན་ཞུ་ཞིག་ཕུལ་ཏེ། བོད་སྐད་ཡིག་བེད་སྤྱོད་ཀྱི་ཁོར་ཡུག་རྒྱ་བསྐྱེད་གཏོང་ཐབས་ལ་གྲོས་ཆོད་འཇོག་དགོས་པའི་སྙན་ཞུ་ཞིག་སྤྱི་འཐུས་རྒྱུན་ལས་ཕུལ་མྱོངས་ཡོད་འདུག  དེ་བཞིན། ཕྱི་ཟླ་ ༡༠ པའི་ནང་བོད་གཞུང་ཤེས་རིག་ལྷན་ཁང་ལའང་སྙན་ཞུ་ཞིག་ཕུལ་ཏེ།  སྐད་ཡིག་རྒྱུན་འཛིན་ཚོགས་པའི་ངོས་ནས་བཙན་བྱོལ་སྤྱི་ཚོགས་ཁྲོད་ཀྱི་ཚད་ལྡན་གྱི་ཤེས་ཡོན་པ་ཁག་ཅིག་སྒྲིག་འཛུགས་གནང་སྟེ།  བཙན་བྱོལ་སློབ་གྲྭ་ཁག་གི་སློབ་མའི་ནང་ལས་ལ་བསྐྱར་ཞིབ་དང་ཞི་དག་གི་ཐད། ཕྱོགས་རོགས་ལྟ་རྟོག་གི་སྐྱོར་བསྐྱོད་ལས་འགུལ་ཞིག་སྤེལ་འདུན་ཡོད་པས། དེའི་ཐད་ཤེས་རིག་ལས་ཁུངས་ནས་མཐུན་རྐྱེན་སྦྱོར་གནང་ཡོང་བའི་རེ་སྐུལ་སྙན་ཞུ་ཞིག་ཀྱང་ཕུལ་ཡོད་འདུག  ཡིན་ནའང་། ད་ལྟའི་ཆར་འབྲེལ་ཡོད་སྡེ་ཁག་ནས་བརྡ་ལན་ཅི་ཡང་སྤྲད་མེད་པ་རེད།

བོད་ཀྱི་སྐད་ཡིག་རྒྱུན་འཛིན་ཚོགས་པ་ནི་ཕྱི་ལོ་ ༢༠༠༥ ལོར་གསར་དུ་བཙུགས་ཤིང་། ཚོགས་པ་འདིར་ད་ལྟ་ཚོགས་མི་ ༡༠༠ ལྷག་ཡོད་འདུག 

གསར་འགོད་པ། ཚེ་རིང་རྒྱལ།