བོད་པའི་བུད་མེད་ཀྱིས་སྣེ་འཁྲིད་པའི་ཞི་བའི་གོམ་བགྲོད་ཆེན་མོ།

དེ་རིང་གཞུང་འབྲེལ་གདུང་སེམས་མཉམ་སྐྱེད་ལས་འགུལ་གྱི་ཉིན་གཉིས་པ་དེ་བོད་ཀྱི་བུད་མེད་ཀྱི་སྣེ་འཁྲིད་འོག་ལྡི་ལི་རཱམ་ལེ་ལཱ་མེལ་ཏཱན་ཐང་ཆེན་ནས་ཇཱན་ཏར་མན་ཏར་བར་ཞི་བའི་གོམ་བགྲོད་དང་མར་མེ་ཁྲོམ་སྐོར་གནང་ཡོད།

དེ་རིང་ཕྱི་ཚེས་ ༢༠ ཉིན་ཞོགས་པའི་ཆུ་ཚོད་ ༩ ། ༣༠ སྟེང་འཛིན་སྐྱོང་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ཐུན་མོང་ཐོག་རྒྱལ་ས་ལྡི་ལིར་གོ་སྒྲིག་གནང་བཞིན་པའི་གཞུང་འབྲེལ་གདུང་སེམས་མཉམ་སྐྱེད་ལས་འགུལ་དེ་རྒྱ་བལ་འབྲུག་གསུམ་ནས་ཆེད་དུ་ཕེབས་པའི་བུད་མེད་ཀྱི་སྣེ་འཁྲིད་འོག  སྤྱི་འཐུས་རྣམ་པ་དང་ས་གནས་འབྲེལ་ཡོད་ལས་བྱེད། སེར་སྐྱ་མི་མང་ ༣༠༠༠ ལྷག་འདུ་འཛོམས་ཀྱིས་ལྡི་ལི་རཱམ་ལེ་ལཱ་མེལ་ཏཱན་ཐང་ཆེན་ནས་ཇཱན་ཏར་མན་ཏར་བར་གོམ་བགྲོད་དང་སྐད་འབོད་ཁྲོམ་སྐོར་གནང་སོང་བར་མ་ཟད། ལས་འགུལ་ཐོག་ལྡི་ལི་ཧིན་བོད་མཛའ་འབྲེལ་ཚོགས་པའི་ཚོགས་མི་དང་བྷེ་རྗི་པེ་མངའ་སྡེའི་ཚོགས་གཙོ་སྐུ་ཞབས་མཱ་ཧེ་ཤི་ཅེ་ཌལ་མཆོག  རྒྱ་གར་རྒྱལ་ཡོངས་ཆེས་མཐོའི་ཁྲིམས་ཞིབ་ཁང་གི་ཁྲིམས་རྩོད་པ་སྐུ་ཞབས་རྗེ་བྷེ་ཤཱ་མཱ་མཆོག་བཅས་གཙོས། རྒྱ་གར་གྱི་གྲོས་ཚོགས་འཐུས་མི་དང་ཁྲིམས་རྩོད་པ། མཁས་དབང་། སྤྱི་ཚོགས་ཞབས་ཞུ་བ། ཆོས་ལུགས་ཀྱི་དབུ་ཁྲིད་བཅས་བོད་དོན་རྒྱབ་སྐྱོར་གནང་མཁན་གྱི་གནད་ཡོད་མི་སྣ་   ༡༧ ལྷག་མཉམ་ཞུགས་ཀྱིས་གཏམ་བཤད་གནང་སོང་ལ། དེར་ཡོད་མི་མང་གིས་བོད་ནང་རང་ལུས་མེར་བསྲེགས་བཏང་བའི་རྒྱལ་གཅེས་དཔའ་བོད་རྣམས་དང་ས་གནས་མི་མང་ལ་གདུང་སེམས་མཉམ་སྐྱེད་ཆེད་མཆོད་འབུལ་སྨོན་ལམ་དང་མར་མེ་ཁྲོམ་སྐོར་བཅས་གནང་སོང་། 
 

དེ་རིང་གི་ལས་འགུལ་དེ་བོད་ཀྱི་བུད་མེད་ཀྱི་སྣེ་འཁྲིད་པའི་ལས་འགུལ་ཞིག་ཆགས་ཡོད་སྟབས།  གསར་འགོད་པས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་སུ་དེ་རིང་གི་ལས་འགུལ་ཏེ་བུད་མེད་ཀྱིས་སྣེ་འཁྲིད་དགོས་དོན་དང་། ལས་འགུལ་ནང་བུད་མེད་ལྷན་ཚོགས་ཀྱི་ས་གནས་ཁག་ག་ཚོད་ཀྱི་ཚོགས་མི་ཞུགས་ཡོད་མེད་དྲིས་པར་ཁོང་གིས། “ ད་རེས་ཀྱི་ལས་འགུལ་དེ་བོད་ནང་གི་ཛ་དྲག་གི་གནས་སྟངས་ལ་གཞིགས་ཏེ་འཛིན་སྐྱོང་བཀའ་ཤག་དང་སྤྱི་འཐུས་ལྷན་ཚོགས་མཉམ་རུབ་ཐོག་ལས་འགུལ་སྤེལ་གྱིན་ཡོད་པ་ལྟར། དེ་རིང་བུད་མེད་ཀྱི་སྣེ་འཁྲིད་དེ་ལས་འགུལ་སྤེལ་གྱི་ཡོད། ང་ཚོའི་དམིགས་ཡུལ་གཙོ་བོ། ད་ལྟའི་བར་རྒྱ་ནག་གཞུང་གིས་དྲག་གནོན་འོག་བོད་ནང་བོད་མི་དགུ་ཡིས་རང་ལུས་མེར་བསྲེགས་བཏང་ཡོད་པའི་གནས་སྟངས་དེ་རྒྱལ་སྤྱིའི་སྤྱི་ཚོགས་ཀྱི་མཁྱེན་རྟོགས་ཡོང་ཆེད་དང་། རྒྱ་ནག་གཞུང་ངོས་ནས་བོད་ནང་གི་དངོས་ཡོད་སྟངས་ལ་ཉམས་ཞིབ་ཀྱིས་མགྱོགས་མྱུར་དྲག་གནོན་མཚམས་འཇོག་བྱ་རྒྱུ་དང་འབྲེལ་མོལ་གྱི་ལམ་ནས་བོད་དོན་ཐག་གཅོད་ཡོང་བའི་རེ་སྐུལ་བྱ་ཆེད་ཡིན། ང་ཚོ་བུད་མེད་ཚོ་ཡང་བོད་མི་རིགས་དང་བོད་རྒྱལ་ཁབ་ཀྱི་ཁོངས་སུ་གཏོགས་པའི་འབངས་མི་ཞིག་ཆགས་ཡོད་སྟབས། སྲིད་བྱུས་གང་འདྲ་བཟུང་མིན་ལ་མ་ལྟོས་པར་ད་ལྟའི་བོད་ནང་གི་ཛ་དྲག་གི་གནས་སྟངས་འདིར་གཟིགས་ཏེ། བུད་མེད་ལྷན་ཚོགས་ཀྱིས་ས་གནས་ ༣༡ ལྷག་གི་མི་སྣ་མཉམ་ཞུགས་གནང་ཡོད། དེ་ཡང་གཙོ་བོ་བོད་ཀྱི་འཐབ་རྩོད་དེ་སེར་མོ་བ་དང་སྐྱེས་པ་ཚོ་ཁོ་ནའི་ལས་འགུལ་ཞིག་མ་ཡིན་པར། ང་ཚོའི་འཐབ་རྩོད་དེ་སེར་སྐྱ་དབྱེར་མེད་དང་ཕོ་མོ་དབྱེར་མེད་ཀྱི་འཐབ་རྩོད་ཅིག་ཡིན་པའི་རྣམ་པ་སྟོན་ཆེད་བུད་མེད་ཀྱི་སྣེ་ཁྲིད་དེ་ལས་འགུལ་སྤེལ་བ་རེད།  “ ཅེས་བརྗོད་བྱུང་།

ཡང་ཁོང་གིས། “ང་ཚོའི་བུད་མེད་ཚོའི་ངོས་ནས་ཀྱང་རེ་བ་གཙོ་བོ། ང་ཚོའི་ངོས་ནས་དེ་རིང་གི་ལས་འགུལ་སྣེ་འཁྲིད་དེ་རྒྱལ་སྤྱིའི་སྤྱི་ཚོགས་ལ་བོད་ནང་གི་གནས་སྟངས་ལ་བཟང་ཕྱོགས་ཀྱི་འགྱུར་བ་ཡོང་རྒྱུའི་འབོད་སྐུལ་ཞུ་བཞིན་ཡོད། ༸གོང་ས་མཆོག་གིས་ད་ལྟའི་བར་འཛམ་གླིང་ཞི་བདེ་དང་བོད་དོན་བདེན་མཐའ་སེལ་བའི་བཀའ་སློབ་རིམ་པ་བསྩལ་ཡོད་པ་ལྟར། འཛམ་གླིང་གི་དབུ་ཁྲིད་དང་མི་མང་གི་ངོས་ནས་ཀྱང་མ་འོངས་པར་འཛམ་གླིང་ནང་ཞི་བདེ་ཡོང་ཆེད།  རྒྱ་ནག་གཞུང་གིས་བོད་ནང་གི་ཆོས་དང་རིག་གཞུང་། ཁོར་ཡུག་བཅས་གཏོར་བཅོམ་གཏོང་བཞིན་པའི་ཐད་ལ་འབོད་སྐུལ་དང་གནོན་ཤུགས་སྤྲོད་དགོས་པ་རེད་ལ། རང་ལུས་མེར་བསྲེགས་བཏང་བའི་བོད་མི་ཚོས་རེ་འདོད་ལྟར་༸གོང་ས་མཆོག་བོད་ནང་ཕེབས་ཐབས་སུ་རྒྱབ་སྐྱོར་དང་འབོད་སྐུལ་དགོས་པ་རེད། “ ཅེས་བརྗོད་བྱུང་།

ལྡི་ལི་ནས་གསར་འགོད་པ་དོན་གོ